AUSTRALIEN CETRAL 2012
Vom Cape Triblulation hei mir üs de ufe Wäg gmacht is innere vo Oustraliä.
Zersch heimer mau no chli müesse ache fahre, bis Charters Towers bis mir de hei chönnä übere ha.
Scho zimlech gli isch aues numeno gradus gangä u es si chuum me Kurve cho. Wenn mau e Kurve isch cho de vilich nach 50 Kilometer. Mängisch isches o über 15 Minute lang gange bis üs es angers Outo isch entgäge cho.
E chline Rägä cha e super Ungerhautig si. U us lutter Längwili cha es fründlechs Winke am entgägekommende Outo liecht bis mittuschwär usartä.
Mount Isa, di erschti "grossi" Stadt hei mir nach 2 Tag erreicht.
In Mount Isa, e Minestadt wo Blei, Siuber u Kupfer abbout wird isch öppe glich gross wi d Schwitz mit nume ca 20000 Iwohner.
Nachdäm d Japaner 1942 Darwin bombardiert hei, isch in ganz Oustralie e Invasionshisterie losgange. D Spitauleitig u d Minegseuschafte i Mount Isa hei drmit grächnet, dass sie uf Grund vo de wärtvoue Metau es witters Zieu fürne Agriff si. Sie hei sich entschide e Luftschutzruum für Personau u Patiänte z mache. I 6 Wuche isch am weschtliche Teu vom bestehende Spitau es Stouesyschtem mit 3 Igäng u Notluke entstande.
Mount Isa isch schlussändlech nie agriffe wordä u si hei die Rüüm uf Grund de chüehle Temperature dert unger für ds Personau brucht.
1996, bi Bouarbeite am Spitau, isch plötzlech e Bulldozer imene Spaut im Feus versunkä. Si hei vermuetet dases e Igang zum witloufende Minesystem isch, aschliessend hei si ds verschüttete Untergrund Spitau mit viune autä Sachä gfunde.
Ungerwägs...
Üsi nächtlechä Bsuecher wo eim am Zäiä chöme cho knabberä!
"Strassezüg" si Laschtwäge zwüsche 1 u 4 Ahänger läng.
Uf dr normale Strass isches für Outos nid so schlimm die z chrüzä.
Wi mir vo Fahrer mit Camperahänger erfahre hei isches dr Horror für sie.
Wiu:
- sie si maximau 53.5 Meter läng
- hei es maximau Fahrzüggwicht vo 132 Tonnä OHNE ZUGWAGEN
- si maximau 4.60 Meter höch
- sie fahre strikt im vorgäbnige Tempo u nid lengsemer (100kmh) u brämse düe si gar nid gärn
- sie hei zwar absoluti Übergrössi, drücke eim aber hinger drann oder überhole eim.
Mir si paar Mau überhout wordä u da luegtme im erschte Momänt nid schlächt, hei aber du ab u dann o mau sie müesse überhole was garnid so eifach isch we eim d Sicht u etlichi Meter vor Strass abdeckt wärdä.
Karlu Karlu
D Devil Marbles isch e heiligi Stätt vo de Aborigines.
D Bedütig vom Begriff Karlu Karlu isch "rundes Objekt".
D Aborigines säge es handlet sich bi de Feuse um d Eier vor Rägebogeschlange us dr Troumzit.
D Troumzit isch dr Zentrau Begriff für d Mythologie vo de Aborigines. Es handlet vore universellä, ruum u zitlosä Wäut, us dere di reali Gägewart, erklärt somit wie aues enstande isch u begründet di ungschribene Gsetz nach däne d Aborigines läbä. D Ereigniss vor Troumzit feschtigä dr Gloube im Land, Feusä, Queuä etc.
Die Stätt spiut dahär i de Zeremonie u de Legände vo de Uriwohner e sehr grossi Rouä.
Alice Springs
die gröschti Stadt zmitz im Outback u mindischtens 1500KM vore nägschte grosse Stadt entfernt.
Alice Springs isch ca 1872 entstande bim Bou vore Transoustralische Telegrafleitig. Sie hei dür z ganze Outback Telegrafstatione gmacht u dr Landvermässer het bim uswähle vom passende Gländ in Alice Springs e Teich irtümlecherwis as Queuä ghaute. Zu Ehre vor Ehefrou vom Chef (Alice Todd) het är d Wassersteu Alice Springs touft. Sie isch e Teu vom Flussbett wo nach heftige Rägä ds Wasser sehr lang hautet u dert heisi d Telegrafstation errichtet. D Sidlig isch aber 4 Kilometer südlech dr Telegrafstation entstande u het zersch Stuart Town gheisse. Dä Ort het aber ufgrund Mangu vo Infrastruktur ke wittere Zuewachs gha bis ca 1929 d Great Northern Railway d Sidlig erreicht het. 1933 heisi d Telegrafstation nach Stuart Town verleit u dr Ort i Alice Springs umbenennt. D Wirtschaftsgrundlage vo Alice Springs isch d Rinderwirtschaft, Kameufarme u dr Bärgbou gsi. Somit het di Stadt nadisna chönne wachsä.
