SIMBABWE / SAMBIA / BOTSWANA / NAMIBIA 2016

E gedigene Bisness-Class-Flug vo Johannesburg zu de Victoria Falls, da d Economy isch usbuechet gsi...

Mir hei üs glittä!

Mir hätte üs schono chönne dra gwöhne a root Teppich, viu Platz u aui süschtige Annähmlechkeite..

`So lässt`s sich fliegen!`

Im 2013 het d EXIM Bank of China 150 Millione Doller i Umbou vom Flughafe in Victoria Falls, Simbabwe butteret. Im 2015 isch de dr Umbou abgschlosse gsi. Bis denn het me uf dr sambische Site in Livingstone müesse lande, dört übernachte oder über d Gränze nach Victoria Falls reise.

Ds Victoria Falls hets dr Aaschiin gmacht, dass dr Tourismus no am wachse isch, trotzdäm dass mir imene riisige Turihotelbunker abgstige si. Am Abe ir "Stadt" ungerwägs si, isch de o chli spezieu u nid ganz ungfährlech gsi. Jehnschti Verchöifer hei üs immer aues Mügleche wöue adräiä.. Houzgschnitzti Tier, auti Banknote oder süschtigi Sache. Viu fischteri Eggä, freiloufendi Wiudsöu u e huufe Affä wo de Passantä Täschä oder Ruckseck furtrissä.

E Bsuech imene Supermarkt darf wi immer o hie nid fähle!

Mir, aus einzigi wiisi Turis, gnauschtens beobachtet vo hundert iheimischä Päärli Ougä.

E Heliflug. Di besti Investition womer üs gönnt hei. Obwou ds Vertroue i sone Chischte zmitts im Nirgendwo Afangs no grad nid sooo riisig isch gsi. Aber egau u hüüüü!

Üse mittlerwile dritt Heliflug. Sehr guet isoliert vom Lärm mit Früschluft, vo däm här no e rächt e agnähme Flug gsi.

D Ussicht: einmalig, einzigartig, dr Wahnsinn, atemberoubend, unbeschriblech - dr Hammer.

Dr Sambesi-Fluss isch 2574km läng und ds viert gröschte Fluss-System in Afrika. Dr David Livingstone het die Fäu im 1855 entdeckt u se zu Ehre vor Königin Victoria so gnennt. Die Iheimische nenne dr Wasserfau Mosi-oa-Tunya (donnernder Rauch) da dr Gischt bis 300m höch geit u me das bis i 30km Entfernig cha gseh.

D Victoria-Falls si mit 1708 Meter Breiti die breitischte, durchgehendschte Wasserfäu vor Wäut. 110 Meter Höchi u maximum 50 Meter zur gägeüberligende Site si witeri iidrücklechi Mass.

Sambia u Simbabwe si mitere Outo u Isebahnbrügg verbundä. Ca dert isch de o d Gränzä vode Wasserfäu.

D Victoria Falls gits wius i däm eigentlech hertä Basaltbodä di Kluft uftah het. Dr Grund derführ isch aber unklar.

Sicher isch, dass dr Ungergrund teilwiis us Sandstei isch und dass sich dr Wasserfau so i nördlecher Richtig bewegt. Me weiss auso scho itze bis wohäre dr Wasserfau i de nägste Jahr wanderet.

O hie hets schöni Tierli...

Vorem Parkigang hets öpe 20 Ständ wo eim unger anderem Rägeponchos vermietä.

Für was äch?!

Dr Itrittspriis basiert uf Härkunftsland vor jewilige Person. Sprich, es sehr individuells Länderabkommä.

D Affe si d Awäseheit vom Mönsch hie zimlech gwöhnt. Fuetter gits ja meischtens ir Tonne oder es wird de Turischte us dr Hand gschrissä.

Die Iheimische si paar Meter vorem Abgrund vo dä Fäu früsch fröhlech am fische.

D Umgäbig um d Fäu si uf Simbabwe- wie o uf Sambiasite sit 1934 unger Schutz u sit 1972 Teil vom Mosi-oa-Tunya-Nationaupark.

Es git 3 verschideni Arte e Wasserfau z bemässä.

