SANSIBAR 2016
Jambo (hallo), was fürne Reis!
In Johannesburg scho viu z spät abgfloge, hei üs aui gseit mir verwütsche dr Aschlussflug vo Dar es Salaam nach Sansibar looocker.
Mir müesse in Dar es Salaam no nid in Tansania ireise, ersch in Sansibar, heisi üs aui gseit.
In "Dar es Slalom" wimers vo itz a liebevou nennä isch dr Spiesruetälouf losgangä.
Bismer überhoupt e Ireisezedu gfunde hei zum usfüue, igreist si und vorauem z Gepäck i däm riise Ghetto gfunde hei..!
Gepäck ändlech gfunde heimer de tatsächlech no dür 2 Gepäckscanner müesse wo gfüeut haub Tansania agstande isch. Ändlech am Check-in Schauter heimer natürlech dr Aschlussflug nach Sansibar um wenigi Minute verpasst. Auso ca 4 Minute z spät zum Check-in wemers gnau nämä.
Ke anderi Müglechkeit, aus dass mir säuber mit üsem Reiseverastauter luege, dasmer ufe nägst Flug chömä. Sie chönne da nüt mache.. heisi aui gseit.
Traumurlaub in Sansibar. Stundelangs wartä am Bodä, ohni z Ässä u Wasser.
Sehr interessant d Sack u Seckli- Reisegepäck- Methodä. Guet umliiret mit Chläbi, oder o nid. Egau, schiint z funktionere.
Chline Schwänk i Nordä.. Z Island geit e normale Reiserucksack scho unger Sperrgepäck..
Gnue Zit bim wartä um mau no chli gneuer z läsä womer da eigentlech härä gö:
- 800, arabischi Chouflüt usem Oman u Yemen betribe lukrative Handu mit de Küsteregione Kenias u Tansanias. Sie nenne d Küste vor Inslä "bar des zandj / arabisch Küste des Schwarzen Mannes. Uf Grund vo de Kommunikationsschwierigkeite (jesses scho denn) zwüsche Händler u Bewohner hetsech di nöi Sprach, hüt aus Swahili / arabisch Küste usere Mischig vo Arabisch u Afrikanisch zure Stammesprach entwicklet.
- 1499, dr portugisisch Seefahrer Vasco da Gama isch us erste um ds Horn vo Afrika nach Indie gsäglet. Vo denn a isch ds Sansibar uf Grund de ideale Bedingige u di etablierti Infrastruktur e wichtige Stützpunkt wordä.
- 1700, d Araber erobere ds Land vo de Portugiesä langsam zrugg. Dr Sultan vo Oman verfüegt überne stark überlägeni Flottä u schlat schlussändlech d Portugeschs id Flucht.
- 1840, dürne ständig wachsendi Beziehig zwüsche Ostafrika u Oman, verleit dr Seyyid Sald bin Sultan si Regierigssitz uf d Inslä Sansibar. Mit dere Umsidlig chöme sehr viu wouhabendi Familie, dr arabisch Ifluss isch sofort gstige u dr Sklavehandu floriert.
- 1873, am 6 Juni wird dr Sklavehandu in Sansibar offizieu beändet u dr Handusplatz gschlossä. Inoffizieu geit dr Handu mit de stark gfauene Sklaveprise witter.
- 1890, am 1. Juli wird ds sogeannte Sansibar- Helgoland- Abkommä ungerzeichnet. Ds seit, dass Dütschland z churz vorhär erworbene Chönigrich Bugada (Hüt Uganda) und es Protektorat (Schutz) über Sansibar a Ängland abtritt. Im Gägezug überchunnt Dütschland d Helgoland Inslä. Ds Märli dass Sansibar gäge Helgoland ituscht isch wordä stimmt so auso nid.
- 1963, am 10. Dezämber hei Sansibar u Pemba (e witteri Inslä vor dr Küste vo Tansania) d Unabhänigkeit vor britische Kolonialherrschaft erlangt. Es chunnt zumne Massaker us Site vor schwarze Bevöukerig gäge di bis derthi regierende arabische Oberschicht. Viu überläbendi Araber flüchte u e sogenannti Revolutionsregierig übernimmt nachem Tod vom Sultan d Macht.
- 1964, dr Presidänt vo Tansania drängt d Revolutionsregierig, es Bündnis mitem Festland izga um die riisigi Unrueh beändä. Nachere Einigung wird am 26. Apriu - 1964 d United Republic of Tanzania gründet.
