Mit zwene Flüg si mir vo Fort Lauderdale über New York nach Burlington gfloge u mitem Outo nach Chazy. Dört hei mir Tante, Götti u Gusä vor Marina bsuechet.

Am erschte Tag simer i Waud ga Piuze sueche, besser gseit DÄ Piuz...

Gueti 2,5Kg heter uf d Waag bracht. Aber leider bim ufschnide isch die bösi Überraschig cho, inne ischer gäub-bruun gsi. Ds heisst, mir si gad 1,2 Tag z spät gsi mit pflückä. Er isch de anstatt ufem Täuer, ufem Komposcht glandet.

Wieviu Kalorie die Schoggiglasse het, wüsse mir zum Glück nid. Ou nid ob me drann stirbt... "Tot durch Schoggi". Aber cheibe fein isch si gsi, die Glace wos leider nume dert ir Umgäbig git!

Ungerwägs z Chazy ir Umgäbig zwüsche See, Fäuder, Biber?! (leider kene gseh). Nume Knabberspure!

Es churzes Usfährtli i Adirondacks-Park. Dr ganz Park isch ca. 25`000 Quatratkilometer. Dr bekanntischt Ort isch Lake Placid, wo scho 2 mau die olympische Winterspiu düregfüehrt het. Hie heimer di erschte farbige Loubböim chönne gseh.

Ahorn-Boum, vo dene gits hie im Norde schier ändlos.

Amene Sunntig hei si ds Burlington im Hafe e `Pumpkin-Regatta` gha. Mit usghöute Riise-Chürbis u Paddu hei si e Strecki müesse bewäutige, de dr `Fahrer` wächsle u dä het ou nomau die Strecki müesse paddle. Die Beschte vo jedem Louf si e Rundi witer cho.

D Chürbis si vorem ushöle zwüsche 400 u 500 Kg schwär.

Wär ds schwär isch gsi oder die fauschi Technik gha het, isch unger gange...

Fasch wie ds Asie. Fried-Rice zum Zmorge... Mhhhhhhh!! A das chönnte mir üs gwahnä.

Ou hie isch i de Läde ändi Septämber scho Wiehnachtszüg usgschteut. Hättemer nume chli meh Platz im Gepäck. Mir hätte du sofort sone Micky Mouse Chuglä heimgno für i Gartä!

Dr dritt-letscht Flug isch vo Burlington nach New York gsi. Am Abe am haubi 6i simer de ufem JFK-Flughafe acho.

Wi jedes Mau wemer glandet si isch dr haub Flüger scho uf de Bei gsi u het no gueti 10 Minute gwartet bis si überhoupt d Türe vom Flüger ufmache...

Mir hei de mau wider e Fahrt id Stadt müesse organisiere. Mir hei de e Shuttle-Bus gno u si de die erschte gsi wo igschtige si. Das heisst erfahrigsgmääs mau nüt guets... Mir si de 1h später geng no am Flughafe gsi u hei Lüt gsuecht zum uflade. Mir si du nach ca 3 Stund ändlech bim Hostel acho...

Nachem Itschegge simer de no öpis Znacht ga sueche. Hurti a Times Square isch geng e gueti Entscheidig. 

Üses letschte Hostel isch de no chli es tüürers gsi, aber d Usgab het sich glohnt. Vor Usstattig bis zur Laag isches eis vo de beschte Zimmer gsi wo mir je hei gha. D Ussicht hinger usse uf dr Füürleitere isch direkt uf ds Empire State Building gsi. 

Sit am 11. Septämber 2011 isch das Memorial offe u zuegänglech.

Ufem Gländ vom ehemalige World Trade Center wird zur Zyt dr `One World Trade Center`-Turm boue. Dä wird de mit 541,3 Meter ds höchschte Geböid vo de USA si.

Im Jahr 2013 sött de dr Turm eröffnet wärde.

Uf de Grundrisse vo de aute World Trade Center hei si je 1 Brunne boue. 

