DOMINIKANISCHE REPUBLIK 2015

Di Dominikanischi Republik isch e Insustaat uf dr Inslä Hispaniola. Ds westliche Drittu vom Insustaat ghört zu Haiti. 

D Bevöukerig vor DomRep stammt vo europäische Iwanderer ab. Überwiegend spanischer Härkunft und vo afrikanische Sklavä. Dr Ateu a Sklavä isch ir DomRep chliner aus im Nachbarlad Haiti. 

D Landessprach isch dämentsprächend spanisch. Ir DomRep läbä aber viu Lüt mit haitianischer Abstammig (Mehrheitlech Flüchtlingä wo aus biuigi Arbeiter duudet wärdä u churz vor de Abstimmige im Land usgschafft wärdä). Die widerum rede haitianisches Kreolisch u teilwiis französisch. Im Nordostä und Südä vor Inslä isch e chlini Minderheit vo Iwohner wo änglisch redä. 

Vo Züri si mir überene Zwüschestop in Madrid nach Santo Domingo gfloge.

"Santo Domingo de Guzman" isch d Houptstadt vor Dominikanische Republik mit ca 3 Millione Iwohner. 

Nacheme länge Flug, churz vor dr Landig e tierischi Muur a Wolkä wo dr Flüger so richtig het düregschüttlet u i tiefi Luftlöcher la flügä. 

Mir si z Madrid z spät abgfloge, darum simer de o z spät ir Dom Rep acho. Benj u d Ariel, am Tinu sini ehemalige u gli wider Arbeitskollegä wo sitteme haube Jahr ir Dom Rep wohnä u geschafft hei, hei üs de i Empfang gno. Wättertechnisch simer mit üsne länge Chleider ire tierische Sauna acho. Nam umzieh vo chaut uf Hochsummer heimer üsä Jeep bir Outovermietig abghout u si los Richtig Westä. 

Vorwäg isch z sägä dass sich i Westä vor Dom Rep bis itze nid würcklech viu Turiste verirrä.. Es wird auso spannend!

A üsem erste Abä heimer de scho üse erst Brugal-Rum u Sunneuntergang gha..

Ungerwägs uf de Strassä.. 

Geng guet luege, konstant fahrä u hupä. Tempolimite, heimer üs la sägä, gits nid u jeh nach Pegu Aukohou sötmä dr Warnblinker dridue bim fahrä.. Mit dr Zit gwahnet me sich o da dra u luegtsech z einte oder angere Fahrverhaut ab. Ganz zum Leid vo de wiibleche Mitfahrerinnä!

Bimene chline Stop zum drüberus luege het üs di dert läbendi Familie sofort Larimar Stei weue verchofe. Was das genau isch chame chli speter uf dere Sitä läsä. Uf au Fäu heimer es schöns Bitzli gfunde womer aus Erinnerig kouft hei. 

Rio los Patos, Paraiso Barahona

Das Früschwasserbecki isch sehr beliebt zum badä. Spetistens am Abä we sich aui träffä zur tägleche Körperhygiene. Ob me wott oder nid, z Outo wird gwäschä ir Hoffnig dases chli Trinkgäud git. Üse Nutzä a däm ganze isch, dass ds Outo uf ke Fau gstohle wird. Zmingst nid vo öpper angerem..

Bahia de las Aguilas

Zimlech abglägä u bis uf wenigi Bsuecher wome aber nid würcklech gseht wiusi z witt furt si läär.. Dr erscht 4x4 Jeep Test isch bestandä.

Uf üsere Rundreis heimer in Pedernales Haut gmacht. Pedernales isch diräkt ar Haitische Gränzä, u das hetme de o z erste Mau richtig gmerkt. Überau Militär u Postä, Kontrouä, Maschinegwehr. Mir hei du es härzigs Hotel mit suberä Zimmer gfundä u d Bsitzerin het gmeint dases für si gfährlecher seg hie aus für üs. So hei mir am Abä gmüetlech chönnä ga Znacht ässä (ganzi Fischä mit Riis) u ungerwägs no Rum u Iis bsorgä.

Vo Pedernales us gits e Strass teilwiis diräkt ar Haitische Gränzä in Richtig Jimani. Dä Wäg fahre aber schinbar chuum Lüt, wiume e guete 4x4 brucht für dert über di Päss z Chuttä. Mit gnue z ässä u Wasser, faus mir e Plattä hätte oder süs würe blibe steckä u vilich Tage?! müesste warte bis üs öper wür cho häufe simer los. Di erste verdutzte Gsichter vode Iheimische hei üs bestätiget, dases äue würcklech nid viu Turiste git wo das machä. E gueti Stund isch d Strass no rächt guet gsi u am erste Militärpostä het dä Typ weue dasmer üsi Nämä ufschribe u pro Person 200 Peso zahlä. Komischerwiis isches am Afang no 400 Peso gsi. O guet. Houptsach mir heinä chönne Schmierä ohni Problem. 

