Mitere riise Portion Übukeit u no viu meh sehr hässlechem, arabischem Männerparfum ir Nasä simer nachere gfüeute Ewigkeit Mahé nöcher cho. 

Topografisch ghöre d Seychelle zu Afrika. 

D Seychelle bestöh us ca 115 Inslä. 42 Granitinsl u 73 Koraueinslä. Die wärde i sogenannti inneri u üsseri Inslä ufteut. 

Zaut wird mit Seychelle Rupie.

Me weises nid so gnau, aber es wird dervo usgange dass di Inslä vo de arabische Händler entdeckt si wordä. Um 1500 si Schiff vom portugisische Entdecker Vasco da Gama bi de Inslä gankeret. Obwou d Inslä somit bekannt si gsi, sisi ersch 250 Jahr speter vo de Franzose duurhaft besidlet wordä. Dr franzöisch Kapitän Lazare Picault isch uf dr Reis nach Indie per Zuefau nach Mauritius uf di herrelose Inslä gstossä. 1753 isches offizieu gsi, dass di Inslä im Bsitz vo Frankrich u nachem franzöische Seeoffizier Moreau de Sechelles benennt isch.

Im Verlouf vom erste Napoleonische Krieg si d Seychelle 1794 vo de Brite bsezt u im sogenannte "Pariser Frieden" 1814 Grossbritannie zuegsroche wordä. Unger dr britische Herrschaft isch d Insugruppe zersch Teil gsi vor Kolonie Mauritius. 1903 hei d Seychelle dr Status vore eigeständige Kolonie erhaute. 

E sogenannt "Säubstverwautig" heisi 1970 übercho. D Unabhängigkeit u dermit z Commonwealth 1976. Fougedessi däm hin u här rede d Bewohner Franzöisch, Änglisch und es Seychelle-Kreol. Was genau Kreolisch isch, chöit dir gärn im Bricht vo La Rèunion oder Mauritius nacheläse. 

Uf dr Houptinslä Mahé acho, heimer afang mau 4 Stund müesse warte bismer am chline Flughafä näbedrann hei chönne erneut itscheggä. Derzue si Flüger usgfaue. Mit witere 2 Stund Verspätig simer miteme chline Flugi uf Praslin übere. 

Praslin isch ca 12 Km läng, 5 Km breit u di zwöit gröschti Inslä.

Um Mitternacht simer du fangs mau i üsem Hotäuzimmer is Koma gfauä. Mir si natürlech unkonventionell ohni Voucher u au dä Schnick Schnack itrudlet. Chunnt dervo weme säuber buechet u ohni 0815- Reisebüro dür d Wäut geit. 

Erste Amtshandlung amene neue Ort: Ichoufsmüglechkeite sueche für Rum und auefaus Wasser. 

D Abchürzig am Meer entlang isch nid schlächt, he?!

Sone Iheimische Supermarkt isch aber o immer e sehr spannend..

Da isch dr Anke gad diräkt näbem Salat u über de Tomate. Evt. isch das dr Sandwich-Schrank? Z Fleisch, no chli Glace, eifach aues wo schmiuzt id Truhe. 

Takamaka Dark Rum. 

"Süsslicher Rum mit würzigem Aroma und lang anhaltenden Vanille- und Karamellnoten."  

Rum trinke u Vögu beobachte. Wasme haut so macht uf de Seychellä.. #schallendes-gelächter

Curieuse isch e Granitinsu u ghört zu de innere Seychelle. Si isch di 5t gröschti Insle u knapp 1 Kilometer vo Praslin entfernt. 

Si isch 3 Quadratkilometer gross, isch vo de Infrastrukture nid umbedingt beruuschend u dämensprächend nume vo wenige Lüt bewohnt. Im 19. Jahrhundert het me dert Lepra-Chranki usgsezt. Z Wätter isch leider immerno Bewöukt u rägnerisch gsi. Vo üsem Böötli- Typ heimer de erfahre dass vor knapp 1 Wuche e mordio Zyklon über d Inslä gfägt isch u dr Uslöifer vo däm Zyklon tschuud a däm  Wätter isch.

Fougedessi simer doch froh heimer das vorhär nid würcklech mitübercho und d Inslä si meh oder weniger unbeschädiget blibe. 

Uf Curieuse heimer d Forschigsstation für Wasserschiudchröte bsuecht. 

Einisch meh heimer bekanntschaft gmacht mit dene riisige Pleger. 

