NEUSEELAND NORD 2012

Mit dr Fährä si mir vo Picton (Südinslä) düre "Queen Charlotte Sound" nach Wellington (Nordinslä).

Sehr schön, aber sehr äng. Es wär nüt füre Schettino vor Costa Concordia. Scusi.

Wellington. Di eigentlechi Houptstadt vo Neuseeland. Nume wüsse das di wenigschtä. Es müesst ja "eigentlech" Christchurch odr doch Auckland si.

Mir si paar Nächt zmitz ir Stadt am Hafä campiert, umzinglet vo Fähräghorn, Strasseverchehr u Polizeisirenä. E super Camping mit WC und Heisswasserduschi.

Mir si ir Stadt umeglaueret u unger angerem zum "Mount Victoria Lookout" u mitem schwizer Bähnli uche i Botanisch Gartä. E super Ussicht ufene Stadt, wo d Lädä scho zwüsche 17.00 u 18.30 zuemache. Ussert bim Abeverchouf. Denn hei di meischtä bis 19.00 offä.

am Hafä in Wellington

Mir hei üse Ufenthaut in Wellington so planet, dass mir no hei chönnä es Rugbyspieu luege.

D Hurrikanes gäge d Dunedin Highlanders.

Was fürne Heidäspass!

Dr "heilig" Nationausport vodä Neuseeländer het üs auso herrläch ungerhautä. Es Drück unes Gmurgs umänä Eierförmige Bau (d Herrä mit churzä Hösli, mini Damä) secklesi ir Reiä hin u här u mäiä enang z Bodä.

Zwüschetine wird no kickt, aber das isch Näbesach. Houptsach ds "Ei" isch irgendwo hinger dr Linie.

D Super Rugby Liga besteit us Teams vo Neuseeland, Australie u Südafrika.

E Namitag hei mir im "Te Papa" Nationaumuseum verbracht.

Unger angerem hei si derte:

- neuseeländischi Tier (inklusive Ungerwasserwäut)

- Informationä über Ärdbebä augemein u in Neuseeland

- dr Fang vore riisige Krakä (di gröschti wosi jehmaus imene Museum usgsteut hei)

usgsteut gha. 

Witters hetme imene Eggä säuber chönne forschä mit Mikroskop, Pc, Gägeständ etc.  

Ungerwägs..

A eim Abä wo mir im Chrutt ussä campiert hei, hets wahnsinnig agfange luftä u rägnä.

Mir hei du flott vor Mitternacht üses Outo ine boumloosi Zonä umparkiert..

Am nächschte Morge isch widr super Wätter gsi..

..Mir hei du im nägschte Dorf ir Turischteinformation gläsä, dass si jehnschti Wanderwägä, Strasse u somit d Sehenswürdigkeite hei müesse sperä da sehr viu Böim umgheit si.. O e Tag speter si d Strassä u Wägä gengno gsperrt gsi.

I dere Nacht seg dr Wind mit 120km/h cho..

Mir heis uf Umwägä trotzdäm gschafft wenigschtens d "Huka Falls" z gseh. Am Wätter entsprächend isch ds Wasser zimlech höch cho u erstuunlecherwis chnütsch häublau!

Bim Stoudamm "Aratiatia" löh si im Summer 4X pro Tag ds Wasser ab. Dr Abfluss gseht de vorhär so us, wie ufem lingge Biud u nachem ablah wie im rächte.. Isch no spannend gsi das mau zgseh. Aber de o nume es Mau.

Ungerwäs ide erschte Thermischä Gebiet vo Neuseeland..

KIA ORA = Hallo (in Maori)

KIA ORA = Hallo (in Maori)

Ds Vouk vodä Maori si d Uriwohner vo Aotearoa (Neuseeland). 

„Māori“ bedütet "normau / natürlech".

D Maorikultur umfasst e traditionelli u gägewärtigi Kunscht im ganze Land. Zum Bischpiu schnitzä, wäbä, Kapa Haka (Gruppedarbietigä), Whaikorero (Redekunscht) und Moko (Tätowierig).

Whakarewarewa "Te Puia" isch in Rotorua. Es geothermischs Fäud mit Geysire, blubbernde Schlammlöcher umne ersteute "Maori"-Dorf. Mir sägä däm dr Ballebärg.

Dertä si mir nomau e Maori- Show go luege.

