ISLAND 2017

Nachem Vereinigte Königriich isch Island flächemässig dr zwöitgröscht Insustaat Europas. D Houptinslä isch di gröschti Vulkaninslä uf dr Wäut u befindetsech sich knapp südlech vom nördleche Polarkreis. 

Guet ufgrundeti 340.000 läbe uf dr Inslä. Über 60% vor Bevöukerig läbt ir Region vo Reykjavik, dr Houptstadt vo Island. Ersti lustegi Gschicht am Flughafä.. Überne Haubstund heimer uf z Gepäck gwartet, bismer usegfunde hei, dass üsi Tramperruckseck unger Sperrgepäck grate isch u das am andere Ändi vom Flughafe abzhole isch. No besser. D Usgab vom Sperrgepäck isch so versteut u zuegschiuderet gsi, dasmers mit huufe Fantasie de mau gfunde hei. 

Zwöiti lustegi Gschicht usserhaub vom Flughafe.. Warte ufe Shuttlebus wo üs zur Outovermietig gfahre isch. D Distanz womer bis zu dere Hautsteu glüffe si hätme i di angeri Richtig chönne machä u wär somit diräkt bir Outovermietig acho. 

Itz chönnt me ja meine dassme in Etwa weiss bi welere Gseuschaft me es Outo gmietet het. Somit hätme uf dere Abbiudig sehr guet gseh bi welem Haut me hätt usem müesse. Hätte müssen.. Het natürlech nie u nimmer funktioniert u so si mindistens zwöi mau öpe 20 Lüt sammt riise Gepäck usem Bus piugeret u wider ichepiugeret. Lustigerwiis hets trotz immer weniger Lüt immer weniger guet klappet aui wider ichezbecho..

Erste Stop Grindavik. Es munzigs Dörfli (aues in Island isch munzig) mit wenige Restaurants, 1 Ichoufsladä und es paar Hüsli. Zum Znacht: Perfekti Pommes mit perfektem, früschem Fisch..

Programm füre nächst Tag womer scho sit Monate vorbuechet hei!

Blue Lagoon

Mir hei d Erfahrig gmacht dasme 2-3 Monet im vorus es tendenziells tüürs Ticket mues buechä damit me cha ja baaiä. Dä tüür Itritt hetsech aber sehr glohnt..

Die blaui Lagunä isch es Thermaufäud..

Dr See näbem Geothermalkraftwärk (d Energie chunnt usem Vulkansystem) isch eigentlech aus Abfauprodukt entstande. Ds Geowärch pumpet es Gmisch us Meer u Süesswasser us ca 2000 Meter Töifi wo bis zu 240 Grad heiss wird obsi wo zur Stromerzügig u zum Betrieb vomne Fernwärmenetz gnüzt wird. Aschliessend fliessts ids umligende Lavafäud.

So biudet sich dört e Sauzwassersee mit dere typische balu-wysse Farb wo us Kieselalgen entsteit. Sie reflektiert vorauem blaui Strahlä we d Sunne schiint.  D Isländer hei de mau erlikt dert drinn z badä u mittlerwile pumpet ds Bad o eigets Thermalwasser us dr Ärde. Dr ganz See zum badä het ca 5000 Quadratmeter.

Z Wasser im Bad isch zwüsche 37 u 42 Grad heiss u beinhautet Minerausauz, Kieselerde und Algä. Super gsund für d Hut, garnid guet für z Haar..!

Scho bim ichegah is Bad wird eim vo aune Site prediget dasme de ums Gotts Wiuä vorem badä gnue Konditioner is Haar duet u nachem Wasserkontakt nomau dou geit ga dri due. Somit hets de o risegi Chüble vou gha vo däm Züg u trotzdäm dass mir in Hülle und fülle igschmiert hei si üsi Haar liecht struppig gsi. Mann stelle sich vor wis wär gsi wenn nüt..! 

Dr See im Lavafäud..

Forschigsarbeit ire lokale Beckerei..

Hübsch igrichtet u zviu feini Sachä!

Uf üsem Wäg im sogenannte "Golden circle" si mir ufe Kratersee Kerid gstossä. Ds isch eine vo füf Kratere wo zum Grimsnes Vulkanfäud ghört. Da chame gäbig hurti drum loufä u dä farberiich See erkundä.

