AMERIKA HAWAI`I 2012

ALOHA

Hawai`i isch e witteri Insuchötti im Pazifische Ozean, ghört zum polynesische Kulturkreis u isch somit di nördlechschti Spitze vom sogenannte "polynesische Drüegg".

Hawai`i isch ersch sit 1959 dr 50 Staat vo Amerika.

Es sege vermuetlech d polynesier vode Marquese Insle (französisch Polynesie) gsi wo Hawai`i per Böötli entdeckt heige. Schlussändlech isch Hawai`i wäg sire zentrale Lag de asiatische u nordamerikanische Iflüss erlägä. Geografisch wird Hawai`i nid am amerikanische Kontinänt sondern as Teil Polynesies zu Ozeanie zuegordnet.

Ozeanie = Australien, Neuseeland, Südsee

D Insle vo Hawai`i:

Ni'ihau, di verboteni Inslä: 180 Quadratkm, 160 Iwohner

Kaua'i, d Gartäinslä: 1431 Quadratkm, 63689 Iwohner

O'ahu, dr Versammligsplatz: 1545 Quadratkm, 953207 Iwohner

Moloka'i, di fründlechi Inslä: 673 Quadratkm, 7404 Iwohner

Lana'i, d Ananasinslä: 364 Quadratkm, 3193 Iwohner

Kaho'olawe, d Ziuinslä: 116 Quadratkm, 0 Iwohner

Maui, d Tauinslä: 1883 Quadratkm, 117644 Iwohner

Hawai'i, di grossi Inslä: 10433 Quadratkm, 173000 Iwohner

O`ahu

Knapp 10 Stung Flug hei mir vor üs gha, zu üsem erstuune hets im Flüger kes Ungerhautigssyschtem gha für jede Sitz. Was me ja eigentlech dörft erwarte uf sore länge Strecki Hützutags. Es het wider mau nid für d Qualität vo Quantas gsproche, das müessemer da würcklech erwähne! U wime ufem Foto unger gseht si d Zite vom Game Boy und Handy mit Antennä doch würcklech sit lengerem verbi..

Ds Waikiki hei mir e WG gha im Hostel. Mit de 2 Jungs wo mir d WG teut hei isch d Poscht z grächtem ab u das wette mir o niemerem vorenthautä!

Stephen het sich scho am erschte Tag e riise Sunnebrand zuechegleit. Chli speter im Usgang het är uf Froueschueh mit Absatz es Tänzli gwagt.. Es het elegant usgseh bis zu däm Zitpunkt wo är sini Tanzpartnerin het weue ine Hebefigur würblä.. Zum Dokter ischer ersch e Wuche speter in Ängland. Bänderriss.

Dr Chris us Amerika isch mit vo dr Partie gsi, är het sich flissig im Schwitzerdütsch redä güebt u het mit Stephen zämä überau aues Wiibleche aquatsch. So isch das fasch e Wuche jede Tag glüffe u wemer gneuer drüber nachedänke si das di einzige astädnige u vorauem jugendfreie Sache womer da drüber chöi schribe..

Waikiki-Beach, eine vo de touristischte Orte uf Hawai`i.

We das nid typisch Hawai'i isch..!

Omi in concert..

A verschidene Abe unger dr Wuche gits ds Waikiki ar Promenade e Hula-Show. Da die Gratis isch, hei mir die Chance gnützt u si ga luege.

Härzig, oder?

Lecker Hamburger, typisch Amerikanisch o hie..

Duke Kahnamoku giutet ds Hawai`i aus Widerentdecker vom Surfe u het dä Sport am Afang vom 20. Jahrhundert populär gmacht. Ds Hawai`i wird är fasch chli vergötteret.

Mit üsne Mitbewohner si mir a eim Tag ds USS Arizona-Dänkmau bi Pearl Harbour ga bsueche. Für dört häre ds cho hei mir zersch 1 Stung mitem ÖV-Bus müesse fahre. Vor Ort überchunnt me när es gratis Ticket, ir Hochsaison si die meischtens am Vormittag scho wäg u darum si mir scho vor de 8i am Morge dört gsi.

Mir hei de no 2 Stung müesse warte bis zu üsem Ilass u hei üsi Zit im derzue ghörige Museum verbracht.

Bim Ilass hei mir e Fium übere Agriff vo de Japaner uf Pearl Harbour am 7.12.1941 gseh u gneuers über Gründ und übere Ablouf vo dere überraschende Bombadierig erfahre. Aschliessend simer mitemene Schiff, gfüehrt vo 2 US Neivi Tüpä, zum Dänkmau übere.

D USS Arizona isch nie imene Chrieg aktiv gsi. Sie isch denn aber mitere 800kg Bombe troffe worde, explodiert u im 12 Meter töife Hafe gsunke. Das Dänkmau hei si dr quere Wäg überem Wrack vor USS Arizona platziert. Me gseht vor u hinger no ds Schiffswrak u e fiine Teppich vom innerno usloufende Öu wo no dinn isch. Mit däm Schiff si no 1177 Maa ungergange, 1102 si geng no im Schiff u nie borge worde.

Big brother is watching you!

Diamond Head

Das isch e riisige Krater, e erloschene Vulkan grad näbe Waikiki. Vo dört us het me e super Ussicht über Waikiki u Honolulu. Mitere 1 stündige Wanderig chame dr Gipfu uf 232 Meter Höchi erreiche.

