STOCKHOLM 2016
Am Morge am 6i z Gänf für ufe Flüger nach Schwedä.
D Gschicht vo Schwede laht sich bis 11.000 vor Christus zrüggverfouge wo z Hütige Schwede nach dr letschte Iischzit zerste Mau vo Mönschä besidlet isch wordä. Nach dr Völkerwanderungszeit u dr aschliessende Vendelzeit (550-800) si d Mönschä de mau chli sässhaft wordä. D Waräger (schwedischi Wikinger) si bis iz töifste Russlad wosi Handelsstatione hei gründet u no witter bis i Baukan u i di arabische Wäutä um Handusverbindige izrichtä.
Nadisna heisech nöii Riich entwicklet, me hetsech abwächslend d Königlechi Macht zuegschobä. Ersch im späte 13. Jahrhundert het e Chönig versterkte Ifluss gha u het dürne Burgbou und dr Ifüehrig vor Provinzialverwautig d Inträssä düresetze und fürnes ganzes Riich chönne Gsetz verordnä.
Unger dr Füehrig vor dänische Königin Margarethe I. isch im Jahr 1397 dr Bund Kalmarer Union gründet wordä. D Kalmarer Union isch d Vereinigung vo Dänemark, Norwegä u Schwedä gsi. Dert hei Teile vo Finnland (het denn no zu Schwedä ghört), Island, d Färöer, Shetland u Orkney u zitewiis Schleswig- Holstein derzue ghört. D Regierig het de ständig gwächslet u 1523 isch das aues schlussändlech dürne Ufstand u Rebellion vom Vouk um Gustav Erikkson Wasa o scho wider verbi gsi. Dä het nämlech aschliessend dr Ladä für 37 Jahr regiert.
Schwede het de mau im grosse Nordische Chrieg gäge Russland u Norwege verlorä, es isch es ewigs hin u här gsi mit Chriege u weles Land het de wider zu Schwede ghört u wenn het Schwede Dänemark oder Norwegä wider verlore, ke Ahnig.
Uf au Fäu heimer dr Zug gno richtig Houptstadt Stockholm.
Joel, dr Brüetsch vor Marina hetsech scho im Zug sehr heimisch (IKEA-FLAIR) gfüeut. Tatsächlech chunnts eim chli so vor.
Zum itscheggä isches no z früeh gsi. Z Gepäck heimer aber de chönne abgä u si de uf Fuettersuechi.
Stockholm / Stock = Stock, Boumstamm Holm = chlini Inslä isch mit über 2 Millione Iwohner di gröschti Stadt in ganz Skandinavie. Zu Skandinavie ghört
- Schwedä
- Norwegä
- Finnland
- Dänemark
- Island
Ganz tipisch si d Chrüzflagge, aglehnt a di dänischi Flagge namens Dannebrog. Dannebrog heisst ganz eifach Danne= Dänisches Brog/ Brok= Stoffstück.
Stockholm het e sibe Jahrhundert zruggreichendi Besiedligsgschicht u isch sit 1643 d Residänz vom König. Näbst em Sitz vor schwedische Regierig isches o dr Sitz vom schwedischä Parlamänt.
Zrugg zu dere Künigsgschicht.
Sit 1973 regiert Carl XVI. Gustaf u isch sit 2016 dr am lengste allei regierend König vo Schwedä. Ihm sini Kronprinzässin, d Victoria kennemer meh oder weniger äue au.
D Schloss steit uf dr Inslä Stadsholmen wo sich o d Autstadt Gamla Stan befindet.
Im Schloss Kungliga Slottet wohnt scho lang ke König meh. Es dient dr Königliche Familie aus Büro u beinhautet mehreri Museeä wie Antikmuseeum, Schlossmuseeum, Schatzchammerä u königlechs Rüstzimmer.
Di grössti Turisteatraktion isch dert d Ablösig vor Palastwach. Jede Tag am Mittag marschiere nöii Wachtruppe vom Palast, begleitet mit viu Getööse vom Musigkorp u mit Konzärt u tamtam wird d Wachablösig zelebriert.
Auti Telefon "Rikstelefon" (Reichstelefon) wos no paari het in ganz Stockholm wo sogar no funktioniere. Bi üs gseh de d Telefonkabine bitzli angers us.
Sehr uffäuig i de ganz aute Chäuerbeitzli hange Fotos u Poster vor künigleche Familie.
Z hüttige Gamla Stan isch viu Jahrhundert ds eigentleche Stockholm gsi. Di erste Hüser si dert im 13. Jahrhundert bout wordä u isch mitlerwile e witteri chlini Inslä in Stockholm. Mitlerwile het Stockholm über 14 Inslä wo mmit über 50 Brüggä verbunde si. Me nimmt a dass d Hüser in Gamla Stan dazumau us Houz bout si wordä und me se im Mittuauter dür Steihüser ersezt hei. Nadisna si de d Fassade erneueret u de jewilige Gwärb apasst wordä.
Stortorget. Scho im früeche Mittuauter hei d Stockholmer dä Platz aus Märit aber o zum aprangere brucht. 1520 het dert z Stockholmer Bluetbad stattgfunde. Dir rot- gäube Steifassadä stamme usem 17 Jahrhundert u hei 1625 nacheme Brand di ursprüngelech Hüser us Houz ersezt.
Tyska Kyrkan Chiuchä
Ungerwägs..
Unger angerem heimer verschidnigi Kanelbullar (Zimetschnäggä) kouft u süstegi schwedischi läckereie.
