NORWEGEN 2018
Ferie im Februar. Was macht me da? Skiferie? Wider irgendwo ane Strand?
Tromsö? Für 200.- pro Person, wiso nid?!
Meer, Schnee u Bärge. Panorama-Flug inklusive..
So simer mit dr Helvetic diräkt vo Züri zimlech i Norde vo Norwege, chli oberhaub vo de Lofote. Ganz genau 344KM Luftlinie vom nördleche Polarkreis.
Geografisch gseh uf dr Breiti vo Nord- Alaska.
Aues schön u guet, bis.. dr Rucksack vom Tinu isch nid mit..
Das isch üs no nie passiert uf de letzte 111 Flüg! Irgendöppis isch ds Züri am Flughafe lätz gange, nume eine vo zwöi Rucksack hets ufem Diräktflug i Norde gschafft.
Wenigschtens si mir nid die Einzige gsi, vier angeri Gepäckstück si o nid acho.
Bis de ändlech öper am Schauter isch gsi, si zwöi Arüef vore Reisegseuschaft u e gueti Stund vergangä. Liecht gnärvt heimer de verno, dass dä no z Züri isch us 1-3 Tag cha ga bis dä Rucksack da isch. Wenns so witt wär uner achiem würe si dä üs verbi bringä. Flott.
Zum Glück heimer aui Thermowösch (leider o z guete vo zwöi Stativ) im Rucksack vom Tinu gha. Konkret: Tinu het ke Kleider, beidi keni Thermowösch.
Nachdäm mir e witteri Stund agstande si u de ändlech dr richtig!! Mietwage abghout hei isch üsi ersti Mission ichoufe gsi.
Ungerwösch, Zahnbürstli und Thermowösch.
Ersti Station zum übernachte: Lyngen Alps. Zimlech usserhaub im Gjätt u Chuefüdle fiischter.
Mir si nam Znacht guet 1 Stund ungerwägs gsi, hei gsuecht, bises plötzlech uftoucht isch. Di erschte Nordliechter! Was fürnes Fürwärch!!
D Iistellige für d Fotos hei am Afang müesse güebt wärde, es isch aber immer besser cho!
Obwohu d Liechter "nume" es 3-4 (vo 10) uf dr Skala hei gha, si sie rächt schöön u stark gsi. Nach 2-3 Stund Dusse ir Cheuti simer de totau gflasht z mitz ir Nacht zrugg id Unterkunft. Mir hei scho erahnet dases chönnt e strängi Wuche gä.
Erkundig vo de Lyngen Alpen. Minus 15 Grad, blaue Himmu u Sunneschin.
Wunderschön azluege, aber da wotme nid z lang blibä u luege bi Schattä u Wind!
Im Februar nimm d Häuigkeit da obe im Norde massiv schnäu zue. Ds heisst, di längä nächt verchürze sich massiv, di churze Täg wärde lenger.
Norwegischi Landschafte erkundä..
Unmänge a verschidene Fotos mache bi dere Kulissä..
Aues natürlech immer dickstens ipackt u so schnäu wi müglech!
Das ewige Eis. Emu im Winter.
Ungerwägs mit üsem Mietouto..
Wär auso mau interessiert wär amne Erfahrigsbricht (etlechi Outos heimer scho testet) chasech mäudä.
Mir si o a däm Tag bis id Nacht ungerwägs gsi u hei Nordliechter gseh..
Blaue Himmu, Sunneschyn, jede Tag. Wahnsinn.
Da bechöme d Minustemperature ganz e angere Steuewärt wius so schön isch.
Im Dorf Lyngseidet säuber hets nid gad dr Huufe gha. E Ichoufsladä, öpe drü Restaurant, ei Tanksteu, Schuelä und es Pflegeheim..
Es sehr ruhigs Läbä mit Fertigprodukt, Fastfood, Lachs u aute Lüt ;)
Sicher gäbig bi däne Wintere mitem Rollator u so.
Voutankt heimer üs fürne Usflug nach Finnland gmacht.
Gmüetlechi minus 28 Grad hei üs dert erwartet..
Grundusrüschtig i dere Wuchä:
Kameras u Handys
Nomau es Angers Gfüu wes eim d Nase bim schnufe veriiset oder me merkt dases ide Ouge ur Lunge chli harzet vor lutter chaut. Nid uszdänkä wisech das ganze hät agfüut wes bewöukt wär gsi!
Heisses Wasser us dr Thermoschanne gfrüürt u verstoubet subito..
Z Kilpisjärvi heimer churz aghaute u paar Sache gshoppet.
