SCHWEIZ - SÜDTIROL- ITALIEN 2018

Summerferie, nüt planet. Nid gwüsst obmer i Gartä gö oder furt.

So heimer nach langem hin u här z Bussli packt u si adiööö..

Chur! I die Richtig heimers vor. Die erschte paar Stund haut chli Outobahn, drfür när chli gmüetlecher.

Ds Bergün simer es chliis Tääli hingere. Irgendwo entlang vom Tuorsbach hei mir übernachtet. Wo`s de het agfange schiffe us Chüblä us nümm het weue hörä hets de ou afa i ds Outo tropfe.. Magnet u Plastig-Seckli = Problem vorübergehend glöst. McGyver wär stouz uf üs!

Bergün; öppe 500 Iiwohner, gründet im Jahr 1209.

Härzigs Dörfli.

Über x Kurve u Stigige simer de ufem Albula-Pass acho.

Dr orange Bus passt perfekt i di grüen,graui Landschaft..

Die Iiheimische si nid Kameraschüüch. 

Dr Albula-Pass. 2312m.ü.M., oberhaub vor Boumgränze, e Äbeni wo me fasch nid gnue überchunnt vom luege.

La Punt, Bever, Pontresina u när ufe Camping ir Nöchi vom Morteratsch-Gletscher.

Eine vo de wenige Gletscher wo me cha dra häre loufe. Ungerwägs gsehtme dür Markierige sehr idrücklech i welem Jahr dr Gletscher bis wo isch cho. D Wanderig duuret vo Jahr zu Jahr immer wie lenger.

Klimawandu sei Dank, gellen Sie Herr Trömp!!!

Ganz ungfährlech isches de bim Gletscher nid grad. Immer wider löse sich Steine, Steinli u Felse u purzle über d Sitewänd Richtig Talbode. Paar mau heimer däm Schouspieu chönne zueluege oder hei ghört das ume öpis abechunnt. Churz nach üsem Bsuech, isch e 6-jährige Bueb vomene Stei am Chopf troffe worde u isch verstorbe.

1878 het me d Gletscherzunge nach knapp 400 Meter loufe erreicht. Ds ganze Tau isch Gletscher gsi. Hüt muess me locker 3km loufe.

D Dicki vom Gletscher mau nid beachtet.

Ou die chline Sache am Wägrand müesse gseh u gfötelet wärde!

Es Biud vo Kanada.

Nei, isches nid, aber chönnt.

Ungerwägs..

St. Moritz und WM-Finale, diräkt am See hets es Zäut gha mit Public-Viewing. Zum Glück isches no gheizt gsi, süsch wärs de scho fasch chli früsch worde bi däm rägnerische Wätter.

(FRA-CRO 4:2)

Abfahrt vom Camping, nächschts Ziel; Italien, Region Dolomiten..

Nach 17km isch de fertig gsi. Bus verreckt u nümme gange. Telefoniere, Versicherig, Abschleppdienscht..

Denn hei mir no ghoffet, dass es nüt Grössers isch.

Erschti Diagnose: nid "auf die Schnelle" reparierbar = abschleppe.

Bir Garage d Ernüechterig: definitiv öpis grössers!

(Isch bis itz Ändi Jahr o geng no nid gflickt wius schwirig isch ds richtige Ersatzteili ds finge). Isch z erwarte gsi bimne Bussli mit Jg.86.

Nach paar Telefon u warte hei mir de uf St.Moritz e Mietwage chönne ga hole. Aues Gepäck u Nötige umlade u am Bussli e gueti Heifahrt i ds Kandertal gwünscht. Er isch per Laschtwage es paar Tag speter heil dert acho.

3 Stund später si mir de wider ds La Punt düre gfahre. Nach dere Aktion hei mir müesse feststeue, dass mir für au die Action wo mir hei gha no schnäu drann si.

Mit somene Outo simer schneuer ungerwägs aus mitem Bus. Het o si Vorteu.

Mitere Fahrt düre Schwizer National-Park simer de Richtig Italie.

Dank dr Versicherig hei mir üs Hotels chönne bueche. Nid ds Gliche wie im Bussli schlafe aber ou OK. Die erschti Nacht simer imene Hotel gsi, wo usemene Gwächshuus es Hauebad hei gmacht. Cooli Idee! Italie u Pizza ahoi!

