WIEN 2009

Fürnes verlengerets, verlengerets Wucheändi si mir uf Wien gflogä u hei e paar Nächt imene guete u lustige Hostel mit eigeter Bar verbracht.

Mir si viu mit dr  ÖstrichischäBundesBahn ungerwägs gsi. Mit denä hetsech d Marina de no mau zimlech hartnäckig agleit.

Dä Billietoutomat ufem Foto het 10 Euro gfrässä aber keni Billiet usegä. Womer de a ÖBB-Schauter si gange heisi üs zimlech unfründlech abserviert u gmeint es segi nid ihres Problem, mir müessi säuber mit dere Firma Kontakt ufnä wo die Outomatä verwautet. Guet. 

Leider het d Marina sicher zämethaft 20 Minute ams Schauter müesse stürmä bismer es Telefon hei becho zum dere Firma alütä. Mir telefonierä wou nid mitem eigete Natel über d Schwitz es Dörfli witter in Östrich. Ändlech es Telefon erkämpft isches wittergangä. Es isch öppe e witteri 3/4 Stund vergangä bis si de mit dene 10 Euro hei weue fürärückä. Si heis ar Marina weue izahle uf ds Postkonto. Zu dere Zit het d Postcard no ke IBAN gha. Nachere wittere gfüeutä Ewigkeit, viu Ufstand, Reklamation het üs de dr Chef vo dä ÖBB Cheffä mit Widerwiuä di 10 Euro am Schauter usghändiget. 

DIÄ 10 Euro!

Stephansdom

Domkirche St. Stephan zu Wien

Dr Stephansdom steit am Wiener Stephansplatz zmitz ir Stadt. Dr Steffl wird aus Wahrzeichä vo Wien u aus österichisches Nationauheilligtum bezeichnet.

Hundertwasserhuus isch ä vo 1983 bis 1985 erbouti Wohnalag.

Natürlech vom 1928 in Wien geborenä Friedensreich Hundertwasser. 

Tori Amos. Dr Houptgrund warum mir überhoupt uf Wien si. Ir Schwitz hei mir d Konzärt vo ihrä verpasst. 

Donauturm

Ussichtsplattform u super geignet für  Bungee Jumping.

Wiener Prater

Circa sächs Quardratkilometer gross u vou mit Vergnüegissachä.

Schloss Schönbrunn

Schönbrunn isch ds grösstä u ds meistbsuechtistä Schloss in Österrich. Ds Schloss u dr öppe 160 Hektar gross Park si sit 1996 Teil vom UNESCO Wäutkulturerbe. 

D Houptatraktion im Schlosspark isch dr eutischt Zoo vor Wäut. Tiergartä Schönbrunn. 

Ds Schloss Schönbrunn isch natürlech bekannt dür d Elisabeth Amalie Eugenie, Herzogin in Bayern, churz Sissi.

Wär kenntsä nid?! Au di unzählige Fiumä....