D Höchi, d Breiti u z Volumä. Mitere Höchi vo ca 107 Meter ghöre d Victoria Falls nid id Top 800 vo de gröschte Wasserfäu wäutwit. Sie sie aber di 10t breiteschte ir Wäut u 13t wätuwit bim Volumä. Rächnetme das aues zämä ergäbesech so di 3 gröschte Wasserfäu vor Wäut.

Niagara Falls, Iguacu Falls und Victoria Falls.

Niagara Falls 51 Meter höch, 1203 Meter breit, 2407m3/s
Iguacu Falls 82 Meter höch, 2700 Meter breit, 1746m3/s
Victoria Falls 107 Meter höch, 1737 Meter breit, 1100m3/s

Zur richtige Tageszyt am richtige Ort u me überchunnt es wunderbars Naturschouspiu ds gseh i Form vo sänkrächte Rägeböge.

Me cha sich chum satt gseh!

Es geit auso bis zu 110m ds Loch abe. Vergässet, dass es da irgendwelchi Absperrige git. Mir si ja da in Afrika und Sicherheit chunnt bestimmt nid z erst.

Sänkrächti Rägeböge - öpis säutenes. D Sunne schiint vou Gas u dr Quaum vom donnernde Wasser stigt uf.

Zimbabwe`s Doller het sit 2007 immer meh a Wärt verlore. Afangs Juni 2015 hei si de bekannt gä, dass d Währig ihre Status aus Währig per Ändi Septämber 2015 verlüürt. Aui hei de ihres Gäut no i US-$ chönne ga wächsle. 35 Billiarde Simbabwe-Doller hei 1US-$ gä.Drum hei die da gaaaaanz viu 0 uf dr Note.

Natürlech hei mers de nid chönne la si no uf die sambesischi Site vo de Wasserfäu ds ga. Usreise us Simbabwe, über d Brügg wandere, ds Sambia iireise u de no i Nationau-Park. Einisch meh es luschtigs Reisli.

Da si Gstaute mit und entgäge cho u i däm Gwusu ar Gränzä no bau am lätzä Ort igreist.

Zum Glück hei mir bim Parkigang vo zwöine wo use si, e Pellerine übercho. Uf dere Site vo de Wasserfäu wirdme no viu nasser aus uf dr Simbabwe-Site.

D Schueh si de schnäu mau trotz Schutz seich-nass gsi..

Dr Ufwand u ds zuesätzelche Gäud üsgä füre Landeswächsu (Itritt & Visa) heisech absolut glohnt!

Uf dr Sambia-Site chönnt me i d Devils-Pools ga bade, die lige uf dr Kante vo de Wasserfäu. Würd no frächi Föteli gä. Aber aues cha me ja nid mache..

Rägä-Mafia!

Mir finde mir hei di besti Wassermängi verwütscht im Juli. Bim Low water chunnt nämlech nume punktuell überau weni Wasser über d Klippä u bi High water gsehtme chum me öpis wiu so viu Wasser abebrätschet u d Wasserwuuchä vo unger uf aus vernäblet..

So heimer öpis gseh, hei eigentlech überau häre chönne u es het üs imne sehr nasse aber aständige Rahme verschiffet u gnetzt.

Härzig, aber sehr fräch u garnid mau so ungfährlech.

Vo Handy, Ässä u Handtäschä muesme uf aues ufpasse, was eim us de Händ gschrisse cha wärdä!

Häts chli weniger Wasser gha, wäremer definitiv ga drüber us luegä..

E chlini, stotzigi Wanderig a Sambesi / Zambezi Fluss.

Dr Sambesi isch nachem Nil, Kongo u Niger mit ca 2574km Fliessstrecki dr viertlängscht Fluss in Afrika u dr gröscht afrikanisch Strom wo i Indisch Ozean fliesst.

Uf dr Brügg zwüsche de beide Länder..

Bimene wouverdiente Apero imene chline, härzige Restaurant nid witt vo üsem Hotel entfernt heimer de nomau d Schlucht beguetachtet u de wiude Zipliner zuegluegt u aune wosech schreiend hei dür d Schlucht la schwinge.

Zum Znacht simer gärn ids Beizli names Mama Africa ghuschet.

Feine iheimische Food zu nid überrissenä u turiusbütendä Priisä.