Nächste Tag, nächste Stop im Pragser Tal, Südtirol:

Pragser Wildsee / Lago di Braies

Dr See isch e Teil vom UNESCO-Wäuterbe Dolomiten und definitiv dr meischt bsuecht See im Südtirol. D Zuefahrtssrtrass isch zwar vo 10.30 bis 14.00 zue gsi u me het i dere Zit nume chönne hingereloufä oder dr Shuttlebus bruche, glich hets abartig, abartig, massehaft Lüt a däm See gha dases üs tatsächlech eis het gä. Dr Plan einisch drum z loufä heimer binne Sekunde verabschidet u üs widerwiuig ufnes Bootsstäginseli grettet.

Ungerwägs..

Here we go,

d Dolomitä

Fahrä, ahautä, wanderä, fötelä, fahrä, ahautä..

..wanderä, fötelä, fahrä..

bis Cortina d'Ampezzo.

Was für di einte es renomierts Winter- und Bärgsportzäntrum isch, isch für üs e italiänische Fuetterhimmu.

Fahrä, ahautä, wanderä, fötelä, fahrä..

Pordoi Pass / Pordoijoch

Das isch dr zwöithöchst Gebirgspass mit durchgehender asphaltierter Strass i de Dolomite z Italiä.

1901 hetme di grossi Dolomitestrass agfange boue u aschliessend Hotel. 

Di turistischi Wäue isch mitem erste um zwöite Wäutchrieg, wo unmitubar im Gebirge stattgfunde het, churz ungerbrochä wordä. Da nachem zwöite Wäutchrieg nid viu kaputt isch gange, isch dr turistisch Ufschwung schnäu wider cho.

Spontan heimer entschide dasmer miter Seilbahn ufe Pordoispitz gö..

Hübsch, oder?!

E plateauförmige Felsgipfu im Massiv Sella.

Unabzuhnet hetme chönne druf umewanderä u d Ussicht vo 2950 Meter über Meer gniessä..

Vo dert wos eim Angst macht muesme mindistens no 1 Schritt drüber us!

Märlisee vo de Dolomitä.

Zu Rächt!

Wäremer mitem VW-Bus zitmässig söfu witt cho hättemer hie sicher änet dr Strass ufem Parkplatz übernachtet u dr Sunneufgang am Karersee gluegt. 

Bade isch hie übrigens strängstens verbotä!

Imene guete Momänt gits hie di schönste Spiegeligä mit de Tanne u de Bärgä..

Üse flitzig VW Sharan (neu u iglöst ersch zwöi Monet vor üserer Mieti) het üs mit viu Komfort bis is Südtiroler Unterland nach Leifers bracht.

I üsem Verischerigsbudget enthaute, es Hotel mit Pool u Whirlpool ufem Dach ;)  

Gardasee

Was fürnech Hochburg für Schwizer u Dütschi!

Mir hei üs es Zimmer imne chline Hotel am See gschnappet us gnossä..

Herrläch. Mir chöi üs es zwöits mau am Lago di Garda vorsteuä..

Chli wi bi üs im Tessin..

Vilich wärs im Tessin scho bau wider schön we gfüut aui hie si?!

Aaah, bella Italia!

Di ca. 10 Pizza. Aber söfu fein sisi de Dahei bi wittem nümme..

Mit Glace u Schlenderä d Italonacht la usklingä

Scho id Schwiz oder no e Nacht in Italie..?!

Mir hei üs füre Lago Maggiore entschidä.

Äue dank em Gardasee zimlech usgstorbe. 

D Suechi nach Fuetter het üs bis uf Stresa bracht..

Die Ruhe vor dem Sturm!

Di ganzi Nacht hets krachet u brätschet..

Nacheme lengere Stop in Domodossola zum ichoufe ufem Märit u im Carefour simer richig Heim.

Ganz praktisch heimer de z Mietouto z Thun bi Europcar chönne abgäh u z Fuess heimloufä. Dr Betrag vor Versicherig heimer ighaute u si heinis aues zaut.

Glück im Unglück. Leider nid mitem VW-Bus, jedoch aber schneuer vorwärts cho u witter aus planet.