AUSTRALIEN OST

Nach Sydney si mir id Blue Mountains.

D Bletter vode Eukaliptusböim verdunschte es Ätherisches Öu, e fiine Näbu lit somit über de Bärge u mitem Tagsliecht schiints blau.

Mit drbi egau wo, d Asiatä..

Per Zuefau isch uf üsem userläsene Camping am Fluss es Rennwucheänd im Gang gsi.

Ski racing. Mit schnäue Boot (gö bis zu 160kmh).

Mir si somit am Samschtig abä no feiechli ungerhautä wordä mit denä abartig schnäue Boot wo dämentsprächend Lärm machä..

u am Sunntig Morgä o.. ab de 7.30..!!!

Aber haub so schlimm. Die wo aui scho i ihrem Campingstüehli am Flussufer ghocket si heimer ja kennt vo Geschter.  

Z Nelson Bay hei mir e Usflug mitem Boot gmacht zum Deufine luege.

Es isch nid lang gange si "fründlechi" Deufinä, auso die wo zum Boot zuechechöme u mitschwümmä, z gseh gsi.

Di 4 wo mir gseh hei si no zimlech lang imene rasanntä Tempo vorus gschwummä. Ab u zue heisi uchegluegt u sich dräit.

Lut Gsetz darf es Boot e Gruppe Deufine nid lenger as 30 Minute "verfougä".

Einä vo dä buntä Vöug wo üs steetig überau begleite

Chlätterä u wanderä uf dä riisigä, längä Sanddüünä

Kookaburra, bi üs lachender Hans gnennt isch e oustralische Vogu us dr Familie vo de Iisvögu.

"Kookaburra sits in the old gum tree
merry, merry king of the bush is he.
Laugh, Kookaburra, laugh, Kookaburra,
gay your life must be."

Ds Margezeichä vom lachendä Hans isch ds lute Glächter zur Revierferteidigung. Ds Glächter findet regumässig am früeche Morge oder bi Dämmerig statt. Es faht  eigech immer sehr liislig a u ändet imene hysterische Lachä. Näbscht däm Lachä wo tönt wine Orangutan cha Hänsu no paar angeri Lut. Die würemer aber äue nie erkennä. Ds hysterische Lachä isch so lut u markant!

So öppis chönnt ig mir o Dahei sehr guet vorsteuä..

Z Nimbin, uf üsere Reiserutä isch es Festivalwucheänd agstande. MardiGrass. Was übersezt "Fetter Dienstag" / Fasching heisst.

Nimbin isch aber nid es "normaus-Fasnachtsdörfli" sondern es richtigs Hippydorf wo irgendwo i de Woodstockzitä isch blibe stah...

Bis 1973 het ds Dörfli eigech no fasch niemer kennt bis dazumau z Aquarius Festival abghaute isch wordä. Bi däm Festival si dazumau 4 Bsuecher verhaftet wordä. D Feschtgmeinschaft isch imne fridleche Protescht zur Polizei glüffä u het nach langem d Freilassig vo dene 4 bewürkt. Zuesätzlech het d Polize dr Konsum vo Marihuana "billigt". Viu vo dene Festivalbsuecher si dazumau gad i däm Dörfli blibe. Hützutags wohnä rund 350 Lüt no dert.

"Niemer isch am luege, aber aui si am glotzä" würd dr Büne Hueber sägä. Das isch üses Motto gsi u es het sich glohnt. Ds eintä Spektaku het es angers abglöst.

Agfange vomene super kreative Museum (e Pivatwohnig wo Itritt nid verlangt sondern ä nätti Geschtä isch), dr Campingplatz ufeme riisige Bitz Land wo so was vo versumpfet isch gsi das aui anstatt mit de Konzärt mitem usefischä vo de Outos u Camper beschäftiget si gsi. Dr Traktor isch uf Hoochtuure glüffä.