Ändlech Fuetter! Samosa mit Hot Hot HOT Pili Pili..
Öpe 4 Stund z spät simer de in Sansibar am Abeid Amani Karume ACHTUNG "Internationale Flughafe" acho.
Gepäckusgab wimers scho öpe die atroffe hei im Märit- Style..
Sansibar Stadt isch di grösti Stadt uf dr Inslä Sansibar, oder o Unguja gnennt.
Mir hei üs es Hotel ir Autstadt Stone Town buechet.
Stone Town, errichtet us häuem Korallechauchstei darum dr Namä.
Mitti 19. Jahrhundert isch Sansibar dr wäutgröscht Produzänt vo Gwürzneukä u d Stadt mitem gröschte Märit für Sklavehandu ar ostafrikanische Küschtä.
The Swahili House
Mitere wunderschöne Dachterassä.. Wenn nid dr schönschtä!
..was für Ussichtä!
Ab id Stadt..
Stone Town isch hüt numeno e chli Teu vo Sansibar Stadt.
Sit 2000 ghört Stone Town zum UNESCO- Wäutkulturerbe.
A jedem Eggä u jedere Ritzä mächtig öpis los.
Darajani Bazaar
oder o Estella Markt oder uf shwahili Marikiti Kuu isch dr Houptmärit vor Stadt. Es Füürwärch für ds Ohr, d Nase und ds Oug.
Me chönnt o säge es geit einisch meh i richtig intressanti Reizüberfluetig
De het me ds Gfüueu me het scho feie chli viu gseh u gschmöckt uf dere Wäut, aber uf däm Fleisch-Märit isches zimlech heftig i d Nase..
Somit o hurti iche, zagg Foto u hurti wider usä.
D Geböide si wi scho erwähnt us Korauestei u Mangrovehouz errichtet u mit Kalkmörtu u Kaltputz verarbeitet. Wemä sich chli achtet gsehtme di einti oder angerei Fassadä wo langsam broosmet u tatsächlech Koraue füreluege..
Dr Boustiu spieglet sehr stark di verschidenen kulturelle Iflüss uf dr Inslä. E Mix zwüsche swahilisch, indisch, arabische und europäische Traditione.
Ide Gschäftsstrasse und umene Märitplatz stöh eifachi, äbeärdigi Swahili Hüser mit schlichte indische Fassadä. Zum Kontrascht di zwöistöckige Hüser wo typischerwiis umene Hof gruppiert si u wome dür schmali Gäng erreicht. Dinne gits de längi, schmali Rüüm u vo usser ziert ds Huus mitere sogenannte Sansibar Türe / Swahili Doors.
Dr Türrahme vore arabische Türe isch eggig u viufach miteme Bitz usem Koran im obere Rahmebereich gschmückt. Dr Türrahme vore indische Türe cha im Rahme o e Bogä ha und si hei Messingdornä wo churz oder läng wi Speerspitzä useluege. Die grosse Fort Tor im indische Rajasthan si ir Zit vo de Mogul- Richä mit settnige Spitze "ziert" gsi um Chriegselefantä vo feindleche Fürstetümmer am ufstosse u idringä vom Tor z hinderä. Gschlossä wärdä d Tor mit grosse Schieberiglä oder si wärde mit schwäre Chöttine am Bode verankeret. Praktisch.
Genereu giut: Je nach grössi, schnitzarbeit und Messingbschleg vor Türe seit das öpis über di soziali Stellig und dr Woustand vom Bsitzer us.
Traditionellerwiis hetme bim Husbou zersch di massivi Türe errichtet. D Verzierige vo Koranvärsä bis zu naturalistische Elemänt hei ds Huus und d Bewohner seue sägnä.
So Grüscht funktioniere auso nid nume in Asie so..
Nomau e Gruess ad Suva.
Sichtlich zfrideni Meitschi ufem Wäg zur Schueu..
No öpis ga gänggelä..
Ungerwägs.. In Stone Town gits verschidentlechschte Gägeverchehr.
Chum wärde d Strasse breiter hets sofort Outos und e riise Verchehr.
Z Tor zum neuere Teu vor Stadt und em sehr beläbte Hafä. Je nöcher me dert härä chunnt umso meh wirdme aus Turischt "azischt" (Kontaktufnahm) um im beste Fau aues mügleche abote becho.