In Gamla Stan hets überau chlini, härzigi Gässli..
Golden Hits.. Was fürne Gschicht..
Nume so viu: üsi Schwedische Tischnachbare hei üs bim Stichwort Golden Hits dervo abgrate dert ichezga..
Statdessä simer de mitne i Usgang. Das isch mau e legendäre Abe gsi!
ABBA. Was süs?!
Geit ja gaaarnid in Stockholm z si und NID ids ABBA Museeum z ga!
Björn u Benny mau angers..
Di schwedischi Supergruppe bestehend us 2 Ehepäärli Agnetha & Björn, Benny & Anni- Frid. ABBA hets sit 1972 gä, 1974 isch d Rageetä am Eurovision Song Contest mit Waterloo abgangä.
Afänglech het sich d Band
Björn & Benny, Agnetha & Anni-Frid
Anni-Frid, Agnetha, Benny, Björn
Björn + Benny + Agnetha + Frida
gnennt.
Oder ir USA uf früechste Plattecover
Björn & Benny med svenska flickor (mit schwedische Meitschi)
1973 het e schwedischi Zitschrift Ufgforderet Namensvorschleg für di mittlerwile landeswitt bekannti Gruppe izsändä.
Friends and Neighbours
Alibaba
BABA
si so di erste Vorschleg gsi. Unger angerem o ABBA. Aber das es grosses u bekannts Nahrigsmittuungernähmä mitem Name Abba Seafood het gä hetme zersch müesse Erloubnis ihole um dr Namä ABBA z verwändä.
Super Trouper. Nume eine vo ganz viu wittere Superhits wos eim eifach dr Ermu ichenimmt ume totau dürebrönnt vor luter herie..!
8 Oubum gfüut mit Superhits wi:
Happy new year, Dancing Queen, Mamma Mia, The Winner Takes It All, Chiquitita, Fernando, Money Money Money, Take a Chance on Me, S.O.S, Gimme! Gimme! Gimme!, Knowing Me Knowing You, Voulez- Vous, Thank You for the Music, Name of the Game, I have a Dream, Honey Honey, I Do I Do I Do I Do..
Was seume mache, es lüpft eim eifach mit!
Ds Outfit vom Eurovision Song Contest..
Herrläch. Ds BRAVO for gfüeute 100 Jahr..
ABBA- Sound abmischä u Karaoke singä...............
Mann, Mann, Mann.. Ds super schöne Chüssi wos damaus het gä z choufe im Fan- Shop! U die Pulloverä!
ABBA in Wachs..
... u wiumer no nid gnue hei..!
Dancing Queens!
Ussicht im Hafä vorem Vasa Museum.
Ds Vasa Museum zeigt ds fasch vouständig erhautene Kriegsschiff Vasa wo uf sire Jungferefahrt 1628 gsunke isch.
Ds chline Modäu zeigt ds Originau.
Di schwedischi Galeone namens Wasa (uf dütsch) wo aus gröschts u am sterkschte bewaffnets Kriegsschiff goute het:
ca 69 Meter läng, 12 Meter breit, Grosmascht fasch 52 Meter höch, ds Achterdeck ca 15 Meter überem Wasserspiegu
.isch bereits nach ca 1300 Meter uf dr Jungferefahrt bi normalem Seegang gsunke uf Grund instabiler Konstruktion. Bravo.
Nach dr Uffindig 1956 u dr aschliessende Bärgig 1961 (es het tatsächlech Jahre duuret bisme ds Schiff usem Seegrund usgrabe u bergt het chönne wärde) hetme ds Schiff sehr ufwändig restauriert u derführ e Hauä drum um bout. Witteri Teili im Meer si gsuecht wordä, rein 9 Jahr si chlinsti Farbpartiku bestumme wordä zum usefinde weli Farbe di über 700 Statue zur Zierde hei gha. Römischi Chrieger, Nixä, Löiä u Phantasiefigure.
Eigentlech fasch aues bis unger anderem e Grossmascht heisi aues gfunde, nume wenigi chlini Teili si ersezt wordä.
Krass.
Mitem Linieboot zrugg ids Stedli übere..
Ungerwägs..
Wi scho erwähnt, die schwedische Leckereiä..
Köttbullar..
Di traditionelle schwedische Fleischbäueli mit Preisubeerikompott, Gonfi u Härdöpfustock.. Es Gedicht!
Für das gömer de definitiv mau i IKEA ga Cherze u angere Schissdräck choufe!
Ach ja.
U wemers scho gad vo grosse Firmene us Schwede hei chöimer ono gad e Schlänker zu H&M machä. A H&M verbi z cho in Schwede isch gloub Grundsätzlech eifach sehr schwär. A jedem Eggä hets e Ladä. Für Chind, Froue, Manne, Jung, Aut, gmixt, Heimprodukt, Pflegeprodukt...
Hennes u Mauritz si mitlerwile wi d Pest eifach überau.
Dr Erling Persson isch 1946 id USA greist u mit dr Idee zrugg cho günstigi Chleider z verchoufä. 1 Jahr speter heter dr erst "Hennes"-Lade eröffnet woner Damemode verchouft het. "Hennes" isch schwedisch u heisst "für sie", "ihres".
1968 isch dr Mauritz Wildforss derzue cho u het Herrebekleidig ids Sortimänt gno. Dämentsprächend, Hennes & Mauritz H&M.
U scho isch ds Wucheändi in Schwede verbi gsi..
Dr Vorteu vore müehsame Flugverbindig isch dr Auperundflug bi guetem Wätter vo Züri nach Gänf!
