SÜDAFRIKA 2016
Vo Züri simer uf Dubai. Z Dubai heimer scho im 2014 ä lengere Stop gmacht.
Meh drüber im Reisearchiv..
Vo Dubai isches de witter nach Südafrika, Johannesburg.
Johannesburg, IsiZulu "Ort des Goldes" u umgangssprachlech Joburg gnennt isch d Houptstadt vor Provinz Gauteng z Südafrika.
Langjährige Wohnort vom Nelson Mandela u hüt zu Tags so krimineu ir Innestadt dases fasch numeno lääri Hotels u Bürorüüm het..
Z Joburg am Abe im afrikanische Winter glandet hei üs 2 Fahrer vor lustigere Kategorie abghout.. Mit zimlech viu Ungerhautig simer de Richtig Guesthouse. U dasmer de dert no öpis z ässä bechöme heimer de no gad im Bus d Charte studiert und d Bstellig id Chuchi düregä.
Im Guesthouse acho hets de oscho gad z Ässä gä u mir hei üsi Mitfahrgspähndli für di nächste 5 Tag lere kennä.
2 Girls us Holland u eis Girl us Tschechie. Mir wittuus di Eutiste näbstem Guide.
Vorem iz Bett ga no hurti z Programm für di nächste Tag studiert u guet ipackt für di chauti, churzi Nacht.
Am morge nam Zmorge mit Malva Pudding und Pap simer am 6i de los. Z 5te höch mit üsem Guide Traver imene Truck wo für 16 Lüt une Guide usgleit wär gsi. Perfekt.
Ungerwägs dür Südafrika..
Südafrika het sit em Ändi vor Apartheid 11 amtlechi Landessprachä:
Änglisch, Afrikanisch, isiZulu, Siswati, Süd-Ndebele, Sesotho, Sepedi, Xitsonga, Setswana, Tshivenda u isiXhosa.
Im Afrikanische ghörtme sehr guet dr Ifluss vo de Holländer, ja me versteits sogar fasch.
Uf dr Fahrt dür d Provinz Mpumalanga heimer e Stop ir historische, "holländische" Stadt Dullstroom gmacht.
Dullstroom isch eini vo de höchscht glägene Stedt in Südafrika.
Und me seu dr Wy usprobiere hets gheissä..
Im Jahr 1652 faht di früechi Gschicht vo Südafrika a, wo dr Holländisch Jan van Riebeek e Stützpunkt für d Handusschiff am Kap der Guten Hoffnung agsidlet het. Scho sit em 15. Jahrhundert isch ds Kap für d Seelüt ufem Wäg nach Indie e wichtigi Zwüschestation gsi. Mit dr Zit hetme am westleche Kap e holländischi Kolonie gründet u dr Bedarf a Acker u Weideland isch immer grösser wordä. So si die Niederländer immer witter ids Landesinnere zogä u di Iheimische hei sich bedroht gfüut. Die Asidlig isch gäge Ändi vom 18. Jahrhundert bis ids Gebiet vo de Bantu gstossä.
Bantu isch dr Sammubegriff für über 400 verschideni Ethnie vo Süd u Mittuafrika wo Bantu redä.
Mitlerwile hets unger de Asidler o Dütschi wi Franzosä gha weli de zauriichi Chriege mit de Bantu gha hei. Bantus si immer meh i Chriege oder Hungersnot gstorbe u si unger Existänzangst abgwanderet.
D Holländer hei ds Land schlussändlech so dicht besidlet gha, dases e Iwanderderigsstop für Europäer het gä. Im Gägesatz vo däm Iwanderigsstop für Europäer heisech die immer meh Sklave ids Land ghout, desse Nachfahre später o europäischi Sidler ghürate hei. Die neu entstandene Vouksgruppe hetme speter "Farbigi" gnennt.
Die Kolonie wo ungerem Name "Vereenigde Oostindische Comagnien" si glüffe si zu Beginn vom 19. Jahrhundert sehr noch ane Bankrott cho. D Brite hei das mitübercho u hei ds Kap bsetzt. Währenddesse hei sogenannti Koalitionschriege in Europa derfür gsorgt, dass sich di Sieben Vereinigten Provinzen (wo unger anderem Niederland u Frankrich verbündet si gsi) ufglöst hei.