Ussicht über Honolulu u Waikiki Beach

Schöni Ussichtä..

Ungerwägs..

Entlang vo dr Küschte vo O`ahu

Hanauma Bay, wird aus DÄ Schnorchustrand vo Hawai`i vermarktet. Iitritt zahle, Fium luege, eifach typisch Amerianisch...

Ds Schnorchle säuber isch de durchschnittlech gsi, sehr wahrschiinlech si mir scho chli ds Verwöhnt vo de vorhärige Orte... Aber ds Wasser isch haut tatsächlech nid Glasklar u wunderschön blau wisis akündiget hei!

North Shore

Hale`iwa, es chliises, gmüetlechs Turischtedörfli im Norde vo O`ahu. Mir hei de no 2 Nächt dert ir Nechi übernachtet.

Zum Zmorge früschi Chnobli-Shrimps...

Im Norde vo O`ahu hets e Strand wo täglech Meeresschiudchrött chöme cho sünnele. Leider isch ds Wasser ds trüeb gsi, u so heimerse nid chönne beoobachte bim schwümme. Si wärde bis zu 185kg u 40-50 Jahr aut.

Sehr cool wi die vorwärts chöme u schwümmä.

Mitbewohner:

Dole

Mir hei de no e Bsuech uf dr gröschte Ananas-Farm vor Wäut gmacht. Sehr interessant so viu verschideni Ananas z gseh. Es git Cayenne-Gruppe, Queen-Gruppä, Spanischi-Gruppe, Pernambuco-Gruppe u Perolera-Gruppe.

Zu üsem erstuune het e Ananas uf dere "Ananasfarm" stouzi 7.- gchoschtet.

Shaved ICE, e Delikatessä in Hawai`i. E riise Huufe graschplets Iiis übergosse mit jehnschte Sirupgschmäcker.. Da wirds o de gröschte Wasserglace-Liebhaber einisch übel!

Eine vo de Stränd miteme Lavateppich

Maui

Mitem Flüger simer vo Honolulu nach Maui. Dr öffentlech Busverchehr isch o wi scho uf dr angere Insle meh schlächt aus rächt. Au Stund fahrt e Bus i irgend e Richtig u de sicher nid dert ane wo mir wei. Da mir aber 8 Nächt in Maui si gsi heimer üs guet di viiiiili Zit chönne nä.

Haleakala (uf Dütsch `Haus der Sonne`) Vulkan

Dr letzt Usbruch isch ca. 350 bis 550 Jahr här. Me isch sich da aber nid so sicher.

Vom Meeresspiegu bis uf 3000 Meter über Meer geits mitem Outo innerhaub vo eire Stung. Mir hei zum Glück mit 2 angere chönne mitfahre u hei d Ussicht u d Kurve hingerinne chönne gniesse. Obe het me de es paar hundert Meter zum Ussichtspunkt chönne loufe und me het auso die dünni Luft au paar Schritte gmerkt. Aber d Ussicht ufe Vulkan isch super gsi. Ersch rächt wo d Wuuche fürne churzi Zit verschwunde si!

E witteri Insu-Erkundigstuur mit ÖV u z Fuess. Ussicht vo Maui nach Lanai`i:

Hübsch..

Iao Valley, i Nöchi vo Wailuku:

Ungerwägs uf Maui..

D `Road to Hana` het 617 Kurve, 56 Brügge u isch 83km läng. Für die Strecki brucht me öppe 4 Stung (1 Wäg...). Tönt nach viu, aber es isch würklech so...

Mir hei de die Strecki mit zwöine Froue us Alaska gmacht. Überau chli aghaute, gfötelet, umegloffe u gluegt.

Ds Highlight isch dr Wailua-Wasserfau gsi wo mir de ou dri si ga bade, am Afang chli chüeu aber weme mau dinne isch, herrlech!!

Ä Troum!

Kaua`i

Mitemene Direktflug vo Maui si mir nach Kaua`i. D Garteinsle vo Hawai`i.

Heiva i Kauai

Das polynesische Festival isch sit 10 Jahr immer am erschte Wucheänd im Ougschte u prompt heimer das i üsne erschte Tag gad vor dr Hustüre atroffä. Da wärde die verschidene tahitianische u hawai`ianische Tänz ufgfüert. Isch aber lengschtens nid so spannend gsi wie die Tanzvorfüehrig in französich Polynesiä.

D Ussicht vo üsem Baukon bi Nacht, Morge u bi Tag:

Üses Hostel, Outo u Zimmer (16er Dorm, keni Fänster u Türä zum bschliessä:

D Marina het sich sit Thailand wider mau d Haar lah schnide u sich la sägä "so viu Sunne u Meerwasser isch nid guet für dini Haar, Schätzeli".

Zum Glück het si dinne im Chüehlä chönne Platz nä u nid wi ds nägschte Opfer vorusse. :)

Ungerwägs mitem Outo uf Maui..

"Queen`s Bath", e grossi `Badwanne` zwüsche Lava-Steine

Ungerwägs..

Mir hei üs de uf Kaua`i e Heliflug gönnt u si i ca. 55 Minute einisch um d Insle. Dür das hei mir Orte gseh, wo me nid so einfach oder gar nid häre chunnt.