DUBAI 2014
D Ruckseck voupackt mit Badhosä u Chartä vo üsne Destinationä si mir mit Bus u Bahn nach Züri a Flughafä.
Ir Sicherheitskontrouä het d Marina ihri Fototäsche mit de Polaroidkameras müesse öffnä, u me het e Drogeabstrich gmacht.. Mir gseh auso immerno so us as würe mir öppis schmugglä..
Nach 6 Stund und eme Dütschä Sitznachbar speter si mir churz vor Mitternacht in Dubai glandet.
Es het duuret bis mir überhoupt hei usem Flüger chönnä, es het duuret bis mir uf z Terminalbähndli hei chönnä, es het no me duuret bis mir dür di schnäui u eifachi Passkontroue si cho
(schaad wes eifach nid funktioniert u di Herrä Ewigkeitä hei bis si sich zur manuelle Arbeit bequemä), es het duuret bis mir üses Handgepäck gscannet hei, d Ruckseck heimer erstuunlecherwiis
schnäu gha. Kes Wunder, di hei mindistens scho tuusig Rundinä ufem Band dräit i dere Zit!
Mitlerwilä isches scho 00.45 gsi, mir hei nüt z verzouä gha, auso nämemer dr grüen Usgang wi aui angere o. Aui wärde düreglah bis uf üs. Mir dörfä ernöit nomau aues Gepack ga scannä.
Notiz a üs: mir gseh definitiv immer no so us as würe mir schmugglä.
Mir hei üs de es Taxi gno! Dr Shuttlebus-Transport wo schlussändlech inklusiv
Trinkgäud 2.50.- weniger hät kostet, het nid gwüsst wo härä u mir hätte no 30 Minute (mir hätte 50 Minute gratä) müesse wartä bis zur Abfahrt.
Bett ahoi, da z Dubai d Uhr 2 Stund vorus isch simer du öppe fangs am 3.30 is Bett cho. Ps: Dussä hets no 32 Grad gha.
Dubai
VAE = die Vereinigten Arabischen Emirate si e föderation (Föderalismus) vo 7 Emirate in Südostasien vo dä arabische Haubinslä ind Südwestasiä.
VAE lige ar Küste vom Persischä Gouf, gränzt a Saudi-Arabiä u Oman.
Es besteit us de Emirate:
- Abu Dhabi
- Adschmann
- Dubai
- Fudschaira
- Ra's al-Chaima
- Schardscha
- Umm al-Qaiwain
Dubai isch vor Abu Dhabi di gröschti Stadt vo de Emirate.
Jumeirah Strand bi 44 Grad.. Wassertemeperatur 32 Grad. U lut aune Taxifahrer womer hei gha (us Marocco, Sudan, Pakistan - nume d Usländer fahre in Dubai aus Taxi-Schofför) wirds no wermer im Juli!
Eigentlech hättis no Bus oder e Metroverbindig. Trotz de klimatisierte Bushüsli u Bahnhöf isches aber eifach viu z heiss.
Da dr Benzinpriis sich uf 40 Rappe pro Liter Benzin u 1.25.- pro Liter Disu belouft isch z Taxi immer no sehr priiswärt u agnähm.
Burj al Arab
"Turm der Araber" isch eis vo de tüürschtä u luxeriösischtä Hotel uf dr Wäut. Es isch 321 Meter höch u eis vo de Wahrzeichä in Dubai. Eigentlech isches es 5 Stärn Hotel, isch aber
usgstattet aus hätis 7 Stärnä. Im Burj al Arab hets usschiesslech nume Suitenä mit jedem Schniggschnagg..
D Moschee in Jumeirah
Usflug id Wüeschti.
Nachdäm mir diräkt vom Hotel mitem Jeep abghout si wordä simer mit wittere 4 Lüt us Dubai use u guet 1 Stund id Wüeschti usesgfahrä.
