FRANZÖSISCH POLYNESIEN - TIKEHAU 2017

Für dasmer dismau nid ganz optimau si ghocket heimer glich e gueti Ussicht gha. 

Zwüschelandig in Rangiroa.

Ia Orana "Tikehau"

Uf irgend somene Inseli (ca 320 KM vo Tahiti im Gaggo uss) i däm Atollstreifä heimer e witteri Wuche verbracht..

Tikehau liit im Tuamotu Archipel u ghört zur Insugruppe "Commune associée".

Di ganzi Lagune misst 461Km. Ds Versorgigsschiff chunnt nume düre 150 Meter breit u maximau 4 Meter töif Pass für a Hafe ir Lagune.

100 Meter vom Flüger bis zum Gepäck, nach 3 Minute isches scho da.

Tuherahera heisst d Houptinslä, dr Houptort vom ganze Atoll. Ca 507 Lüt hei lut Wikipedia im Jahr 2007 in Tikehau gwohnt. Es het 1 Beck, 2 Lädeli und 1 Imbiss.

Somit isch d Fahrt vom Flughafe a Hafe dür z Dörfli i wenige Minute o erlediget gsi.

Üsi Hoteleigeni Reisebegleitig

Ufem Wäg is Resort..

E länge Strand mit nume eire Paume druff.. Hmm. Wi chunnt me äch zu dere?!

Bienvenue au paradis!

Tja, u ds isches fürne witteri Wuchä..

Da wäremer widr bi de Flitterwuche mit Ruckseck! Es schiint aus chönngme nume mit Rollkoffer hürate u id Ferie?!

U das ischs fürne witteri Wuche unger Wasser diräkt unger üsem Wasserbungalo:

Dr erst Abe heimer garnidso groos chönne gniesse. Mir si nämlech mitem Boot scho ume reotur uf d Houptinslä.

Pünktlech ufe Tag gnau heimers nämlech zum grösste Ereignis im Jahr in Tikehau gschafft. Heiva.

Di wenige Nachbare zeige enand was sie tänzerisch druff hei.

Di beschtä wärdes vilich i paar Jahr professionell bis uf Tahiti schaffä.

Da wär das äbä no das mitem schöner aus Bora Bora..

Läuft!

Eine vo de wenigste Usflüg wos git per Boot. Mit de Toucher mit ga schnorchlä.

Fasch 2 stund simer as andere Ändi vom Atoll preschet.

Los gehts..

Zwüschetine mau widr uf z Boot öpis ga trinke u widr dri.

Plötzlech isch unger üs e Napoleon Fisch aka Hiudis Chuefisch uftoucht. 

Sone Fisch cha bis 2.30 Meter läng wärdä. Für gwöhnlech blibter aber so 60cm läng u cha zwüsche 190-200kg schwär wärdä. 

D IUCN (International Union for Conservation of Nature and Natural Resources / Internationale Union zur Bewahrung der Natur und natürlicher Ressourcen aka Weltnaturschutzunion) het Hiudis Chuefisch zur Zit aus stark gfährdet igstuft.

Singapur, Hongkong u Indonesie betribt starke Fischfang u Handu. Für 1Kg bechunntme je nach Qualität zwüsche 90-175 Dollar über. 

De gschider no chli luege wases Ungerwasser git bevor aus läärgfischt oder verbleicht isch!

Ufem Rückwäg heimer hie no hurti aghaute. 

Es verlassnigs Inseli miteme verhudlete Hüsli druf.

Dr Grund: d Guides hei scho vo wittem gseh dases sich lohnt hie no hurti is Wasser z gumpä..

Mantarochä u dises mau sehr nöch u klar. Wahnsinn!

Dr Riffmanta. Ghört id Familie vo de Teufelsrochen und isch eine vo de gröschtä wos git. Es gitne im Rote Meer, und im ganze Indopazifik; sprich vo Madagaskar bis übere uf Französisch Polynesie; und är läbt im Gägesatz zum ozeanische Riesemanta nume küstenah. Dr Riffhei wird bis maximau 5 Meter läng, d Spannwiti vode Flosse ca 5,5 Meter läng. 

Zrugg uf üsi Inslä..