Dr Bahia Laraie Strand bi schlächtem Wätter.. Aber glich schön.

Curieuse isch näbst Praslin di einzigi Inslä wo Seychellepaume Coco de Mer wachst. Und das zwüsche Praslin u Curieuse steuewiis nume wenigi Meter töif isch (10Meter Wassertöifi) ligt d Vermuetig nöch dass Curieuse mau e Teil vo Praslin isch gsi. 

Einisch quer über Bärge u Mangrovä simer äne bim Anse St. Josef acho zum Lunch. Mangosalat, Rüeblisalat, Chabissalat, Peperoni u Fleisch..

Wi scho erwähnt isch di Inslä bis ca 1965 für Lepra Chranki gsi. Ungerbracht im Doctor's House wo iz aus Museum (Informatione über die Zite) dient. 

Ufem Wäg vo Curieuse zrugg nach Praslin heimer bir Insu St. Pierre ghautä. E chlini, unbewohnti Inslä, guet zum schnorchlä. Da z Wätter immerno nid so guet isch gsi; grossi Wäuä, zimlechs geschaukel; heimer hie nume e haub Stund aghaute. Ganz zum Glück vor Marina wo zimlech Übukeit het gha.

Zrugg uf Praslin heimer üs es Outo gmietet fürne Tag.

D Strasse si jenachdäm nid gad di bestä. Wougmerkt. Strass chame garnid sägä das fasch überau ke Mittustreife het gha. 

Blütenzauber. Oder dr klassiker unger de Rägeschirmä..

Anse Lazio. Dä schönst Strand uf Praslin. Nid gschüzt dürnes Koraueriff, dämentsprächend gfährlech für Heiagriffe.

Dank em ehner schlechtere Wätter hets üs zum Glück nid glustet ga z badä.

Umso meh Zit heimer gha füre ganz Strand zlängem u zhöchem erkundä. 

Ungerwägs uf dr Inslä.. 

Unger angerem nid unger Paumä u abfauendi Kokosnüss parkiere, mmmh.. 

Immerhin heimers z spät aus garnie realisiert wasmer im Outo-Mietvertrag hei gläsä.

Vallée de Mai

Sit 1983 ghört dä Nationaupark zum UNESCO Wäutnaturerbe. Die Landschaft isch es prähistorisches Übrigbleibsel us dere Zit wo di Granitfeusä no zum Kontinänt Gondwana hei ghört. 

E nöie Bsitzer het dr botanisch Garte mit Zierplanze, Kaffee u Fruchtböim verschöneret. 1945 isch z Tau i private Bsitz vor Regierig cho u sider sisi dranne aui ortsfrömdä Planze wome het igfüehrt uszrottä. So gsehtme, o uf de Seychelle passiert unnötigs wome früecher oder speter mues usbadä. 

D Seychellepaumä, oder besser bekannt aus Coco de Mer. Wi scho erwähnt gits die nume uf dr Insu Curieuse u Praslin. Di Fächerpaume wachse sehr langsam u chöi so gäge di 200 Jahr aut wärdä. Di spezieui Nuss wird zimlech gross u schwär u isch es Wahrzeiche vo de Seychelle. Sones Füdlä (Interpretation vo üs) heimer nämlech i Pass gstämplet übercho. 

Wo die Nüss uf verschidene Inslä am Strand gfunde si worde umese a kere dert wachsende Paume het chönne zuordne, hei d Bewohner agno, dass die usem Meer mues cho. Darum Coco de Mer. 

Dr Wäg zum Wasserfau a dere eher stark u gfährlech befahrene Strass hetsech schwiriger dargsteut aus dasmer dänkt hei. Zum loufe z witt, parkiere nid müglech, Fuesswäg sowiso nid vorhandä. Aber es het müesse si. 

Ungerwägs in Baie Ste Anne zum usefinde wo mir de mit dr Fähre uf di nägsti Inslä fahrä. Und definitiv nüt wäutbewegends. Ussert me fahrt bim Polizeiposte zueche für umzchehrä.. We die doch das Züg im Usland nume besser würde aschribe!

Nöii Inslä, nöis Glück? 

Mit dr Fähre simer de vo Praslin uf La Digue. Einisch meh Verspätig, warte u es komisches System für Lüt u Gepäck uf d Fähre z becho. Regel Nr. 4: verunsichere nie e Roukoffer-Reisende.