Mir si immer witter uchä, d Strass isch immer Chempiger wordä u me het uf Haiti übere gseh. Immer wider simer a Lüt i Blächhütli u riise Plantage vo Mango u Banane verbi cho. Bimne chline Picknick simer bsuecht worde vomene Giu und ere Muetter, zimlech sicher us Haiti da si nume kreolisch gredt hei. Mir hei Ihne de vo üsere Melone abgä was se sichtlech gfröit het. Jede Tag e gueti Tag oder so. 

Typischi Hüsli überau..

Zrugg ir Zivilisation u nach öppe 5 Stund Offroad Ghouper voupackt mit Ros, Eslä, Chind u ungloubwürdegi Militärkontrouä heimer Mau öpis z Ässä brucht und es grosses Bier. Bier vor 4 geit hie sehr guet! Wi scho erwähnt, dr Warnblinker isch eifach wichtig..

Wasme so fingt bim ichoufä. 

- La Fuerza Wy

- Tante Jemima Pancakes

- Riis zum säuber abfüuä im Chübu 

- Schissipapier namens Bingo

Ufem Wäg zum Lago Enriquillo simer erneut sehr nöch ar Haitische Gränzä gsi.Viu z nöch. D Polizei het üs de aprupt aghautä u usgfragt u zum Glück ohni grösseri Outokontrouä la ga. I dere Gägend het sich ds Ärdbebä in Port au Prince im Jahr 2010 i de chline Dörfli zeigt. Aus isch bodesäbe gsi u verwitteret. 

Uf däm Parkplatz womer hei stiu gha zum üs schlau übere Lago Enriquillo mache hets gwimmlet vo Leguanä. Di si zimlech schnäu aui uf üs zue cho, me het scho bau chli Angst gha. Leguane chöi bis zu 14 Meter läng wärdä. Settigi hets nid gha, aber glich isch dr eint oder dr anger feiechli gross gsi! 

I däm chline Dörfli womer hei müesse übernachte hets zwöi "Hotel" gha. Bim einte het dr Chef nid gwüsst ober bis am 9i am Abe Strom het oder ober di ganzi Nacht usfaut. Ds hät gheisse: ke Ventilator!! Schreckensnachricht bi dere Affehitz. Im angere "Hotel" heimer Strom gha, derführ isch nume e chline Bislistrau a Wasser us dr Wand cho zum duschä und abchüelä. Es klassisches Bispiu derführ dasme nid aues cha ha. Guet so. 

Dr Lago Enriquillo isch e grosse Sauzsee, diräkt ar Gränzä zu Haiti. Dr See isch ide letschte Jahr us unerklärleche Gründ agstige u somit isch di 25 Quadratkilometer grossi Inslä fasch verschwundä. Uf üsem Usflug mitem Boot hetme das de o sehr dütlech gmerkt. Fasch aui Böim stöh Meter tief im Wasser. Ab u zue heimer mitem Böötli hurti ufeme Ast ufgsezt. Das widerum zieht sehr viu Vögu u Krokodiu a. D Krokodiu si dür die Versteck i dere Böimige Landschaft no garnidso eifach z finde gsi, aber mir heire gfundä vo chli bis gross..

Ungerwägs uf de Strasse..

No Fragä?!

Früschi Bananä.. Immer wider e Troum!

Da lose mir no gad eis e Rundi Räber Peeti mit sim "grüeni Banane" Hit..!

Larimar Mine

Einisch meh simer froh gsi ume Jeep. E gueti haub Stund simer per 4x4 id Bärgä uchegfahrä zu de Minä wo dr Larimar Stei abbout wird. 

Larimar isch bis itze nume ir DomRep gfunde worde u somit sehr lukrativ. 

Dert obe acho si mehreri hundert Haitianer grad no ir Mittagspousä gsi. Miteme sehr mulmige Gfüueu mit hunderte Ougepaar uf üs grichtet simer usgstigä. 

Mit pfiifä u johlä hetme üs begrüesst. Sofort si d Verchöifer cho u e Mine- Mitarbeiter wo üs dür ds ganze Gebiet gfüert het.

Är het üs verzeut, dass är sit 13 Jährig i dene Mine schaffet u für das Gäud überchunnt woner de o würcklech findet. Herti aglägeheit!

I dene schmalä u beängende Schachtä gö d Mitarbeiter bis zu 60 Meter id Tiefi. Tag für Tag u si dert unde Stundelang ire drückende, füechte Hitz.

Schinbar simer e wiukommeni u interessanti Pouseungerhautig gsi.. 

Quasi "die Atraktion" vom Tag! 

Natürlech hei aui versuecht ihri Steinä u Schmuck z verchoufä. Hetme sich druf iglah, isches lenger gange um dert ume furt z cho..

Es "Notfauhüsli" mit integrierter Apothek..

Da würd d SUVA stuunä über so viu Soforthiuf am Arbeitsplatz!

Dr Larimarstei wird i dere Mine abtreit, id Hauptstadt nach Santo Domingo gschickt u dert so bearbeitet dasme speter ide chline Dörfer Schmuck etc. cha drus verarbeite.