Aus erschts hei mir e Powhiri gseh. Das isch e formelli Begrüessig vorem Wharenui (Versammligshuus). Ä Chrieger vodä Tangata Whenua (Gastgäber) fordert d Manuhiri (Gescht u somit üs) usä. Är het ä Speer (Taiaha) und legt us Zeichä (ä chlinä Zweig) ufä Bodä. D Manuhiri (Gescht) müesse dä Zweig ufhebä, um z zeigä, dasmä mit friedlichä Absichte chunnt. Ersch denn hei mir dörfe is Versammligshuus iche ga. Dinne hei mir witteri verschidnigi Rituautänz u Spiu gseh.

Wider mau 45 Minutä hennä spannendi Maori Show. Ds schwirigschte isch aber, dass si eim druf hi wiisä dasme bitte seu ärnscht si u nid lachä.. Chasch de weder einä ständig d Zunge usestreckt, mit de Ougä rout u im Schiufröckli umetanzet.. ;)

Bire gfüehrte Tour mitem Maorigäid Ediedi hei mir de chli meh über das "Te Puia" verno.

Mir hei de dört näbschte Geysire ono e Kiwi-Vogu gseh. Die si ir Wiudnis eigentlech fasch niene meh ds gseh, u dört het me leider nid dörfe fötele.

D Schnitzschueu für ca. 15 Schüeler pro Jahr. Arä Skulptur heisi zwüsche 4 u 6 Wuchä u fürnes Brätt ca 12 Wuchä.

Us 247 söttigne Bletter gits 1 Röckli. D Bletter wärde gfautet, grizt u aschliessend lösise la tröchnä zum ungerschidlechi Farbe becho. Settig Chleider wärde im Wäbereiatelier immerno härgsteut.

Fotoseschen am Strand vo Waihi-Beach. Schön, aber ds chaut zum ga bade.

Ds Hundertwasser-WC in Kawakawa, ds letzte Wärch vom Hundertwasser. Er het bis zu sim Tod in Kawakawa gläbt.

Hmm..

Ds Paeroa hei mir e Fläsche vom "Nazionaugetränk" L&P müesse choufe. Mir weis ja meischtens gnau wüssä. Änlech wie Sprite aber glich e chli angers. Irgendwie o chli wi Alca C. L&P ghört hützutag zum CocaCola-Konzärn.

Maitai Bay

Hie paar Meter hingerdrann hei mir campiert. Aber ou hie; ds Wasser z chaut zum bade...

"Cape Reinga" für üs "Cape Regina" wiusechs so schlächt lat la läsä u ussprächä. Es isch dr nördlechscht Zipfu vo Neuseeland. Dört prauä Tasman Sea u dr Pazifik zäme. A stürmische Tage gits Wäue wo bis zu 10 Meter höch si wesi ufenangträffe.

Schäfli in Neuseeland si äuä nümme so agseit wi oscho. Üs dünkt mir heige meh Chüe aus Schäfli gseh?!?

Ändloose "90 Miles Beach". In Würcklechkieit eigech nume 55 Meilä (88Km) läng. 

U mängisch muess me überne Privat-Strass, dass me dört häre chunnt womä wott.. Ds wär de quasi dr Privatstrand.

Sunneungergang vomene "Gratis-Camping" us..

Wär bi däm Biud chli gnau luegt, gseht lings vom Mond d Venus u rächts dr Jupiter.

Ungerwägs..

Kauri- Böim..

D Kauri-Böim chöi bis zu 4000 Jahr aut wärde, e Stammdurchmässer vo 1-4 Meter oder meh erreiche u wärde zwüsche 30-50 Meter höch. Es isch die gröschti iheimischi Boumart u isch im Norde vo Neuseeland ds gseh.

D Neuseeländr verwände bi ihrne Strassearbeitä Chisusteindli-Gröll. Dämentsprächend hetsech sone chliä Cheib so ir Bräms verkeilt, dases quitscht u tschädderet het. 

Zum Glück 5 Minute vor Fyrabe vom Garaschier u mir scho dänkt es het üs öppis verjagt bi däm Lärm. Dä het üs hurti dr Stei usegno u guet.

Ufem Camping vo Auckland... Mit Ussicht uf d Vulkaninsle "Rangitoto". U we ufem Outo scho steit "ds Schwitzerarmeemässer vodä Cämper"...

E 360 Grad Rundumsicht vom Skytower het de scho müesse si. Mit 328 Meter ds höchschte Geböid uf dr südleche Hemisphäre.

Auckland us verschidnige Blickwinkle...

Auckland isch erbout ufeme Vulkanfäud. Rings um d Stadt um hets ca 48 inaktivi Vulkän. 2 drvo si mir go luege. Einä drvo isch dr "Mount Eden". Dr Krater isch ca 50 Meter tief.

"Protea" (Zuckerbüsche) us Afrika