MAURITIUS 2014

Z Outo retour gä, ds ganze Flugprozedere hinger üs bracht u scho simer mit eirä Stund Verspätig ufem Roufäud gstandä u hei gwartet. Wartä u nid z schnäu wird o am Flughafä ganz gross zelebriert.

Mit no grösserer Verspätig simer de vo Réunion knapp e Stund u Luftlinie ca 226,5 KM e Inslä witter nach Mauritius gflogä..

Das si scho mau sehr gueti Ussichtä..

Nachdäm mir ohni Problem dr Stämpu i Pass hei becho u dür Gsundheiskontrouä si, wäres ja nid mir mitem Rucksack wo bim Zoll müesste Äxtrahaut ilegä.

Üses Änglisch isch ja nid z leidschtä. Aber di het dert gschnuret u Frage gsteut miteme Akzänt dases auso nümm schön isch gsi.

Nachdäm mir dr ganz Fragekatalog "was chönnte die Röiber derbi ha" zumene chline Rästeli Tabak u Papierli zum säuber Zigaretä dräiä si cho het si scho zimlech dr Fang vom Tag im Gsicht gha u üs du definitiv zum uspackä chönne verwisä. Mit wildem Gelächter simer auso dert härä u hei üsi Ruckseck scho weue abzieh u uspackä, da hei üs di Type düregwunkä u gfunde das seg scho ok. 

Usgrüschtet mit Chartä u kere Ahnig isch dr Tinu mitem handgschautete Outo i mauritisch Linksverchehr tuckeret. Da isch nämlech aues u jede uf dr Strass dasme chum schneuer aus 30KMH cha fahrä. 

Ungerwägs zum Hotel i Nord / Ostä uchä het üs dr Hunger packt. Mir hei eifach irgendwo aghautä u si ines iheimisches Beizli visavis ere Beckerei ga ässä. Es isch so fein gsi, dasmer e Tag speter no Mau retour gfahre si u dert Znacht gässe hei. 

Long Beach Hotel *****

E Gschicht für sich..

Nachdäm mir bim Bediensteteigang hei weue ichefahrä, simer de doch no zum richtige Tor glangt. Dert heisi üs mau ganz komisch agluegt u gfragt was mir wei. Schliesslech heimer e Reservation gha u si hei üs icheglah. Mir si ufe Parkplatz ga parkiere, hei z Wichtigste a Handgepäck mitgno u hei zur Reception weue loufä. Schnäu heimer gmerkt, dass die no zimlech witt furt isch. So simer zrugg is Outo u witter gfahrä. Ar Reception hets üs fasch dr Gong gä. Dr Hotelmanager het dr Gong gschlagä u di rästleche no nid awäsende Mitarbeiter si zuechegsecklet.

D Outotüre isch ufgmacht wordä u ds Gepäck vo allei i Sekundä usgruumt gsi. Ds Outo het sich du o säuber parkiert. Was fürne Chrampf für üs das zue zlah! 

Nachem ganze 5 Stärn Icheck-Programm heimer üs de ändlech chönne im Zimmer versteckä u üs Jugendherbärgämässig chönne benäh.. 

We MAHO'S uf ***** Stärnä träffä gseht das so us:

Ds wouverdientä Fürabe-Bad im Pool..

Inklusivem Sprudlä u gueter Ussicht trotz Wuchä.

Dr ganz nächscht Tag heimer üs vom Z'Morgebuffet müesse erholä..

Sünnelä, de Flitterwücheler zueluege u zuelosä wisi ihres Gschänkpacket abhaagä.

Ab u zue isch no eine cho fischä i däm ganze Salat innä.. 

När no chli uf d Schoucklä ga plätterä..

När a Pool ga plätterä..

E chlinä Schnorchuusflug ads Riff usä..

In Mauritius wird mit Mauritius-Rupie zaut.

1.- si knapp 34 Rupie. 

Dä Cheib isch ar Marina übere Fuess gsprungä.. Irgendwie hetsis mit dere Tiergattig!

Üsi Karossä für die Wuchä. KIA RIO. Dä hättmer mau chönne in la Réunion bruchä. Grüümig u gnue Schriis für id Bärgä uchä.