Dr Geysir Strokkur bricht ca au 10 Minute us. Mängisch nume einisch chli, mängisch bis zu 25 oder 35 Meter höch, mängisch drü mau chli hingerenand.

D Kamera auso gschüzt im Aschlag u bereit zum losfötelä damitmene verwütscht.

Heissi Quellenä und e gruusig eierige Gruch ir Nase wimer das scho vo Amerika oder Neuseeland kennä.

Dr gröscht Geysir vo Island bricht nur no sehr säutä us. Mitarbeiter sägä si heiges i 5 Jahr einisch erläbt..

Dr Gullfoss (Gull= Gold Foss= Wasserfall) 

Dr Wasserfau besteit us zwöi Stufä. Eini 11 Meter u die angeri 21 Meter höch. Z Spezieue isch, di Kaskade stöh rächtwinklig zunenand.

D Hallgrimskirkja isch e evangelischi Chiuche ir Houptstadt Reykjavik und ds gröschtä Kirchegeböide vo Island. D Chiuche isch z sächtsgröschtä Bouwärk vom ganze Land. Es isch äbä aues e chli chliner u zierlecher in Island..

Aber e gueti Ussicht hetme glich..

Modetechnisch vou im Trend..

Meistens us Schafswullä oder angere Materialie wo bestialisch zwickt u biist!

Aus Isländer dringend notwändig. Die trage aber de die richtige sogenannte Lopapeysa (Pullover) wo d Grossmueter säuber us Schafswullä glismet het. Klassischi Farbe wyss, grau u schwarz. 

Ungerwägs..

Ab zum nächste Wasserfau u richtig Südä..

Seljalandsfoss

Eine vo viune Wasserfäu ungerem grosse Gletscher Eyjafjallajökull.

Ca 66 Meter stürzt hie ds Wasser über d Klippä.

Me cha hingerem Wasserfau düreloufe u wird de eifach pflotsch nass.. trotz de guete Chleider. Aber es lohnt sich! 

Mir hei zum Glück au üses Gepäck derbi gha und üs chönne umzieh im / um z Outo bi Null Grad.

Witter richtig Südä..

Bitte einisch ussprächä:

Eyjafjallajökull

Dr Eyjafjöll-Gletscher isch dr sächst gröscht Vulkan vo Island ungerem bekannte Vulkan Eyjafjöll. Zletscht isch dä nämlech im 2010 usbroche u het ds ganze Flugsystem vo Europa tagelang lahm gleit. Sider denn wird Island mit Masseturismus überfluetet. Leider..

Ungerwägs näb dr Houptstrass.. Hübsch, oder?!

Wunderschöni Landschaftä wome fasch nid cha höre fotografierä..

Oder ja. Eifach d Marina cha nid.. Weisme ja aber fangs!

Ds Islandpferd, Isländer oder Islandpony gnennt isch e iheimischi, sehr robuschti Pferderassä. Dusse bi Wind, Rägä, Schneesturm. Aues gseh.

Aus Islandpferd giut auso nume es reinrassigs ohni Frömdbluetchrüzig u Abstammig lückelos bis Island. Z Island isch d Ifuehr vo Ross zur vermidig vo Chrankheite verbote. So chöi Ross wo z Island gebore si u d Inslä verlah hei nieme zrugg. 

Skogafoos

E wittere hübschä Wasserfau (vo abertuusende im ganze Land).

Dr Skogafoos ergiesst sich inere Breiti vo ca 25 Meter i ca 60 Meter Töifi.

Me cha däm Wasserfau entlang ufewandere u het näre e schöni Ussicht über d Klippe u ds ganze Gebiet drum um.

Vík í Mýrdal (Bucht im sumpfige Tal)

Dert hets es tüürs, aber wunderschöns Guesthouse..

Erbout 1931 u erwiteret um d Heufti meh im 1961.

Dr Dorsteinn Bjarnason ud d Sigurlin Erlendsdottir hei mit ihrne 8 Chind gwohnt. Gudjon u Oskar, 2 vo dene 8 Chind hei d Farm 1970 überno bis sie aut si gis. Gudjon wo sis ganze Läbä i däm Huus verbracht het isch sehr wachsam gsi über aues wo im und um z Huus gange isch.   

