THAILAND SÜD 2012

Nach 3 Stung Busfahrt vo Siem Reap zur Gränze Kambodscha/Thailand hei mir üs mau id Schlange chönne asteue für e Stämpu zum Usreise vo Kambodscha ds übercho. Bis mir de äntlech si dra cho, si ca. 45 Minute vergange mit warte ir Hitz (plus/minus 38 Grad)... Mit de Gedanke, das äntlech überstange ds ha, si mir zum thailändische Zoll cho. Aber dört isches, anstatt besser, no schlimmer worde. D Schlange isch no lenger gsi u d Wartezyt vo 2,5 Stung isch no weniger agnähm, aus ds Warte bim kambodschanische Zoll. Nach insgesamt 4 Stung Warte u Stämple si mir de äntlech im Mini-Van ghocket wo üs nach Bangkok bracht het. Nach 4 Stung Fahrt si mir ds Bangkok useglah worde.

Bangkok hei mir ja scho chli kennt vom erschte Bsuech über Siuveschter/Neujahr. Mir hei die 2 Übernachtige drmit gnützt, üs es Busticket i Süde vo Thailand ds organisiere u hei ds Grossstadt-Feeling no chli gnosse. Vor auem ds chliine Strasse-Beizli mitem herrleche thailändische Ässe!!!

Mmmmmmmhhhhh.... Bim einte Tämpu hei si e Art "Jahrmarkt" gha, wome sis Glück bim Glücksfische (mit richtige Fische...) oder bim "thailändische" Lotto het chönne usprobiere...

Churz bevor mir si abghout worde, für e Bus richtig Süde, si mir no chli dür ds Chinatown-Viertu vo Bangkok. 2 Täg vorhär isch chinesischs Neujahr gsi, drum isch aues (vor auem d Strasse) no chli gschmückt gsi.

I de änge Gasse isch richtig viu los gsi. Näbscht aune Fuessgänger, si uf ds mau Roller drhär cho, zum Teil zimlech voupackt. Scho we e Roller isch cho, ischs zimlech äng worde. Aber zu au däm heisech natürlech ono Outo drdürdrängt, dass me het müesse id Lädä iche stah zum nid überfahre wärdä..

D Busfahrt vo Bangkok richtig Süde het scho guet agfange. "Mir wärde de abghout" hei si üs gseit. Super mitemene Mini-Van abghout u zum Bus bracht, hei mir dänkt... Isch de nüt gsi, mir si ds Fuess abghout worde u hei ca. 30 Minute mit Gepäck dür Bangkok dörfe wandere.. Äntlech im Bus... 5 Stung fahre, e churze Stop für WC u ässe u nomau 5 Stung Busfahrt... Am Morge am 5i si mir de irgendwo im Dunkle bire Busstation abglade worde. "Dr Bus nach Krabi fahrt am haubi 7ni witer", danke!

1,5 Stung warte im (N)Irgendwo... Scho am Viertu ab 6i ischs de mitem gliche (!!!???) Bus witter gange nach Krabi. Dört si mir mitenene grosse Pick-Up mit ca. 15 angerne zum Hafe bracht worde, für uf ds Schiff nach Koh Phi Phi.

Schlussändlech si mir nach 19 Stung reisä, uf dr Insle acho.

Koh Phi Phi. Da het me eigentlech ds Gfüeu me geit ufene Insle u  het nid viu ussert Strand, Sunne u Meer. Aber ds Dörfli uf Phi Phi isch es zimlechs Party-Dorf mit Bars u Restaurants. So isches de emu sehr ungerhautsam gsi.. U so e Ananas-Shake am Strand het scho müesse si...

Mir hei üs de uf Koh Phi Phi e Tagesusflug gönnt u si mitem Speed-Boat rund um Koh Phi Phi.

Insgesamt hei mir 4 Insle agstüüret. Eini dervo isch Bamboo Island gsi, wo mir Zmittag- u Bädli-Stopp gmacht hei. E Troum vo Sand u Wasser...

E witere Stopp isch Monkey Beach gsi. Dr Affestrand, mir hei ämu de es paar i de Böim obe gseh.. U dr Sand a däm Strand..

Fiiiiner geits fasch nümm!!!

Ungerwägs hei mir immer wider Stopps gmacht zum Schnorchle (unger angerem mit Haifische...), Fische fuettere, Höhli luege (dört düe si uf d Vogunäschter ufpasse, für när Suppe drus ds mache), bädle, Sunne gniesse u Sunnebrand ds hole. Trotz icreme..

D Tourischteattraktion schlächthin! E Bucht uf dr Insle näbe Koh Phi Phi, Maya Bay. Dört hei si dr Fium "The Beach" mitem Leonardo Di Caprio dräit.

Mit dr Fähre si mir vo Koh Phi Phi i 1,5 Stung uf Koh Lanta übere. Dert hei mir wider mau chli Erholig bruucht vom Ungerwägs si u hei üs e chli es tüürers Bungalow mit Meerblick gönnt. TukTuk fahre, fein ässe, fötele, e riiiise Quaue finge u Sunneungergang gniesse. Das si so üsi "Aktivitäte" gsi...

Nach paar erhousame Tag simer dasmau insgesamt 7 Stung ungerwägs gsi (mit dr Fährä!) bis mir uf Koh Lipe si acho. Das uf Koh Lipe kes Pier git für grösseri Schiff, hei mir 100 Meter vom Strand wäg müesse ufenes Longtail-Boot umstige. Isch gar nid so eifach gsi, da ds Longtail-Boot wäge de starke Wäue immer wider ca. 2-3 Meter ufe und abe gange isch...

D Inslä het üs aber super gfauä.

Leckers Thai-Ässe, Fuessmassage, fasch keni Fahrzüg uf dr Insle uuuuund troumhafti Stränd... obwou mir e zimlech grossi Quaue gfunge hei. Zum Glück hets e Pharmacie gha drmit d Marina sich gäge di erschti Vercheutig het chönne iidecke...

Ja, Fähre fahre macht müed u Seechrank....

Nomau:

Vo Krabi si mir uf Phi Phi u witer uf Lanta. U vo Lanta uf Lipe.

Vo Koh Lipe hei mir de wider mau d Fähre gno. Furt us Thailand nach Malaysia.