D Brite hei somit weue verhindere, dass d Franzose z Kap aus wichtige Handelsort für sich gwinne. D Uflösig vo däre Republik vo de Vereinigte Provinze het im Ändeffekt derzue gfüert, dass si de Holländer aues wider hei müesse überlah. Es paar Jahr speter heisech d Brite jedoch aues zrüggeroberet u di erste Kolonie gründet.
I de fougende Jahr hei d Brite d Landesgräze erwiteret und das ganze militärisch o gad abgsicheret.
E Fahrt dür u entlang de Drakensberge / Drachenberge.
D Drakensberge si di höchste Gebirge in Südafrika. In Lesotho wo di höchsti Spitze vo dene Bärge liit, wärde sie Maloti gnennt.
D Zulu nennese Drachenberge wäg de vile Schluchte, Kämm u Höheliniä.
Sie si es sehr beliebts Touristeziu uf Grund vo de vile Wasserfäu, Voguwäut u de Wiudblueme. Sit 2000 ghört e Teu vom Ukhahlamba- Drakensberg Park zum UNESCO- Wäuterbe.
Ungerwägs..
D Landschaft mit de Drakensberge..
Üsi Ungerkunft für 2 Nächt imne private Reservat vom Safari-Abieter.
Ps: nid izuhnet..
Witt u Breit ds einzige Wasser (näbst emene Miniatur Glüngli chuum erkennbar ir Prärie uss).
Vorem Lagerfüür no chli Sunneungergang spottä..
Und bim Izug no ganz viu Bedänkä was wiudi Tier u stählendi Affä um ds Hüsli um abelangt schön redä!
Wiu, im gmuurete u mit Houz usgstattete Bad isch z Fänster gnue gross, dass d Affä chöi idringä (drum nüt la ligä) u ds Stoff-Zäut ungerem Ungerstandshüsli het e lützi Tür wome nid söt offä la bi Awäseheit wiu d Affä nume druf wartä öpis cho z chlauä. Und, PS: Natürlech hautet das Stoff-Zäut weder Löwe no Elefant ab öpis vo üs zwöue. Aha. Schön heimer ds chönne klärä..
Bire gmüetleche Rundi am Lagerfüür näbem Pool hets üs de dünkt irgendwas isch im Busch. Nachdäm mir üs vo de Guides im erste Momänt hei müesse i Sicherheit bringä, simer mitem Safaricharrä dä Elefant ga ufsueche. Scho gli mau simer fündig wordä.
E riisigi Herdä Wiibli wosech trotz chline Fäntli nid hei la beiflusse bim frässä u aschliessend e Herdä Männer wo üs Benjamin-Blümchen-hardcore-mässig id Flucht tröötet hei.
Zmitz ir Nacht de mau im Zäut, heimer d Löie vo wittem ghöre brüelä u d Elefante ghört Böim umstoosä u nuuschä..
Am nägste Morge de hurti d Überraschig im Gartä..!!
Am Morge vorem Zmmorge hetme üses Mitgspähndli Kristina us dr Tschechei gseh zimlech schnäu i ihres Hüsli zrugg secklä. Segg drufabe isch de bi üs e Elefant verbi gruuscht wo sie hurti churzum überrascht het.
(Fürnes Selfie-Foto hets aber no glängt).
D Guides si natürlech sofort igschritte u hei dr jung, pupertierend Elefant mit Chlatsche u Schreie vo üsne Hüsli verjagt damit mir ids Houpthuus hei chönne ga Zmorge ässä. Aues wunderbar, bis dä Elefant sini Meinig churzum aber gänderet het u üs ufem Wäg hingernache gsecklet isch.
Am Abe vorhär het üs üse Guide dr Traver klari Awisige gä:
- Zügig vo A nach B loufä
- ungerwägs nid trödlä oder gar ahautä
- nume mit Liecht umewanderä
- lüchte ir Nacht irgendwo 2 siubrigi Chnöpfli uf, nid weue usefinde was fürnes Tier sich hinger dene Chnöpfli verbirgt
- lüchte ir Nacht irgendwo 2 siubrigi Chnöpfli uf: zügig aber nid rennend u nid schreiend hingerzi wime isch cho zrugg ine sichere Ort.
- nid renne, ussert dr Guide seit explizit me seu rennä..!
U mir hei de müesse rennä wiu d Guides üs zimlech verständlech ufgforderet hei derzue..