La Digue isch di chlinschti vo de 3 bewohnte Houptinslä. Uf knapp 10 Quadratkilometer läbä ca 2500 Iwohner wosech Diguois nenne. D Inslä isch 1744 vo Lazare Picault entdeckt u zersch "Isle Rouge", gnennt wordä. Dür d Erkundige vo de de Insle het de dr franzöisch Marineeoffizier Marion Dufresne d Inslä 1768 nachem Name vo sim Schiff La Digue umbenennt. Wider isch d Insle zersch vo de franzose im Bsitz gsi, wo de d Ängländer si cho isch la Digue unbewohnt gsi. Di erste Sidler 1798 si deportierti Ufsändischi us La Rèunion gsi. D Familie Morel mit 5 Chind u vier Sklave wo churz druf nach La Digue umgsidlet si. Obwou d Sklaverei i de französische Koloniä 1784 abgschafft worde isch, hetmes uf de Seychelle aber witterhin praktiziert. 1815 isch ds Ehepaar Morel gstorbe, dr Bsitz het öppe e füftu vor Inslä so wie 25 Sklave umfasst. 1817 hei 71 Lüt uf La Digue gwohnt. 1827 sis 364 gsi, da dervo 240 Sklave. Am 1. Februar 1835 isch d Sklaverei offizieu abgschafft wordä. Glichwou hei di ehemalige Sklave witter aus Arbeiter i de Plantage miteme minime Lohn müesse schaffä. Ersch 4 Jahr speter im 1839 het di Sklaverei de definitiv ghört uf de Seychelle. 

U z erste was mir uf dere Inslä mache? Genau, ichoufe. Schliesslech schlafemer uf "däm" Supermarkt vor Inslä. Sperrzite füre chouf vo Aukohou kennemer ja scho u wüsse üs z häufä..

Im Jahr 1976 hets no keni befestigte Strasse gä u nume 1 Hotel. Mittlerwile hets paar Hotel meh und immerhin paar wenigi Kilometer befestigti Strass. Ersch sit es paar Jahr gits paar Outo uf dr Inslä. Für die gits 1 Outowärchstatt und 1 Tanksteu. Houptverchehrsmittu isch ds Velo u no öppe die e traditionelle Ochsecharre. Mir hei üs de am nägste Tag es Velo gmietet u si richtig Nordä gfahre. Garnidso eifach mit dene aute u rostige Velos. 

Obwou dases nume ca 3 Kilometer si gsi, heimer Stundelang gha. Dr Hoger uf ohni gueti Gangschautig u überau stiuha zum badä u fötelä.. 

Anse Patate, eine vo de schönste Stränd uf La Digue.

Da wüssemer nidso rächt ob das chline, wiise Wüuchli ir Mitti ehner stört, oder däm ganze kitschige Ablick e Goubwürdigkeit verleit..?

Immer wider schöni "Fänster" zum Fotografierä.

Ds "Chez Jules" Restaurant. Üse wouverdient Pit-Stop bi ca 32 Grad u 3 Stund Velofahre u badä!

Feini, früschi Fruchtsäft, Kokosnuss, kreolisches Ässä u gueti Ussichte!

Natürlech zum Sunneuntergang ume zrugg bim beste Sunneuntergangs-Spot vo dere Inslä..

Takamaka Rum und es Bänkli für üs allei am Meer..

D Inslä im Hingergrund: Praslin

Ds Obligate Bluemefoto ♡

Für di räschtlechi Inslä heimer üs de die 2 hübsche, verrostete, schepprige Velos gmietet. Chörbli hingerdruff isch ds populärste Accessoire uf dr Inslä. 

A dere Houptstrass, oberhaub vom Italiänische Restaurant, em Supermarkt u dr Bank heimer gwohnt. Bescheide imene unspektakuläre Zimmer wo weni kostetet het. Längt. So chunntme nämelch o zumene zaubare Budget uf d Seychellä!

Mir si zwar nid imene Hotel gsi, aber emene 4 Stärnhotel agschlosse. So hei mir dörfe di ganzi Alag bruche. Wasmer brucht hei: Strand, Pool, Bar, Poolbar! 

Gässe heimer nämlech lieber bi de Iheimische im Take Away. Kreolischi Gricht, jede Tag wider nöii Menue zum useläsä. 