Arbeitszitä (in Nimbin)

Offä a dä  meischtä Täg ab 11 oder 12.00. Früechschtens am 9.

Aber mängisch o später, so 13 oder 14.00.

Mir schliessä am 17.30-18.00. Müglecherwiis o am 16 oder 17.00.

Villech o speter so 22. oder 23.00.

Mängisch simer o garnid da. Weni aber mau da bi de bini da.

Nid böös si we ig nid ganz da bi. Aber mir si ja glich da.

Byron Bay

Da het üs ds erschtä mau dr turistisch Schlag troffä.

Hennä viu Lüt, es gstress u aui wei Sörfä. Nume mir nid.

Mir si die wo d Ussicht uf ds Meer gniessä u denn a Strand gö we aui angere

beschäftiget si.

Sufers Paradise.

Chli z gliche wi in Byron Bay. E Hochburg für Turischtä u iheimischi Sörfer.

Hochhüser u Meer, chli ähnlech wi in Miami.

Trotz au däm hei mir super Täg gha in Surfers Paradise ufeme super Camping zmitz i de Hochhüser inn.

Wi geng hei mir Hustier gha wo jedä Morgä si cho luege obs öppis z ässä git.

Zu üsem Spass hei du üsi Nachbare ihres Toschtbroot etc. vorusse la stah..

Scho gli müesse mir üs "outä" as Vöguliebhaber.. hiufe..!

Brisbane

Öppis u Nüt. Finde mir.

E Stadt wo zum gmüetleche Verwilä iladt...

Mir ernähre üs nidnume vom feinschtä Beef / Rindfleisch sondern zwüschetine o mau vo Fisch oder Grövettä. Vorzugswiis mariniert mit Chnoublouch u Chrüttli..

Glass House Mountains

Ä riisigeNationaupark mit 12 Vulkanhügu.

Es super Pärkli mit super Wägli zum loufä.

Einä vo viunä Campingplätz..

Da lacht "mä" no bevor d Wäuä chunnt..

Fraser Island

Früecher Great Sandy Island (grossi Sandinslä) gnennt. Es Schiffsunglück im 19 Jahrhundert het zur Umbennenig vor Inslä bitreit. Im Jahr 1836 isch dr Käpten James Fraser mitem Schiff vo Sydney nach Singapur ufbrochä. Am Great Barrier Reef wo dert afaht isch dr Rumpf kaputt gange u ds Schiff gsunkä.

Dr Käpten u d Frou heige schiinbar überläbt, si vo de Aborigines wo denn scho uf dere Inslä gwohnt hei aus Sklave ghaute wordä und und und und und. Mir wei nid däräwä abschweifä!

Mitere Grössi vo 1840 km² isch ds di gröschti Sandinslä vo Wäut.

D Inslä ghört sit 1992 zum UNESCO Wäutnaturerbe.

 Uf üsem Tagesusflug si mir mit üsem 4WD Lastwagä mit dr Fährä überä uf d Inslä u si dr haub Strand (75 Mile Beach) abgfahre bis zum Wrack vom Schiff Maheno.

Im Jahr 1935 isch dr ehemalig Luxusliner Maheno (nid Costa Concordia) ufem Wäg zu sire verschrottig in Japan uf Grund vomene für die Jahreszit untypische riisse Sturm (Zyklon) uf  Grund glüffä. Da`s vomene chline Schiff zoge isch worde, heisi zum dr Strömigswiderstand verringere d Schrube u z Rueder usbout. Dämentsprächend hets i däm Sturm natürlech nümm chönne manövrierä. Si hei versuecht ds Wrack z entfernä. Isch aber nid glunge. Darum hei d Insubewohner dazumau ds Schiff für Hochzit u Fescht gnüzt. Speter hets d Royal Australian Air Force us Zieuobjekt brucht. Hüt gsehtmä numeno di oberschte Deck.