House of Wonder oder o Palast der Wunderisch es Wahrzeichä in Stone Town. Es isch ds gröschte u höchstä Geböide in Stone Town und isch eine vo sächs Paläscht wo vom Barghash bin Said, em zwöite Sultan vo Sansibar erbout isch wordä. Afangs 2000 hetme es Museum eröffnet wo ungera anderem auti Swahili Boot usgsteut si gsi. Itz isch ds ganze Gebäude zue uf Grund starkem Verfau u ds Museum züglet.
Dert voruss het üs de e Iheimische aquatscht. Är het abottä üs z wichtigste z zeigä, uf dütsch. Das zumne Pris wos üs zum Schluss dr Wärt isch. Uf so öpis stöh mir, drum hü.
Überau wo di Fahne hange u die Symbou si chöi sich Mannä über Gott und die Welt, vorauem über Politik ungerhaute. Si hocke verteut im ganze Hof u debatierä mitenand, jede cha zuelosä, cho u ga winer wott.
Mir si de zimlech vorwärts cho ohni ständig ufem Plänli z luege wo mir üs äch momentan befinde i dene verwinklete Gassä..
Ungerwägs..
Nam.. einisch ahautä, probierä u choufe. D Frucht haubiere isch das höchste der Gefühle. Ohni Schniggschnagg wird da usgsugget.
Zit heisi definitiv zum bigelä.. Dä mit de Eier het üs auso sehr, sehr heiku dünkt. Dä ehner unstabiu Ahänger isch vou näbeme sehr beläbte u ängä igang vore wittere Märithaue gstandä. Zimlech sicher würd bi üs nachlässiger gluegt aus dert.
So hets de o meistens usgseh wemer ungerwägs si gsi..
Si wei verchoufe, häbers vor d Nase u loufe wes nötig isch mit dir mit.
D Houptgeböide vom Zäntrum stamme usem 18. u 19. Jahrhundert.
Stadt het hunderti ängi Gassä wo absolut keni Outo düremögä und es het überau erhöchti Gehsteig gnennt baraza wo voreme mügleche Hochwasser seu schützä oder eifach aus Sitzbank gnüzt wird.
E chline Abstächer i Hindutämpu.. Ds eigentleche Highlight a däm Tämpu isch d Beschriftig, sprich, si d Hitlerchrütz wo mir nichts dir nichts d Fassade zierä.
Viatu nzuri (schöni Schueh) di nööi Summer / Herbstmodä..
Strom u Wasserleitige si sone Sach. Meistens verloufe die uf glicher Höchi, öppe 1.80m ab Bodä..
E witteri Dachterasse mit Restaurant u gueter Ussicht.
Zum Schluss vor Tuur ds obligatä Erinnerigsfoto / Trophäe / Touriste jagä.
Hurti am Hafä Zmittag gässä simer de gleitig ume ir schöne Autstadt gsi wo üs eidütig besser gfaut.
Pünktlech zu de Gebät us aune Himmusrichtige uf dr heimische Dachterassä.
Untergangs- Alarm..
Bolle Bolle! Auso easy peasy chille isch ds Motto vo de Sansis.
Nächste Tag, neus Ziu. Benki (Bank) ahoi.
Gäudwächslä, ganz eifach.. Oder eifach o nid. D Bank womer nach langem umeirre gfunde hei het züglet. Wo härä? Ke Ahnig.
Dert vor dere aute Bank usse simer de plötzlech froh gsi simer dert nid iche u aui drum um wüsse bim usecho wasmer derbi hei. Aber nacheme haube Tag isch o das voubrach gsi! U zwar hets vorem Hotel usse eifach ä Gäudwächsustube gha..
Fuessbau- EM in Sansibar. Hie wird dr Dorfplatz no sinnvou gnüzt.
Sehr interessant isches eifach immer wider irgendwo abzhockä u z luege was aues passiert..
Dr bsteut Taxifahrer wo üs uf di angeri Site vor Inslä bringt isch pünktlech itroffe u het üs über hundert Eggä u übere ganz Märit zu sim Outo gjagt..
Kilometer läng heisi d Strass samt Trottoir ufgrisse und se weue nöi teerä. Komischerwiis isch denn d Boufirma samt em Gäud u de staatlech Verantwortlechä abdüüset u für das aues fertig z machä fäut natürlech z Gäud. So geit die stoubigi Sach eifach witters.
