LA RÉUNION SÜD / OST

La Réunion. 

"Insel der Zusammenkunft" isch e Inslä im Indische Ozean, es politisches Übersee-Département und e Region vo Frankrich. Bis 1794 het d Inslä "Ile Bourbon" gheissä u ungerem Napoleon bis 1848 "Ile Bonaparte".

Vor dr Akunft vo de Europäer im 16. Jahrhundert isch dr Indisch Ozean scho vo de Araber u Austronesier erforscht wordä. Scho im 10. Jahrhundert isch de arabische Seefahrer la Réunion aus "Diva maghrebin / Westinsel" bekannt gsi.

Bis Mitti 17. Jahrhundert isch Réunion unbewohnt gsi u het lediglich aus Zwüschestop für d Schiffahrer vo und nach Asiä dient.

Ir Zit vor französische Kolonialisierig si französischi Sidler uf d Inslä cho für d Plantagewirtschaft vo Vanille und Zuckerrohr. Sklave us Madagaskar, Ostafrika u Indie si zuesätzlech für die Arbeitä uf Réunion verschleppt wordä. Mitem Ändi vor Sklaverei 1848 si vo ca 60.000 Sklavä 35.000 ibürgeret wordä.

Biuigi Arbeitschräft hetmä ab sofort us Indiä, Afrika oder China agworbä. D Nachkommä vo de einstige Sidler u Sklave wärde Hüt "Kreolä" gnennt.

- d Lüt us Madagaskar u Ostafrika wärde 'Cafres' gnennt.

- di speter iträffende Inder wärde je nach Gloubä 'Zabres' (sunnitischi        Muslime us Gujarat) oder 'Malbars' (Tamilä, Hindus, Chrischtä) gnennt.

- d Chinesä 'Sinoi'. 

- di verarmte französische koloniale Sidler 'P'tits blanc' oder 'Yabs'.

- di französische Grossgrundbsitzer 'grand blancs'.

- di us Frankrich stammende wosi nid eso gärn hei 'les zoreils' oder 'les metros'.

Di französischi Verfassig verbietet d Sammlig vo ethische Datä. Darum chame nume schetzä, dass ca 45% Nachfahre vo de europäische, madagassischer u afrikanische Sklavä, öppe 25% Inder, ca 25% rein europäischi u 3% Chinesä uf dr Inslä wohnä. 

Näbscht däm kulturellä, spannende Mix isch e Reisegrund dr "Piton de la Fournaise" gis. Einä vo zwöi Vulkän wo no aktiv isch uf dere Inslä. 

Bismer bir Ussichtsplatform si acho si widr eländ viu Kurvä cho u di einti oder angeri Schotterpistä mit dou Schlaglöcher.

Dr "Piton de la Fournaise" isch e 2621 Meter höchä Vulkan. Är isch ca vor 380.000 Jahr uf dr Südsite vom "Piton des Neiges" Vulkan entstande u isch sogar dr aktivst Vulkan vor Wäut. Das heimer natürlech üsne Familie bis itze no nid mitteut :)

Wener aber usbricht de chunnt nume chli Lava wo eigentlech immer i ei Richtig is Meer abesüderet.

Mir hei üs de für zwöi Nächt ir "Gite du Volcan" iquartiert im 4er Dormzimmer. So z säge es SAC Hüttli im indische Ozean.

Knapp über de Wuchä isch a beidne Abä d Sunnä troumhaft abegangä..

Gässe heimer imene grosse Ruum u üs heisi natürlech näbe di Dütschä gsezt..

Aui Franzosä a eim Tisch u aui Dütschä u mir zwöi a eim Tisch ;)

Znacht hets du Iheimisches gä.

Zum Apero e Rum-Punsch (hiuft gäge dütschi Sitznachbare im grosse Familieformat).

Zur Vorspiis hets Gmüessuppä, Teigware oder Bluemchöhli Gratin gä.

