VIETNAM 2011

Gfährlech, spannend, luschtig, erstuunlech & Roller Roller Roller Roller Roller.

Das isch Hanoi, Houptstadt vo Vietnam.

Dr erscht u dr letscht Idruck vo derä Stadt isch luuuut. Im ganzä si mir 8 Tag ir Stadt gsi.

Z einzige wo dert greglet u organisiert isch isch, dases keni Reglä git u nüt würcklech klar isch...

Wichtigschti Info:

Bim überquere vor Strass giut: Lengsemer isch immer besser! Aghornet wirdmä  einewäg vo auem wo dert i dene zum Teu sehr ängä Strassä fahrt.

Immerhin chame i dere Stadt geziehlt u greglet ichoufä. Mä mues nume wüsse a welere Strass dasme was bechunnt. A eirä Strass gits zum Bischpiu nume Wiehnachtsdeko. A eirä numä Süessigkeitä, numä Schuä, numä Plüschtierli, numä Chuchiartiku, a eirä numä Büroartiku, a eirä numä Sidäprodukt, nume Houz etc.

 Viufach wärdä d Sache o uf dä Roller oder uf dä Velo transportiert und verchouft.

3 Tag si mir id Halong Bucht. Ei Wäg Hanoi - Halong Bucht isch imene chlinä Bus ca 4 Std. gangä. So raasend schnäu wi üse Fahrer anegfahre isch, umso langsamer simer miteme angerä Fahrer zruggtückerlet.. Fakt isch, d Vietnamesä hei ihres eigete Verkehrssyschtem.. nämlech garkes. Ussert, dass dr grösser immer Vortritt het, aui huupä u überhout wird was z Züg härehäbt.

D Halong Bucht (Vinh Ha Long) isch es ca 1500 Quadratkm grosses Gebiet im sogenanntä Golf von Tokin, im Nordä Vietnams. I däm Gebiet hets ca. 1970 Chauchfeusä wo zum Wasser useluegä wo zum teu bis zu 100 Meter höch si. S het viu chlini Insäli wo nume sehr wenigi drvo bewohnt si.

Ds Chauchsteiplateau uf däm wo d Bucht steit, isch langsam am versinkä. Sit 1994 isch d Bucht vor UNESCO zum Wäutnaturerbe ernannt wordä.

Dr Namä Vinh Ha Long bedütet: "Bucht des untertauchenden Drachen".

D Legändä seit, d Bucht isch düre Drachä entstandä wo ide Bärgä ir Nöchi vom Meer het gläbt. Viu gloube dr Drachä het ufem Wäg zur Küschtä mit sim Schwanz Furchä ids Land zogä und het mitem itouche is Meer aues gfluetet. Angeri sägä, wo d Chinesä d Vietnamesä agriffe hei im Chrieg, hei si am Drachä grüeft, wo dr Bitz Land mit sim Schwanz i 1000endi Bitzä verschlage het. Somit hei d Chinesä dr Wäg nümme gfungä zum agrifä.

Mit jehnschtä Schiff, chli u gross si mir umekutschiert wordä. Höhli aluege, Kajaknä, fischä, schlaafä ufem Schiff, Velo fahrä uf Cat Ba u schlaafä ufere mini Inslä wosi am 23.30 stinkfräch ds Stromagregat abgsteut hei.. Mä cha o im Dunklä no Bier trinkä..

In etwa settigs trifft me a, wemä mit offnä Ougä dür d Strassä louft. Eifach mau Zitig läsä ufem Trottoir, Haar schnidä vorussä, chli Brätspiu machä näbem Tämpu, chochä etc..

U geng ufpassä dasme nid überfahrä wird..!

Heike aus "Tschöörmeni" (Deutschland) macht ds super mitem Fotoaparat vorem Tämpu..

Hübsch..

Ds Wätter über Wiehnachte z Vietnam leider nidso super. 

Z nägste schöne Wätter isch in Laos.. 

Ab is Reisebüro u Flugbuechä.