Dr Gudjon hetsech sehr füre Naturschutz igsezt und hets mitunter gschafft, dass ds ganze Dyrholaey Gebiet 1978 zum Naturschutz erklärt isch wordä.

Die beide Brüetsche hei nie ghürate, si aber vo de Schwoschtä guet umsorgt wordä. Die hei de aube ds ganze Huus puzt und dr Gfrierschrank gfüut mit bachene Cake für di beidä.

We de Bsuech isch cho heisine e gfrohrene Chuechä u Kaffee chönne abietä.

U das überchunntme no hüt weme dert ga übernachtä. Es wird eim Chuechä u Kaffe abote u d Eva luegt immer, dases es Cake ufem Tisch het zum schnousä.

Wo de dr Oskar z aut isch wordä zum sich um d Farm kümmerä, het dr Gudjon beschlosse ine benachbarte, chlinere Hof z züglä.

So hei d Eva u dr Vigfus wo i benachbarte Hüser ufgwachse si ds ganze Awäsä z choufä.

E schöni Überraschig am Morge früeh..

So heimer d Skogafoss nomau ganz anders chönne erläbä..

Nass, no cheuter, aues veriiset u tierisch rütschig!

Myrdalsjökull isch e Plateaugletscher u dr viertgröscht in Island mitere Flächi vo ca 596 Quadratkilometer.

Myrdalsjökull bedütet "Gletscher des sumpfigen Tales". Die Bezeichnig wird nid nume füre eigentlech Gletscher verwändet, sondern für ds ganze Bärgmassiv, ähnlech wi bi de angere isländische Gletscher wi zB. em Eyjafjallajökull. Im Gägesatz zu däm het dr drunger ligend Vulkan e eigene Namä. Katla.

Dr Katla Vulkan isch eine vo de aktivste Vulkän in Island..

..und sit Jahre überfäuig fürne Usbruch. D Bewohner rund ume Katla wärde regumässig gschuelet u betröit füre Notfau da dä Usbruch lut de Bewohner sehr läbesbedrohlech isch.

Ja, u mir. Mir lauere chli ufem Gletscher desume so witt wimer chöme ohni Gletscherschueh we scho mau niemer süs umä isch.. 

O we steit me seu nid u dr Punkt wome nid söt überschritte gaaanz witter vorä wär gsi. Aber dr Reisebus wo üs isch entgäge cho nimmt ds o nid so gnau..!

Ungerwägs..

I Richtig Meer u vorhär no hurti i Schnee dippä..

Reynisfjara, black sand beach

Bestehend us schwarzem Lava. Sehr schön, aber o absolut sehr gfährlech!

Immer wider lauere Turischtä z witt is Meer use zum ume Feuse luege, oder für i di nächsti Bucht z cho. Si wärde vore riise Wäue mitgrissä u einisch drinn het bis itz kenä vo dene tödlech Verunglückte e Chance gha.

Mau abgseh dervo, wunderschön, oder?

Ob grau oder blau, isch beides schön..

U mit de Wuuchä no viu schöner!

Ungerwägs..

Nachem Hoger nomau vor angere Sitä a Strand.

Wasme in Island haut so macht wes gschneit het..

A Strand ga Cello spilä u Tonufnahme machä.

Im Hintergrund immer wider z gseh, d Reynisdrangar.

Di drü Feusä "Skessudrangur", "Landdrangur" und Langsamur".

D Legände seit, dass Trolle es Schiff hei weue a Land bringe und derbi versteineret si wordä.

Bi söfu viu Schönem und söfu Wind dasme fasch abhebt chame scho mau chli usflippä..

Die risegrosse Wäuä, ds Liecht u di Stimmig löh d Liebi zu Island la höcher schlah!

Näbebi chutets eim fasch d Outotüre ab bim i und usstigä..

Für die Ussichtä lohnt sich 1-2 Outotüre weniger.

Es lohne sich o gfrohreni Extremitäte, Zäie u Finger (trotz Thermousrüschtig)..

Zur Ufwermig gits es chauts Bier..

D Story mitem Polarliecht..

