MALAYSIA 2012
"Andere Länder, andere Sitten".
Es sei zuerst geschriben, dass Malaysia viu zum teu strängglöibigi Moslems het. Dämentsprächend si Chopftüecher u Burkas autäglech azträffe gsi. Am Afang isches für üs sehr frömd gsi, scho nume wäg de Tägleche Gebät (5 Mau am Tag) wo ab de Minarett in Lutsprächer Richtig Mekka schauue.
Mit dr Fähre si mir vo Koh Lipe (Thailand) uf Langkawi (Malaysia) übere.
Uf dere zimlech grosse u Duty Free Inslä si mir nach Pantai Cenang. Das isch meh oder weniger das Tourischte-Dörfli vo dere Insle. Mir si 2 Nächt blibe u hei 1 Tag chli ds Strandläbe u ds "nütmachä" gnosse. Dr Strand isch sehr läng u eigech rächt schön gsi, jedoch heimer gläsä dases sehr viu Quaue het. Darum simer nume einisch gsi go badä.
Es witers Mau si mir mit de Fähre vorwärts. Vo Langkawi nach Pulau Penang. Ir Stadt George Town hei mir es chlises, gmüetlechs, aber für üses Budget chli tüürs Zimmer buechet gha. Darum si mir de nur 1 Nacht dört gsi. Aber d Duschi u ds WC uf dr Terrasse u 5m höchi Zimmer si nid grad autäglech.
D Autstadt vo George Town isch im 2008 uf d UNESCO-Wäutkulturerbe-Lischte ufgno worde.
Mir hei ds abwächsligsriiche Strasseläbe beobachtet u die, für Asie, untypische Geböid si sehr interessant gsi. Mitere Standseilbahn (natürlech us dr Schwiz, Garaventa) si mir ufe Penang Hill, d Ussicht über George Town ga luege. Ufem "Bärg" (833M.ü.M.) hets e Moschee u e Tämpu gha zum besichtigä.
Vo George Town si mir i 4,5 Stung mitem Bus, mit sehr gedigne Sässle, nach Kuala Lumpur gfahre worde.
Ds Kuala Lumpur isch ja ds bekanntischte d Petronas-Twin-Towers. Die si zur Zyt die höchschte Zwillings-Türm vor Wäut (452 Meter), u si bi ihrer Eröffnig im `99 die höchschte Geböid vor Wäut gsi. Die hei mir natürlech scho müesse gseh vorem u nachem Iidunkle. Vor Ussichtsplattform vom Menara-Tower (Das isch dr TV- u Radio-Sändeturm vo Kuala Lumpur, 421 Meter höch), hei mir e super Rundumussicht uf die ganzi Stadt gha. Ou dä Turm isch unger de höchschte i sire Art. Wäutwit isch das dr sibet höchscht Sändeturm.
Die räschtlechi Zyt in KL (wie`s d Malaysier nenne) hei mir mit ässe, d Dachterrasse vom Hostel gniesse, schlafe, schwitze (40-45 Grad isches scho gsi), Busticket organisiere und umeloufe verbracht.
Zwüschezitlech heimer widr mau luschtegi Lüt atroffe.
So zum Bispiu dr Stefan us Dütschland wo komischerwiis ewigs Bettwanze het u 2 Fröleins vo Japan, vo dene 1 umbedingt het weue e Zigarettä säuber baschtlä.. "Oooooh".. und z Piiszeiche nid vergässä!
Vo Kuala Lumpur si mir i NUME 2 Stung nach Melaka mitem Bus.
Melaka ligt zwüsche Kuala Lumpur und Singapur, u het knapp 800 000 Iiwohner.
Ds Zäntrum isch sit am 2008 ir UNESCO-Wäut-Kultur-Erb-Liste.
Vom Busbahnhof i d Stadt (ca. 5 km) si mir mitem Local-Bus wo quitscht u gixet het aus würd er nächschtens vonang gheie... Aso d Sitzä si scho druff u drann gsi!
In Chinatown hei mir üses tolle Guesthouse gha. "Jalan Jalan Emas". Sehr familiäri Atmosfäre u luschtigi Lüt hei üs die 3 Nächt zumene guete Ufenthaut gmacht.
A eim Abe si mir i ds "Capitol Satay" ga ässe. 30 Rappe het 1 Spiessli koschtet. Egau ob Gmües, Würschtli, Meeresfrücht, Schwiinsfleisch etc.. Es isch es Erläbnis gsi, da me scho e haub Stung het müess astah zum überhoupt e Tisch ds becho. U ds no bis churz vor Mitternacht!
Adios Malaysia, ab nach Singapur..