AMERIKA SÜD 2012

Dr Flug vo Las Vegas isch am Morge am 6.00 ds Fort Lauderdale acho. E agnähme Nachtflug isch angers!  Völlig übermüedet hei mir de dr öffentlech Bus gsuecht u gfunge. Nach 2Stund, 2 Mau Umstige plus paar hundert Meter loufe mit Sack u Pack simer de äntlech im Hostel acho. Leider hei mir no nid chönne itschegge, auso hei mir ir Lobby gwartet u si z mitz ide Lüt igschlafe...

Die witere Täg ds Miami Beach hei mir eigentlech mit chli bade u nid viu angerem wöue gniesse. Aber ds Wätter wo dr Hurricane Isaac bracht het, isch aues angere aus toll zum bade gsi... Üsi zwöi junge Mitbewohner usem schwabe-lendle Döitschland, hei üs aber beschtens ungerhaute!

Churzi u intensifi Rägegüss verwandle d Strasse schnäu ine See.

Grägnet hets vo jedere mügleche Site...

Abwarte, Nachos u Sushi ässä..

Nach üsem Bahamas-Usflug (wome seperat cha nacheläse) simer nomau paar Täg ds Miami ir Stadt gsi. Unger angerem ou in `Little Havana`. De Amerikaner isches nämlech immerno nid erloubt nach Kuba z ga, o wes vo Florida us nid wit furt wär! Deswäge zelebriere si Kuba in Little Havana.

Hie u da simer o im Starbucks azträffe. Mir überlege üs o ab und dann gueti Nämä zum z Kafi la aschribe..

Da mau Furz-Normau.

Mitem Mietouto hei mirs de mau i Walmart gschafft. Riiisige Ichoufslade, 24 Stund offe, u je speter am Abe me geit, umso meh Lüt gsehtme wo nöii War i di totau lääre Regau füue. Heisst aber nid dases weniger Chunde het. Im Gägeteu! D Wägeli wärde o bevorzugt eifach gad ufem Parkplatz la ds stah oder wärde is Bandeli gsezt. D Sammusteu wi mir das kenne existiert. Isch haut aber mängisch paar Schritt entfernt..

School-Bus: immer schön ahaute we dä ahautet, blinkt u jehnschte Züg usfahrt! Süsch choschtets mindeschtens 250 Dollar Buess bim erschte Mau überhole.

Vo Miami us geits über 42 Brügge u 250 Km nach Key West. 

Gfroorne `Key Lemon Pie`

Mir si z Fuess i de beliebte Strasse vo Key West umeglaueret bire ungloubleche Hitz plus höche Luftfüechtigkeit. Di einzigi Abchüehlig, au paar Meter e Schischi-Turischteshop mit Isige Temperature u Föhn dases eim fasch abglüpft het.

Dr südlechscht Punkt vo de USA. Eigentlech nid. Denn dä wär uf Hawai`i, u isch ca. 6 Breitegrad witer unger aus dä ds Key West.. Aber mir lö ds itz Mau.

Es schiint egau z si, uf welne Insle me isch, überau hets Hüehner uf dr Strass wo niemerem ghöre! E Insu-Chrankheit?

Wär wot wüsse was d Marilyn Monroe drunger anne het mäudet sich bi Dinu unger dr Nummere 004176....

Eis vo de Tourischte-Schpektaku uf Key West, dr Sunneungergang. Ds Pier isch am Abe zimlech gfüüt, u mit richlech Aukhou wo a Turischt bracht wird, zelebriert mä dä Ungergang.

Dr Afang vom Highway 1.  Dä geit vo Key West dür 14 Bundesstaate bis zur kanadische Gränze u isch 3846 Km läng.

Everglades. Die beschti Zyt zum Tier beobachte isch leider nid jetz, sondern im "Winter". Das heimer ja gwüsst u si glich uf d Suechi..

Wer sucht der findet.. Angeri Frag. Wär suecht eigentlech freiwiuig bi tuusig gfüute Grad Alligatore?!  

Eine isch gmüetlech cho z schwümme u a üs verbi padlet. Het sich aber näre im Schatte versteckt, o dene isches eidütig z heiss! Bim zruggfahre heimer no es chlises uf dr Strass gseh.