D Froue heis de nid chönne lasi u hei de no es Schmuckstück weue choufä.

I däm hübschä Dörfli simer de fünig wordä.. 

Am Meer..

Tanksteu

Bleifrei 95, 92, 87 oder Disu?

Perfekti Ussicht am Küstenabschnitt.. 

Wes doch ir Schwitz o gnue warm wär ds ganze Jahr damit mir settigi Blueme chönnte ha!

Brugal. Dr berüemt iheimisch Rum zumene Spotpriis..

Und dä geit definitiv scho vor de 12.00 am Mittag!

Üsä Amigo het während mir gässä hei uf üses Outo ufpasst. Het aber ehner üs ungerhaute u üs ufzeigt was är aues kennt u cha ufschribä.

Zrugg in Santo Domingo heimer ds Outo abgä, 

und mir hei üs leider müesse trennä vo däm super Chlapf mit Rückspiegu- Kamera..

Zrugg ir Outovermietig heimer zum Glück chönne verhindere dass si üs hei weue über z Näscht abzieh mitem Tank wo angäblech nid gstumme het. Nach Verhandlige am Taxistand simer usserhaub vor Stadt ad Busstation. Nach öppe 2 Stund Wartezit simer de aus fasch einzigi "Turis" knappi 1 1/2 im Wifi-Öv-Karaoke-Kambodscha-Revival-Maho's-Trauma-Bus Richtig Las Terrenas tuckerte. 

Usgstigä simer fasch ganz im Nordä in Las Terrenas bir Villa Elisabeth wo dr Benj u d Arielle es Zitli gwohnt hei.D Elisabeth usem Seeland isch vor 20 Jahr i di Dominikanischi Usgwanderet. Dazumau hets no grossflächig Dschungu gha u si het 2 Jahr gwartet ufene Telefonaschluss. D Bewohner vo Las Terrenas sige sehr guet dürmischt mit Iheimische u Uswanderer. Das hetme de o guet merkt. Zwar ischme us Frou immerno agluegt oder apfiffä wordä, aber Müntschi si eim chli weniger zuegflogä aus im Westä. 

Ab itz si d Strandtäg absehbar gsi!

Jede Tag unterwegs. Strand, Strand, Strand!

Bequemi Ligenä, lauwarms Wasser u früschä Passionsfrucht-Saft bis fasch gar zum Türler.

U zum Schluss Rum trinkä bis zum Sunnenuntergang.. Top!

Nöie Tag, nöie Strand..

Rumtümpeln im Ozean..

Plöffen im Ozean..

Zur Zwüscheverpflegig chli Poulet, Härdöpfu u Yucca / Maniok imene chline, iheimische Beizli.

Mitem Roller dür ds Dorf düüsä..

Hie si sich d Domis Turiste scho meh gwahnet aus im Westä. 

Aber o hie wirdme wi scho erwähnt immerno agstart us wird eim nachepfiffä.

Flügendi Müntschi heimer o e paar entgäge gno..

Karibischi Stümpä i aune Variantä

Ichoufe im Supermakt isch i jedem Land öpis wo gmacht mues wärdä.

Es git chuum öppis spannenders!

Hie isch leider dr Typ mitem Maschinegwehr wo vor jedem Supermarkt steit nid ufem Foto gsi.. Guet, vilich jenachdäm obsim de gfaue hätt oder nid o guet so!

Pina Colada Stranda mit Mucho Rum drin, oder so.. Wüsses nümm so genau. 

Früschi Oustere miteme schlächte, dürschoute Verchoufstrick inklusive. 

Dä Sibesiech wo d Strandbar erfunde het sei gepriesen!

Wider mau e klassische Fau vo: "wenn die Affen steigen"..

Herrläch. Lääri Stränd scho bau am Kilometer!

Zwüschetine Open-Air-Znacht ir Hoffnig dases es Bitzeli Lüftlet!

Dases rändiert (u mir nid jede Tag müesse ga ichoufä) chli e grösseri Fläschä u wius umso feiner isch heimerne igfrohrä.

Bsuech bim aute Arbeitsplatz vo Benj u Ariel. Über di karibischi Qualität vo de Patisserie Sache gits feiechli viu Gschichte z verzeue..

Ungerwägs.. 

Dr Bonita Strand.. 

Que bonita! 

Nid schlächt, oder?!

Badä, badä, badä und e rundi Fotoshooting..

Ungerwägs uf de Strasse in Las Terrenas..

Warte am Morge vor de 8.00 ufe Bus.. Mir wider mau viu z früeh für di karibische Verhäutnis und d Atraktion schlächt hi für aui Schueuchind u Büetzer wo verbi fahre u loufä. 

Nam itscheggä Richtig Turks & Caicos simer dür d Sicherheitskontrouä. U was das für eini isch gsi. No nie so intensiv erläbt i üsere Reisekarierä. Froue u Mannä barrsch trennt, überflüssigi Sache wi Schue, Jaggä abzieh, Frisure uf u intensivschti Leibesvisitation vo jedem. Schinbar isch e riise Drogehandu hops e Tag vorhär.