ST. LUCIA 2019

Acho in St. Lucia, e Insustaat im sogenannte Bereich vorde Westindische Inslä ir Karibik und Mitglied im sogenannte Commonwealth of nations.

Es isch bereits fiischter gsi bi üsere Akunft, drum heimer es Taxi gno für zwar dä churz aber trotzdäm aspruchsvou Wäg bis zu üsere erschte Unterkunft in Castries.

Zum Istand heimer vor Rezeptionischtin namens Gini Whyski becho.

Ds Bier heimer oscho gad mau testet.

Bi Tagesliecht het de das Ganze scho ume angers usgseh. Feie chli e Villa wo mir ds Castries übernachtet hei.

Z Fuess simer de a Flughafe ds Mietouto ga übernä. Isch eigentlech aues beschtes gloffe, bis uf dä Zytpunkt wo me d Kaution mit dr Kreditchartä het müesse hingerlegä. Dr Seich isch, weme de vom Chärtli dr Code nümme weiss. Ferie ahoi. D Erlüüchtig isch de cho..

Outo - Check.

Säuber Outofahre macht Spass, isch aber tendenziell aspruchsvou. Spetischtens denn weme vo de Iheimische mit Chlibusse gjagt wird. Zum Glück isch gad ke Saison vo Chrüzfahrtschiff wo tuusendi Bsuecher pro Tag i die Bussli verfrachtet wärde und einisch um d Insle heizä. Die paari wos het gha hei bereits glängt.

Ou ir Karibik het d Sunne mau e Pousä.

"Soufrière, my hometown" het üs eini a däm Touri-Ussichtspunkt gseit.

Es isch nid nume ihri Heimatstadt. Soufrière isch dä Tourischte-Spot uf dr Insle mit sehr viu Arbeitslosä wo sich es paar Dollar wei verdiene. Mit Insiderinformatione über d Insle, Restauranttips, Parkplatz iiwise usw. wirdmä regurächt belästiget.

Ab is Hotel.

E Welcome-Drink, es riise Zimmer mit Chuchi und e Baukon. Mit Hängematte.

Top. Längt.

Ussicht - nüt gseh uf Grund schlächtem Wätter.

Bi Nacht wos ufklahrt het, erahnt wi schön dases am nächste Morge wird si..

..ok, nid schächt.

Rundgang dür üses Hotel zum Zmorgä. Für dases es *** isch no guet u o sehr schön, jedoch rächt tüür. Das liit aber eifach tatsächlech ar Inslä säuber und am Touri-Spot hie.

Soufrière City.

E chlini, hübschi Stadt. Jedoch heimers rächt sträng empfunde. Hie geit nämlech ds ufdringleche weue Gäud verdiene vo de Iheimische witter.

Da mir in Kamdobscha u süstige Orte vor auem in Asie bereits sehr usfüehrlech und kreativ "beläschtiget" si wordä heimers de gli mau mit Humor gno.

Im Schnitt wei 7 Lüt dir glichzitig e Parkplatz organisere, füf glichzitig e Tour, di angere drü wei di dür di `grossi` Stadt füehrä..

Flaniere, Gäud organisiere, ichoufe, witters.

Ab id Natur u niene gross ahautä - mir müesse süs gfüut aues choufä.

Tet Paul "Stairway to heaven"

E schöni, flotti Tour miteme persönleche Guide.

Sehr viu Infos über Fauna und Flora vor Inslä.

Einä vo de beliebtischtä Stränd uf dr Inslä isch dr Sugar Beach.

Grundsätzlech isch zu de Stränd z sägä, die si öffentlech u dörfe vo aune gratis brucht wärdä. Ds Land drumum jedoch, isch i de meischte Fäu verchouft. Privat oder a Hotels. U da isch d Knacknuss. Viu Hotels wie zB. ds Sugar Beach Resort verlange Gebühre damit me dür z Hotel cha passierä - füehrt ja logischerwiis o ke angere Wäg zum Strand. 50 Dollar wärs gsi pro Person inkl. Guetschiin zum Ässä (wo aues i Auem numeno tüürer wär wordä) u dr Wucher für miteme Boot privat oder mitere Tour hin u zrugg zga o unger jedem Souhung. Tüürer aus e Tagestrip ir Südsee. Da heimer natürlech nid mitgmacht.

Sulfur Springs

E sogenannte "drive in Vulkan" (lut Internet dr einzig uf dr Wäut) u das wiume drann cha verbi fahrä und vo wittem brodlendi Matschfäuder luege. Mir phoupte aber, das mir in Amerika mindischtens 10 mau nöcher a so öppis härä gfahrä si aus hie. Sit 200 Jahr ischer nümme usbrochä, är blöderlet und stinkt eifach vor sich hi. Chli witter unde hättme no für viu Gäud im Schlamm chönnä badä. Dr Adrang für die üsserscht gsundi Aglägeheit isch gross gsi.

Ungerwägs, dr Usblick uf Soufrière..

Diamond Waterfalls

D Houptattraktion im Diamond Botanical Garden.

Viu schöns z gseh wi zum Bispiu d Pinkt torch ginger, di roti Ingwerbluemä - Fackellilie, Wilder Ingwer oder Philippinischi Wachsblueme gnennt. Immer wider schön, di heimer scho z Asie oder o z Hawaii viu atroffä.

Wandere mit Flip Flops dür Banane, Farn u Wasserfäu. Eifach guet, guet, guet.

D Sulfur Springs spisä d Diamond Falls mit Wasser. Dört mische sich Rägewasser u z Wasser vor Schwäfuquelle. Dr Fau isch ca 17m töif, je nach Liecht nimmt z Wasser ungerschidlechi Farbe a und dür z minerauhautige Wasser wird z umligende Gestei mit verschide farbige Ablagerige bedeckt. Bade isch aber nid grad empfohle...

Säubergmachti Glace - lecker.

Witter ungerwägs..

Ufere scho bau chli offroad Strass in Richtung Strand..

O hie isch dr Strand dürnes Resort abgschottet. Me cha aber gratis derdür u dr "öffentlech" Strand bruchä.

Warum mir hie si. Es sig e guete Spot zum schnorchlä:

Vorem Znacht no a Dorfstrand ga badä.

Wi meischtens di einzige Tourischtä..

Eis vo de wenige Restaurant wos het in town. D Menuecharte isch wi fasch überau i de Restaurants uf St. Lucia sehr übersichtlech: Salat, Fisch, Pommes, Teigwarä u no irgend es Dessert.

Nöie Tag, dr glich wahnsinnig schön Usblick!

Nachem Zmorge ab ids "Dorf" - obwou me eigech fasch wett ir Hängematte blibe u nur drüber us luege.

Mission ohni "Belästigung" isch z Ziu. Schwirig.

D Mehrheit het ke Job, ke Job meh - sezt nur no ufe Tourismus u verdient so liechts Gäud. Schnäu viu Gäud, Periode wo chum Chrüzfahrchiff u Touriste achöme, Längwilig, Aukohou. Au die wo no einigermaase nüechtern uf de Bei si quatsche d Touris a - was ds ganze für viu nid sympatisch macht.

Getränk u Snacks ichoufä..

Es Hobby vor Marina - frömdi Länder u dere Läbesmittulädä.

Wi so viu het St. Lucia dr Hr. Kolumbus entdeckt. Ersch aber uf sire dritte Reis ca 1500. U wi bi so viu angere Insle o, hei d Brite mit de Franzose hin u här Krieget.