NEUSEELAND SÜD 2012
Über Ouschtralie (Sydney) si mir nach Christchurch gflogä.
Dert hei mir üses Outo abghout am nägschte Tag u si de nach 2 Tag vo Christchurch wittergfahre. Dert het sich nämelch gad genau dr Tag vom groossä Ärdbäbe gjährt was sichtbar u spührbar isch gsi. Ds ganzä Zäntrum isch immerno abgsperrt u churz vorem Abriss.
Üsi erschti Fahrt im Lingsverchehr, het üs nach Akaroa bracht.
Ufem Wäg zum Mount Cook, si mir am Lake Tekapo, dr "Church of the Good Shepherd" und am Lake Pukaki verbi cho.
Churz vorem Mount Cook oder o Aoraki hei mir am Lake Pukaki mit üsem "Spaceship" Camper d Ussicht gnossä ufä gröscht Bärg (3754 m) vo Neuseeland.
Ufere churze Chlätterpartie si mir zum Tasman Gletschter uchä.
Ungerwägs uf de Strassä.... Der Haase..
Vorä Lachsfarm hei mir üs früschä, gröiktä Lachs gönnt.
E riise Bitz ca 500gr. für 18.-.. Chliners hetmes ja o nid ufere Farm. Är het leider nid lang überläbt! Fein ischer gsi! Liebä Lachs, mir dänkä viu a Di!
Am Koekohe Beach si mir uf d "Moeraki Boulders" gstoossä.
D Legände vo dä ortssäässige Maori seit, dases Räschtä vo Aalchörb, Fläschechürbisse u Süesshärdöpflä si, wo vom Wrack vom legendärä Kanu Arai-te-uru ad Küschtä gspüeut isch wordä. D Klippe wo ir Nechi si, steue dr Bootskörper u ä Feusvorsprung dr Körper vom Kapitän dar.
Di Boulders bestöh us Schlamm, fiinem Lehm u Ton wo mit Calcit `zämegkittet` wordä si, vor Millione vor Jahre. Si si hert, wi Stei.
In Dunedin si mir dr aut Bahnhof ga aluege und di steilschti Strass vor Wäut uchegchlätteret.
D "Baldwin Street" isch lut Guinness-Buch der Rekorde di steilschti Strass vor Wäut. D maximali Stigig vor 200 Meter länge Strass isch ca 35% oder 19,3 Grad. Dert hei mir auso wedernoch mitem Outo uche no aschliessend achä weue.. Loufä / chlätterä het föörig glängt!
Ungerwägs bis zum südlechschtä Punkt vor Süd- Inslä..
Nugget Point, Strand um Strand u "Curio Bay" (versteinerti Räschtä vo Böim).
Milford Sound isch ä Fjord, us Gletschter erschaffe, wo speter im Meer isch versunkä. Dr Fjord wird umringt vo über 1000 Meter höchä Feuswänd wo mehreri Wasserfäu drüber us chömä. Dr markantischt Bärg isch dr 1694 Meter höch "Mitre Peak".
Ufem Wäg dert häre hei mir unger angerem am Lake Gunn ä Spaziergang dürä Rägäwaud gmacht.
Queenstown; dr Adrenalin-Ort vo Neuseeland. Bungy-Jumping, Jet-Boat fahre, Sky-diving, Paragliding etc...
Mir huere Action-Heude hei`s grad mau bis uf d Rodubahn gschafft...
Ufem Bob`s Peak hei mir e super Ussicht gha u hei de vilä Turischtä ufem Sässelilift zuegluegt..
Am Abe si mir no ä Maori `Kiwi Haka`-Show ga luege. Die ganzi Show isch us verschidene Tänz u Lieder bestange, dr bekanntischt dervo isch dr `Ka Mate`-Haka. Är dient zur Iischüchterig vo de Gägner. Sit 1884 wird dä vor dä Rugby-Spiu vor Neuseeländische Nationaumannschaft praktiziert. Schiinbar mit Erfoug. Letscht Jahr si si Wäutmeischter wordä.