Dr Captain vo dere ganze Usflügerei het üs mit sine Chind losgschickt. Es Modi, scho chli euter u 2 jüngeri Gielä. Im Gägesatz zu angere Turischte simer da scho zimlech "abgschreckt" über aus wo usserhaub oder imne Boot isch und oder cha passierä. Da machtsech nid mau di verantwortigsbewussti, sicherheitsbeuftreiti u spassbräms Marina Sorgä. Mir si de zu dene Inslä useböötlet bis d Nationaupark-Scheriffe si cho. Dene heimer chli Itritt zaut u scho sisi niene meh ume gsi. Z Gschäft vom Tag äue erledigt u guet. 

Weder Dori no Nemo..

Dr Tinu het de Bekanntschaft gmacht mit ihm da..

Im Gägesatz zu de Schiudchröte in Barbados wo ehner schüüch si gsi, het ärs zimlech spannend gfunde. Dr Tinu het ne seehleruehig chönne fotografierä.

Coco Island

E chlini unbewohnti Inslä wome nume cha häräschwümmä. Garnid mau so ungfährlech das feiechli Ströhmig het gha und ds Wasser zimlech seicht isch gsi. 

E schöne, chline Strand zum Glück no vor de angere vile Turischte verwütscht..

Ja dert druffe miteme Zäut oder ere Hängemattä würdsechs ono la läbä!

Felicite

Vor dr sächst gröschtä (innere) Inslä us Granit simer abermaus usem Boot usgladä wordä zum schnorchlä.

Trotz em El Nino (Koralle bleaching) hets wunderschöni Koraue gha. Dür d Meereserwärmig vom sowiso scho warme Wasser passiert di sogenannti Koralle bleichig. D Koralle verliere d Farb, stärbe us. Im Jahr 1997/ 98 isch dazumau e wittere riisige Schuub (El Nino) usbroche uf dr ganze Wäut. Es heisst dass innert 9 Monet e säschstu vo de Koraueriff zerstört si worde. 

Näre gits immerno die super schlaue Turischtä wo sich o unger Wasser benäh aus hättesi derführ zaut u dörfä. Drufstah, alängä, abbrächä.. U we di Iheimische dervo warne wiume sich o gröber cha verletzä oder me nie weiss a was me da achunnt hei die ganz sicher ke Ahnig..! #grummel #dummshuehn

Ariel die Meerjungfrau?!

Schnorchlä u badä mit dr Böötli-Crew..

Ufem Rückwäg heimer d Inslä umrundet u di schönschte u abglägniste Stränd vom Meer us chönne gseh..

Super Idee. Usflug ufe Ussichtspunkt uche. Hurti. Steil, steiler u no steiler isches obsi. Mir si di einzige gsi wo d Velo so witt ufegschleppet hei!

On top, bim Restaurant verbi simer no witter. Dä Wäg hets nomau isech gha! 

D Ussicht aber uf jede Fau lohnenswärt..

Zrugg im Restaurant heimer üs e feine Lunch zu dere schöne Ussicht gönnt.

Sehr viu wohne ide Häng, d Turischte si natürlech am Meer.

Pünktlech zrugg ufe Sunneungergang miteme Takamaka- Rum..

Gäge Schluss vo üsne Ferie uf La Digue heimer üs de no i absolut Turischte-Eggä gwagt. A Strand Anse Source d'Argend. Dä isch izuhnet u me zaut Itritt. När chame uf däm Areau no e Fridhof ga luege, Schiudchrötte à gogo, Vanillepflanze und hennä viu Paumä. So viu hets süsch niene uf dr Insu gha. 

Obwou mir ersch am spätere Namittag si acho hets immerno massig Lüt gha. So guet s isch gange simer de au die Turischte umgangä. Da heimer jedi Müglechkeit gnüzt Fotos ohni Mönschebärg z machä. 

Tja. Zit u Geduud si 2 wichtegi Kriteriä fürnes guets Foto. Auso meistens nime ig mir Zit u dr Tinu mues Geduud ha. Chunnt aber oscho mau umbekehrt vor.

Ungerwägs..

Neue Tag, neue Strand. 

Durchus es guets Motto für uf de Seychellä.

Wider e Strecki mitem rostige Velo bi gfüute 100 Grad, tuusig Stütz u quasi kere Gangschautig.. Schlussändlech hetsechs glohnt. Grade Anse, e schöne, grossä Strand. Fasch no keni Lüt, aber o chum Schattemüglechkeite. 

Zersch mau no witters u dr chliner Strand sueche. Nachere haube Dschunguwanderig heimers de gfunde. 

