BAHAMAS 2012

Bis mir de üses Chämmerli gfunge hei uf däm riise Schiff wo aui Gäng glich usgseh... Läck mir, di Teppiche mit dene Muschter überau!

In Florida acho, het dr Hurricane Isaac üs no fasch e Striich dür üsi Chrüzfahrt-Buechig gmacht.

Am Sunntig isch dr Hurricane aus tropische Sturm über d Key West gfägt. Ds Miami hei mir de no chli d Uslöifer ds gspüre becho. Räge vo jedere mügleche Site mit vollepulle Wind. Danke a dere Steu a di vilech Nachrichte vo Lüt wo sich Sorge gmacht hei um üs. Vorsorglech hei si dr Hafe vo Miami zue gmacht u mir hei de nur uf gueti News vo dr Schiffgseuschaft chönne warte. Am Mäntig Morge isch de es Mail cho, dass üses Schiff abfahrt. Jedoch mit Verspätig.

Eis Chaos überau mit Areisende u Abreisende u irgnedwenn heimer uf hauber Strecki ds Gepäck ufgä. Einisch meh di einzige mit Ruckseck u kene Röuelikoffer. Hocke, stah u warte..

Anstatt am 17.00 simer ersch am 23.00 abgfahre. Umso müeder simer denn scho gis u umso luschtiger isch di astehendi "Sicherheits-Lektion" gsi womer hei müesse zuelose u luege wime im Ärnschtfau muess istah u e Schwümmweschtä alegä..

Mann und Frau finde die Kabine..

D Ussicht ufe Beach vo Miami wär bi Tag scho chli schöner gsi... Aber mir hei wenigschtens chönne ga.

D Bahamas si e Insustaat im Atlantik. Si lige südöschtlech vo Amerika und nordöschtlech vo Kuba. D Bahamas wärde zu Mittuamerika zeut. Es git meh as 700 Inslä und nume 30 dervo si bewohnt.

D Bahamas bestöh us Inslä u meh aus 2400 Koraueriff, de Cays. Jenachdäm wie dr Meeresspiugu gad isch, gits vo dene Cays eis meh oder weniger.

Ungerteut wärde d Inslä i di beide sterchschte bewohnte New Providence sowie Grand Bahama u di sogenannte Out Island. Dr höchscht Punkt vo de Bahamas isch uf 63 Meter.

Es heisst, d Spure vore Besidlig gö bis ids 4 Jahrhundert zrugg. Duurhaft besidlet si es paar Insle aber ersch im 9./10. Jahrhundert worde dür Vöuker vo Südamerika. Nachdäm dr Christopher Kolumbus 1492 d Bahaminslä entdeckt het si fasch 50000 Insubewohner zur Sklaverei verschleppt worde u dür das gstorbä.

Irgendwenn im 17. Jahrhundert hei d Ängländer di Inslä beasprucht u d Sidler hei e Kolonie errichtet. Verschidenschti hei d Inslä Ändi 17. u afangs 18. Jahrhundert aus Ungerschlupf gnüzt. Im Amerikanische Unabhängigkeitschrieg isch e grossi Zahu loyaler Brite uf d Bahamas gflohe. Während em amerikanische Bürgerchrig etc. si di nochä Inslä e super Dreh- und Angelpunkt gsi für Handu u Schmugguwar. Im zwöite Wäutkrieg het dr Guwanör Duke of Windsor vo Grossbritanie de Bahamas Säubschtverwautig erloubt u das het schlussändlech derzue gfüehrt, dass d Bahamas 1973 d Unabhängigkeit vo Ängland erreicht hei. Uf de Bahamas läbe ca. 300'000 Lüt. Dervo 70% i dr Houptstadt Nassau. Da ds Land über keni wahnsinnige Rohstoff verfüegt, si si sehr agwise ufe Turismus u ds Bankgwärb. Es herrscht aber immerno sehr grossi Arbeitslosigkeit, Korruption u Drogehandu uf de Bahamas.

Dr erscht Stopp isch uf dr Grand Bahama Island gsi. Si isch eini vo de nördlichschtä Inslä u ca 90km vo Florida furt.

Di zauhriche Korallerffe si früecher sehr gfährlech gsi. Uf Grund dessse si d Spanier furt vo dert u d Pirate si cho u hei d Schiff uf d Riff drängt u so besser chönne plünderää.

D Spanier hei so eigentlech när ke Luscht meh uf d Inslä gha u d Ängänder heise i Bsitz gno. Im verlouf vor Zit heisi du d Piraterie dert i Griff becho.

Mitere "Touri-Tour" hei mer de chli öpis ds gseh übercho uf dere Insle.

Früscher geits scho nümm, aber zum das "Gschlüdder" ds probiere hei mir de zweni Luscht gha.. Conch Muschlä, steigeret d Potänz. Irgendwie heis die Mannä o immer irgendwie nötig..

Irgendwie het das Polizeiouto ehner e unrasante Idruck gmacht!

Rum u Karibik. Die wo üs kenne wüsse das cha nur guet cho!

Am Taino-Beach

Ds Wasser düre Isaac leider no sehr ufgwüeut aber seikelig lauwarm!

U das macht d Crew we ds Schiff dr ganz Tag im Hafe steit. Putze u Striche. Ja de viu Glück bi dere Grössi!

Dr zwöit Stop isch bi Great Stirrup Cay gsi. D Insle ghört sit 1977 dr Norwegian Cruise Line u wird nur vo dene Chrüzfahrtschiff agfahre.

Mitemene Shuttle-Schiff het me uf d Insle übere chönne. Ligischtüeu si Gratis gsi, Schatte nid... Zum Schnorchle hätt me müesse e Schwümm-Veschte alegge. Di het natürlech 5$ gchoschtet. Mir hei du mitem "Pouschalturismus", wo üsi nöii Lideschaft isch worde, ds warme Wasser gnosse. Benäh wi e Pouschalturischt natürlech inbegriffe.

Modell "Pauschalturist"

In und um ds Wasser..

Zrugg an Bord..

Uf däm riisige Schiff het me natürlech aues mügleche gha.

Sunnebränd, schlafendi, Party machendi...

Modell "posender Pauschalturist"

"Üses" Schiff, es Boot im Gägesatz zum angere Chrützfahrtschiff vo Disney. Neid..

Dr 3 Tag heimer de in Nassau verbracht.

Miteme Lokale Typ heimer es "Privats" Turischtetüürli gmacht.

Si a Strand, hei "Sea Grapes" (Meeres Trubä) gseh u si zum berüehmte Atlantis Hotel. Ds tüürschtä Zimmer isch ca 25'000.- pro Nacht..!

Befor mir wider uf ds Schiff si, heimer no Zit in Nassau City verbracht. Si si dert bestens usgstattet mit Hard Rock Cafe, Starbucks, Burger King etc.

D Ussicht vo üsem Schiffli uf ds Disney Luxus Schiff. Ja, es isch e Wasserrutschbahn obe druff u ja, me het sogar d Disneyfiume wosi uf dr Grosslihnwand näbedrann abgspiut hei bis übere ghört.. Neid!!!

Abfahrt vo Nassau usem Hafe mit Ussicht uf ds Atlantis Hotel

Nume churz. We dr Chef de Service agfange het ds Buffet eröffne heimer üs einisch meh amüsiert.. Nid nume wiumer leckers Züg i aune Wariante gässe hei, sondern o wiumer luschtegi Lüt hei chönne beobachte im Bereich u ungerem Motto "Essen und verfressen werden!"