Zwüsche Queenstown und Wanaka si mir dür Arrowtown gfahre. Äs auts Goldgreberstedtli im Wiudä Weschtä Stiu. Zu üsem Glück het denn gad e Gruppe mit aute Austin-Outo`s Haut gmacht.
Lake Wanaka dr viert gröscht See vo Neuseeland
Dr Franz-Josef-Gletscher isch e fliessende Gletscher u isch sit 1982 ca. 1 km gwachse. I 1 Stund cha me vom Parkplatz bis 100 Meter vore Gletscher loufe. Da immer wider Stück vom Gletscher abbräche, chame nid ganz zum Gletscher häre. Ussert me buecht e Tour mit Guide.
Achtung!
Pancake Rocks si vor ca. 30 Millione Jahre im Meer dür Ablagerige entstange. Dür d Verschiebig vo de Ärdplattene si die Ablagerige a d Oberflächi cho.
"Apple split rock" im Abel Tasman Nationalpark
Ds letschtä Häiläit uf dere Inslä wo mir ufem Wäg gha hei.
Mitem Boot si mir vom "Kaiteriteri"-Strand es rächt wits Stück uche i Nationaupark gfahrä. In "Tonga Querry" hei si üs am Strand useglah u mir si ufere ca 3 Stündige Wanderig zruggglüffä nach "Medlands Bay".
Ungerwägs hei mir wi scho fasch überau uf dr Inslä Farn atroffä.
Ds Farn het bidä Neuseeländer wi o bide Maoris e spezieui Bedütig.
Ds Farn isch unger angerem uf dr Landesflaggä abbiudet. Früecher hei d Polynesier ds Farn us Wärchstoff brucht. Hüt findet mä über 50 verschideni Artä wo vo urzitlechä Farn vo über 180 Millione Jahr abstammä. Di neuseeländischi NationaupFlanzä, ds Siuberfarn cha bis zu 10 Meter höch wärdä. O zimelch beidruckend isch ds Boumfarm wo ide Rägäwäuder vorchunnt. Es cha bis zu 20 Meter höch wärdä.
Das cha passiere weme dr chli Küddersack mau vergisst ichezruumä..
Das dumme Campinghuhn isch ufe Gschmack cho..!!
Zum Schluss:
A ds chautä Wätter heimer üs gli mau gwahnet. Ä chliinä Schnuderi u es paar nöi, höchi Sockä hei da Abhiuf gschafft.
Es het überau Campingplätz. Di meischtä si aber sehr tüür da mir üs lut de Nöiseeländer immerno ir Houptseson (bis ändi Apriu) befindä. Das aber nümme so viu Lüt het (mä gseht zwar nume Camper u Mietoutos überau) isches nie es Problem no e Platz z becho. Uf dene Campingplätz hets eigentlech immer e Chuchi (mau weniger, mau besser usgstattet), Tv, heissi Duschi etc. Uf de chli priiswärtere Plätz wo meischtens abgläge ir Natur usse si zautme natürlech viu weniger. Die Plätz hei de meischtens eifach e deckti Füürsteu u Plumsklo.. wenn überhoupt ;)
Ds Internet isch e angeri Gschicht.
Eigech niene bechunntme gratis Internet. Im Mc Donalds wärs zum Bischpiu gratis, duuret aber e Ewigkeit. Ide Bibliothekä bechunntme nume ide "unturistische" Ortä über. Das het üs "Zwungä" e Stick mit SIM-Chartä z choufe damit mir über ds Telefonnetz is Internet chöi.
Ds absolut auerläschtigschtä si d Sandflöigä überau. Mir behebä di dumme Ficher u dr Juckreiz aber mit aune Mittu! Antibrumm, Fenistil Gel u Tigerbalsam Menthol.