Uf dr Inslä hei mir Dingos gseh. E Dingo isch eigetnelch e Hushund wo scho vor Jahrhundertä verwiuderet isch u unabhängig vom Mönsch läbt.

Si si nid gfährlech, es wird aber überau druf Ufmerksam gmacht wimesech sött Verhautä we eim einä übere Wäg macht. Picknick isch a fasch aune Ortä nid erloubt.

Dr Whoody,, üse Guide, het üs sogar abgrate Schueh, Chleider oder Täschä unbeufsichtiget zlah. Es gäbi viu Dingos (vorauem jungi) wo gärn so Züg schnappä u i Busch verschleppä. Auf niemehr Wiedersehen!

Uf dr Inslä gits ca 200 Süesswasserseeä mit extrem suberem u klarem Wasser. Di meischtä drvo ohni Zue oder Ablouf. Whoody het gseit es gäb wäutwit 70 settigi Seeä. 40 drvo si uf Fraser Islanand, einä drvo isch dr Lake McKenzie.

Zum Schluss hei mir no e Spaziergang düre Rägäwaud gmacht u üs di verschidnigschte Böim agluegt wo üs Whoody erklärt het.

Mir si chli im Verzug gsi da d Fluet isch cho u di letschti Fährä isch am 16.30 vo Fraser Island übere uf z Feschtland. Es het gad suber glängt.. Mir si jedoch guet überne Haubstund so was vo düregschüttlet wordä uf dr Schotter/Sandpischtä u statt 50kmh 80kmh gfreeset.

Üses gschidä Camperbuech het üs zumene super gratis Campingplatz gfüehrt.

Jehschnti Kilometer zersch amächeligi Dräckstrass. Nam Tor mit Krokodiuwarnig ide Gwässer isch d Strass zum Strässli worde u d Löcher si zu riisige Gruebe wordä. Kes Problem, mir hei ja mitem Horst o so öppis wine 4WD Tschipp...

Nach langer Zit mit Schritttämpo u wittere Warnige bim Beträtte vo Privatland simer am Notch Point acho. S het vereinzelt Camper gha, d Chüe si aber ir Überzau gsi.

Whitsundays

E wittere Usflug het üs vo Airlie Beach uf d Whitsundays bracht.

D Whitsunday's bestöh us 74 Inslä, wobi 17 drvo bewohnt si.

Mitem Schnäuboot si mir usegfreeset u hei mau e Rundi gschnorchlet.

Ds Wasser isch leider trüeb us het wenige Fischä.

Witter si mir uf de Whitsundays a Whitehaven Beach. Mit 99% Quarzghaut isches einä  vo de wiissischtä Stränd vor Wäut.

Vor u während em  Zmittagässä hei mir Bsuech cha vo e paar Waranä. Si si geduudig um üs umegschliche bis si chli Fuetter hei becho.

Z Cairns hei mir e ganzi Wuche verbracht u hei widr Mau "Ferie" gmacht u uf chli bessers Wätter gwartet. Da me nid cha badä im Meer hets vore ar Esplenade e riisige gratis Pool. Schigg!

Mir hei üs in und rund um Cairns vertöörlet. Im Chino wär "Beauty and the Beast" in 3D cho. Leider nid Tinus Favorit..

Mir hei üs geiniget ufne Usflug ines Papiorama mit Vögu.  

Spetischtens hie isch absolut aues klar..

Tinu - Vogu, Vogu - Tinu..

Dr Eric frisst gärn u stabet am liebschte uf  aune Turischte desume dr ganz Tag.

Und, är isch sehr sehr sehr usserordentlech gwunderig!

E wittere Usflug het üs einisch meh düre Rägewaud zu de "Baron Falls" bracht. 

Wo de d Wätterprognose nid schlächt usgseh het, hei mir de e Tagesusflug zum Great Barrier Reef buechet.

