NEW YORK 2009
Ä ganzi Wuchä Manhattan afangs Dezämber.. Ä Troum!
Überau ir Stadt heisi di grossi Wiehnachtsdeko füregno u Wiehnachtsmusig düüdlet us aune Eggä.
Üses Zimmer im "Candy Hostel" isch uf dr Höchi vom Central Park glägä u het e super Metrostation gha womä i 2 Statione bim Times Square isch gsi.
Dr Centralpark. Di "grüeni Lunge New Yorks" isch ca 4km läng, vor 59 bis zur 110 Strass, isch 860Meter breit vor 5 bis zur 8 Avenue u isch 1973 fertig gsteut wordä.
D Ahwohner hei sich es Erholigsgebiet gwünscht mit Ungerhautigs u Freitzitmüglechkeitä. Nach lengerä Diskusionä, u planigä isch dr Park nadisna erbout wordä. Es het verschideni Seeä, Chinderspiuplätz, Kaffe, Baseballplätz, Tennisplatz, Chricketplatz usw. Dr Fuesswäg isch äxtra seperiert vor Strass wo derdür füehrt. Darum hets o vili Brüggä u Ungerfüehrigä.
Bi guetem Wätter herrscht i däm Park es riise Gewusel mit Jogger, Velofahrer, Spaziergänger, Chind usw.
Amene Abä hei mir üs im berüehtme Madison Square Garden (MSG) es Basketbauspiu agluegt.
Dr MSG wird für verschidensti Verastautige gnüzt. Zb. Boxä, Ishockey u Konzärt. Gspiut hei d New York Knicks gäge Phoenix Suns. D Knicks hei schlussändlech höchhuus gwunnä. Üs het aber dünkt dass das Spiu ehner 2rangig isch. Im Vordergrund isch definitiv z ässä u Bier gsi. Es isch sones riise glöif gsi.
Rockefeller Center
Es het 70 Stockwärk u isch 259 Meter höch.
Vorem Rockefeller Center isch jedes Jahr di berüehmti Schlöfbahn u DÄ WIEHNACHTSBOUM. Dert obä hetmä e super Ussicht ufe Central Park und uf ds Empire State Building. Me chouft es Ticket u mues sich zur agäbene Zit i di längi Schlangä für uchä ireihä.
Ds schlöflä uf der Schlöfbahn isch übrigens o e längwiligi Sach. Me mues unger Umstände Stundelang astah wiu nume bis 150 Lüt druf chöi u dr Pris isch o chli übertribä. 27 Doller fürnä
Fahrt. Schlöf mietä 12 Doller.
Ds Empire State Builging isch bis zur Antennäspitzä 443 Meter höch u het gsammthaft 102 Stockwärch. Di meiste Turiste fahrä aber nume bis zur 86 Etagä. Mir hei aber natürlech no bis z oberst weuä. Bisme aber dert obä achunnt muesmä wi o im Rockefeller zersch astah, wartä u dürne Sicherheitskontrouä. Aues wird uf ds Band gleit u gscannet.
Ischmä näre mau dür di ganze Labyrinth düre u dobä gsehtmä ganz guet wes dunku wird wo sich dr Time Square befindet..
Vom Epire State Building us gshetmä o sehr guet uf ds Macy's.
Macy's isch dr grösst Wahrehuusbetriber ide Staatä. Me seit sogar ds Macy's z New York isch ds grösstä Wahrehuus vor Wäut. Es het so viu Lüt gha das mir nid sonderlech lang si dinne blibä. Aber scho nume bis mir z WC gfunde hei hets duuret.
Es Highlight si di autä Routräppä us Houz. Dür z ganze Jahr isch im Macy's immer öpis spezieus los oder spezieu dekoriert.
Statue of Liberty / Liberty Enlightening the World, Lady Liberty / Freiheitsstatue
steit uf dr Liberty Inslä; im Hafä vo New York; isch 1886 igweiht wordä u isch es Gschänk vom französische Vouk.
Ungerdessä ischsi vor UNESCO as Wäutkulturerbe klassifiziert. D Statue us bronze isch e römischi Göttin vor Freiheit mitere vergoudetä Fackelä ir rächte Hand und e Inschrifttafelä
mitem Datum vor amerikanische Unabhängigkeitserklärig (4. Juli 1976) ir lingä Hand.
D Statue signalisiert Freiheit u isch eis vo viunä Symbou für Amerika.
Bi ihrne Füess ligt e zerbrocheni Chötti.
Näbscht dr schöne Ussicht uf Manhattan hei mir e sehr feinä Burger zum Zmittag gnossä, bevor mir mitem Schiff wider übere gfahrä si.
Z erwähne isch ono, dass o da e Sicherheitskontrouä ala Flughafä stattgfunde het bevor mir uf ds Schiff si..
Gad näbedranne befindet sich Ellis Island.
Di Inslä isch sehr lang dr Sitz vor Ireiseböhrdä vom Staat ur Stadt New York u über 30 Jahr Sammusteu für d Immigrantä wo id USA hei weue cho gsi.
Afangs um 1800 hetmä no nid so viu Immigrantä gha u no nid so druf gluegt wär darf iwanderä u wär nid. Ab ca 1820 hetmä agfangä zeuä u het festgsteut dass d Zahlä stetig stigä. Somit
heisi d Kriteriä immer meh verscherft.