Es Büchsli Schaaf, es Fläschli Schlümpf u öpis undefinierbars..
Nei, natürlech nid. Mir hei wi immer u überau Gwürz wos bi üs nid git kouft.
Mitlerwile si d Temperature bis minus 29 gheit. Am Namittag. Bi Sunneschyn.
Pünktlech zum Sunneuntergang zrugg z Norgwegä..
Und no pünktlecher zum nächste Spektaku.
Minus 20 Grad, 2 paar Termowösch, Skihose, Winterschueh, T-Shirt, Pulli, Jagge, Haustüecher, Sturmhube, Chappe, 2 Paar Händschä u nach 5 Minute glich am frierä wius Windet. Klar, di best gmischti Usrüschtig isches nid u es wär no usboufähig.. Faus mir itz uf Winterferie umstige u jedes Jahr Wuchetelang bi Minus 20 Grad i Landschafte umegruppe überelgemer üs e tuusig Fränkigi Sach z choufä.
Am liide für eis vo de schönschte Naturschouspiel wo mir je hei gseh. Faszinierend, iidrücklech, spannend, unvorhärsehbar..
AURORA BOREALIS
Römischi Göttin Aurora, Göttin der Morgendämmerung / Griechischer Gott Borealis, Gott des Nordwindes
Elektrisch gladeni Teili vom Sunnewind träffe uf Suurstoff- u Stickstoffatome i de obere Schichte vor Ärdatmosphäre. Je nach Höchi gits angeri Farbe. I öppe 100km Höchi si sie grüen, i öppe 200km Höchi si sie rötlech.
Roti u vorauem blaui Nordlichter si sehr säute z gseh.
D Liechter wärde i Böge, Vorhäng, Corona u Bänder ungerteilt.
Wie u warum dases di verschidene Arte git isch immerno unklar.
Uf dr Südhaubchugle heisse d Liechter "Aurora australis". Aber ou das isch üs i denä Momänte z mitz ir Nacht so zimlech egau gsi.
Nach drü Nächt ds Lyngseidet hei mir üs ufe chürzer Rückwäg nach Tromsö gmacht.
Mit dr Fähre isches leider nume es churzes Fährtli.
36 Meter isch d Tromsöbrua höch. Boue hei si die Brügg vo 1957-1960. Bis denn het e Fähre aui u aues i ds Zäntrum vo Tromsö bracht.
Umeschlendere ds Tromsö ir Stadt, u wie duet me sich da ufwerme?
Klar mitere asiatische Suppe..
Üsi zwöiti gad nöi "eröffneti" Ungerkunft isch e 3-Zimmer-Wohnig gsi, wo mir di ganz Zit für üs allei hei gha. Gedige, wiu mit 4 angerne Persone wärs de öppe chli äng worde.
Mir hei üs dänkt, warum nid ono e Nordliecht-Tour buechä um meh z erfahrä über d Liechter oder no meh z gseh.
So simer miteme Brätsch vou Turis am Abe imne Car fasch zwöi Stund im Gaggo usetinglet. Ungerwägs hät de o jede Hinz und Kunz seue begriife wie und warum d Kameraistellig zum fotografiere söt si. Het de natürlech nie u nimmer klappet.
Ändlech acho u parat si de d Nordliechter hurti verbighuschet. Es isch quasi dr schlechtischt Abe gsi verglichä mit aune angere Nächt. Immerhin, es het gha, mir hei chli gseh. Schlussändlech ischs üs aber fasch stärbens eländ gsi vo de vile Güetzi und em vile Gaggo im Gaggo. Flieh chame ja de o nid us dere ganze Miserä..
Was me so rund um d Huustür gseht.. E churze öpe 20 Minütige Spaziergang bi Sunne u blauem Himmu. Iischaut u chum uszhautä bi däre Bisä!
E Usflug ufe Huusbärg "Fjellheisen" vo Tromsö het nid dörfe fähle.
IN LÖVE with Tromsö.
Sunneungergang am Namitag am haubi füfi.
Veldig hyggelig, oder?
Tromsö het ca 75`000 Iwohner.
D Jahresdurchschnittstemperatur ligt bi +2,5 Grad..
D Bärgstation isch 418MüM. Für üs ja nid sooo höch, aber für dört längts..
Wes de langsam dunku wird, wirds no schöner. Leider hei üs a däm Abe d Wulkä e Strich dür d Rächnig gmacht. Mir hätte gärn vo dört öbe us d Stadt u d Nordliechter gluegt.
So si mir früehzitig abem Bärg u si ufem Heimwäg no öpis Znacht ga choufe. Da derbi heimer e "Party-Brus"-Bruce-Willis gfunge..