Dr Mage vor Marina het i däm Momänt absolut nid mitgmacht u mir hei üs entschide nidno bis zum letschte Strand z piugere (wär eigentlech z Zieu gsi) sondern lieber wider zrugg a anger Strand z ga. Dert heimer üs unger d Feuse a Schattä gleit, chli badet u de gli mau dr Rückwäg aträttä. Magenunverträglichkeit wäg was auch immer sei Dank! 

Usgrächnet a däm Abe hei mir natürlech im Restaurant obe zum Znacht reserviert. Aus ersti abghout heimer no feiechli e Rundreis dür d Insu gmacht. Vo Hostel bis 5 Stärn Hotel heimer aues mügleche ufgläsä. Natürlech o Schwizer. Schwizer wo mit ihrne Chind natürlech mitem Helikopter vor Houptinslä aflügä u im 5 Stärn Hotel wohnä. Natürlech.

Zum Apero sauzigi Bananechips miteme Drink u d Sunne wo abegeit..

Riis, Poulet, Gmüess u Fisch, zum Dessert Glace.

Sunneuntergang hinger dr Inslä Praslin..

Romantik puur mit gschnatteretem Züri- Dialäkt im Äckä!

So henne steil wis ufe isch gange isches de im fiischterä wider nidsi..

Kurvig u schnäu, hinger heisech no d Chöch wi ufem Küderwage aghänkt u ufem Natel umetöggelet.. 

Di einzigi Beckerei uf dr Inslä heimer natürlech ono testet..

Säubergmachts Glace u paar übersüessti Chuechä u süstige Konfekt. Uf jede Fau nid schlächt für uf sore Inslä.

Nümm so viu wi früecher, aber dochno si 1-2 Ochsechärrä ungerwägs wo houptsächlech d Turischte uf dr Inslä umekutschä. Immerno es Zeiche für d Gmüetlechkeit u kes Gjufu u dr Inslä. Dä hie, speziell gschmückt fürnes Hochzit. 

Äbä. Da si mir mit üsne super Velos trotz em vile Rost u de süstige Mängu chli schneuer ungerwägs gsi..

Anse Source d'Argend zum Zwöitä..

Ds Wasser lauwarm. Viu z warm zum abchüehlä u badä!

Chli schwaderä, umewanderä, fötelä u wider schwaderä..

Warte ufe Sunneuntergang..

D Silhouette vor Silhouette Inslä

A üsem aueri letschte Tag simer nomau di haubi Inslä abgfreeset. 

Eigentlech heimer no weue dr letscht Strand findä womer dank er Mageverstimmig vor Marina nid hei chönne ga. Aber mir hei de schnäu gmerkt dass üs dä "Wäg" wome auso äue am beste e Macheetä hät derführ bi dere Hitz meh abverlangt aus nötig. Drum heimer am nägste Strand ghautä us eifach no chli gnossä..

Bis uf dä Punkt dass die frächi Echsä sehr gwunderig und zuetroulech isch gsi! Isch doch die am Tinu bim pfuuse übere Arm u näre immer wider sehr nöch cho. Zum Schluss sogar no id Täsche iche..

U ja. Da chas passiere dasme ungerwägs e Schiudchrott atrifft wo irgend ememe Iheimische ghört. Dert chas nämlech passiere dasme vo sim Grosvater oder Vater e Schiudchrott vererbt bechunnt. U was machtme mit somene Hustier? Genau, me lahts eifach mau chli use düre Tag.

Dr letscht Abe het üs de no e rissige Sturm mit Rägä bracht.. 

Zum Znacht nomau i üses lieblings Beizli u Iheimisch ga fueterä.

U wius so fein isch, ds letschtä Zmorge- Zmittag ono gad dert.. nam nam!

Ruckseck?! Wäm o immer die si, uf au fäu si das so siffigi Hippis!

Z nächste Mau chömemer de mit somene Schiffli da uf d Seychellä..

Ja, zimlech sicher isch ds d Hitz u dr Sunnestich vor Warterei!

Mit 1 Stund Verspätig isch ds Schiff de itroffä. Anstatt in Praslin no azhaute isches de gad diräkt mit sehr starkem Wäuegang u Karaokevideo nache Mah

Auso. Abem Boot, Gepäck findä, i Bus istige u über di haubi Inslä a Flughafä. Dert bi gfüute 80 Grad stundelang ga warte u zum di länge Hose u Turnschueu alegä für i Flüger..