Irgendwo im Supermarkt im Gjätt usse heimer aghaute fürne Wc u Glace Stop. Das Dusse z heiss isch gsi (me isch ja usem Jeep gheit wordä) ischme i dä Ladä u prompt heimer e Schweisshudu ufe Gring bunge becho. Maa rot u Frou schwarz.
Versträbige im Outo inne machesech immer guet fürne Wüestä-Safari.
Dr Fahrer het no hurti churz chli Luft us de Redli glah u näre simer für 45 Minute ab dür Dünä..
Öppe zwöi mau heimer gmeint dr Charä überschlaht sich ire absolute Steilhangdünä wos öppe 3 Meter zimlech gäge rächts ache isch gangä. Schlimmer aus im Europapark, wiu da duuret d Fahrt nid 45 Minute am Stück ohni Pousä oder e Dünä usse z lah..
Das mir z hingerst im Outo ghocket si het sicher ono si ungünstig Teu bitreit. Aber immerhin simer dert allei gsi u hei nid no müesse luege dasmer wie die vordrannä nid i di angere frömdä icheputschä.
Das eländä ghops hingerinnä, di vilä Kurvä u dr Stop & go Fahrwiis heisech glohnt u mir si z mitzt ir Wüeschti belohnt wordä.
Dr schönscht Sandchaschtä womer jeh hei gseh!
Z Camp füre Abä
Orientalisch ässä
Ritä ufem Kameu namens Champagner
Traditionelli Tänz
Was mä in Dubai fahrt..
Ungerwägs in Dubai City
E Tagesusflug u für das hetmä bi Ussetemperature vo 44 Grad gueti Gründ isch dr Bsuech ir Dubai Mall. Schön klimatisiert, me brucht scho fasch es Jäggli oder muessech hurti usä go ufwermä.
Näbst de normale Lädä wo mir o kennä wi H&M, Lush, New Yorker usw. hets natürlech o dr ganz Schiggimiggi Eggä mit Versace, Laurent u Gabana gha. Am bestä het üs dr orientalisch Eggä gfauä. Mau abgseh vo de intesive Röicherstäblidüft.. Huufä Schmucklädä wo gar ke Prise meh drann si u aues us Goud, Badchleider für islamschi Frouä, Usstatter für Männerrobä usw.
Dr Maa im wisse Gwand wächslet d Nationautracht (Dischdascha oder Kandora) 4 Mau pro Tag.
Am Morge für id Moschee leiter eini a, wächslet für ga z schaffä, wächslet für i Fyrabe u geit aschliessend i Usgang oder ga ichoufä u leit no mau e nöii a.
Es Tischört us Boumwulä wird us Ungerhemmli treit. Es Bouwullätuech namens Wesar wird ume Ungerkörper gwicklet, u das längt normalerwiis bis zu de Fuesschnöchlä. Drunger wird ke Ungerhosä treit! Dischdascha oder Kandora isch äbä es längs Übergwand mit längä Ermlä wos i verschidene Farbe git, aber in wiiss im Summer u Schwarz im Winter bevorzugt wird.
Bischt, es edus Übergwand wird nume bi bsundere Aläss über ds länge Gwand treit. Bischt si meistens bruun oder schwarz u hei Bordürä us ächtä Goudfädä.
D Gahfiya isch e chlini, wissi Chopfbedeckig wo ghäglet isch u si sich diräkt ufe Chopf setzä. Drüber chunnt meistens es dünns, im Dreiegg gfautets Tuech namens Ghutra. D
Farb vo däm Ghutra het nüt mitem persönleche oder irgend emene angere Status öpis z tüe. Es gits i verschidenen Farbe u isch Gschmackssach. Bevorzug wirds aber in wiiss oder in rot-wiss
kariert.
Damit dä ganz Tüechersalat nid dervo flügt gits zwöi schwarzi Ringe namens Agaal wo zimlech schwär si u beschwärä.
Dazu trägt der Herr Sandalen und einen Oberlippen und oder einen Vollbart.
