DOMINICA 2019
U scho widr heimer bi Akunft schlächts Wätter. Dismau e rächt flottä Rägeguss.
Aues kes Problem - chlini Inslä, chline Flughafe, chlini bis nid vorhandeni Dechli für eigentlech nid nass z wärdä.
Willkommä uf dr ehner untouristische Inslä
- knapp 49Km läng, ca 23Km breit u e Flächi vo 750Km2 -
hallo Dominica.
Nach es paar Arüef isch Eine cho u het üs ds Outo vermietet. Mir si so wimers verstande hei di einzige gsi für dä Tag?! Dr ganz Tag ke Arbeit, aber 1 Termin verpasse - für üs us dr Schwiz aues angere aus dänkbar. Insuläbä = kes Problem für üs. Ir zwüschezit heimer üs gmüetlech e Füehrerschiin beatreit u kouft - ca. 10.- für 1 Monet.
Im Linksverkehr - äue z letschte Mau in Mauritius säuber gfahre - ischs Richtig Unterkunft. Ischs no hübsch, hautetme eifach a. Dr Vorteu u dr Grund warum mir we müglech immer säuber es Outo fahre.
Dominica / Ouaitocoubouli
E Insustaat i de sogenannte "Kleinen Antillen" östlech ir Karibik. Dominica isch Mitglied vom Commonwealth of Nations. D Amstssprach isch Änglisch, jedoch o Antillen-Kreolisch "Patwa" gnennt.
Dominica wird inofiziell "die Naturinsel" gnennt uf Grund sire üppige u arteriche Tier u Pflanzewäut. Es het Flüss, Bäch so wie heissi Quelle.
E Fahrt übere "Pass". Für üs nume einigi Höhemeter, aber für hie scho e rise Sach für drüber zfahrä.
Gäge Abe simer in Portsmouth acho im nordweschte vo Dominica. Schnäu no öpis ichoufä.. (?!) was garnidso eifach isch gsi u näre ab zur Unterkunft -
5 Nächt Bungalow diräkt am Strand.
Quasi vom Terrässli über paar Meter Strand i ds Meer gheie. Ganz nach üsem Gusto. Derzue e chlini Chuchi u mir si zfride!
Ungerwägs uf Dominica, d Inslä erkunde. Die ganzi Insle isch no rächt verwüeschtet vom Hurrikan Maria wo im Herbscht 2017 drüber gfägt isch. Ds Oug vom Hurrikan isch aus Kategorie 5 über Dominica donneret, dases am andere Ändi uf de letschte Meter uf Kategorie 4 abegheit isch het nüt bracht. Houptverbindigsstrasse si wäggspüelt, Decher abdeckt, ca 90% vo de Hüser si beschädiget oder gad ganz wäggfluetet wordä. Die unberüehrti u wunderschöni Naturinsel - muesmesech leider ehner i de Gedanke vorsteue.
Tagesufgab isch ds Ichoufe imene propperä Läbesmittuladä. O das isch garnid so eifach z findä. Schlussändlech simer bis ids Houptstedtli gfahrä derführ.
Us Belohnig dr Sunneungergang gniesse mitemene Drink oder zwöi oder drü. So bringt me ja $$$ uf d Insle wo si dringend nötig hei. U sie si ja ou froh we dr Tourismus-Zweig wider chli azieht nachdäm ds 2018 e Totau-Usfau isch gsi.
Während de Fiumufnahme vo Fluch der Karibik het ds ganze Team i üsere Hotelalag gwohnt - jedes Bungalo het dämentsprächend e Name becho.
Dr Name vo üsem Bungalo:
Martin Schaer us Sitte, Wallis - Kameramaa bi "Fluch der Karibik".
Drive-In in Dominica.. Uf dr Houptstrasse versteit sich.
Trafalgar-Falls
Bi Räge u Wind simer hurti ga luege. Lenger uszharre het üs nid agmacht, o we e imposanti Mängi Wasser isch achecho.
Freshwater lake
Uf üsere Rundi düre Morne Trois Pitons Nationaupark heimer no hie aghautä. Chaut, näblig u praktisch niemer umä. Ganz angers aus me ir Karibik erwartet.
Ds Wasser isch tatsächlech rächt früsch gsi.
Bunts Tribä ir Houtpstadt Roseau. D Hafestadt befindet sich im Südwestä vor Inslä u es gitse sit mindistens 1642. Dr einzig Ort uf dr Inslä mit richtigem Betrieb.
Scott`s Head, am üsserte Zipfu Südweschtä vo Dominica.
Dört si d Spuure vom Hurrikan no sehr guet ds gseh gsi.
Scotts Head het si Name vom Colonel George Scott erhaute, wo mit dr britische Invasionstruppe nach Dominica isch. Die hei d Insu 1761 vo de Franzose eroberet, är isch vo 1764 bis 1767 Lieutnant Govenor vo Dominica gsi.
Scott het uf dr Haubinsu e Befestigungsalag la boue. Die isch bis hüt zum grosse Teu vo de Klippe is Meer gstürzt, nume no wenigi Ruineteili si fürig blibä.
Wo d Franzosä 1778 Dominica ernöit eroberet hei, isch d Befestigungsalag uf Scotts head dr erscht Landigs un Schlachtpunkt gsi. Im Wüsse vor Invasion hei französichi Bewohner d Brite bsuecht, se abgfüut und aui Kanonä mit Sand verstopft. I dere Nacht si französischi Flottä vo Martinique cho u hei d Brite miteme Agriff überrascht.
Zrugg richtig Roseau..
