LA RÉUNION NORD / OST

Foret de Bébour-Bélouve.

Di ersti Wanderig im Bélouve Gebiet isch zimlech näblig u chüeu gsi. Dr Wanderwäg isch geng wi meh zum Hindernislouf wordä u zur Rutschpartie..

Atroffä hei mir massewiis wiudi Goyavier wiusi gad ir Ärntezit si gsi u Callas.

Üsi Schlafglägeheit, d "Gite de Bélouve" heimer im erste Momänt garnid gfundä wius so gnäblet het.. 

Imene 12er Zimmer hei mir mit 4 Franzosä d Nacht verbracht. Einisch meh heimer sehr fein kreolisch gässä. "Cari ti' Jacques boucané", sehr fein!

Am Morge früeh simer erwachet abem Helikopter wo duurend Sachä bracht het. 

D Ussicht übere nach Cirque de Salazie.

Hell-Bourg isch so tief im Tauchessu dasmes leider nid gseh het.

Trou de Fer.

Das isch e öppe 250 Meter tiefi, chessuartegi Schlucht wo im beste Fau sächs verschideni Wasserfäu abechömä. Bis zum Ussichtspunkt hetme gueti 1,5 Stund ei Wäg z Fuess.

Zue, aber kes Hindernis wemer scho mau dert si! Geit ja schliesslech numeno 300 Meter..

Es hetsech glohnt für die Ussicht übere Zuun z chlätterä, obwou me vo dert us nume ei Wasserfau gseht..

Z Hell-Bourg simer is "Maison Folio". 

E auti Villa vo guet gsitteter Gseuschaft wo sit 1989 unger Dänkmau steit. Auti kreolischi Architektur miteme wunderschönä Gartä. 

Nachdäm Europäer ide 1830er Jahr Thermalqueuä ir Nechi vom spetere Dorf entdeckt hei isch Hell-Bourg as chlinä, riichä Kurort entstandä u het lang floriert.

Ca 1839 het di koloniali Behörde agfange Hotels bouä. 1890 het ds Dörfli Aschluss ane befahreni Strass becho. 

D Thermalbäder wo nadisna entstande si, si gli mau usserhaub vo Réunion berüehmt wordä. Zämä mit Thermä im Süde vor Inslä u einerä in Madagaskar isches es beliebts Usflugszieu für Reisendi us Südafrika, Kenia, Mosambik und vorauem für riichi Vanille-Plantage-Bsitzer vom Ostä vor Inslä wordä. 

D Massewanderig zu däm Kurort isch viunä vergangä. D Queuä isch ad Gmeind Salazie verchouft wordä u die heise ar Kolonialverwautig abträttä. 1920 isch d Wassertemperatur zrügg u me het ds Wasser dür Öfä müesse erhizä.

1948 het e Zyklon e Ärdrutsch usglöst u so d Thermauqueuä blockiert. Me het zwar versuecht mit Sprängstoff se ume ufzbecho, aber stattdessä hets Teilä vom Dörfli zerstört.

Nach paar Jahrzäntä u de Burä wo dä Bitz Land ume besidlet hei isch Hell-Bourg plötzlech ume chli interessanter für Turischtä wordä. 

Mit dr finanzieuä Ungerstützig vor Europäische Union si ca 26 traditionelli, kreolischi Villä restouriert wordä. 

Aus einzigs Dorf uf dr ganze Inslä isch Hell-Bourg Mitglid vo "Les Plus Beaux Villages de France/di schönschtä Dörfer vo Frankrich". E Uszeichnig wo nume öppe 150 vo de sehenswärte Gmeinde i Frankrich hei becho. 

Ab u zue hei mir üs ane Gruppe miteme Guide gschlichä u chli zueglost waser verzeut het..

Ds Universau-Gmües "Chouchoux" ou Chayote gnennt ghört zu Chürbisgwächs u wird uf dr Inslä sauzig wi o süess, zum Apero, Houptgang oder Dessert verarbeitet. 

Ds Grüenzüg dranne wird ufem Märit Bünduwiis verchouft oder me tröchnets u flächtet chlini Bändeli oder Figürli drus. 

Marina's lieblings "lambrequin"/ Schutzbländä..

D Post u eis vo paarne Restaurant in Hell-Bourg..

Da wird d Bierwärbig wi früecher no überau agmaut.. 

Das isch äue z Iheimischtä, kreolischtä miniatur Beizli wos git uf Réunion. 

Bluemä z Réunion. Wougmerkt die wo im Winter blühiä..

D Vanille-Farm hei mir zwöi ganz für üs alleini gha..

Nacheme 10Minütige Fium, hei mir mit eim vo drü awäsendä Frölein no fasch e Stund e Füehrig gha..

Saint-Denis.

Dr Namä vor Stadt chunnt vomene Frachtschiff, wo ar französischä Ostindiä-Kompanie het ghört u d Inslä im Jahr 1667 erreicht het.