Riis, Süesshärdöfu, e Rinderragout, es Bier. Perfekt.

Ufbruch zum nägste Abentüür..

Vo Simbabwe simer de miteme Bus für 30 Lüt z 2te höch plus Fahrer allei ad Gränzä vo Botsuana. Über d Gränze simer de allei (inklusive Schuebad), änä het üs de dr nägst miteme Chlibus erwartet wo üs a nägst Gränzpostä am Chobe River gfahre het.

Wot me nämlech, so wi mir, e Chrützfahrt ufem Chobe Fluss machä, muesme bi däm Gränzposchtä wider usreise bevor me uf z Boot cha..

Nach lengerem Warte u ca 5x z Gfüeu ha, irgendwie weiss niemer was mit üs afah, heimer de ändlech ufenes Böötli dörfä.

Lustigerwiis isch dert es oustralisches Päärli derbi gsi, wo genau wi mir um di glichi Zit im gliche Hotel in Victoria Falls los isch. Äbefaus miteme riise Bus, z 3te höch ad Gränzä vo Botswana gfahre isch u dert ine Chlibus gstige isch u a dä Gränzpostä.

Churz, me hät ja chönne zämefahrä u sich lengschtens es Outo teilä usw. Aber hie wott jede öpis vom Chuechä abha. Me Arbeit, me Trinkgäud.

So, keni Fotos darfme mache vo dere Inslä names Impalila. Eigentlech.

Wiu da isch d Imigration für Namibia..

Aha.. Oder o das notwendige Übel gnennt.

So viu derzue:

Es isch e Inslä ca 18 Quadratkilometer gross, nume per Flugi oder Boot erreichbar, mit weni Iwohner u viu Turischte.

Nacheme Spaziergang ufeme Chiiswägli chunntme de zum Gränzhüsli.

Weme Glück het isch überhoupt öper da, oder me wartet wi mir no öpe 20 Minute bis di Agsteute fertig si mit Zmittagässä.

Chobe Princess, üses Dahei für di nägste 3 Nächt..

Schöns Wohnzimmer, schöns Zimmer mit super Ussicht uf ds Ufer u feins Ässä scho gad zum Zmittag.

Auso. 3 Nächt, aues Ässä (3 mau am Tag) u z Trinke wasme wot bis ufe hochprozäntig Schnaps inbegriffä.

Mindestufenthaut 2 Nächt, 10 Gest plus Crew a Bord. Erneut perfekt!

Chum losgfahre heimer scho di ersti grossi Elefanteherdä gseh.

Am linge Ufer isch Botswana u am rächte Ufer Namibia.

Iheimischi im Gägeverchehr..

No am gliche Tag heimer ufene Böötlisafari chönnä u so chli nöcher a d Ufer härä..

Wahnsinn, oder?

Asiatischi wi Afrikanischi Elefante si im Momänt chli vom Usstärbe bedroht wäg de Eufebeizähn wo o da Millione bringä.. E Souerei!

Ungerwägs ufem Chobe Fluss..

Da dr Fluss no nid so viu Wasser het, chame nume d Heufti befahre.

Für di ersti Nacht heisi ds Schiff z oberst am müglechste Punkt gankeret.

O we d Sunne langsam abe isch, glich no wunderschön..

Oder?!

Bimene feine Getränk mit Gügs dr Sunneungergang gluegt..

Zrugg uf z Schiff gumpet u anstatt wie aui angere ga duschä (Wasser isch eh chaut we aui wei) u uftaacklä heimer dobe ufem Deck dr Räschtä vom Sunneungergang no gnossä..

Herrläch z wüsse dasme fasch aus einzigs no ungerwägs u i dere Tierwäut isch, während aui angere vom Park zrugg i ihrene tüüre Lodges si.

Mir si aber de o di einzige, u vorauem die jüngschte gsi, wo 3 Nächt ufem Schiff verbracht hei. Skandau so öpis. Das mir das chöi. D Dame us Amerika hetsech de nacheme lengere Gspräch mit üs ume chli beruhiget gha.

Am Morge früeh di beste Ussichtä ufe Sunneufgang.

Neue Tag, neui Müglechkeite zum Tier spottä.

Hufe Krokodiu u verschidensti Vögu überau..