Lädelä in Centre de Flacq aus einzigi Turischtä. Düre Tag nid gfährlech, aber mir si zimlech genau beobachtet wordä..

Öffentlechi Verchehrsmittu in Mauritius. Es Klimbim-Taxi oder e Abgas-Bus..

Hibiskus Bluemä, eini vo üsne Lieblingä. Leider nume i de wermerä Gägendä z findä..

"Le Vanille Réserve des Mascareignes" Natur Park.

E Park mit Krokodiu, Affä, Flughünd u Schiudchröttli u riisä Schiudchrötä..

Domino, 95 Jährig u ca 240Kg schwär. 

Imene grosse Gheeg hets unzähiligi, grossi Schiudchrötä gha.

Dr Panzer vo dene Schiudchröt si nume wenigi Centimeter dick u so empfindlech wi ä mönschlechä Nagu. 

Si hei keni Zähn, chöi aber glich schmärzhaft zuebissä, mache ehner e langsame Idruck, aber wesi z Frässe vermuetä chöisi e Gang zuelegä u uf ihrne stummeligä Füess. Das i üsem Summer Winter isch dert friere si chli u schlüfä aui uf ei Huufä oder parkiere sich gägene Boum.

Ungerwägs uf de Strasse..

LUX le Morne *****

Ds gliche Icheck-Prozdere, nume heimer üs scho chli besser gwüsst z benäh. Parkiere hetmä o säuber dörfä, es isch schliesslech no 5 Stärniger aus in Long Beach u darum äuä scho widr erloubt. Da länge o nume d Päss ohni dasme no d Buechigsbestätigung het. Üses schiggä Zimmer het Blick ufe Pool u z Meer gha u sogar es eigets IPad mit Infos über di ganzi Hotelalag, News, d Agebot vom Tag, Usflüg buechä, Menuechartä studierä u no viu meh.. Kreisi! 

Hübsch..

Abäspaziergang am le Morne Strand..

Dr Sunneuntergang ir Hängemattä..

..oder am Pool.. Egau wo, es isch eifach herrläch!?

U wius i däm Hotel eifach so schön isch, tigeret me eifach o nume dert desumä.

Dr perfekt Blick zum Zmorgä ässä..

Üse Strand..

Da chönntme locker lenger blibä..

..

Spazierä ufem Hotelgländ u wartä ufe nägst Sunneuntergang.

Päng!!! E Chübu Kitsch entläärt sich genau hie und itz! 

Usserhaub vom Riff hets stark gwäuet, u mir hei bis churz vore Usflug nid gwüsst ober de o tatsächlech chöi ga.. Mir hei aber Glück gha u mir hei chönne ga Deufine luegä. Ds Boot heimer ussert mitem Captain no miteme dütschä Päärli teut.. 

Nach ca 20 Minute ufem Schnäuboot heimer de oscho di erste entdeckt..

.. Flossä u Schnorchuzüg alegä u dri gumpä u zwar pronto..

So het dr Tinu aus Schnorchu-Raketä feiechli viu Deufine chönne gseh..

Üse Boot-Captain isch feiechli beidruckt u begeisteret gsi vo Tinu sine Schnorchukünst u Usduur. Es git da drum eifach o immer no angeri Kaliber..

Zum Bispiu d Japaner wo trotz Westä u Booiä ersch im offene Indische Ozean merkä dass si eigentlech nid chöi schwümmä u vor Panik numeno schreiä u di dütschä wo nach 2 Mau is Wasser gnue hei.. 

Dr le Morne Brabant, 556 Meter höch.

Im 19. Jahrhundert si d Sklavä ufe le Morne Brabant gflüchtet. 

Am 1. Februar 1835 isch fertig gsi mit dr Sklaverei u es isch e Polizeiexpedition ufe Bärg uchä. 

Viu Sklavä hei das fausch verstandä u hei sich vom Bärg gstürzt.

2008 isch dr Bärg vor UNESCO aus Kulturlandschaft is Wäutkulturerbe ufgno wordä. 

