HONG KONG 2011

Vo Züri über London nach Hong Kong. Gueti 23 Stund vo Tür zu Tür. Beidi Flüg si unerwartet sehr agnähm gsi u mir si sogar 1 Stund z früeh acho. Zum Glück, denn die heimer ufem  Wäg vom Flughafe id Stadt locker widr verlorä bismer aus gfunde hei wasmer hei müessä!  

Ä herrlächä Schiuderwaud überau..

Ds guete drann isch; da mir sowiso nüt verstöh, beachtet mä ds nachere Zit garnümm.

Di groossi Mönschemasse beschäftiget eim ide erschte paar Tag meh. Zum Glück si die aui viu chliner aus mir, so dasme nume weni Platzangscht bechunnt!

Der sogenannt Tian Tan Buddha isch e bronzeni Buddha Statue bi Ngong Ping uf Lantau Island.  Dr Big Buddha isch di wäutgröschti,  freistehendi Buddhastatue ir sitzende Hautig. D Fahrt mit Schiff u Bus isch scho allei es Erläbnis gsi.. Eifach mau elegant freesä!!

D Skyline vo Hong Kong heimer i dere Wuche e paar Mau vo verschidene Orte us gseh. Vom Victoria Peak, ICC Sky 100 (ds 4 höchschtä Geböid uf dr Wäut) und vom Kowloon Pier. D Liechtshow wo jede Abä am 8 startet luegemer Hinäch zum 5 Mau. Mir gloube je meh dasme die gseht, desto besser findet mä sä.  

In Hong Kong gits sehr viu Märite zum bsueche. E paar drvo si: Ladies Market, Goldfish Market, Bird Market, Stanley Market.

Dr Man Mo Tämpu ghört zu dä eutischtä Tämplä vo Hong Kong. Är isch dä beide Götter Man und Wo gweiht. Im Inneruum hange uzähligi Wiirouchspiralä a dr Decki wo d Gebät vo dä Glöibigä söuä tragä. Es wär sehr schön gsi, wenn da nid dä biissend, Ougebrönnend Rouch wär gsi, so dass mä fasch nümm het gseh.. Mir hei scho feiechli e Abneigig gäge Röicherstäbli etc..

Repulse Bay uf Hong Kong Island. Da guet au 5 Meter e Hautsteu isch cho, simer feiechli lang im Bus ungerwägs gsi! Aber es het sich glohnt.. Dr Stanley Market isch es Bijoux gsi u dr Beach rächt schön.