D Eva (Bsitzerin vom Guesthouse) het üs gseit es stöng e gueti Nacht für Polarliechter a. Mir auso aues parat gmacht für numeno id Chleider u Schue, dr Tinu isch use ga di erste Istellige machä u när heimer immer schön usem Fänster gluegt.

Churz vor Mitternacht heimer scho ufgäh gha u üs ufe Wäg is Bett gmacht (d Marina isch immerno Mentau überzügt gsi da chunnt was) u dr Tinu am Zähnputzä. Plötzlech hets e chlini Ufruhr gä im Huus u d Eva isch cho chlöpferlä: "hallo, exgüse für d Störig.. Es het Polarliechter Dusse.." Ja was hallo exgüse für d Störig. Ab wi d Ragetä, da chasch holeiä wine Sou!

Mir so schnäu wi müglech use u dr Tinu ohni propperi Chleider-Usrüschtig usegrennt.

Wow. D Kamera la knipsä u ufestarrä bi Minustemperature..

Definitiv isch das öpis vom schönschtä womer bis izte hei gseh!

Nordliechter chame grundsätzlech ide nördleche Regione gseh.

D Sunne stosst immer widr starki Ladige vo elektrische Teili furt i Wäutruum, dr sogenannt Sunnewind isch das. Chöme di Teili id Nöchi vor Ärdä, so wärdä si zum Teu vo Magnetfäuder vor Ärdä igfange u zu de Polä abglänkt. Dert stossesi mit Luftteili zämä u bringe die so zum lüchtä. Stimme mues da aber ono d Temperatur und z Wätter. E gwüssi Cheuti u klare Himmu, fasch wi bim Schneie u näre klappts. Entwedr gits wiisi schleierä oder de wärdesi richtig schön farbig. Grüen, violett aber o rosa u gäub u aues zämä chas wärdä. Das passiert de uf dr Polarliechterskala bimene 8-10. D Liechter wo mir da gseh hei si es 2i uf dr Skala gsi.

Nöiä Tag, nöis Glück. Bevor mir witter ufwärts gfahre si simer nomau zrugg gfahre u hei dr Skogafoss nomau ga luege..

Richtig Süd-Ostä hets gschneit u mir si dank 4x4 zum Fjaðrárgljúfur Canyon cho..

Dr Schneefau het hurti fürne Haubstund nacheglah u so heimer chönne a Afang vor Schlucht ga luege. Sie isch ca 2 Kilometer läng u a teune Steue bis zu 100 Meter töif. 

Zrugg im Outo, zrugg im Schneesturm. Aber scho fasch 60 Kilometer speter mitere Höchstgschwindigkeit vo ca 20KMh simer e rundi ga Wanderä bi zimlech guetem Wätter.

Fasch e gueti Stund Obsi. Zieu: Svartifoss.

Schwarze Wasserfau uf Grund vom schwarze Gestei. Gneuer gseit isches Basalt.

Blick zurück.. Z Wätter ufmerksam beobachte in Island isch di haubi Mieti.

Schlächts Wätter in Island isch nid zwingend schlimm, jedoch chas innert Minute sehr gfährlech wärdä weme nid irgendwo iche cha.

Bi Rägä u Minustemperature hurti usem Outo gumpä..

Ice ice Baby!

Je witter mir i Südoste Richtig Höfn gfahre si, umso schlimmer isch z Wätter wordä.

Viu speter aus planet simer bim Jökulsárlón acho. Lenger aus 3 Minute heimer nid chönne useha, es het üs Angers verblasä u verchuttet. Ja guet. Augen zu und düre nägst Schneesturm..

Z Höfn am Abä ändlech acho het üs d Bsitzerin vor Ungerkunft gseit ds Wätter wärdi Morn besser, sicher nid schlechter u überhoupt müessi da no viu passiere dass sie Strasse würe sperrä. Bim Znacht heimer besti Ussichte ufene Sibirische Sturm gnosse u wo dr Strom usgfaue isch für gueti 15 Minute heimer üs langsam afe frage ob mir tatsächlech wei 2 Nächt da obe in Höfn blibe u uf super Risiko zrugg a Flughafe fahre.