Ds Menu zum Znacht:

fritierti Chlilli-Teig Bäueli

grilltä Fisch mit bratenem Riis are Knoblouchsauce

flambierti Bananä im Rum

Marlin-Fisch-Salat, Samosa, Fisch mit Riis, Poulet Riis, flambierti Bananä..

Zmittag ässä am Flic-en-Flac Strand. Ds Menue heisst Briani u beinhautet Riis, Pulet-Schänku, Gurke, Rübeli u würzegi Carambol. Scharf, scharf, scharf!

Zum Dessert e Glace usem närvige Klimbim-Glacewagä..

Bismer de usegfunde hei dass das dr Glacewagä isch u niemer wo ds Natel lat la tschäderä u eifach nid abnimmt..

Ungerwägs uf dr Inslä..

..u ufem Wäg für i Nordä..

Dr Fahrplan vo dänä Abgas-Bus wo üs a jedem Eggä entgäge chömä isch üs immerno es Rätsu..

Wi uf jedere schönä Inslä het o Mauritius sini Schattesitä. E huufä Armuet u Blächhüsli, Ghüder.

D Arbeitslosigkeit uf Mauritius isch jedoch weniger höch aus uf la Réunion "dank" de vilä Hotel.. 

Öppe 1/3 vor Bevöukerig si Inder u dr Räschte isch kreolisch (bekannt us la Réunion) 2% si chinesischer Abstammig u knapp 1% si "Wiissi".

Uriwohner gits keni, da Mauritius vor dr Kolonialisierig unbewohnt isch gsi u ab u zue vo arabische Seefahrer bsuecht isch wordä aus Zwüschestop. Scho im 10 Jahrhundert isch Mauritius uf dr arabische Seecharte itreit gsi. Das isch ir glichä Zit gsi wo me o la Réunion entdeckt het. 

Arabischi Seefahrer hei d Inslä "Dina Harobi / verlasseni Inslä" gnennt. Speter isch drus "Dina Robin / Silberinslä" wordä. 

Ob dr Vasco da Gama wo 1498 aus erste Europäer dr Seewäg nach Indie het endeckt o dr erst isch gsi wo di Insugruppe entdeckt het weismä bis itz nid. 

Uf dr portugisische Charte vo 1502 si d Inslä jedefaus izeichnet. Es cha aber o si, dass me d Lag vo de Inslä o eifach nume vore arabische Charte übertreit het. 

Offizieu isch d Inslä 1504 vom portugies Diego Fernandez Pareira entdeckt wordä. 

Är het d Inslä "Ilha do Cerne / Schwaneninsel" gnennt, me seit us Aspilig wäg de Dodo (ca 1 Meter grosse Flugfogu). 

Pedro Mascarenhas het ca 10 Jahr speter d Insugruppe entdeckt. Nach ihm isch sit 1620 d Insugruppe (Mauritius, la Réunion, Rodrigues) benennt. "Islas Mascarenhas / Maskaren". 

1598 si Schiff mit Holländer cho u si hei d Inslä ufe Name "Prins Maurits van Nassaueiland" nachem Prinz Moritz von Oranien (Maurits, latinisch Mauritius) touft. Darum auso dr Namä Mauritius.

Churz drufabe si d Holländer de witterzoge u me het Mauritius witterhin aus Zwüschestopp ufem Wäg nach Indie brucht. Nachdäm es Holländisches Schiff dert umenand e Schiffbruch erlittä het isch ca 1615 ds Grücht umegange, dass die Routä über Mauritius verfluecht isch. Ab denn hei d Schiff Mauritius gmidä u si über Madagaskar gschipperet. 

1638 isch d Inslä vo de Holländer besidlet wordä. Im gliche Jahr het Frankrich d Nachbarinslä Rodrigues u Réunion i Bsitz gno. Jehnschti Oberhöipter hei Mauritius regiert, jedoch heisi d Inslä 1710 ufgä, wiu d Belastig u dr Ufwand wos dür di vile Zyklonä, Dürräperiodä, Schädlingsplagä, Nahrigsmangu u Chrankheitä gä het, z gross isch gsi. Seeröiber hei churzi Zit speter d Inslä überno u hei sich immer dreister über aues härgmacht. D Handusmacht Frankrich het gäge di Piraterie kämpft, Mauritius isch scho ganz abghouzt gsi u d Tierbeständ wi zB. dr Dodo si scho odr fasch ganz usgrottet gsi.