Für au die wo dänke mir heige hie tuusendi vo Stütz am ligä. Nope.
1.- si ca 2265 Tansania Schilling. Me cha aber in Sansibar eigentlech o überau mit US Dollar zahlä.
Uf au Fäu hei mir in Jambiani es chlises Paradies atroffä..
Üsi zwöi Ligestüeu unger üsem Sunneschirm vor üsem Bungalo. Gad diräkt näbem Restaurant u deshaub us einzigs Bungalo mit Internet. (ca bis 22.30)
Hübschi Duschi und e sehr schöni Ussicht..
D Aalag vo üsem chline Hotel mit nume 7 Bungalos u maximau 12 angere Gescht.
Herrläch!
Eine vo viune Lieblingsortä zum si..
Da studiertme eifach scho hurti wime am beste so öpis i dere Art Heim bringt.
Macht o sehr Sinn. Ohni Gartä!
Da wäremer oscho gad bimne wittere Lieblingsort..
..und em gmüetleche Ligistiu mit gueter Ussicht?!
Gmüetlech heimer de chönne beobachtä was bi Ebbe am Strand so vor sich geit..
Zersch heimer dänkt da wärdi we Ebbe isch Küder entsort.
Mir hei üs vo Iheimische la verzeue:
Es wärde Kokosnussschale gsammlet i Seck und die näre vergrabe. Ca 2 Monet lige di Seck im Meer u wärde dou igweicht. Nach 2 Monet wärde die usgrabe u d Faserä vor Kokosnuss usenand gschrisse. So entsteit bir Witterverarbeitig es Seili für aues Mügleche.
Genereu ischs ja in Sansibar eifach besser bim bade im Meer Schue anne z ha.
Es het sehr viu Seeiglä und genau viu vo dene Hüüfä wome schön drischuttet bim badä.
Dr Entdecker het nid sonderlech lang mögä wartä u scho heimer es Dau gmietet wo üse ads Riff use bracht het..
Guet konstruiert, oder dä typisch Säguschifftyp im idische Ozean.
Wemer lang gnue wartet tribts eim gli mau Richtig Seychellä, Mauritius oder uf d Maledivä..
Was mir hei gseht i ca 3 Meter Tiefi..
Dasch mau gäbig Gäud verdient..
Nach über eire Stund schwümmä u schnorchlä e guetä Snack.
Früschi Sansibar Kokosnüssli..
Blau, blauer, Sansibar..
Ungerwägs am Strand..
Fasch e ständige Begleiter bi üsne Strandspaziergäng, di aus Massai verchleidete Kenyaner wo aues mügleche hei weue verchoufä.
Bi Ebbe isch eifach tatsächlech am meiste los a de Stränd. Aui chöme cho Kokosnüss i oder usgrabä, Seegras sammlä für d Kosmetikindustrie usw.
D Chind (allei am Meer) am spile hei üs schnäu entdeckt.
Foto luege uf dr Kamera..
Spilä u umeturnä..
Bimene sehr exotische Früchtedrink mit Ingwer, Honig, Orange u süstige Gwürz vor Inslä heimer z riisige Gschehä bi Ebbä beobachtet.
Znacht ässä im famous "The Rock".
Bi Ebbe no guet z Fuess z erreichä. Bi Fluet bruchts es Boot.
Es wäutberüehmts Restaurant ufemene grosse Korauestei, öppe 20 uf 20 Meter gross.
Für dert ga z ässä muesme definitiv e Tisch reservierä, es het pro Mauzit ca 12 Tischä, mehrheitlech a 2 u maximau a 4 Lüt. D Prise si leider chli übertribe dert, aber es isch öpis wome fasch mues bsuechä weme z Sansibar isch.
Zu späterer Stund nach feinem Znacht:
dr Startschuss zu üsere Mariasch.
"Ja" d Marina wott!!!
Wär gärn meh wett wüsse darf sich sehr gärn bi üs mäudä..
Ungerwägs mit üsem Privatfahrer..
Ob de dä nid irgend es Drögeli gschnouset het..
Da drüber simer üs no Hüt nid ganz sicher!
Leider isch Heroin e grossi u wittbervreiteti Droge für d Iwohner u Kokain sehr beliebt bi de Turischtä.