Näbscht de Alligatore u Krokodiu (dr einzig Ort uf dr Wäut wo die 2 Arte so nach ufenang läbe) chame hie ou Panther, Schwarzbäre, Schlange, Waschbäre, Manatees, viu verschideni Voguarte u viles angere beobachte. Da hätte mir üs aber stundelang müesse uf d Luur legä, u das isch nid so üses Ding. (Ohni Bier)

Schiudchrött gits ouno, weme de gnue schnäu zum fahrende Outo usegumpet zum fotografiere.

E wittere Usflug ide Everglades hei mir ids Shark Valley gmacht. Miteme Bus simer gueti 2 Stund düre Bitz gurket, hei viu über Alligatore u d Everglades ghört.

Dä Alligator het sich im Wasser versteckt...

E witere isch im Gebüsch gsi, u paar chliini (wo schiins 3-4 Täg aut si) hei mir ou no gfunde.

Nach de Everglades si mir a d Weschtküschte vo Florida. Herrlechi Stränd, weni Lüt, schöni Ville - chli Ferie-Feeling...

Ds Naples ufem Pier hei mir üs drmit vergnüegt de Pelikane zue ds luege wie si fische. 

5 Meter ufeflüge, vou garacho i ds Wasser stürze, e Schnure vou Wasser ds nä u d Fische usefiutere. Aschliessend dou sünnele u plöffä für d Fotografe.

9/11

9. Septämber

Uf Staatsaordnig si d Fahne uf Haubmascht gsi

Zwüsche Summer u Herbscht isch Brüetezyt für d Schiudchröt. Drmit d Turischte nid uf d Eier stöh wo im Sand vergrabe si, düe se d Ranger izuune.

A eim Strand hei mir e `Conch Snail` gfunge. Uf Dütsch isch das e Fächterschnägg. U das het dä Schnägg ou gmacht... Üs zersch agluegt u när wöue afuchtle mit sim Arm. Es isch schad chame hie kes Video ufelade...

Ds Bradenton hei mir de d Cusine vor Marina bsuecht u hei dört im Feriehuus vo ihrem Götti paar Tag verbracht. Es ganzes Huus für üs elei. Mir heis gnosse mau widr ruhigi 4 Wänd z ha u ds schlächtä Wätter het üs da überhoupt nid gstört. Im Gägeteu!

Mir si du no witter uche bis Clearwater beach. Dert hei mir mit däm chliine Schiffli üs uf d Suechi vo Deufiine gmacht. Zersch si mir i dr Lagune umegschipperet u hei no Erklärige übercho, weli Villa wäm ghört u wie viu Zimmer u Badzimmer die hei.. bla bla bla, wisi haut so stouz si uf settigs ;)  Eini ghört am Nigel Mansell (ehemalige Formu 1 Fahrer).

Deufiine hets nid grad viu gha, aber eine het sich de doch no lah blicke u het paar Sprüng gmacht.

Sunneungergang am Clearwater beach..

Huuui, doch de no chli "rosig"..

Ungerwägs i de Strasse u Wasserwäge vo Fort Lauderdale

E chli Rägä u när scho widr so öppis..!

Ds Outo Modä Durchzug isch ehner nid für im Räge "gmacht".

Dä typisch amerikanisch Chlapf isch uf au Fäu biuiger aus es Gabriole!

Churz zur Präsidäntschaftswau:

Im Fernseh chöme ständig Wärbeclips wo entwäder dr Obama oder dr Romney d Stimme vo de Bürger versueche ds übercho. Mit jehnschte Mittu probiere si, dr anger schlächt ds mache, u sich natürlech i ds beschte Liecht ds rücke...  Zur Zyt isch Tendänz knapp zu Guschte vom Obama, dr Romney verliert mit immer nöie komische Aktivitäte, Ussage oder äbe nid Ussage über sini Stüürsach Wähler.. Am 6. Novämber isch de die grossi Entscheidig, mir sägä "VORWÄRTS MIT OBAMA"!

Vorwärts aber ohni Obama verlöh mir dr Staat Florida u flüge i Staat New York für di letschte 3 Wuche vo üsere Reis..