School of the Air
Di Schueu gits mitlerwile scho sit 60 Jahr. Früecher heisi vo Alice Springs us d Chind mit Kurzwäuefunk usem Studio im Outback ungerrichtet. Vor 10 Jahr heisi du umgsteut uf d Internettechnologie u ds ganze Studio vergrösseret mit verschidene Kameras. Es gseht us wines Nachrichtestudio. Shool of the Air gits ono a paar angere Orte in Oustralie. D Schueu in Alice isch aber bis ize di grösschti. Si hei Schüeler ufere Flächi vo 1.000.000 km² verteut. Ca 15 Prozänt si Aborigines Chind. D Holly wohnt am wittischte (1465Km) vor Schueu furt.
Schueu isch komplett vom Schueuamt finanziert. Jedi Familie bechunnt während dr ganze Schueuzit e Kompiuter, e Webkamera, Drucker, Fax, Sateliteschüsslä, Baschtumateria etc. gsteut. D Ufzgi wärde per Mail ad Lehrer gschickt. Jedes Chind het pro Tag ca 1 Stund Gruppe oder Einzuungerricht per Internet. Dr räschtlech Tag lernt ds Chind mit de zuegsändete Materialie (wird ir Zentrale ine Mappe verpackt u per Flugzüg bracht) unger Aleitig oder Hiuf vo de Eutere, Gschwüschterti oder ere spezieu für das igsteute Person. Ire Schueustund per Internet mit Webcam het e Lehrer maximau 10 Schüeler. D Lehrer chöi Schüeler diräkt asprächä, wägschautä, zure Gruppearbeit zämeschaute u d Chind hei sogar e "Handufha" Chnopf wosi ufgrüeft chöi wärdä. Us dr vououtomatische Bibliothek wärde CD-Roms, DVD u Büecher mit de Schueubüecher verschickt. Einisch pro Jahr gö d Lehrer ihri Schüeler is Outback go bsueche. Entwedr mitem 4WD Outo wosi vorhär drführ instruiert wärde oder gad per Flugzüg. Dahei wärde Problem, Frage etc. mit aune Lernbeteiligte besproche u auefaus optimiert. Da d Chind relativ isoliert im Outback ussä läbä isch d School of the Air di erschti Sozialisationsmüglechkeit mit andere Chind usserhaub dr eigete Familie. 4 Mau pro Jahr träffe sich Chind, Eutere u Lehrer in Alice Springs zure Schueuwuche.
Eigentlech hei mir chli usserhaub vo Alice Springs weue go rock carving luege.
Mir si schlussändlech aber ca 10km witt cho u hei üs e Trailler Haagä igfahre wome nid het chönne vorhärgseh. Guet, da het Tinu öppis ztüe gha. Mir si zrugg u hei bi Beaurepaires zuechegha u schlussändlech e nöie Reife becho. U das isches du äbä oscho gsi. Guet. Da het Tinu widr öpis z tüe gha.
Känguruschwanz: nid probiert!
Känguru Steak: ungwohnt, nid schlächt, glich komisch.
Wiudi Kameu in Oustraliä.
Aues klar, odr?!
Uluru
Der Stein der Steine im Uluru- Kata-Tjuta Nationaupark.
Die absolut wichtigschti Stätt für d Aborigines. Si sägä d Troumzitreis füehre der ane u ändet dert.
Uluru vo de Aborigines gnennt u Ayers Rock vo de wissä isch ca drü Kilometer läng, bis zu 2 Kilometer breit u het e Umfang vo ca 9 Kilometer.
Witter i däm Park si d Kata Tjuta (Olgas).
Im gebiet umä Uluru läbe sit über 10.000 Jahr d Anangu (Stamm vo de Aborigines). 1873 het dr William Gosse aus erschte Europäuer dr Stei ufere Expendition entdeckt u hetnä nachem Premierminischter Henry Ayers "Ayers Rock" touft. Uf wittere Expeditione hetsech usegsteut, dass das Land ume Stei für Landwirtschaft nid geignet isch. Jedoch si witterhin Entdeckigsreiser u Wüsseschaftler agreist wo ds ganze Gebiet erkundet hei. 1920 hei di Wissä Teilä vom Hütige Nationaupark zum Reservat für Aborigines gmacht.
Di erschte Turischte si 1936 cho u di europäischi Besidlig het ide 40er Jahr agfange. 1948 heisi di erschtä Strasse u Wäge für Outos gmacht. 1958 heisi ds ganze Gebiet zum Nationaupark erklärt u dr Park "Ayers Rock - Mount Olga Nationau Park" gnennt. Ds erschtä Motel u e Landebahn isch 1959 entstande. Nachere Gsetzesänderig 1976 umene Grichtsentscheid im 1985 isch ds Gebiet ad Anangu zrugg gangä. Jedoch si si verpflichtet, dr Park für 99 Jahr a australian National Park u Wildlife Service z verpachtä.
