MARTINIQUE 2019

Martinique ghört zu de sogenannte "kleinen Antillen" u zu de "Inseln über dem Winde". D Inslä wird no hüt vo de Iheimische Insel Madinina / Blumeninsel gnennt. Martinique isch aus Überseedépartement und Region Frankrichs e vouintegrierte Teil vom französische Staat u somit Teil vor EU.

D Bevöukerig isch zu ca 80% afrikanischer Härkunft, 15% si vo indischer oder afro-indischer Härkunft. Sogenannti "coolies".

Ca 5% vo de Iwohner si europäischer Abstammig.

Ersti Besidlige uf dr Inslä chöi bis 4000v. Christus nachegwisä wärdä. Öppe um 100v. Christus hei d Arawak vom Orinokogebiet (Indigenes Vouk in Venezuela) d Inslä besidlet. Im 10. Jahrhundert sid Karibe cho und aus erschte Europäer het natürlech dr Christop Kolumbus Martinique 1502 uf sire vierte Reis für Europa entdeckt. D Inslä isch 1635 im Name vo Frankrich kolonialisiert wordä u isch sithär bis uf drü churzi Periode frömder Bsatzig i französischem Bsitz. 

Nacheme Zwüschestop in Paris, simer in Martinique acho u si wi geng ufm schneuschte Wäg ga z Mietouto holä. Wi scho öfters erläbt, isch das aube scho e chlini Gschicht für sich. Spetischtens denn, we zwüsche Schlüssu u Outo fasch 1 Km zum loufä isch dürnes Gländ ane Ort wome nid dermit wür rächnä no öpis für si Outoschlüssu zbecho.

Nacherä länge Fahrt über d Inslä inklusiv erschtem Ichouf simer de im scho fasch im Fischterä acho. Z letschte Ziu vom Tag: Fuetter.

Üses Dahei für 1 Wuche. E chlini Feriewohnig mit Chuchi in Anse-à-l'Ane.

Lut dr Bsitzerin hets scho ussergwöhnlech lang nümm grägnet. Darum isch di ganzi Alag wi dr Räschte vor Inslä rächt trochä gsi.

Hübsches vor dr Hustüür..

O nid witt wäg, dr Beck. Früsches Baquette miteme Paumeblatt drinn.

Insu erkundä.

Memorial de l'Anse Caffard.

1783 hets in Martinique ca 60.000 Sklave gä. 1787 bis 1802 isch e Bürgerchrieg zwüsche Plantagebsitzer und Händler entflammt, es het e sogenannte Sklaveufstand gä. 1794 het di französischi Konvention / französischi Revolution für d Abschaffig vor Sklaverei gstimmt. Dä Beschluss het jedoch nid lang gha, dr Napoleon het 1802 d Sklaverei nämlech wider igfüehrt. 1848 isch d Sklaverei definitiv ufghobe wordä. 

Ds Dänkmau mit dene 15 Figure erinneret a die Zit.

Churze Stop am Strasserand für früschi Frücht..

Churze Stop in le Diamant

Bescht Spot für Sunneuntergäng!

Plage de Salines

Nöie Tag, nöis Abentür..

Ziu: Granda'Rivière im Nordoschtä.

Es chliises Stedli, chum me Iwohner, nüt los.

Nur weni Tagesturischtä finde dr Wäg, höcklä fürnes Zmittag oder e Snack i das einzige Beizli wos het.

Unterwägs..

Stop ide Bananä

Spontan heimer gäge Ändi vom Tag beschlossä hie no Stiu zha.

Les Gorges de la Falaise, e Schlucht im Rägewaud.

Mit Wasserfeschtä Schue u im Badedress ischs mau uf dr Stägä zimlech nidsi gangä.

Ds sächste höch (es angers Päärli und e Muetter mit chliner Tochter) heimer de uf üse Guide gwartet.

Nachem Istig im Bachbeet u chlätterä über Chempä heimer mehreri Meter müesse schwümmä. Witter ufwärts däm Bach entlang.

Leiterä, schwümme, stapfä dür z Wasser bis zur nächste Leiterä.

Dr letscht Bitz bis zum Wasserfau..

Wahnsinn!

Nacheme usfüehrlichä Badeplousch simer di ganzi Schlucht wider retour.

Zum Schluss; aus wärs nidscho gnue asträngend gsi; het no dr Ufstig gwartet.

Ussicht uf St. Pierre, im Hingergrund dr Vulkan Pelée.

Wouverdients Znachtässä. Einisch Poulet und einisch Fisch.

Gmüetlech Zmorgä ässä mit Ussicht bevor dases wider uf d Pischte isch gangä.

Aklimatisiere für z schnorchlä am Anse Noire.

Tatsächlech e Schiudchrott gfundä wo gmüetlech dür d Bucht tuckeret isch..

Spannendi Korallä. No nid usbleicht u no einigermaase in Takt (vergliche mit vilem womer bis itz uf dr Wäut gseh hei).

Jehnsti Kilometer Strand vom einte Ändi zum anger womesech cha verloufä.