Trotzdäm ischs de a däm Tag bewöukt u sehr windig gsi. Die 90-minütigi Fahrt zum Riff isch de seeeeehr wäuig gsi. Bim erschte Riff het me d Müglechkeit gha zum ga schnorchle oder äbe si erscht Touchgang ds mache. Nach churzer Iifüehrig ischs de abe gange. Bis zu 8 Meter unger dr Oberflächi.

Ume Mittag si mir de zum zwöite Stopp gfahre worde u hei währenddäm es Salatbuffet chönne gniesse. Am zwöite Stopp het me nomau Zyt gha zum schnorchle oder äbe nomau e Touchgang ds mache.

Nach dene paar nasse Stung si mir de wider zrugg nach Cairns. U d Wäue si no chli  heftiger gsi, aus bim usefahre... Loufe ufem Schiff isch nid sehr empfählenswärt gsi...

Ds Great Barrier Reef isch ds gröschtä Koralleriff vor Wäut. Scho im Jahr 1981 hets d UNESCO zum Wäutnaturerbe erklärt.

Jedoch schint ds nid viu gnüuzt zha. D Landwirtschaft ar Küschtä, vermerti Zyklonä, jahrelangi fischerei u Turischtä etc. hei ds Riff beschädiget.

Für üses Abendtür ids Landesinnerä hei mir z Cairns ds nötigschte im Kofferruum bunkeret. 20 Liter Bänzin i 2 Kanischter, ä huufe Liter Wasser, Gas füre Chocher etc.

Vorhär si mir aber no chli witter uche i Nordä gfahre. No chli am Meer entlang Richtig Cape Tribulation. D Stränd wäre no rächt schön, we nid di ewige Schiudli überau wärä. Achtung Quauä u Krokodiu!

Mit badä im Meer wird nüt me vorlöifig. Mir chöi üs o angerwittigs beschäftige. Bitte ds aständige Foto vo üs bruche für is Familieaubum.

Churz vorem Übergang mit dr Fähre ufem Daintree Riveris für is Cape uche si mir miteme Böötli uf Krokodiu Tuur gange. Mir hei äs grosses Kroki u viu chliini gseh. Einisch sogar drü mitenand uf eim Houzascht. Circa 300 Krokodiu läbe i däm Fluss, di wenigschte gsehtme schwümme. Mir hei uf däre Tuur viu interessants über Krokodiu u di verschidenschte Mangrove am Ufer erfahre.

Cape Tribulation

Einisch meh viu u schöni Stränd. Aber, o hie nid zum badä u somit angers vertöörlä.

Näbscht iz no viu meh Warnschiuder si d Essigfläschä gäge Verletzige vo Quauä z iseztä nid witt furt vom Strand.

Spatziergang im Rägäwaud..

..schöni Böim..

..schöni Ussichtä..

..weniger schöni Schlangä.. Nid witt furt, aber für üs natürlech ke Gfahr, Frou Karin!

Mir schribe iz hie nid Meh u usfüehrlecher über di vilä giftige und giftigschte Schlangenä uf dr Wäut wo aui ds Oustralie wohnhaft si..

Es Cassowary (Kasuare)

E flugunfähige Vogu  het plötzlech d Strass überquert u het üs öppe glich doof aglotzet wi mir ihns. Lut de Oustralier si d Cassowary vom usstärbe bedroht u es git numeno ca 1200 freiläbendi.

Uf eim vo viune Spatziergäng dür d Mangrovä..

Mir hei nid probiert..

Gross chöi si si di Spinnelä hie. Darum häbe o nume d Mannä ihri Händ so nöch..

D Heufti vo üsere Reis isch scho düre, mir dänke aber no überhoupt nid as ufhörä!

Obwou mir viu erläbe, verpasse mir o ganz viu Sachä!

Ämmes Schwangerschaft, 30igschti + 20igschti  & angeri Geburtstäg, d Toufi vom Gottemeitschi Anuk, dr Schueustart vom Léon, ds Hochzit vo Ka & Fäbu etc.