FRANZÖSISCH POLYNESIEN 2012

Tahiti

IO RANA

Französisch Polynesie, ursprünglech Französich Ozeanie isch e Teil vo französischem Überseegebiet in Polynesiä. Klartext, es ghört de Franzosä.

Französich Polynesie besteit us insgesammt 118 Inslä u Atoll, die si i 5 Meergägende iteut.

Gseuschaftsinslä: 13 Inslä, 1.647 Quadratkm, 214.445 Iwohner

Tuamotu-Archipel: 76 Atoll, 850 Quadratkm, 18000 Iwohner

Marquesasinslä: 12 Inslä, 1.274 Quadratkm, 8.632 Iwohner

Austral-Inslä: 6 Inslä, 148 Quadratkm, 6.669 Iwohner

Gambierinslä: 26 Inslä, 31 Quadratkm, 986 Iwohner

Mir si nacheme länge Flug zmitz ir Nacht uf dr Houptinlsä Tahiti acho.

Dert hei mir ire Lodge di erschte 2 Nächt verbracht u hei scho uf üsi nägschti Inslä übere gseh.

Uf Moorea het üsi Rundreis, uf de Gseuschaftsinslä, agfangä.

Tahiti ufem Wäg nach Moorea

Moorea

Moorea isch d Schwöschterinslä vo Tahiti u mit ca 17km Distanz i Sichtwiti.

Ufem Campingplatz imene chliine Chämmerli hei mir di erschti Wuche ghuset. D Wänd nid dicker as d Rückwand vomene Billy-Ikea-Regau. :)

Dr Strand isch in Sichtwitti u nume paar Meter entfernt gsi.

Spontans Privatkonzärt vo Iheimische am Strand inklusive, bis d Sunne ache geit

Herrläch!!

Um di ganzi Inslä z erkundä (ca. 60Km) hei mir e Roller gmietet.

Mir si zum Ussichtspunkt ufegschnaaget und hei d Stränd bsuchet. Per Zuefau heisi amene Strand no gad Musikfestival gha wome us Frou het chönne mittanzä.

Das ganze isch am Temea-Beach im Gang gsi. Aber meh fasziniert si mir aber abem Strand gsi. Quasi e riisige Swimming-Pool! Sand, klars Wasser, Paume... Das isch eine vo de wenige öffentleche Stränd in Moorea, wiu di schöne ghöre nämlech immer a de Hotel oder si süsch i privatem Besitz!

D Ussicht ufe Temea-Beach vo obä. Im Hingergrund Tahiti

D Hibiskus-Blueme het üs über aui 4 Insle i aune Farbe begleitet...

Sehr grosses u ungwohnts Gäud die zentrau pazifische Franc (XPF).

Ichoufe uf Moorea isch ou immer es Erläbnis gsi! Mir si üs vorcho wi Dahei vor dr Chüeutruhe wode nid hesch gwüsst was das de Hüt wotsch ufdoue. Dr Chüeuschrank ufem Camping isch ou nid grad sehr weschtlech gsi...

Spaziergang entlang vom Ufer

Ab uf z Pedalo..

Mitemene Päärli us Frankriich si mir de id Lagune use zure Sandbank. Dört isch ds Wasser ca. 1,5 Meter töif gsi u mir hei mit Roche u Heie chönne schnorchle. Isch schono spezieu gsi, dene Heie i d Ouge ds luege. Die Art Heie (Black-Tip-Shark /Schwarzspitzenhai) giut aber aus nid gfährlech. Es git wäutwit sehr wenigi Fäu wo so eine Mönsche agriffe het.

Herrlechi Ungerwasserwäut im krischtauklare Wasser... Unger angerem luschtegi Fische wome fasch nid gseht u Wasserschlange wome nid umbedingt id Nechi sött.

...ohne Worte...

Nach 5 Nächt uf Moorea hei mir leider üses Züg wider packt u si a muntzig "Flughafe" Richtig Huahine.

Huahine

Landeaflug u "Flughafe" ds Huahine. Usstige wie a jedem Flughafe z Polynesie uf dr Flug u Landebahn. Uf ds Gepäck wartetme ir Regu nume wenigi Minute.

Mir si de am Flughafe abghout u nach Fare schoffiert worde. Ds isch dr Houptort vo Huahine. Nid wiit näbedra hets sogar e Super-U gha. E riise Ichoufslade mit huufe Züg, wie ds Frankriich! Mir hättes nümm erwartet.

Das isch für 6 Nächt üses Dahei gsi. Super Zimmer, super Ussicht vor Terasse, super Chuchi u super viu Fründe vor Marina!

Das het üs vorem Gartetor erwartet. Chinder wo bade, Fischer, Strand u super Plätz zum schnorchlä.

Ir Pension hei mir 2 Mitbewohner gha. Gäbigerwiiss heimer nie meh as 2 gha u somit hei mir di ganzi Pension quasi für üs allei gha. Mit ihne hei mir de früsche Tuna-Fisch kochet. 3,8kg für ca. 20.-! Es het de emu guet für 2 mau Znachtässe glängt. Yummi!