Chranky, Polygamistä (Vielehe), Prostituierti, Armi, Anarchischtä, Chinese bis 1882, Japaner bis 1907 und Analphabetä bis 1917 hei nümm dörfä ireisä.
D Iwanderer hei Ellis Island o "Träneinslä" gnennt wiu sich hie nach 2 Minute Befragig u medizinischer Ungersuechig ds Schicksau entschidä het.
Me het grad am Afang e 50-stufigi Stägä zum Registrierruum uchä müesse womä scho vo Ärzt beobachtet isch wordä.
Het öpper Problem gha, hetmä agno dass es Härzlidä vorligt u isch so intensiver ungersuecht wordä. Infektionschrankheitä teschtä, Händ, Gsicht u Haar aluegä. Isch öper verdächtig gsi
heter mit Chridä es S für Senilität uf d Schuuterä gmaut becho. Ct für d Ougechrankheit Trachom u es X für nä psychischi Erchrankig.
Aui angere si dür d Tür mit dr Uffschrift "Push to New York" u ufgno wordä.
Broadway ichezieh wemä scho mau da isch!
Spontan si mir verbi glüffä u hei ar Marina's Lieblingsgschicht as Musical entdeckt. Aues wunderbar, gueti Plätz fürne super Priis.. hätte mir vorhär nid dr ganz Tag ikouft.. Irgendwie
simer liecht ufgfauä wiumer aues unger üsi Stüeu quetscht hei u dr Räschte ufe Schoos hei müesse nä. Schlussändlech isches e super-kali-fragilistik-expi-ali-getischi Vorstellig gsi mit viu
üblichem Glöif vode Amis für Fraas u Trank.
M&M&M&M&M&M&M&M&M&M&M&M&M&M&M&M&M&M&M&M's.
Es riise Agebot uf mehrere Etage u verschideni Farbä wo ihre Priis hei gha. U glich hetmä kouft.. Wiisi, pinki, rosa, dunku rot, schwarz, viollet, sänfgäub, antrazit usw.
Dr Time Square
Irgendwie chönnte mir üs dert Stundelang ufhautä u üs la berislä mit Liecht, Grüch u Grüsch..
Ds ToysRUs, Mc Donald, Starbucks.. aues ufem Platz womer zum überläbä bruchä ;)
Irgendwie hets dert geng tuusendi Lüt uf einisch.. Das isch vilich das wo üs so fasziniert? Wo angeri Platzangst u Panik bechömä geit bi üs ds Härz trotz paar Phobiä uf! Lüt beobachtä uf dr Rotä Stägä isch es Muss!
Unterwägs in Manhattan..
Grand Central Station, dr Bahnhof in Manhattan.
Dert ände jehnsti Pänduzüg ud Metro. D Grand Central Satation isch am 2. Februar 1913 us sogenannte Sackgassbahnhof igweit wordä u isch sit däm wäutwitt dr Bahnhof mit de meiste Gleis.
Dr ganz Bahnhof isch uf 2 Stöck u het 44 Bahnstäg mit 67 Gleis. 41 Gleis ändä obä u 26 Gleis ände im 2 Stock unger.
Ds Chinatown wo mittlerwilä i kere Stadt me fäut.
Wo d Iwanderigä vo de Chinesä hei zuegno, isch dr Zuewachs vo 1882 bis 1924 stark igschränkt wordä.
D Chinesä wo fürä Isabahnbou wiukomme si gsi, hei ihri Frouä nid dörfä mitnä. Ds ganze Chinatown isch somit vo Junggseuä prägt wordä u hetsech abkapslet.
No hüt isch ds chinesische Kulturerbe stark erhautä u weniger aus 55% vo de Bewohner in Chinatown redä änglisch..
Fortloufend heisech d Chinese ide ehemalige jüdischä u italiänische Stadtteilä usbreitet. Um ds italiänische Erbe z erhautä hetmä sich ufene festi Gränze geeiniget. Little Italy isch aber numeno zwöi Strasse "gross".
Das Objekt unserer Begierdä. DÄ WIEHNACHTSBOUM!
Dä z gseh isch garnid so eifach gsi.
Miteme riise Klimbim-Szenario hetmä dä Boum zelebriert. Huufä Lüt wo scho am Morge früeh si ga härestah, Asprachä u Konzärt. Dür au die Absperrige z cho isch garnid mau so eifach gsi. Irgendwenn hets üs dünkt mir chömä us däm Absperrigsgaggo nümm witer. Wär möcht sich auso scho bi au dene amerikanische Polizischte dür d Absschrankige verbischmugglä?! Niemer bis uf üs!
Alles für DÄ WIEHNACHTSBOUM! Glücklercherwiis hetmä üs nid verwütscht..
Da es üse letscht abe in Manhattan isch gsi hei mir das eifach müessä machä!
Mit zuesätzlechä Täschä u huufä Züg si mir umä Heim u si astandshauber bim Zoll ga sägä dasmer paar Sachä kouft hei. Wivu u was genau heimer aber nümme gwüsst u me het e über-den-Daumen-Rächnig gmacht vo öppe 40.-