Rund um dä Brunne hei si uf Plattene aui Näme vo de Opfer, vo de Aschleg, igrawiert. Witters chame uf Compiuter spezifisch nach Opfer u Informatione sueche. 

Ds Museum ufem Areau isch leider no nid offe. Aber dri gseht me glich fangs chli. Dinne hei si Stahutreger ufboue vom aute World Trade Center. Unheimlechi Chräft hei da müesse gwürkt ha...

Die chlini St. Paul`s Chiuche grad näbem Gländ vo de World Trade Center. Bi de Aschleg hets däm nid viu gmacht. Es isch denn zure Gedänkstett worde, u isch das hüt no...

Im Bsuecherzäntrum isch aues mügleche zum Thema 9/11 usgsteut.

Ungerwägs i de Strasse vo NY. Irgend e Fiumszene wo si am dräie si gsi vo weisi nid was. We öpper s gad erchennt, bitte bi üs mäudä. 

Roosevelt-Island

E spezieui u Mau angeri Ussicht ufene chline Teil Manhatten. Gondle fahre ire Grossstadt chame ja ou nid grad überau...

Günschtig Znacht ässe, u nid müesse 18-20% Trinkgäut gä, ir eigete Chuchi. Vorauem mau widr leckeri Pasta säuber machä!

Hilfe!! Da ischer cho. Uf üs zuegschuehnet u weue Fotos machä...

TIMES SQUARE

Dr Times Square ligt ar Chrützig Brodway u Seventh Avenue. Ds dert awäsende Geböuide vor New York Times Zitig isch dr Namensgäber gsi. Dr Square geit vor 42 bis zur 47nd Street u biudet z Zäntrum am Broadway, sprich ds Theaterviertu vo Manhattan. Irgendwenn ide 1930 Jahr isch dr Times Square offizieu i zwöi Abschnitte ungerteilt wordä. Dr südlech Teu het dr Name phaute u dr nördlech Teu isch in Duffy Square umbenannt wordä.  

Näbä ca 40 Theater hets o jedi mägi Cafes, Fast-Food-Chötinä, Suvenierlädä, Noburestaurant, Multiplex Chino, MTV Studios, Sony, Toys'R`Us, Vogue, M&M's Ladä etc. Nid z vergässe si di vile Liechter u d Lüchtreklame wo zum Teu taghäu machä.

Es isch dr meischt bsuechtischt Ort vo Turischte wäutwit. Jährlech 22 Millione Bsuecher. 

Dämentsprächend isch o d Polizei o au paar Meter presänt gsi.

Dr letscht Sunneungergang vo üsere Reis. Vor Ussichtsplattform vom Empire State Building. Dr Bsuech vom Empire State Building isch für üs scho e Tradition. Ke Bsuech i dere Stadt ohni Empire!

Irgendwo da gredi unger isch ds Hostel...

Eini vo de schönschte u bekanntischte Skylines vo dr Wäut. U scho gli wird si de chli angers usgseh we de ds nöiie WTC fertig boue isch.

Eifach ou am Abe e troumhafti Ussicht! 

U mir wüsse eigentlech scho itze, dass e 4. Bsuech i dere Stadt uf Grund au däm sicher wird stattfinde!

Ds letschte Znacht im Hard Rock Cafe am Times Square. Mir hei de nomu so richtig amerikanisch gässe u üs es feins Bier und e Bahama Mama Drink gönnt :)

z letschte Mau hei mir d Ruckseck packt...

Ufem Rückflug über London nach Züri heimer's no einisch richtig gnossä mit auem mügleche wome sich cha la serviere.. ;) 

D Gschicht mit dr Rum-Deguschtation am Morge am 9 z London am Flughafe lömer gekonnt us.. Ds Wätter ir Schwitz het üs scharmant empfange, ufe erscht Schnee nach fasch 1e haub Jahr müesse mir no chli warte. 

A dere Steu es MERCI a di vile Lüt wo üs am Flughafe (mit Chueglogge!) empfange u die wo üs Dahei hei so richtig überrascht hei! Dr Rum isch läär..!