Aliferig vo nöier Ware mitem chline Frachtschiff. I dere Wuche si im gsammte 3 acho u no 1 Passagierschiff.

Zitvertrieb in Huahine

D Ungerwasserwäut in Huahine. Klein aber fein.

1,2 Müscheli suechä

Egouette, Röhrefisch oder wie ou immer die heisse. Unger Wasser gseh si auso chli eleganter us aus ufem trochne. Dr Teil zwüsche Chopf u Schwanz sig sehr fein zum ässe. Guet. Het üs itz ehner nid gluschtet!

Wi geng hei mir aues wöue gseh u si mitem Roller gstartet. 60Km um di ganzi Inslä.

Bir Vanille-Farm si mir grad ere Familie agschlosse worde u hei e Gratis-Füehrig übercho. Üs isch d Apflanzig u Härstellig vo Vanille erklärt worde. Es geit auso 3 Jahr bis e Pflanze z erschte mau cha Schote mache, witteri 9 Monet bisme e Vanilleschote cha ärntä. Nach 3,5 Monet sisi de parat zur Verarbeitig. Si mache am meischte Vanille-Bourbon drus. Pro Jahr produziere si ca 900-1000Kg Vanille. Zum Schluss hei mir de no Vanille-Kafi, Bananebrot, früschi Frücht mit Kokosraschple u Vanille chönne deguschtiere.

Mitemene chliine Böötli simer zure Perle-Farm gfahre worde. Dört isch üs d Produktion vo dene tüüre Perle erklärt worde.

D Muschle wärde im Meer i 5 Meter tiefi glageret damit dr Temperaturungerschied nid z fescht isch. Dene Muschle wird e Startperle Injektiert. D Startperle isch us Muschle usem Amazonas u mues i weniger aus 1 Minute platziert si. Aschliessend chöme si widr zrugg is Meer u d Muschle umhüut d Perle. Es git schlussändlech 3 Arte vo Perle. Di erschti wo viufarbig, rund und wärtvou isch, eini wo weniger farbig, chli griuet u "bezaubare" Wärt het u di absolut misglückti Abfauperle-Muschle wo d Perle abstoost.

Obwohu die dört zimlech günschtig verchouft worde si, si si geng no ds tüür gsi für üses Büdsche. Je nach Qualität zahut me ds Öiropa schnäu mau 3-4 mau so viu, wie hie ds Polynesie. Es hätsech auso glohnt wemer zuegschllage hätte ;)

Ds Sofitel-Hotel ds Huahine isch sit paarne Jahr zue. Anstatt e nöie Bsitzer z sueche oder aues abzriise lösis eifach la stah, wi a so viune Orte in Polynesie.

Dr Strand isch sehr schön u ds Schnorchugebiet vor dra isch ou nid schlächt gsi...

Ungerwägs mitem Roller uf de Strasse ds Huahine

Ungerwägs..

Frangipani

Heiva i Huahine:

Sit genau 130 Jahr fiire di Lokale Lüt Heiva. Während em Heiva wird di polynesischi Kultur z grächtem zelebriert. Es isch e Zit wo sich Tanzgruppe, Chör, Kanugruppe, Spehrwärfer, Steitreger, Früchtetreger, Kokosnüss-Brächer u Handwärcher im Wettbewärb stöh.

Mir hei ds Fare a 3 Äbe d Müglechkeit gha ds Träning vor dorfeigene Tanz- u Musiggruppe ds gseh. Am Wucheänd hei si de ihre Uftritt gha wosi am Dorf zeigt hei mit was fürere Show si am Wettkampf aträtte. Mir hei natürlech "üsi" Gruppe müesse ga luege. 5.- Iitritt für ne Show wie me se nume ds Polynesie cha erläbe. Eröffnet het das ganze dr Chor vomne angere Dorf.

Aschlissend si Froue u Männer getrennt u zum Schluss zämä ufträtte.

Zude Wettbewärbsbedingige hei unger angerem 3 verschideni Kostüm für Maa u Frou ghört.

Fasch di ganze Kostüm si rein us Natürleche Materialie gsi.

Paumebletter, Bananebletter, Blueme, Chrüter, Stroh, Muschle etc.

Eini vo de beschte Musiggruppe womer jeh hei ghört.

Mir hei, wi scho Moorea, Huahine mit schöne Fotos, Videos u Erinnerige verlah u si mitem Flugzüg witters nach Bora Bora gfloge.

Bora Bora

Aflug uf "die Insel der Träume"

Ou hie isch dr Flughafe meh e Flugplatz. Dä ligt ufemene Motu, e Lagune-Insle rund um d Houptinsle. Zum uf d Houptinsle ds cho gits e Shuttle-Service mitem Schiff nach Vaitape. Ds isch dr Houptort vo Bora Bora u dört si mir vor Tina abghout worde.