Di ganzi Nacht hets düregschneit u düregstürmt. Wi immer u mehrmaus am Tag wi das o empfohle wird heimer üs über d Strasseverhäutnis informiert u si zur Sicherheit no is Turizänter. Dä Typ dert het üs zimlech schreg agluegt, so ungerem Motto was heit dir da obe no verlore bi däm Wätter, dir chömet niemeh hei. Är het üs grate sofort ufzbrächä u so witt wi müglech Richtig Reykjavik z fahrä. Ds Wätter wärdi ufe nächst Tag (Friti / üse Abreisetag) no schlimmer.. So simer retour is Zimmer, hei aues Notfaumässig ipackt, igladä u hei 

chli öpis zum Schnouse ikouft. So hei mir üs ufe Wäg gmacht Richtig Reykjavik.

D Strasse si scho schön Schneebedeckt gsi. Da simer einisch meh froh gsi übere 4x4-Chare u Spikes a de Reife! 

Die früsch verschneiti Landschaft isch e Troum gsi. U we mir ja nomau am Jökulsarlon düre fahrt, de hautet me ono mau hurti.

D  Wätterbedingige si o a däm Tag zimlech garschtig gsi, jedoch chli besser aus am Vortag.

Wind, Rägä u Chaut wie weiss nid was..

D Iisblöck am schwarze Strand si einmalig.

Dr Jökulsarlon isch dr gröscht Gletschersee vo Island u ligt im Skaftafell-Nationaupark. D Gletscherblöck si aus Tribiis ufem See ungerwägs u wärde mit dr Ebbe usem See use gsoge. Sobaud sie im Meer usse si windets die Blöck gad sofort dert a Strand.

Grad chli si de die Blöck ou nid.. Cool, oder?!

Dr bescht Zytpunkt (Wättertechnisch) gnützt fürnes Selfie...

D Strass zwüsche Höfn u Vik isch ufere Strecki vo ungerdessä öppe 70km gsperrt gsi wäge Schnee. `Befahren auf eigenes Risiko!`

Scho dr ganz Tag hei sie d Strass Bearbeitet, si däm aber nid z Bodä cho.

Nachegfragt im Restaurant diräkt bir gschlossene Strass het üs e Iheimische gseit dass är erfahrigsgmääs nid würd fahrä. Viu z höch sig z Risiko zum blibe steckä, igschneit oder ab dr Fahrbahn blasä z wärdä da dr Wind vom Meer här absolut nid berächebar isch.

Mir hei d Wahl gha zwüsche:

probiere mit dürefahre oder umchehre, 180km zrügg uf Höfn u zueluege wie mir am nächschte Tag igschneit wärde u dr Flug verpasse.

Auso, no Risk no Fun. Mir hei de am Strasserand lengeri Zit gwartet u Gwärweiset u zimlech Respäkt gha. De isch de eine cho wo sich äue o churz überleit het ober seu fahre oder nid u isch de gfahre. Vilich wiuer dänkt het mir chäme de o, so wi mir dert gstande si. Mir si de spontan Konvoi gfahre. Die erschte 20km isch sehr stürmisch gsi. Me het d Strass ganz knapp gseh. Es witers mau simer ume 4x4 mit Spikes froh gsi.

Schwarz - Grau - Wiiss

Nach ca 40km isch üs de di ersti Schneeschnuzi vom Tag entgägä cho. Rächt iidrücklechi Grät. Vo denn a, simer sicher gsi, dass mir die Strecki ganz sicher bewäutige.  

Vo eim ufe nächst Meter het ds Wätter uftah. 

D Landschaft bi Sunne isch scho chli schöner u entspannter zum fahrä.

Ab dr Strass gluftet oder de isch e Fahrfähler vora gange.

Die Outo`s wärde markiert, so dass si wüsse, dass kene meh dinne isch. E Es wird gwartet bis dr Schnee furt isch u denn nähme si d Outo`s wider mit..

Genereu giut eigentlech dasme gnue Wasser, warmi Deckinä und warmi Chleider derbi het wis cha si dasme lengeri Zit verschneit im Grabe oder näb dr Strass parkt bis eim öpper cha abholä.

D `Raschtstett` nach dene stränge 70km. E churze Stoppe het scho müesse si.

Die ruume öppe nid nume Schnee usem Wäg...

Im Fluss näbe dr Raschtstett, si tuusigi vo Iisblöck dr Fluss ab.