Mau nid säuber kochet, sondern Uswärts ga ässä. Grundästzlech isches nidso eifach gsi es Restaurant z finde ir witterä Umgäbig. Restaurants u Läde si wi Böim, Paume, Wohnhüser vom Hurrikan u de fougende sehr starke Fluete mitgrisse wordä.
Wider ab id Bärgä vo Dominica.
Dr Itritt zum Spanny Wasserfau heimer im Shop glöst. Mues me, es geit nämlech dürnes privats Grundstück u ohni Wägbeschrieb fingtme nämlech dr Wäg / Igang nid.
Hübschi Wanderig bevor dases gfüut düre Dschungu nidsi richtig Wasserfau isch gangä. Paar Arbeiter hei di zerstörti Ussichtsplattform gad fertig ersetzt u so heimer dr Wasserfau churz um für üs allei gha.
Wahnsinn!
Dr Tinu het sich no ufnes witters Abentüür gwagt u isch zumne wittere, chline Wasserfau ufeklätteret. Matschig u häbe nur amne Seili müglech. Me mueses eifach gärn ha.
Ganz ir Nechi heimer scho dr nächst gfundä.
Jacko Wasserfau.
U wemer scho derbi si u so Liebhaber si dr nächst.
Emerald Pool.
Mir hei üse Standort u z schöne Wätter usgnüzt u si zrugg zu de Trafalgar Falls. Definitiv schöner bi schönem Wätter.
Dr Wasserfau rächts isch 20 Meter höch u ds Wasser isch warm wiuer vom Breakfast River gspise isch. Dr Breakfast River füehrt düre Boiling lake, dr zwötigröscht chochend See vor Wäut im Morne Trois Piton Nationaupark.
Dr Wasserfau links isch 40 Meter höch.
Es wird eim zwar garnid empfohlä, aber me cha zu de Wasserbecki chlättere u zimlech gmüetlech bade drinne.
Firabe bi Horbers im Bungalo.
Start i Tag bi Horbers in Dominica.
Ufstah, Zmorgä ässä, schnorchlä vor dr Hustüür.
Wer sucht der findet. Mit chli Usduur u Glück het dr Tinu schöni Fische.u Koralle gseh.
Entdeckige ungerem Wasser..
Entdeckige überem Wasser..
Ungerwägs dür au di düreghudlete, sehr lääre Dörfli.
Tagesusflug zum Champagner Riff
Es heisst Champagner Riff, wius so usem Bode sprudlet. Grund isch die vulkanischi Thermalquelle.
Leider isch z Riff hie nümme so in Takt gsi - het Standortmässig o öpis mitem Hurrikan und de Fluete z tüe wo aues is Meer gspüut het. Trotzdäm heimer paar schöni Fisch gsichtet.
Paar feini Frücht ufm Wäg für zrugg.
Guet Nacht!
Indian River
Dr Indian River het si Name vo de Kalinago. Kalinago - ursprünglech bekannt aus Kariben, wärdä sie als ursprünglech us Südamerika stammend agseh u sie steue dr letscht verblibnig Stamm vo de präkolumbische Karibik - Indianer dar.
Mit dr Akunft vom Christoph Kolumbus und dr aschliessende Akunft vo de europäische Siedler, mit dene wo d Kalinago heftig Krieg hei gha, si sie massiv i Minderheit gratä.
D Kalinago hei a de Ufer vom Indian River gwohnt und heine aus Zuefahrtswäg zum Meer gnüzt. Dr Fluss isch füre Läbesunterhaut wichtig gsi, da sie ne zum Transport vo Güeter füre Handu mit de Seelüt entlang dr Insuchötti gnützt hei.
Richtig berüehmt isch dr Indian River dür Fluch der Karibik 2 wordä.
Ufem erste Biud gsehtme wis no vorem Hurrikan het usgseh, u so hei mirs ufem zwöite Foto atroffä. Böim Wäg, Huus u Stäg wäg.
Üse Guide het üs viu verzeut über d Fauna und Flora. So verdschuderet u sehr lichte hets leider uf dr ganze Fahrt düre Dschungu u Mangroväwaud usgseh. Vorhär sig uf dr ganze Fahrt aues verwachse und schattig gsi.
Nach öppe ere haub Stund simer ir Dschungubar acho.
Wasme het müesse testä isch dr Dynamite Drink gsi. Irgend e sehr Hochprozäntige Mix mit chli Saft..
Ufem Rückwäg het de e Guide no es Portemonaie vore Turischtin gsuecht wo warum o immer vo Board gange isch..
Ungerwägs..
Wi meistens simer ab vom Schuss gfahrä.
Zum Bispiu fürne chlini Wanderig im Gjätt uss..
Dr Imbiss im Dorf testä. U da heimer wider mau gmerkt, dass mir witt u breit so zimlech di einzige Turischtä si gsi u dass dr Turismus massiv ibrochä isch.
Dr nächst Flug ersch gäge Abä. So heimer Zit gha ufem Wäg a Flughafä aues wo ufm Wäg gläge isch z erkundä.
Dr Wäg het üs zum Batibou bracht.
Nachdäm mir 5 Doller "Itritt" pro Person zaut hei simer nidsi. Zum Glück isch üses Outo e Geländegänger gsi, süs wäremer subito blibe steckä oder hätte müesse wanderä.
E schönä, pflegtä Strand mit chliner Strandbar u Security wo zum rächte luegt.
Das Schönste kommt zum Schluss, u so hei mir dr letscht Tag no gnossä.
Vorteu vomne chline Flughafe - we Personau awäsend isch - es geit aues sehr schnäu und unkompliziert. Outo abgä, mitem Gepäck paar Meter bis zum Terminal.
Dominica - Guadeloupe. Chli retour ine Zivilisation.