Joel, sehr schön umgsezt.
Use usem Ladä hets üs scho dünkt es tuet sich öpis am Himmu.
Chuum dehei hets agfange, diräkt über üs volle pulle..
Nam Znacht ca 23.00 hets Dusse immer no chli glimmerlet. So hei mir üs de nomau uf d Jagd gmacht. D Wulche hei sich chli verzoge u d Ussicht vomene "nöie" Plätzli us, isch wider mau unbezahubar gsi.
Dr rot Punkt ir Mitti isch dr Tinu ide Skihose.
Innert Sekunde veränderet sich aues..
U no mit de Wulchä wosech verfärbä isches no einisch angers.
U so stöhmer widr mau z mitz ir Nacht allei im Gaggo ussä u starre bi minus 20 Grad a Himmu..
Wi a jedem angere Tag simer witt nach Mitternacht is Bett cho.
Ds Island fliesse d Wasserfäu im Februar no, ds Norwege si sie gfroore.
Trotz de längä Täg u de no lenger Nächt simer ufene Rundtour um d Insle Senja..
O die chliine Sache si es Foto wärt..
Oder o "wasme nid aues gseht bim bislä" gnennt!
We Dir nume wüsstet wie chaut, dass es da uf däm Loufstäg isch gsi!!!
Gfüut mit Biisä öpe Minus 35 Grad.
Aber d Ussicht..
Hüsli, Bärge, Fjorde, Ufer, Waud, Steine und, und, und..
Es git auso nid nume Nordliechter zum knipse!
Sunset downtown anywhere in Nowhere-Norway..
Ice, Ice, Baby!
Überraschend sehr schön uf Senja!
Durchus e Ort womer üs chönnte vorsteue zrugg z ga.
Sogar e Sandstrand hets/hätts. Leider si d Temperature nid so amächelig gsi zum ga bade. Wäresi äue o im Summer für üsi Verhäutnis nid..
E chline Stop im lokale Supermarkt heimer müesse nützä.
Mä cha eifach nid gnue übercho u zum Glück wirds de mau no Dunku..
Wobi Dunku chönnt widerum Nordliechter bedütä.. Never ending!
Dr Heiwäg.. Mitere Fähre hätt me super chönne die Rundi dräie, aber öpper het dr Fahrplan vorab nid gnau studiert.. So simer de am Hafe gsi u ke Fähre isch gfahre. Ersch ab Apriu bis Oktober.
So simer di bereits gfahrnä Stundä!! wider retour. Zum Glück?!
Scho churzum hei üs d Nordliechter uf üsere Heimfahrt belgeitet. Bimne Parkplatz heimer de ändlech chönne useha u ds Spetkatu ifah.
Pinkelpause inklusive bi windige -16 Grad. (Gschicht für sich..)
Bekanntlich hei die Dumme Glück, oder wie?!
Nächste Haut..
So simer scho widr bis um Mitternacht ungerwägs gsi u hei Nordliechter gjagt..
Um die Zit simer de scho fasch ganz allei ungerwägs ds Tromsö gsi u hei d Chance gnüzt d Eismeerkathedrale in Rueh u ohni Turiste-Puff z luegä.
D Eismeerkathedrale isch e evangelisch-lutherischi Pfarr- u Seemannschiuche u z Wahrzeiche vor Stadt. Ä ächti Kathedrale i däm Sinn ischsi aber nid, u jedoch glich giutet si aus die nördlichsti Kathedrale uf dr Wäut.
Am letschte Tag isch ichoufe u packe agseit gsi.
Feins Bier, feini Güezi, Schoggi..
Dr letscht Sunneuntergang, fein Znacht chochä u chli usruiä vor dr letschtä Jagd.
Voupackt u guet usgrüschtet simer mitem Outo nomau zrugg a dä Ort womer mit dr gfüertä Tour härä si. Es het chli meh Lüt gha aus denn. Ganz genau 3 Care, 4 Chlibusse u 2 Outo meh.
Herrläch!
E guete Spot und zum Abschluss nomau spannend u wunderschön.
I sibe Nächt heimer tatsächlech i jedere Nordliechter gseh.
U das, obwou im ganze Monet vorhär nüt/nid viu isch glüffä.
Vor Stadt bis a Flughafe ischme schnäu, dr ganz Flughafe isch chli u me isch schnäu derdür. Bim istige hets dr sogar scho dr Blick gä..
Bi bestä Konditione geits wider retour..
Nachere Wuche blauem Himmu, Sunne pur u huufe Nordliechter ernöit e Panorama-Flug obedruuf.