Es witters `markierts` Outo vo viune wo üs si begägnet.

Es witers u letschts mau usegha bim Skogafoss. Das mau mit weni Lüt, bi Sunneungergangszyt u Schnee.

Nomau useha bim Seljalandsfoss mit Schnee..

Ungerwägs hei mer de es Zimmer buechet, womer gwüsst hei wie witt mir no chömä. Sehr ab vom Schuss, ufere grosse Farm mit paar Übernachtigsmüglechkeitä. Ab vom Schuss heisst sehr fiischter u das widerum mitere Polarliechtmüglechkeit.. perfekt. Auso parat mache fürne chaute Abe ar früsche Luft.

U tatsächlech, nach öppe eire Stung Dusse wartä het d Marina e chlini, fiini Bewegig am Himmu wahrgno u gli drufabe hetsechs formiert u agfange tanze am Himmu. Nid ganz so starch u intensiv, aber glich wider sehr faszinierend!

Churz Zämegfasst:

A üsem Abreisetag, am Friti herrscht e massivste Schneesturm vo 10.00 bis u mit Mitternacht im ganze Land. Me cha im ganze Land nid reisä.

No chli gneuer, aschoulicher u klar si ganz viu roti Strasse mit rote Kreisli mit gäub drinn, was so viu wi Strassesperri und kein Durchkommen bedütet.

Live in etwa so:

Mir hei zum Glück dr ganz Tag no dörfä im Zimmer blibä. Dusse hets nämlech tatsächlech sehr, sehr ungmüetlech ta. 

Gäge Abä isch di einti u angeri Strass wider offä gsi u mir si pünktlech di letschte 2h a Flughafe gfahrä. Nachdäm mir z Outo pünktlech am 21.00 hei abgäh, heimer erfahre dass üse Flug nach Barcelona am 23.30 gstriche isch wordä. Aus eine vo de einzige Flüg a däm Tag. Z Chaos isch perfekt gsi, vorauem wiu no nid würcklech e Aschlusslösig isch parat gsi. So heimer ca 2 Stund am Flughafe gwartet bismer de mau gwüsst hei was geit. Chrüz u quer i Car igstige u chrüz u quer wider usgstige. Üs hetmä nämlech gseit dasmer bim erste Haut usemüsse, schlussändlech isches 2h speter bim letschte Haut gsi. 

Dr gröscht Witz a dere Gschicht: mir hei d Nacht uf dr genau gliche Farm verbracht, nume bire angere Ungerkunft wie d Nacht vorhär. Nachere sehr churze Nacht u 2 weniger im Car (sie si z spät cho) simer am nächste Morge wider retour gfahre. Öppä ir Heufti het dr Car aghaute u het weue umchehrä zrugg is Hotel. Dr akündet Flug am 12.00 isch wider gstriche wordä. D Stimmig isch definitiv kippet u di grossi Horde Spanier het a Flughafe weue. Mir o.

Am Flughafe isch ds Chaos witter gangä. Niemer het öpis vo Vueling ghört oder gseh, e Antwort uf Afrag übercho. Mir hei Stundelang gwartet mit dr Vertröstig, dass am Abe am 18.30 eventuell e Flug geit. Mitlerwile hei es paari usegfunde, dass Vueling kes Flugi gschickt het wiusi irgendwie kes hei gha oder Erfahrigsgmääs dr Flugplan ehner aus lockeri Empfählig aus Verbindlech gseh hei. 

Mir hei de nid möge uf guet Glück warte, scho nume wiumer am Mänti hei müesse ga schaffe und`s langsam aber sicher knapp isch wordä. Somersby ahoi zur Entspannig!! So heimer üs wi viu angeri entschdie säuber z luege wie dasmer uf Züri chömä.

Churz drufabe heimer e Flug nach Kopenhagen, dert e Nacht im Flughafehotel und am nägste Morge e Flug nach Züri aus tüüri aber glich biuigschti Option, buechet. 

Zum Glück. Dr akündet eventuell Flug isch statt am 18.30 schlussändlech am 23.30 nach Barcelona gfloge. Ob mir de vo Barcelona irgendwenn mau nach Züri wäre cho bezwifle mir no hüt. Flüge düemer sicher o nümm so schnäu mit Vueling!