Vougedessä isch Mauritius 1710 vo de Franzosä eroberet wordä u si heisä "ile de France" touft. Di riichä Eigetümer vom Inland hei d Zuckerrohrplantage vo Sklavä us Ostafrika u Madagaskar la bewirtschaftä. Ab 1767 isch d Inslä e französischi Kolonie wordä. 

1810 hei d Ängländer nachem "Mauritiusfeldzug" d Inslä bsezt und se widr uf Mauritius umtouft. O Rodrigues isch retour i Bsitz vo de Britä während la Réunion ad Franzosä zrugg isch. Ab 1810 isch Mauritius e britischi Kolonie gsi, aber si hei nume weni Ifluss gno ud d Inslä. Viu Iflüss wi ds Französisch odr dr Code Civil (französisches Gsetztbuech für Ziviurächt, ifgfüehrt vo Napoleon Bonaparte) si blibä. 

Im 19. Jahrhundert het d Masseiwanderig us Indie igsezt, nachdäm d Britä 1835 d Sklaverei verbote hei u d Mehrzau vo de Sklave für d Koloniauherrä nümm hei weue ufem Fäud arbeite. Ab 1871 isch e Iwanderigsstop verhänkt wordä, wius zu däm Zitpunkt scho 60% Inder uf dr Inslä het gha. E Zuckerrohr-Krisä ändi 19. Jahrhundert het derzue gfüehrt, dass e grosse Teil vor Bevöukerig widr abgwanderet isch. 

10 Jahr lang hei d Britä Mauritius u Rodrigues ihri Säubständikeit vorbereitet, unger anderem mitem allgemeine Wahlrächt ure politische Outonomie. Nach 150 Jahr britischer Herrschaft isch Maruritus am 12. März 1968 unabhängig wordä u isch im Commonwealth biträtä.

Ds "Commonwealth of Nations" wis ganz genau heisst, isch e sogenannti loosi Verbindig "souveräner" Staaten, welche in erster Linie vom Vereinigten Königreich Grossbritanien und Nordirland und dessen ehemaligen Kolonien gebildet wird und dessen Gründung auf das Jahr 1931 zurückgeht".

Am 12. März 1992 isch Mauritius nach dr Ifüehrig vore neue Verfassig e Republick wordä. 

D Verchehrsvorschrifte si e Bitz angers aus bi üs .. 

Chez Popo Supermarkt. We die wüsste was Popo uf Dütsch heisst..

Trou aux Biches

E schönä Strand überhüüft mit eim Hotel nam angerä. 

Cap Malhereux.

U was das fürne Unglücksort isch. D Marina isch nämlech gstoglet, het e riise Misstritt gmacht u isch um. 

Im Hotel hetme de dr Fuess stundelang küeut u duur igremet mit dr Saubi us dr Apothek.

Ile aux Aigrettes

Mitem Böötli simer übere uf d Naturschutzinslä u hei weue e Rundgang machä. D Marina isch aber mit ihrem Fuess nid mit. 

Schiudchrötä, verschideni Fögu, Echsli u verschidensti Pflanze..

Nach däm Usflug a üsem letschtä Tag simer nach eire Wuche widr Richtig Flughafä gfahrä.

Z Mauritius isches no so gange mit dr Distanz zum loufä. In Dubai isches vom eintä Eggä i anger Eggä vom Flughafä doch de z witt gsi mit däm gschwuuenä Fuess. Bismer aber a sone Station si cho wome mit Handicap e Roustueu bechunnt isches no zimlech witt gangä..

Irgendwenn nach langem wartä u abklärä het de einä d Marina mitem Roustueu imene Affetempo vom einte Terminal dür z angere Terminal, mitem Lift u mitem Bähndli ids anger, letschte Terminal gstossä.. Dert heimer ire Lounge nomau öppe zwöi Stund müesse wartä, bevor dases nomau los isch bis 10cm vor z Flugzüg..

Vo Züri mitem Zug hei hets de z Bärn mau Krückä gä. 

Diagnose paar Tag speter: Bänder agrissä