Zwüschetine chli ufwerme u sünnelä..

O hennä viu überau, Flusspferde.

Dr Name Flusspferd isch es griechisches Gmix us Hippos "Pferd" und potamos "Fluss". Hippopotamus isch dr wüsseschaftlech Name vor Gattig, di latinischi Form vom griechische Wort. Darum d Abchürzig Hippo.

Dr Name Niupferd chunnt dadervo, wiume us europäischer Sicht ds erste Flusspferd im Nil entdeckt het. Mitlerwile sisi aber dert usgrottet.

Afrika. Genereu ächt es Paradies für Vogu-Liebhaber!

E chline Nachteu ischs weme ufem Fluss u nid imne Outo isch für chli nöcher ga z beobachtä..

E Giraffefamilie..

Nid unwitt vom Löi, aber dä het sichtlech gnue gjagt.

Härzig wisi poset hei..

Namittagsprogramm am neue Ankerplatz für d Nacht.

Tierbeobachte uf dr Bootsterassä, chli plouderä mit de Australier u Apéro nä.

Scho bir Geburt isch es Elefantechaub bis zu 100kg. D Schwangerschaft duuret 20- 22 Monet. Somit isch ds di lengschti vo aune Landsöigetier.

Je nach Art cha dr Elefant im Durchschnitt zwüsche 2 u 5 Tonne Körpergwicht und e Grössi vo bis zu 4 Meter erreichä.

Dr gröscht Elefant hetme 1978 mit 4,21 Meter Höchi in Namibia gfunde. Dr eutischt Elefant het im Zoo vo Taipeh / Taiwan gläbt u isch 86 jährig wordä.

D Elefante bewege aui 4 Füess zum schwümmä u si dadermit sehr schnäu. Dr massig Körper sorgt für gnue Uftrieb u dr Rüssu dient aus Schnorchu.

Spannendi Gschicht..

E Löi nöcheret sich amne Elefant.

Langsam aber steetig hetersech härepirscht.

Spannung puur.. Aber. Angers aus dasmers erwartet hätte het dr ehner jung Elefant dr Löi nach langem i d Flucht gjagt.

E wittere schönä Tag isch miteme schöne Sunneungergang z änd.

Hesch gseh Gotte Ruth:

Die rote Sonne von Barbados isch schinbar o hie z Namibia..

Lecker Znacht, super u interessanti Gspräch über Gott u d Wäut mit Australier wo aus Lehrer mit schwirige Chind u stark beiträchtigte Outischte schaffä.

Früsch an Board cho, ds Grosi vo Eminem.

Ä Löi gsichtet..?!

Nei, süsch e Huufe Tier..

Dr Graufischer isch e sogenannt Eisvogel wo vo Afrika entlang vom Nil, Sahara, im südleche Asie u vor Türkei bis nach China vorchunnt. Er isch e Standvogu, ds heisst är zieht im Winter nid furt.

Kapbüfflä u Kudus, Fantä, Äntä u Störch namens Nimmersatt..

Impalas

Ghöre zur Gattig vo de afrikanische Antilopä. Wäg ihrem ähnleche Ussehä hetme d Impala bis izt immer i Eggä vo de Gazäuä vermuetet. Jedoch hetme itze äbä usegfunde dass sie ehner mit Chuehantilopä verwandt si.

Impalas si sehr witt verbreitet u mir hei überau u ständig vo dene gseh.

Sünnelä..

Lieblings Apérogetränk mit Gügs:

Savanna Premiud Cider. Us afrikanische, sunnengerifte Granny-Smith Öpfu.

Windhoeck Lager. `Ein nach deutschem Reinheitsgebot gebrauets Bier in Namibia.`

Definitiv di besti Bucht zum Tier beobachtä..

Vorauem für riisigi Herdänä Elefantä!

Was die nid aues chöi mit ihrem Rüssu. Dr Rüssu het kes Nasebei oder Chnochä, sondern besteit rein us Muskugwäb. Es dient aus Tascht u Griforgan, zur atmig u Gruchswahrnämig, aus Waffä, Drohmittu, Sug u Druckpumpi bim trinkä.

Zum Schutz vor dr Sunne u Insektä stoubesisech mit Dräck oder Stoub i.