Im 1993 isch Uluru z erschtä mau näbe Ayers Rock, i Proschpäkte, Strasseschiuder etc. usgschribe wordä. Ds letschtä Strasseschiud isch im 2002 uf "Uluru (Ayers Rock)" gänderet wordä.
O dr "Mount Olga" het iz mit "Kata Tjuta" widr si ursprünglech namä.
Im ganze hei mir 3 Tag im Nationaupark verbracht. Campiere im Park isch absolut nid müglech. Für das hets gad näbedranne ds Dörfli Yulara mit scho nume 2000 Mitarbeiter.. Viu Resort, Wohnige, Campingplatz, Restaurant, Coiffeur?!.. Aues wome haut so brucht ir Wüeschti ussä..
A eim Tag si mir zersch miteme Ranger 2 Stund es Stück am Uluru entlang glüffe u hei sehr viu übere Stei und d Anangus ghört.
Aschliessend si mir di räschtleche 9 Kilometer drum um no allei witterglüffe.
Mir würde gärn ganz viu drüber no Berichtä. Aber es sprängt Momentan gad i Aune Bereiche dr Rahme. Eis no. Dr Uluru het verschideni Steuä wome weder darf Fotografiere no Videoufnahme machä wius für d Anangus wichtigi Steuä si.
Kontrolliert, abbrönnts Gras
Auti Hingerlasseschaftä..
Wunderschöni Höuzer
Schöni Landschaftä..
Uluru am Morgä
Uluru am Namittag
Uluru am Abä
Mir hei üs mitere riise Schüsslä Bierchermüesli ufe Wäg gmacht u si ganz allei mit super Ussicht dr Sunneuntergang ga luegä.
Uluru bim idunklä
Kata Tjuta
36 Bärge, ca 30Km entfernt vom Uluru. d Kata Tjuta si vom europäische Entdecker Ernest Giles 1872 entdeckt u nach dr Königin Olga von Wüttenberg touft worde.
Kata Tjuta heisst für d Anangu übersezt "viele Köpfe" da ds dr Bärg so sehr guet beschribt. D Kata Tjuta befinde sich im Besitz vo de Anangu u uf Grund dr Mythologie mit dr Troumzit verbunde.
D Anangu nütze o dä Ort für Rituau u isch us däm Grund für d Turischte nume sehr beschränkt begehbar.
D Schue si u blibe wou huere dräckig!
"7 Sisters auf der Reise, sitzen am Wasserloch"
Kings Canyon
Dr Canyon isch e Teiu vom Watarrka Nationaupark und nid witt furt (250km mitem Outo) vom Uluru.
O dr Kings Canyon isch für d Aborigines e heiligi Stätt, isch aber für d Turischte zuegänglech. D Feuswänd si us rotem u gäubem bis wissem Sandstei. D Wänd si zum Teu über 300 Meter höch. Erosion vo Sunne u Wind hingerlaht di verrundetä Formä.
Zersch mau steil..
Was mir uf dr 3 Stündige Wanderig süs no aues hei gseh..
E super Ussicht i Garten Eden
Welä Wäg?
Ungerwägs..
Ufem Wäg zrugg Richtig Sydney hei mir in Coober Pedy, "weisser Mann im Loch", haut gmacht. Coober Pedy nennt sich säuber "Opal Hauptstadt der Welt". Ca 3/4 vo de wäutwitte Funde vo wissem Opal stammt usem Gebiet rund um Coober Pedy. 100ti Kilometer um Coober Pedy si fasch komplett usghöut. Di extremä Summertemperature (47 Grad im Schattä) u dr Opal-Abbou hei drzue gfüert, dass di mieschtä Iwohner i ungerirdische Wohnhöline läbä u i de vile Mineschächt schaffä. Witters hei si dert Hotels, Kiuchä u Friedhof ungerirdisch.
Mir hei üs dert es Museum agluegt. Spannend, aber es Vöukli für sich!
Ungerwägs..
Dr Witz a däm Schiud:
I 240 Kilometer nume 1 Känguru gseh. Jedoch aber tuusigi Geissä!
Zrugg in Sydney hei mir ds Outo nach 70 Nächt abgäh u mau es grosses Zimmer zum puffnä gnossä. Dämentsprächend heimer o es riisigs Päckli uf d Poscht ta. Dr Inhaut wirdse am Zoll de no fröiä.
- e Pfannä
- e Trailler Haagä... etc.
Hie in Sydney isch sitt üsem letschtä Bsuech dr Winter igchehrt.
Das heisst es schmöckt nach Herbscht oder im Dorm nach angere Grüch u isch düre Tag so um di 15-18 Grad.
I 3 Wuche si mir de churz widr e Nacht in Sydney. Mau luege wi de ds Wätter hie im tiefschte Winter isch.
Bis denn houemers aber id Südsee..