Zum Houptgang hets Riis mit Linsä, Fisch oder Schwiins Curry gä u

zum Dessert e Mais oder Härföpfuchuechä miteme totau süesse Rum-shot (hiuft gäge di ganze müehsame Gschichte vo de dütschä Sitznachbare im grosse Familieformat z vergässä).

Unger drü Dechine heimer einisch mit Franzosä u einisch mit Walisser us Sierre ds Zimmer teut.

Am Morge nam Zmorgä hei mir üs angers aus aui angere gmütlech ufe Wäg gmacht. Zersch simer vo üsere Gite us mau 20 Minute opsi glüffä bis zum Tor. Am Tor für i dä Vulkan-Tau-Chessu isches über 520 Stägetritte ache gange. U zwar so unregumässig wi nume müglech. Aschliessend simer a chline wisse Strichli ufem Lava Steibodä gäge Vulkan zue glüffä..

Nach guet angerhaub Stund, heimer dr haub Vulkan bechlätteret u si ufem Vulkankrater obä acho.

Über Stock, Stei u Gröll..

Üsi Route vom Gite- Hüsli ungerem Krater dürä bis uchä..

Dr diräkt Wäg für uchä u am Krater entlang isch leider gsperrt gsi, da dr Rand sit em letschte Usbruch nümm sicher isch u cha istürzä.

D Sicht i Krater ichä isch aber o so sehr ufregend gsi!

Huch, da röichlet öppis..?!

Nachem Pick-Nick mit Baguett, Salami u Öpfu heimer üs ume ufe glich Wäg retour gmacht..

Frächi Vögu zimlech witt vore im Vulkan-Tau-Chessu. Di si üs über längeri Zit nachegfloge u hei irgendwie genau gwüsst, dasmer irgendwo no chli öpis ässä bevor dases nach knapp 6 Stund no über 520 Stägetritte obsi geit!

Dr Blick retour u z wüsse me het di verfl... 14 Kilometer gschafft..

Ufem Wäg für ache ads Meer..

In Saint-Pierre heimer de z warme Duschwasser gnosssä u chli Feriä gmacht..

..und mir hei üse Liebglings-Apero-Stand gfundä. Bier und Samosa i huufe verschidene Sortä..

Dr Wäg für nach Cilaos.. Di kurvige u steile Strasse womer bishär gfahre si het dä Wäg no toppet. Zum Teu nume eispurig befahrä, Bousteuä, Lastwägä, Bus, mir..

Cilaos ligt im Tauchessu "Cirque de Cilaos" quasi ir Mitti vor Inslä.

Uf dr Südsitä vo Cilaos us gsehtme dr "Piton des Neiges".

Vor öppe 5 Millione Jahr hetsech ufem Grund vom Indische Ozean e Hot-Spot biudet u mitem Ufstig vom "Piton des Neiges" hetsech vor ca 3 Millione Jahr d Inslä la Réunion biudet. Dr Vulkan isch vom Meeresgrund bis zum Meeresspiegu ca 4000 Meter u het dert e Umfang vo öppe 800 Km. Me vermuetet, dass dr Vulkan überem Meeresspiegu mau 4300 Meter höch isch gsi. Dür Usbrüch, Explosionä u Erosione heter sini hütegi Höchi vo ca 3070,5 Meter erhautä. Vor ungefähr 12000 Jahr isch dr Piton de la Neiges erloschä.

Di sogenannt entläärte Magmachammere a de Ränder vom Vulkan si ibrochä u biude di hütige Tauchesslä:

- Cirque de Mafate (im Bricht vom Westä)

- Cirque de Cilaos (Bricht momentan)

- Cirque du Salazie (im Bricht vom Nord / Ost)

Nacheme Zwüschestop in Cilaos simer no witter gfahre nach Ilet a Cordes.

Dert obe hei mir vo einrä wo vor ihrem Huus e Stand het gha zwöi säubergmachti Wy kouft. Einisch wissä u einisch Pfirsech. Nei, fein sisi nid gad bsunderlech gsi, aber igfahre sisi feiecheli.

