FRANZÖSISCH POLYNESIEN - MOOREA 2017

Nachere guete Lektüre ur Bekanntschaft mit dr Franziska wo sit 6 Monet nume ir Südsee isch ungerwägs gsi (sie het sich z Tahiti verliebt u isch ufem Wäg zrugg zu ihrem Hächu gsi) simer am Abe z Tahiti acho. 

Dr Räschte vom Abä zämegfasst:

- D Wächsustube z Neuseeland het gmeint mir seue gad z Tahiti diräkt Gäud wächslä. Sig dr best Kurs u di eifachsti Variantä

- d Wächsustube z Tahiti het wo zwar off het gha het ke Schwizerfranke gwächslet. Sit nöistem natürlech ersch

- dr nächst Bankomat isch vore im Dorf gsi u z Fuess müehsam witt.

- mitem riise Gepäck belade simer im Fischterä uf extremä Umwägä dr Bärg uf gschnaaget is Flughafehotel

- d Franziska het ir Zwüschezit ihres Outo gmietet

- mit dr Franziska heimer uf ihre Hächu gwartet

- dr Hächu natürlech mässig z spät

- z vierte simer mitem Outo is Dorf füre u hei 3 verschideni Bankomate agstüret

- kenä het üs Gäud gä

- d Franziska het üs schlussändlech 100.- i Pazifischi Franc gwächslet

- dank ihre heimer im Roulot chönne usstige u öpis z Znacht ässä

- d Postfinance het gmeint es sötti eigentlech funktionierä. Mh.

- Happy Birthay Marina, todmüed u totau verschwitzt nach däm Akt im Hotelzimmer acho u sofort igschlafä

Am nächste Morge früeh heimer de d Insle Moorea scho vom Bett us gseh.

Dert weimer härä.

E churze Chutt, äue gad knapp 5 Minute Flugzit u scho simer dänä gsi.

Usstige ufem Roufäud, ds Gepäck gits o vo Hand ufem Märitstand.

Üses Bungalo für paar Tag.. 

Dr Strand kennemer scho vo letscht mau womer d Bedalo gmietet hei.

Klein aber immerno fein..

Ersti Amtshandlig wi immer: Ichoufä.

Da mir z letschte Mau fasch am gliche Ort ghuset hei, heimer gwüsst dass es Velo zum ichoufe nid schlächt wär statt loufä. Het ja o keni Trottoir. 

6 Velo, es het wenns Velo het. U wenn ja, Rost ahoi. Kennemer ja fang. Das sogenannte Insel-Fahrrad. Es zeichnet sich mit einer ausgeprägten Verrostung an allen möglichen Stellen und einem fehlenden Luftreifen ab.

Dr Ladä, immer no e Spass, aber scho bau chli moderner aus letscht mau.

Ravioli zum Zvieri und aschliessend:

Sunneungergang - as it`s best!

E Mooreanischi Pamplemousse zum Zmorge vertribt zwar nüt, aber isch henne fein! 

Ds letscht mau hei mir das mit "Wäutreisebudget", auso mitem Pedalo gmacht. Das Mau hei mir die gfüehrti Variante gmacht.

Immer no sehr Iidrücklech mit Stachuroche u Riffhaie ds schnorchle.

Stachelroche mau usere angere Perspektive..

Zum striichle si sie sehr spezieu. Gschliferig u fiin.

Bonjour mon amie!

Ussehaub vom Riff simer no uf d Suechi nach Buckel-Wale. D Saison isch grad am Afang, u sie hei paar Wuche vorhär gseh gha. 

Leider hei mir aber ke Glück gha.

Drfür huufe Riffhaie u Koraue u ab u zue mau paar Fische.

D schwarzspitze Riffheie wärde bis 200cm läng u chöi bis zu 40 jährig wärde.

Machä immer no nüt wemese nid gad geit ga schmuusä.

Schnorchle direkt vorem Hotel.

Hie het zum Glück d Korallebleichi wi im indische Ozean no nidso Izug ghautä.

Am Tag vor dr Abreis uf Bora Bora heimer üs es chlises Outöli gmietet u si einisch um d Inslä gfahrä. Chum simer ir Heufti gsi, hets agfange rägne wiverruckt..

Üsi Ziu si somit im wahrschte Sinn vom Wort is Wasser gheit u so heimer üs e Mittagspouse gleischtet.

Rohe Thunfischsalat und lecker Fischifisch.

Zum Znacht is benachbarte Dörfli u bi strömendem Rägä id Gartäbeiz.

Wasme haut so romantisches macht ide Flitterwuchä!

Neue Tag, nöis Glück. Da mir ersch nam Mittag si losgfloge heimer nomau bi bestem Wätter chönne d Inslä erkundä. 

Tatsächlech het sich sehr viu veränderet sider üsem letschte Bsuech. Scho nume d Strasse si mehrheitlech zu richtige Houptstrasse teeret u markiert wordä. 

Erschts Ziu, hurti hurti 2 Stund bi praller Sunne ufe Magic Mountain ufegschnaaget.

D Ussicht ghört üsere Meinig nah id Kategorie unbezaubar!

Tatsächlech e richtige Töder dert ufe, aber es het sich glohnt!

Nächste Stop Belvedere Ussichtspunkt.

Es Hübschli.

Ungerwägs..

Marina's Lieblingsgmües:

 Es Bitzli Koralle isch tatsächlech mit Heim gwanderet.. 

Plage publique de Temae

Dä Strand vo Moorea wo sich Iheimischi mit Turischtä tummlä.

Schöni Ussichte uf Tahiti (wes de Wuchelos wär)

Leider simer ja schlussändlech ufem Wäg gsi zum z Outo retour bringä u e Inslä witterflügä.

Nomau ga uftanke u bir Outovermietig d Glace müesse vom Rückbank schriisä u ablah.. Typisch!

In Französisch Polynesie füutme sich doch z ganz Jahr wi a Wiehnachtä..

Viu z früeh am Flughafe heimer widr d Chance gha z beobachte was für Lüt da Hüt zu Tags uf Bora Bora flügä.. Lagio mio!

Familie mit Chind zersch. Iu. Hätme da am einte oder angere Teenager gseit är seg no es Chind de viu Glück. Leider hets unger anderem de dere wahnsinns nätte Familie us Dütschland o nüt gnüzt, dass sie sich stinkfräch füredrückt het..

Aus ersts istige schützt vor "uf dr lätze Site absitze" o nid..