Chli entspannt badä, sünnelä, schnorchlä, schlafä, ässä:

Und zum Dessert dr Sunneuntergang gniessä!

Nöie Tag, nöiä Usflug.

Mit 3 sehr mitteiligsbedürftige Italopärli, em Böötlifahrer und er Angelique us Moorea simer uf z 

Motu aux oiseaux Puarua / Voguinslä.

Me cha auso ir Südsee o mau ufne Nid-Ungerwasser-Wäut-Tour ga.

D Insle besteit us Koraue, auso si Schueh, z mingst einigermasse gueti Flip Flops unbedingt vo Vorteil!

Gross, chlii, farbig, blond, roti Füess, etc. tuusendi vo Vögu.

Tatsächlech sehr z empfähle für Voguliebhaber und, was üs da usse fasch dr Gong het gä, d Angelique het tatsächlech aus ono uf Italiänisch verzeut..!

Hallo?!

Kokosnüss wo Triibe mache, die chame `ärnte` u ds wiisse drvo chätsche u ässe.

Gschmacklech? Geits i richtig Kokosnuss :)

Mitem Böötli simer nachdere stränge Wanderig ufenes angers Motu ga Mittagspouse mache.

E Platz zum blibe für immer! Schön warm, warms krischtau-klars Wasser, ussert de Angere vom Böötli isch genau niemer süs da..

Genau wäge söttigem si mir da häre cho, e Troum wo üs no lang wird blibe!

Und definitiv e Steigerig zu Bora Bora! 

Währenddäm mir ds Motu erkundet hei, si d Angelique u dr Captain fliissig gsi u hei üs es Hammer Zmittag uftischet. 

Schwarz-Spitze-Haie zum griffe nöch..

Nach em Zmittag und emene Schwumme hets e Paume-Blatt-Flächtkurs gä: 

Ds Täuer für ds Dessert säuber baschtle, u ersch no komposchtierbar! Nennt me das Öko-Tourismus?

Uf au Fäu hei mir di Aleitig am beschte begriffä u während di angere no ewigs knorzet hei hei mir scho lengstens chönnä di feinstä Frücht ever ässä!

Switzerland 10 Points, oder so.

No einisch chli d Zäie la aknabbere vo de Haie..

Nei, natürlech nid. Aber eifach nume krass weme ir Laguna im Wasser hocket usech die Tier so präsentiere!

Mönschelääri Stränd...

Nacheme wunderschöne Tag (mit Theme wi Mamas beste Spaghetti u feinste Cappucino inklusive)

zrugg is Resort.

Eifach nume schön..

Nöis Abetüür. U ja mir wüsses, immer Abentüür bi üs. Süs wäres ja nid mir.

Z Fuess heimer di umligende Inseli erkundet..

De no e rundi mitem Kajak:

 Garnid so eifach bi denen viune Ströhmige zwüsche dene viune Inseli.

Zum Glück ischs nid töif, da chame no z Fuess mitem Kajak..

Zwöi mau am Tag hets es Schuttelböötli wo eim mit uf Tuherahera u de 2 Stunde speter widr zrugg uf d Resort- Inslä nimmt. So heimer auso 2 Velo igladä u si los.

2 Stund uf sore chline Inslä, garnid so eifach. Mite Velo zimlech schnäu erkundet, 2 chlini Lädä hets, 1 chlises Restaurant wo am Namitag offe het. Zum Zvieri heimer es feins Thunfischsalätli u Riis gfundä.

Ungerwägs uf Korallä..

Weme sich mau überleit wie komplex u müehselig so Koralle entstöh.

Zum Schluss simer de im grösste Ladä no ga shoppä..

Kouft heimer chli Güetzi, Süessgetränk u Bier. 

Viu z früeh simer de widr retour am Hafe gsi. 

Zu üsem Glück isch im ganze Dörfli zimlech öpis los gsi. Es het nämlech a däm Namittag ds Frachtschiff Dory agleit wo z Rangiroa vom ganz grosse Frachtschiff Aranui belade isch wordä. D Aranui passt nämelch nid dür di 150 Meter breiti u 4 Meter töifi Öffnig vom Atoll. 

Eifach e schöni Inslä heimer da usegläsä!