Mir si die einzige gsi uf däm Flug wo mitemene grosse Rucksack acho si. Aui angere si "riicheri" Resort-Gescht gsi wo äuä meh oder weniger ihri Flitterwuche dört verbringe u eim dr Klimbing-glitzer-Ring nume so entgäge gstreckt hei. Tja, da heisi d Rächnig ohni üsi kreativi Adere gmacht..

Nam idunkle si mir de ändlech am Matira Point, üsem nöie Dahei acho.

Es Foto bir Akunft vo üsesm Baukon u eis am angere, erste Morge.

In und um üses Zimmer.

Es schiggs Brünneli, d Ussicht vo üsere Terasse, d Chuchi, paar Chrebsli etc.

Nach dr erschte Nacht hei mir de dür grosse Zuefau ds Päärli us Frankriich, wo mir ds Moorea hei lehre kenne, wider troffe. David u Michou hei de e Lagune-Tuur miteme Iiheimische organisiert u üs mitgno.

Dr To`ofa isch üse Schooför gsi vo däm mehbessere Nussschäli. Sini Frou, d Calista isch spontan mitcho uf dä Tagesusflug.

Nachdäm To'ofa Kokosnüss u Paumebletter isch go pflücke het de d Calista innert chürzischter Zyt us Paumebletter für aui vieri e polynesische Huet gflochte.

Dr erscht Stopp isch i 1,5 bis 2 Meter töifem Wasser gsi. Dört hei mir de d Glägeheit gha zum ga Schnorchle. Rund um üs si unzählegi, bunti Fischli, Roche u Heie gsi. Ds isch sehr iidrücklech gsi umgäh ds si vo 40-50 Heie. Näbscht däm hets no jehnschti Seeigle, Muschle u Koraue gha. Für üs dr bescht Ort zum Schnorchle uf üsere ganze Reis!

Nachem schnorchle hets de zur Erfrüschig e früschi Kokosnuss gä.

Mitem Nussschäli si mir de mau ono a üsem Dahei verbi tukerlet.

Ds Zmittag hei mir ufemene Motu gha, u dr To`ofa het üs erklärt wie dass me sones Dach macht. Uf de Motu wärde d Bletter gsammlet wiusi nume dert wachse. Näre wärde si 1/2 Tag i Wasser igleit u aschlissend glettet. Mit Houzchneblä wärde di Bletter verflochte. Lut To'ofa wärde numeno z Bora Bora d Decher so Handgmacht wiusi uf de angere Inslä nümme wüsse, wis geit ohni maschinelli Hiuf. Ca au 5-8 Jahr wärde d Decher erneueret. Si si offesichtlech sehr stouz uf di erhauteni Tradition.

Nach laaaaaaangem hei mir wider mau Büchse-Ravioli gha...

Sprich es si eifach di erschte Ravioli gsi womer jemaus uf dere Reis atroffe hei!

A Marina`s Geburtstag hets Lachs zum Zmorge gä. Es Bitzeli Luxus mues scho si!

Mir hei gfunde mir weuge zur Fiir vom Tag is Dorf füre. Ohni Velo, Roller, Outo oder ÖV (mir wüsse gengno nid obs e ÖV Bus git odr nid) isch ds garnid so eifach. Di ca 7Km si mir scho mau glüffe, ds Taxi isch viu z tüür u uf au das heimer gärn chönne verzichte! Mir hei darum widr einisch meh Outostop gmacht u mir hei Glück gha. Es het zwar no Sitzbänk i däm Mercedes-Bus inne gha, jedoch si die nümm würcklech agmacht gsi.. Ufem Schämeli mitfahre isch äue no fasch di sicherschti Option gsi i däm rollende Chaschtä. Gurte si garnid ersch erwähnenswärt. Mir si ca mit 20kmh im 5 Gang is Dorf füre grout. Fahrzit: 20Minute. Augemein söttemer vilich mau erwähne das d Outo uf dene Insle nüt mit Paradies u Luxus z tüe hei. Mir frage üs immerno wie dr Fahrer vom Twingo, wo üs paar Tag vorhär mitgno het, weiss wi schnäu daser fahrt, wenn dass er muess ga tanke u wenn daser abem Gas mues das ds Outo säuber brämset..

Zum Znacht simer i ds Bloody Mary`s ga ässe. Eis vo de beschte Reschtaurants ds Bora, wo ou bi Promis beliebt isch. Paris Hilton, David Copperfield, Pierce Brosnan, Cameron Diaz, Drew Barrymore si nur es paari wo uf dr Lischte stöh. ... u natürlech MIR!!!

Am Buffet heimer üsi Bsteuig ufgä.

- Spiess mit Rindfleisch

- Spiess mit Fisch

- Schwärtfisch

- Mahi Mahi Fisch

Mahi Mahi isch e Goldmakrelä und im ganze Pazifik e Spezialität.