D Frou im Emirat treit e Kandora. E längi, ab u zue farbefrohi aber in schwarz (Blickdicht) bevorzugte Ganzkörperplasigsack. Drunger trage di meistä e Ungerrock oder längi Jeans. Di islamischi Chleiderordnig für Frouä verlangt, dass nume d Händ, Füess u ds Gsicht für nid verwandti Männer darf sichtbar si. Di meiste Froue trage aber wesi furt gö e Ayba. Das besteit useme Chopftuech umene dünne, bodälänge Überhang. Dazu trägt die Frau Schuhe nach belieben und hat fast ohne Ausnahme lange oder sogar sehr lange Haare. Händ u Füess si oft mit Hennamalerei verziert damit dr Goudschmuck bsunders guet zur Gäutig chunnt.
Zu ganz bsundere Aläss treit d Frou e Thobe. E eleangti, mehrteiligi Kandora mit verziehrig u Flädermuusermlä. D Thobe wird aber nuem Dahei u nid ir Öffentlechkeit treit. I
ganz traditionelle Familiä isches üblech, dass d Frou ono e Gsichtsmaske treit. Sprich e Burka. Viu Frouä in Burkas heimer nid gseh. Aber ab u zue e Frou wo nidmau e Ougeusschnitt oder es fiins
Netz über d Ouge het gha sondern eifach es schwarzes Tuech übere Chopf. Dämentsprächend hei die nüt oder chuum gseh u hei vo ihrne Männer u Chind müesse betröit
wärdä.
Zmitz i däm riisige Ichoufszänter hets natürlech ono paar Exklusivi Sachä gha. Wi zb. es riisigs Aquarium über 2 Etage oder es grosses Isfäud mit Tribühni u Putzmaschinä.
Spaziergang zum ufwärmä ir Marina.
Pünktlech zur abgäbene Zit simer parat gsi für uf z Burj Khalifa. E Lift het üs innert Sekundä zur Ussichtsplattform im 124 Stock bracht.
Ds Burj Khalifa isch momentan z höchschte Geböide uf dr Wäut mit de meiste benutzbare Stockwärk. Bis zu sire definitive Fertigstellig het dr Turm Burj Dubai (Dubai Turm) gheissä u itz ischer nachem Präsidänt vo de vereinigte Arabische Emirate touft.
Bout heisi vo 2004 bis 2009 u zwar ganzi 828 Meter.
I dä ungere 37 vo de augemein nutzbare 163 Etage isch ds erste Armani Hotel izogä. I de drüberligendä Egage si 43 Büros u etlechi Suitä. Im 124 Stock isch Ussichtsplattform, mit 452 Meter di zwöithöchschti nachem Shanghai World Financial Center.
Di höchschti Bewohnti Etage im Burj Khalifa isch di 163 uf 584, 5 Meter obä. D Liftä fahre bis i di 189 Etage uf 638 Meter. Sit Januar 2011 gits im 122 Stock z At. Moshere Restaurant wo nach Zau vo de Stockwärk z höchschtä isch vor Wäut. Im Februar 2011 si im Burj Khalifa zwöi Gäudoutomate igweiht wordä, wome wi amene Gäudoutomat cha Goudbarrä vo bis zu eirä Unzä uselah.
Ussicht uf Dubai Marina u lings im Eggä unger ds Ichoufszänter.
Täglech ab de 18.00 findet dert au haub Stund es Wasserspiu statt.
Schoggi mit Kameumiuch?!
Dr Typisch Familieusflug
Wartä uf ds Wasserspieu miteme heissä Schwarztee wo komischerwiis bi 34 Grad Ussetemperatur nid so rächt wot abchüehlä..
D Fontänä schiessä bis zu 150 Meter id Höchi..
Es git 1000 verschideni Wasserspiu mit verschidenster Musig u immer mit Liecht "ungermaut".
Zu däm Wasserspiuereigniss stürme fasch aui Bsuecher vom Ichoufszänter i Massä au 30 Minute id Hitz.
Nach dene paar Tag i dere riise Hitz heimer üsi Ruckseck ume packt u si ganz weneli froh gsi, dasmer es chüehlers Reisezieu astüürä.