Churz wetti ds Selfie vor Kristina und em Elefant wo scho vorhär uf sie zuegrennt isch erwähne..
Aues verjage het irgendwie nüt gnüzt. I sim jugendleche Übermuet; wimer däm bi üs würd sägä; ischer de hinger di chline Safarioutos. Mir, ca 80 Meter entfernt in Sicherheit, erfahre so Sache wi: dä Elefant cha das Outo locker is Muu nä u la flügä.. usw.
D Nasä heimer de glich fasch z forderst gha, wiu dä Elefant het eifach nid wöue ufhöre mit de Outo spile u ga. Schlussändlech heisi dr gross Truck brucht wo am Elefant entgäge gfahre und gäselet, biser de mau chli vom Areau isch.
Nam Zmorge is Safarioutöli kläteret u los..
Di ersti grossi u sehr entspannti Elefanteherdä heimer de gli mau entdeckt..
Irgendwo im Gaggo ussä simer de usem Outo usgstigä u hei üs ufene ehner riskante Spaziergang gwagt. Mit 2 Guides, Chneblä u Gottvertroue simer los.
Da zeigt üs dr Traver gad e umgworfne Boum mit akätschete Wurzlä.
Dr Elefant chätschet ir Dürreperiodä Wasser us de Wurzle.
Imene Reiheli loufe, ä seggä Abstand ha zum nägste damit keni Löcher entstöh u somit d Tier chönnte agriifä und stiu si.
Und natürlech ufpassä u luege wo dasde loufsch da me z einte oder angere Tier nid gad uf Ahieb gseht.
Ungerwägs..
Überläbt *wuuhu*
Eine vo abertuusendä Vögu in Südafrika.
Vo üsere Terasse us im Houpthuus heimer super zum Wasserloch gseh und so fasch e ganze Namittag Tier beobachet. Fasch wie fernseh luege...
Da wird d Reihefoug akribisch ighaute.
Me wartet bis d Wasserqueuä läär isch u näre pirscht me sich a.
Lustig azluege dr Giraff wo geng wi meh i Spagat abegräätschet.
Eine sogennante Grüne Meerkatze.
Si läbe i grosse Gruppe, si Auesfrässer und äbä, chlaue aues wosi gad chöi.
Ufere wittere Safari gäge Abä heimer de schnäu mau es Nashorn gseh.
Eis vo mittlerwile wenige uf dr Wäut. Ds tötä u absaage vo Nashörner floriert u zwar fasch oder scho uf Goldpriis Niveau!
1 Kilo Horn ab 40,000 Dollar.
Chli Horn mörsere u me het di perfekti Droge oder Viagra.
Zum Schluss vo dere Abesafari heimer üsi ipackte Drinks u Snacks usgladä u dr Sunneungergang gnossä.
Nume so viu:
Me mues ga bislä, aber es geit no ewig für zrugg u me muess im
- fiischterä
- ir Wiudnis
ga. Hingerem offene Safariouto wiu aues angere gfährlech wär..
Aues iladä, witter geits..
Nachere wittere Nacht, feinem Ässä am Campfüür u gmüetlechem zämähockä simer uf d Panorama Route.
Erste Stop:
Blyde River Canyon
Dr Blyde River Canyon isch e 26 Kilometer länge u ca 800 Meter töife Canyon us houptsächlech rotem Sandstei. Är ghört zu de gröschte Naturwunder vo Afrika.
Düre Canyon fliesst dr Blyde River wo a de Bourke's Luck Potholes afaht.
Üsi Reisegruppe. Natürlech immer genau hinger däm unerloubte Punkt wome dörft si..
U das sisi die Bourke's Luck Potholes.
Dür d Imündigunge vom Treur River und em Blyde River si dür d Erosion vom fliessende Wasser im Dolomitgestein entstande.
Dür witteri Uswäschige u di strudlendi Bewegig vo de Steine si töifi Kolke (Strudulöcher) u Röhre id Feuse gschliffä wordä.
Balläbärg uf Afrikanisch
D Medizinfrou usem Dorf Shangana
Medizin us Chnochä, Beeri u Zähn u da dermit ono gad d Zuekunft vorus sägä.
Sie choschtet sicher nid wi dr Mike Shiva pro Minute 4.50.-...!