#hach

Churz nam Zmorge ab ga schnorchlä..

Viu mache muesme ja nid. Eifach nume dr Chopf is Wasser ha u scho hets rund um z Wasserbungalo gnue z gseh.

E Sandbank zum löiä nach däm asträngende umeschnrochlä ir Lagunä..

Mau ume es Inseli witers:

E Wasserspaziergang, oder wie söu me das nenne we me über d Insu-Chötti vom Atoll Tikehau ungerwägs isch?

Einisch heimer no müesse schwümme für vom einte zum angere Sandbänkli/Inseli. Dr Wassersack u e Luftmatratzä für di vile Überquerige si da sehr hiufriich gsi.

Bir Akunft am erschte Tag hei mir die einsami Paume ufere Sandbank gseh u üs gfragt wimer zu dere chämt..

Es het afangs nid so usgseht aus wärs wit. Aber es isch de fasch e Ganztagesusflug worde wosech aber glohnt het..

Sand, Paume, Kokosnüss, Strand, Sand, Wasser, Paume..

`Catch of the Day` zum Znacht. 

Morgens halb Zehn in Tikehau..

Es churzes Spaziergängli, Zmorgä ässä u Fischschwärm zueluege.

Zum Ändi vo dere Wuche e witeri bunti Schnorchurundi..

Wie im Katalog, nume besser! U so heimer leider schwären Härzens mit nasse Badhosä müesse Abreisä.

E Böötlifahrt aus Start ufe längscht Heiwäg womer je hei gha:

Abfahrt mitem Böötli; Friti, 0.00 (MEZ)

Akunft Dehei; Sunnti 10.00 (MEZ)

Totali Reisezyt vo ca. 58h

23`149km Flugstrecki

Eifach, unkompliziert u schnäu. Flughafe Tikehau.

Startä u landä im Paumewaud, weni Lüt u aues gmüetlech u fridlech.

Air Tahiti, üsi Lieblings Fluggseuschaft.. Wo süs gits so schöni Ussichtä?!

Nomau e churze Zwüschestop in Rangiroa, bevor`s witer uf Papeete / Tahiti geit.

Voilà et adieu pardis:

Zrügg ufem internationale Flughafe vo Tahiti. 

O hie chame em Gepäck no zueluege wis chunnt.

So heimer de ca 12 Stund am Flughafe z Tahiti müesse wartä. Aues zue düre Tag wiu keini grosse Flüger achömä. Ds Gepäck ufgä simer de is Dörfli füreglüffä u üs d Zit versuecht um d Ohre z schlah. Snack Aute, Mann het no zue gha, ds Beizli womer hei weue ga ässä isch ono zue gsi. So simer ine Ladä für aues Müglechä vo z Trinke bis Schrubä, Gebäck u Tischtüecher. Dert hets überau chli usgseh wi im Putzgang. Dräckig.. 

Znachtsituatin in Tahiti:

Gartebeizähnlechs Flair mit eme riiiiise Täuer ässä für ca 15.-, herrläch.

U so heimer de no di letschte paar Stund am Flughafe verbracht. 

Umestoglä, umehockä, umelige, DVD luege ufm Laptop u Tahiti Drink schlürfä..

Zu üsere Ungerhautig wärde in Tahiti zum Teu Abreisendi chli angers verabschidet aus ir Schwiz. Hurti es Tänzli oder no e Song singä. 

Am Morge am 3.30 ds Papeete abflüge während angeri achöme u ihre Trouurloub startä. Wi scho z letschtä Mau schreckläch!

Hello Auckland u nomau wartä. Irgendwenn u irgendwie heimer de o mau müesse schlafä. Mir hei us dr Areis glernt u Dechine usem Flüger mitgno da Duss immer no Winter isch u überau d Klimaalag louft.. 

Nacheme wittere Stop in Singapur und emene wittere 12 Std. Flug nach Züri simer de ändlech ir Schwiz glandet u si mitem Zug u Bus no heimtuckerlet. 

Game over nach 58 Stund!

Merci beaucoup / Maururu a aui wo üs zu üsere Hochzit e Teu a di schöne Flitterwuche ir Südsee gschänkt hei!

Maururu & nana Französich Polynesie, mir chöme wider..!