Ungerwägs dür z chline Dörfli hinger üsere wahnsinnig schniickä Hotelalag..
Tagesusflug nach Changuu / Prison Island
Changuu isch Suaheli u isch dr Name vomene Fisch wos um die Insle um mau het gä. Changu het dr erst Sultan vo Sansibar, Majid bin Said a zwöi arabische Sklavehändler gschänkt. Vo dert hetme d Sklave de ufe Sklavemärit vo Stone Town bracht. Churz nachdäm Changuu aus Koralleminä gnuzt isch wordä het dr britisch Gouverneur Lloyd Mathews d Inslä kouft um es Gfängnis für Gwauttäter vom Festland z bouä. Statdessä isch aber i däm Gfängnis e Quarantänestation für Gäubfieber igrichtet wordä wo in Stone Town d Epidemie droht het wo uf ganz Ostafrika hät chönne überschwappä. Da di meiste Schiff im Summer si acho und im Winter keni nöie Erchrankte igliferet si wordä, isches schnäu mau zumne beliebte Erholigsort wordä. Im Jahr 1919 het Changuu vom Gouveneur Aldabra-Rieseschiudchröte gschänkt übercho.1931 hetme für di knapp tuusig Erchrankte nöii Quarantänene bout u scho gli isch d Inslä gfluetet worde mit Hotel u Feriewohnigä.
Üse Typ wo üs mitem Boot dert usegfahre het bi zimlechem Unwätter (es het de zum Glück hurti ghört womer Duss si gsi) het phouptet är chönni super schwümmä. Tatsächlech isch d Marina immer parat gsi wiuer jede Momänt hät chönne absuufe ohni jediglichi Chraft für zrugg zum Boot. Unkoordinierter u zappliger aus e junge Hund wo lernt schwümmä.
Ungerwägs für zrugg is Resort:
Märit, voubeladeni Lastwäge, e Umzug, Schueuschluss..
Jozani Chwaka Bay National Park
50Km läng u dr einzig Nationaupark uf dr Inslä.
Ä rote Colobus Aff
Mitlerwile isch dr rot Colobus Aff vom usstärbä bedroht.
Uf dr Fuettersuechi i de umligende Stedtli wärde si viufach aus Plage agluegt u sehr speditiv vernichtet.
Härzig aber fräch und viu z zuetroulech!
I däm Nationaupark bestehend us Rägewaud versuechesi aber zu dene Affe z luege u dr Waud so guet wi müglech z erhautä.
Für einisch heimers scho am Morge früeh use gschafft u hei dr Sunneufgang gluegt..
Leider chli bewöukt, aber glich sehr spannend.. Mir hei de erste zuegluegt wo a ihrem Boot z Seegras mitere riise Flamme useme gfrisierte Bunsebrönner vom Schiff gmacht hei.
Vorem ga bade; d Fluet isch nämelch mau wider cho; heimer no mau chli am Strand gfötelet. Es gseht nämelch immer wider angers us u di verschidenen Blaus ungerscheide sich ono ir intensität..
Da heisech di Modis ufem Schueuwäg vor d Linsä drängt u hei weue fotografiert wärdä. Dr Tinu mit de längä Haar ur wiisse Hut heisi de gneuer unger d Lupe gno..
D Fluet isch zum Glück vorem Mittag, sprich nam Zmorge cho.
So simer nam scho schwitzige Zmörgelä chüeu u gmüetlech ga baaiä.
Ds letschte mau ds Füdli schwäichä bevor dases ufe Heimwäg geit..
Dr Fahrer wo üs vo Stone Town uf Jambiani gfahre het isch tatsächlech mit chum ere Minute Verspätig uf dr Matte gstande. Per Handschlag vorere Wuche abgmacht u het zu üsem erstuunä klappet. Da si mir üs i angere Länder anderi Zueverlässigkeite gwahnet.
Ungerwägs im Sansibarstiu..
Irgendwie, irgendwo ickeckä. Am liebste z Gepäck no säuber i Flüger iladä..
Zrugg a üsem Lieblingsflughafe Dar es Slalom.. Warte uf AUES im Stiu vomene Tagesusflug isch hie Programm.
Name, Passnummerä, Flugnummer etc. Aues nomau usfüue u warte ohni Ässä u Trinkä..
Hakuna matata!
Ahsante Sansibar!