Zrugg a üsem Lieblingsplatz am Plage des Salines.

Badä bis d Sunne abgegeit..

Dä Spot wär öpis füre Vujo. Hie müesster nämlech nid so viu vorbereitä fürne schöne Sunneuntergang..

Ufm Rückwäg no hurti ga ichoufä, mir hei Luscht ufne Suppe gha.

Bsuech im Botanische Gartä vo Balata

Unterwägs im Gartä..

Leider het z Wätter nid so mitgmacht, aber immerhin hets bi üsem Bsuech gad nid grägnet.

No öpis für d Ornithologe u Reptilieliebhaber:

Distellery Depaz

Da het e Bsuech nid dörfe fählä. Wobi mir müesse sägä, dass dr Rum in Martinique für üs nidso fein isch. 

Umringt vo Zuckerrohr isch ds schöne Herrehuus wo zur Alag ghört.

Es Hüsli us de 1920er Jahr wo d Marina sofort chönnt izieh.

Rundgang dür di wägm warme Klima offeni Brönnerei.

Depaz produziert ca 1.000.000 Liter Rum pro Jahr und exportiert vor auem nach Frankrich. Vo Februar bis Mai wärde bis zu 10.000 Tonne Zuckerrohr us rund 120 Hektar rund um d Brönnerei verarbeitet. Ds Zuckerrohr cha nume teilwiis dür Schnittmaschine gschnittä wärdä, es brucht no immer Handschnitt. Es wärdä ca 10 Tonne Zuckerrohr pro Stund dür d Mühli glah, di chline Stängle wärdä presst und i 12 jewils 30.000 Liter grossi Gärtanks pumpet. Dert wird aus für 30-36 Stund fermentiert. D Temperautrregelig während dr Gährig wo nid über 30 Grad darf ga, erfougt dür z Wasser usem Fluss Roxelane. Ds Wasser wird ad Ussesite vo de Gärtanks gsprayt. Nach dr Gährig het ds öpe 4,5% Aukohou. Dä wird i sogenannte Ein-Spalten-Brennblasen uf 68-70% Aukohou brönnt. Das isch schinbar so gängig fürne Brönnererei uf Martinique. 

Es wird individuell glageret u abgfüut. Es git Depaz Rhum Blance, Depaz Rhum Dore, Depaz Blue Cane Bernstein Rhum, Rhum Depaz VSOP, Rhum Depax XO Grand Reserve und so witter und so witter. Aui heimer quasi düreteschtet dert u si de definitiv zum Entschluss cho, das dr Rum hie für üs nüt isch. Bis uf:

Dormoy Rhumpunch..

 In St. Pierre heimer dänkt chöimer ono gad no chli witter wemer scho da si uno Zit hei. U zwar wider mau söfu witter bis d Strass nümm witter geit.

Anse Couleuvre, schwarzi Sandtränd si scho öpis schöns!

St. Pierre

Die ehemlas florierendi u wohlhabendi Küstestadt ligt 31 Kilometer nördlech vo Ford de France. Sie isch über mehreri Jahrhundert d Houptstadt vo Martinque gsi. 1902 ischsi vom Vulkan Pelée zerstört wordä.  

Kitsch kitsch!

Nomau in le Diamant verbi u hurti übere Märit.

E bewöukte u liecht rägnerische Tag. Warum ds Diamant heisst? Wiume (ufm 2 Biud) es Högerli im Wasser gseht wo ane Diamant erinneret..

Eigentlechs Ziu a däm Tag:

Mitem Wassertaxi übere uf d Inslä `île chevalier`. Dert hets de leider scho gad so richtig agfangä rägnä u dämentspärhend wiu ds Wätter lut Wätterbricht o nid besseret hät simer ender aus planet wider retour.

Ar Sunne entgäge u bis sie de definitiv davor isch gsi heimer mau öpis gässä.

Poulet, Riis, Salat und e feini karibischi Soossä.

Erneute Spaziergang am Plage des Salines

Letschte Abe in Martinique.

Ds heisst nomau bädlä u dr schön Sunneuntergang gniessä..

U die beide Sachä natürlech zämä!

Letschte Morgä in Martinique, Spaziergang zum Beck..

Ufere französische Insle si het haut scho sini Vorteilä. Feins Brot, Schoggigipfeli u angeri Leckereie wome kennt.

Eis Kriterium für üs, dass e Insle e Insle isch si näbst de wiude Hüehner überau d Frangipani Bluemä.

Üse Flug isch ersch am Abe gange, drum heimer no guet Zit gha Umwägä z fahrä und chli azhautä.

Ei Stopp zB. in Petite Anse d'Arlet mitem berüehmte Stäg oder irgendwo bimene Ussichtspunkt wo scho lang kene me isch - drum nämemer di nächsti Strass weisi wohi u luege womer härä chömä.

Hurti chli wartä, ickeckä, zum Flüger loufä, churze Chutt, churze Flug, vou üses Ding. 

Ab nach St. Lucia