KAMBODSCHA 2012
Mitem Bus hei mir Laos verlah u si über d Gränzä nach Kambodscha. Tinu het ufeme Zwüschestop mau nachegfoorschet, warum mir meistens mit Schritttämpo u zimlech Schlanggelinig gfahre si.. Kes Wunder, odr?
Irgendwenn si mir in Phnom Penh, dr Houptstadt vo Kambodscha acho. Das isch üse Dreh- und Angelpunkt gsi.
O hie isch dr Verchehr kunterbunt. Vorauem was Transport ageit..
Di "Roten Khmer" isch e Guerillabewegig gsi, wo 1975 z Kambodscha a d Macht isch cho. Dr Namä hetsech vom kambodschanische Sttaatsvouk dä "Khmer" abgeleitet.
Ä spetere Füherer vo de Rotä Khmer isch dr Pol Pot gsi.
Dr Pol Pot het us Kambodscha weue es Arbeitervouk machä.
Ds Tuol-Sleng-Genozid-Museum isch ds ehemalige "S-21" Gfängnis vo de "Roten Khmer". I dene Gebäude isch früecher e Schueu gsi. Gymnasium Tuol Svay Prey bevor dases vo de Rote Khmer nach dr Eroberig vo Phnom Penh aus Gfängnis mit sytematischer Fouterig vo de Insasse brucht isch wordä. Si hei aui Geböide mit Stachudraht izunet u dä unger Strom gsezt. D Klasserüüm heisi zu Gfängniszäue u Fouterchammere umbout. Zwüsche 1975 u 1979 si zwüschä 14.000 u 20.000 Mönsche us ganz Kambodscha dert inhaftiert wordä. Unger anderem eigeti Mitglider vo de Rote Khmer, wo i de Ouge vor Füehrig aus Verräter guutä hei.
Dr Houptteu vo dä ermordetä si aber Ärzt, Awäut, Richter, Lehrer oder eifach nume Brüuetreger gsi.
Ds bekanntischte "Killing Field" wo mir si ga luege befindet sich in Choeung Ek, ir Nechi vo Phnom Penh. Dert si bis zu 17.000 Mönschä umbracht wordä. Me gseht dert ufbewahrti Toteschädu, Chnochä, Zähn oder Chleider wo aube die eis füre chömä nachemä Rägä.
Damit si hei chönne Muniton sparä, heisi d Lüt mit Isestange, Axtä etc. umbracht.
D Chinder / Babys heisi gäge Böim gschlagä. Di Totä heisi ufem Gländ i jehnschti Massegreber sortiert u begrabä.
Es isch eigentlech chuum vorsteubar, dass das ganze ersch vor ca. 30 Jahr stattgfunde het.
Zum Teu si d Verfahre gäge ehemaligi Afüehrer vom Gfängnis ersch im 2009 eröffnet worde. Im 2010 isch dr verantwortlech Gfängnisleiter Kaing Guek Eav, alias "Duch" verurteilt wordä.
Mitem Bus si mir vo Phnom Phen nach Sihanoukville.
I dene paar Täg, wo mir ds Sihanoukville si gsi, si mir mitem Schiff uf d Insle Koh Rong übere. Koh Rong isch di zwöitgröschti Inslä vo Kambodscha u liit am Gouf vo Thailand.
Vo Sihanoukville si mir mitem Bus widr zrugg nach Phnom Penh u vo dert us nach Siam Reap.
Dert hei mir innert 3 Tag di ganzi Gägend bsuecht mitem Tuk Tuk. Mit drbi bi fasch usnahmslos jedere Tämpualag d Verchöiferinne, Verchöifer vo jehnschtä Sache wi: Bändeli, Poschtchartä, Chleider, Haustüecher, Flötä, Büecher, Ässä u Trinkä, Musiginstrumänt etc. O d "Minä-Band" het per Turischteawäseheit agfange spilä. Guet u schön. Aber wesi eim dr ganz Tag verfouge u kes nei chöi akzeptiere isches sehr asträngend!
Angkor Wat:
Dr vo ca. 889-910 regierend Yasovarman I het viu Stouseeä u Bewässerigsalage erbout. Das het drzue gfüert, dass d Iwohner mehrmaus im Jahr e gueti Riisärtnä hei gha. Das widerum het am Land groossä Richtum erbracht. Kambodscha hetsäch so zumne regionale Machtzäntrum entwicklet im Südä Chinas. Das het de Khmers erloubt Grossstedt u Tämpualaagä z errichtä.
Dr nächscht König Suryavarman II het vo 1113 bis 1150 d Regierig vo Angkor übernoh. Är het mehreri Kriegszüg gäge di agränzende Regione gfüert u somit d Macht über Angkor witter usbout.
Angkor Wat isch nume e chliine Teu vor gsammte Angkor "Alag".
Immerno isch ungklar wär, wenn, wo was genau bout het.
Bayon
Ta Prohm
Preah Khan
Banteay Kdei
Ta Som
Pre Rup
Kbal Spean
Banteay Srey
Ta Keo
Aui Boutä hei sichtlechi Schäde uf Grund Witterigsiflüss, tropischer Vegetation und Mönschlecher Gwaut bide Plünderige vodä Siamesä im 15 Jahrhundert, etc. Verschideni Länder u Organisatione si dranne z restauriere u somit dr Zerfau z stoppä.
Busfahrä in Kambodscha isch e ganzheitlechi witteri Erfahrig. Es schlaaht eim ufs Oug bi dene Vorhäng u däm Klimbim im Bus. Es schlaaht eim fürchterlech uf d Ohrä we 8 oder meh Stund pouselos Kambodschanischi auti Lieder im Karaoke-Stiu loufe u ghoornet wird wie verruckt. U es schlaaht eim ufe Mage we si wäge de Strasseverhäutnis no kurviger fahre.
Gchocheti Schiudkrot schiint sehr beliebt z si, wi o Hüehnereier mit Fleischigem Inhaut..
