LA RÉUNION WEST

Frankreich Landkarten auf stepmap.de

Nachdäm mir in Dubai no dummi Sprüch drüber gmacht hei dases mau Zit wär üs la uszrüefe simer du gad drufabe zimlech i Stress cho. Wo dr Biudschirm widr mau vo Arabisch uf Änglisch umgsteut het, isch nämlech gstande dass üse Flug uf Mauritius "final call" auso letschte Ufruef zum istige i Flüger het. Da simer mau e Rundi gsecklet, da's no zimlech witt isch gangä..

Flug verwütscht u nach 6 Stund u huufä ghouper (sogar d Board-Crew hetsech müesse ga aschnauä) simer z Mauritius glandet. Dert heimer düre Transitbereich müesse zum dr Flüger nach la Réunion z verwütschä. E witteri Stund simer de am Abe Spät no gfloge u churz nach de 19.00 simer in Réunion acho.

Mietouto gschnappet u ab nach L'Hermitage-Les-Bains a Strand.

Ds erste iheimische Znacht u Bier hei mir üs natürlech sofort no chönne orgaisiere zu später Stunde.

Am nägste Morge im Supermarkt ums Eck. Ideckt zur Säubstversorgig u mit Rum..

Ab a Strand, dr Rollator parkiert, da blibemer...

D Zit am Strand heimer üs mit Chlatschheftli (choufemer immer für i Flüger u luege när lieber Fium) fotografierä, Korauä luegä, badä u Schnorchlä vertribä.

Badä chame uf dr ganze Inslä nume hie wius e Lagunä het u somit keni Haifischä umä si. Ir Südsee hei mir ja scho inmitte ere riise Hordä Haifisch gschnorchlet. Aber me het üs gseit, die hie sege nidso nätt wi z Französisch Polynesiä!

La vie est belle..!

Ds schnorchlä im zimlech klarä Wasser u i dere Lagunä isch zimmlech eifach gsi. Nid so viu, aber paar Fischli hets de doch gha.

Gwunderigi chliini, es lustigs Chrebsli u e gruusigi Moräne.

Dr Strand vor dr Türä u d Sunnä wo gredi vor dr Nasä ache geit.

Mit üsere Mietchrutzä (im Kofferruum het gad mau ds Handgepäck platz gha) simer nach Etang-Salé a Strand mitem schwarze Sand. Leider isch dert z Meer offä, u me cha nid ga badä wäg de Heifischli..

Am Morgä vor de 6e heimer üs ufgmacht zum "Cirque du Mafate". Sprich, zum Ussichtspunkt Cape Noir. Das ganze isch e riisige Tauchessu wo nume z Fuess odr mitem Helikopter erreichbar isch. Bismer dert si gsi heimer gfüeuti 10'000 Kurvä dervo ca 9000 Haarnadukurvä überwundä u öppe 1200 Höhemeter. Guete Morgä, zum Glück het d Marina as Bifahrer no ke Zmorgä gha.

Nachere Wanderig simer im Cape Noir acho u hei zersch mau aues Fototouglech gmäit. Gueti Fotos chöme nid gad geng eifach so vo nüt.

När heimer gwartet uf d Sunnä u Zmorge gässe.

Vom Cape noir simer dr Wäg zum "la verre bouteille" gwanderet.

Gwanderet isch eigentlech chli ungertribe. Klätteret u ghanglet!

Märit in St.-Paul

Eigentlech genau so wimers us Frankrich kennä..

Viu Frücht u Gmüess womer kennä, das wome nid kennt wird kouft. ZB. di rote u gäubä Goyavier Beeri. Di rote si rund wi Chirschi, gseh chli us wi riise Hagebuttä, chärnig u si ehner süürlech im Gschmack. Di gäube si ganz weneli miuder.

Samosa si Teigtäsche wo ihre Ursprung z Indiä u Pakistan hei. Si wärde mit diverse Sache gfüüut. Poulet, Gmües, Thon, Chäs, Schinkä, Meerestier. Dr Teig isch meistens traditionell us Weizämäu u Wasser. Si wärde zumene Drüegg zämegfautet u aschliessend frittiert. Uf la Réunion gits die überau zha.

Uf dr Inslä chli überau azträffe isch d Sidäspinnelä. Totau ungfährlech füre Mönsch u d Netz chöi riisig wärdä.

Sunneuntegang vor dr Hustüre

Heit dir gwüsst, dass d Sunne wesi ungergeit zum Schluss no e Bruchteu vore Sekunde grüen wird?!

Je nach Temperaturschichtig gits e chline Prismen-Effekt. Dr Rotateu vor Sunneschibe verschwindet zersch ungerem Horizont, u so blitz am Sunnerand e grüen-blaue Strich uf.

Erneut am Morge früeh, es isch no nid 6i gsi, heimer üs im Fischtere ufe Wäg gmacht Richtig Maîdo.

Churz nach däm mir si losgfahre simer aber no id Polizei-Aukohoukontrouä cho..

Di hei nämlech näbe üs im Hotel düregfiiret u d Musig isch erstummt womer si ufgstandä. Womer de dene hei gseit dasmer ufe Hoger uche wei heisi üs ganz locker verbi gla.

Nach erneute gfahrtä u gfüeutä hundert tuusig Kurvä simer vo 0 uf 2205 Meter über Meer gsi.

Vom Maîdo us gsehtme widr i "Cirque du Mafate" ache.

Es het no Tou gha uf de Houztrittä u mir hei erneut uf Sunne gwartet.

Wo si isch da gsi hets o gad sofort Massehaft Turiste ghaglet u mir hei mau gmüetlech Zmorge gässä.

Vom Maîdo us gsehtme widr i "Cirque du Mafate" ache.

Dr Tauchessu ghört sit 2007 zum UNESCO Wäutnaturerbe.

U widr zrugg as Meer..

Bassins des Cormorans

Drü Wasserfäu uf drü verschidene Etage, wobi dä ir Mitti nid zuegänglech isch.

Dr Wäg dert achä gits garnid. Me mues nämlech dürnes Loch im Maschedrahtzuun. Obwou dert unger no e Usstiger Typ wohnt isch ke Wäg u nüt agschribe. So si mir de natürlech o zu däm Wasserfau klätteret blutfuess wo am schwirigste z erreiche isch gsi!

Ändlech widr einigermaasse dobe hets üs de dünkt, dass das nid aues cha si u si los.

Zum Glück, dr ober Wasserfau isch super schön gsi und ganz eifach z erreichä.

Am Strand entlang simer witer nachh L'Etang-Salè Richtig Süd / Oste gfahrä..