Eine vo de letschte Müglechkeite zum persönlechs ichoufä für di nägste 2-3 Täg.
Wasser, Chips u Güetzi.
Dimensionä zu üsem Truck..
Und ab i di nägsti Drifters huseigeti Green Fire Lodge in Hazyview.
Aues für üs 5 plus dr Guide und e paar Hushäuterinnä wo üs z Zmorgä uftischet hei.
13. Juli, Marina's Geburtstag. 5.30 Abfahrt Richtig Krueger Nationaupark.
Scho zimlech Verchehr u Stou churz vor de 6.00 bi eim vo de Houptigäng.
Es riisigs Blächlawinepuff u mir z mitz drinne u das aus gröschts Outo.
Nachteu: deu Strasse heimer nid dörfe befahre wiumer z gross si gsi.
Vorteu: mir si mit üsem Chaschtä zimlech nöcher (Achtung, nid übertribe) zu de Tier gfahre ohni dasmer hätte müesse Angst ha und mir hei witter u besser gseh.
O ohni dä Plan wo jede Tag die ganzi Zit aktualisiert wird heimer zimlech schnäu e huufe Tier gfunde.
Dr Krüger Nationaupark isch ds gröschte Wiudschutzgebiet vo Südafrika. Dr Park het ca e Flächi vo ca 20.000 Quadratkilometer u somit ghört er zu de gröschte Nationauparks in Afrika.
Ds Schutzgebiet isch am 26. März 1898 ungerem Presidänt Paul Kruger als "Sabie Game Reserve" zum Schutz vor Wiudnis gründet. 1926 het ds Gebiet dr Status aus Nationaupark übercho u isch i hütig Namä umbenennt wordä.
Im Park läbä ca:
- 147 Sügetier inklusive "Big 5"
- 507 Voguartä
- 114 Arte Reptiliä
- 49 Fischartä
- 34 Amphibieartä
Immer schön useluege u Tier findä..
E Huufe Hippos, Hyänä chli u groosi, afrikanische Büffu..
Es Rudu Löiä wo Niupferd hei ufgspürt u verfougt..
E Huufe Krokodiu wosech d Sunneterasse mit de Impalas teilä.
Struusä, Gnu u Elefantä..
U sehr guet markiert dürne riise Blächasammlig, es Rudu Löiä.
Schinbar zrugg vom jagä, dr haub Büffu het no zum Busch usegluegt, am usruuiä.
Zum Zmittag d Chuchi usgfahre, hurti gschnibslet u kochet.
Menue: Chabissalat u HotDog.
E Glanzstar. Hübsch, oder?
Südafrika- Flora.
Im ganze Park hets immer wider chli angers usgseh. Mau grüen, mau dürr, mau sehr steinig u sehr sandig.
Witters mitem spottä vo Tier.
Zebras, wider e huufe Hippos, Vögu und e afrikanischei Zibetchatz wome schinbar säute gseht.
Schlachtplan Big 5.
- Elefant
- Afrikanische Büffu
- Nashorn
- Löi
- Leopard
4 vo 5 gseh.. Es fäut immerno dr Leopard.
Ungerwägs..
12 Stund im Park, huufe Tier gseh aber ke Leopard. Auso nume Big 4/5.
O guet. E guete Grund für nomau z ga.
Feins Znacht, viu Tee u zum Schluss e Absacker vor Bar. Perfekte Geburi.
Eis vo de letschte Zmorge in Südafrika..
U vorauem es edus derzue.
Ufem Rückwäg nach Joburg heimer no hurti usegha u si ga d Kwazulu Wasserfäu luege.
E churzi Wanderig dürne fischterä Tunnu et voilà.
Zrugg in Johannesburg heimer üs erhout und üs ab dr itroffnige, riisige Schaar Chinese ungerhautä.
Mir hei üs usgmaut wie das wär gsi, we mir anstatt 6 im gsammtä 16 oder 17 Lüt wärä gsi.. Nei merci.
Selfie x 16, Wc x 16, vorem Elefant furtsecklä x 16, Fragä über Fragä x 16..
Am nächste Morgä früeh simer mitem Outo uf Grund zimlechem Stou über Umwägä (dür z absolute Ghetto u Drogequartier wo niemer süs wot fahrä) a Flughafe schoffiert wordä.
Nächste Stop Simbabwe, Sambia, Namibia u Botswana.