E typische Kiosk uf dr Inslä.

L'Etre-Deux

Es typisches kreolisches Dörfli ide Bärghäng vo Réunion. 

Wichtigi Elemänt vor kreolischä Architektur si bunti Farbe, di eistöckegi bouwiis us Houz, e Veranda une schöne Gartä. Ds grösste Merkmau si di kunstvouä Schutzbländä namens "lambrequins". 

Um 1720 hei di erste Schiffboumeister eifachi Hüsli (Cabanes) us Houz u mit Bläch verchleidet erbout. Di Cabanes si afänglech us zwöi Rüüm bestandä u jeh nach Familiezuewachs hingeruse Zimmer für Zimmer grösser wordä.

Traditionell isch d Chuchi usserhaub vom Huus, da mit offenem Füür kochet wird. 

Traditionell si d Farbe Tubeblau, Mintgrüen u Sunnegäub brucht wordä zum d Hüser amalä. Hüt zu Tags spiuts ke Rouä weli drü Farbe brucht wärdä. 

Ds Muster vo denä "lambrequins" (Schutzbländä) si nach Forme vo Frücht entstandä u si wi scho gschribe z uffäuigste a dene kreolische Hüsli. 

Näbst däm dases dekorativ isch, hets o e praktische Zwäck. Abracht am Vordach schützts d Fänster, Fassade oder Veranda vor de massive Rägefäu. Über di Spitzigi Form louft dr Rägä ganz sanft ab. Traditionell hetmä unger dr Tropfkante no e chline Bambus pflanzet us Sprützschutz. 

Bim Coiffeur heimer ir Zitig gläsä, dass dr Vulkan womer vor paar Tag no si dobe gsi agfange het ruumorä. Witteri 3 Tag speter heimer verno, dass si ds Tor hei zuegmacht ume bis uf witters nümm uche cha.

Erneut ufem Märit..

Zwüschestop am Strand in Grand-Anse.. Leider o nüt gsi zum badä uf Grund vo Heifischli!

Da mä wi scho gschribe ussert z L'Hermitage-Les-Bains niene cha badä hei di Iheimische sich zB. in Manapany-les-Bains e Pool bout.

Im Rivière-Langevine-Tau hets d Grand Galet Wasserfäu. Di si so breit, dasme si garnid ganz ufenes Foto bringt! 

Um üs um..

- Bananä

- Hibiskus

- Frangipani

- Gecko

usw.

Ds Cape Méchant hets inn sich gha. Churz nid realisiert isch e riisigi Wäuä so dermasse d Klippe ufpeitscht (15-20 Meter höch...) u het dr Tinu mit dr Polaroidkamera im Aschlag wortwörtlech übergossä.

DAS Getränk in Réunion, überau wirds verchouft. Mir hei natürlech wimer si weue wüsse was das seu si. E Investition i übersüessts Plääterliwasser mit Marshmellow gschmack. Bäh. E huufe nei merci! 

Am Fuess vom Piton de la Fournaise Vulkan isch e chlini Chiuchä. Im Jahr 1977 isch e Lavastrom dür z ganze Dörfli u het wi "durch ein Wunder" vor dere Chiuchä haut gmacht. Sprich, das isch das wo aui sägä. Tatsächlech isch ds Lava ir Mitti vor Chiuchä blibe stah. D Chiuchä heisst sider denn "Notre-Dame-des-Laves". 

Le Grand Brulé.

Dr Überlouf vom Vulkan Piton de la Fournaise. D Strass derdür wird regumässig mit Lava verschüttet u mues so nöi gmacht wärdä. Weme ar Küste dür dä Abschnitt fahrt, gseht me di verschidene Lavaström vo de verschidene Jahr. Me sött aber nid uf d Fäuder useloufä, ersch rächt nid we Schiuder s verbietä. Dr langsam erstarrend u glich immerno bewegend Strom veränderet sich steetig. Es duuret ca 200 Jahr bis d Lava bis i di töifstä Steue verhertet isch.