BARBADOS 2016
Mit däm Gassehouer vo de Flippers hei mir üs Wuchelang vorbereitet.
Ha ha. Oder o nid.
Morgestund het huufe "nei merci" derbi. Am Morge vor de 6e ufe erst Bus..
Chaut u scho henne viu Lüt im Zug.
Z Gänf am Flughafä es riise Puff mit huufe Lüt wo zimlech sicher per Zuefau o gad Sportferie hei.
Barbados isch e Inslä vo de sogenannte "chline Antille" und e Staat (wi Mauritius) innerhaub vom Commonwealt of Nations. Ds "Commonwealth of Nations" wis ganz genau heisst, isch e sogenannti loosi Verbindig "souveräner" Staaten, welche in erster Linie vom Vereinigten Königreich Grossbritanien und Nordirland und dessen ehemaligen Kolonien gebildet wird und dessen Gründung auf das Jahr 1931 zurückgeht".
Barbados isch ca 430 Quadratkm gross u het ca 3'000'000 Iwohner.
Im Gägesatz zu de benachbarte Inslä isch Barbados nid dürne Vulkan entstande sondern ufeme Kalksteiplateu, sogenannts Riffkalk us Koraue, Schwämm u angere Meeresorganismä. Ds Kalksteiplateu erreicht am höchschte Punkt 336 m.
D Iwohner wärde Barbadier gnennt. D Barbadier säuber bezeichne sich aus Bajans. Bajan isch e ufem Änglische basierende kreolische Dialäkt wo mit em änglisch uf dr Inslä gsproche wird. D Statistik seit dass d Bevöukerig us ca 90% Nachkomme vo afrikanische Sklave, 4% wiisi vorwiegend britischer u irischer Abstammig sowie Asiatä (Inder, Chinesä) u "Mulatte" besteit. Arawak u Kariben si di voreuropäische Iwohner vo Barbados. Dr Name Barbados (portugisisch "os barbados" = (die) bärtigen) het d Inslä im Jahr 1536 vom portugisische Entdecker Pedro Campos becho uf Grund de frei abehangende Wurzle vo de vile Figeböim wo ihn a Bärt erinneret het. 15 Jahr nach dr Entdeckig vo Barbados hei spanischi Eroberer Bewohner für Plantagearbeit uf dr Inslä versklavt. Ganz viu si gflüchtet, somit hei d Ängländer es Jahrhundert speter e verweisti Inslä vorgfundä.
1625 het Ängland d Inslä vo de Portugisä überno u bis 1962 isch si i deräm Bsitz blibä. 1627 hei d Ängländer di Mönschelääri Inslä besidlet. Sklave us Irland u vo de gsammte britische Inslä hetme uf Barbados bracht.
Scho i de früeche 1640 Jahr heisi mitem vorhande Rohrzucker gwirtschaftet wo nach Ängland verschifft isch wordä. Scho im Jahr 1655 het d Inslä öppe 8000 Tonne exportiert u isch bis Hüt vo Zucker, Rum u Sirupproduktion abhängig.
No keni 3 Stund glandet hetsech dr Tinu scho mitem Sicherheitsdienst / Polizei vom Flughafe bekannt gmacht. Ufem Wäg im Taxi vom Flughafe bis zum Hostel ischim z Telefon zum Hosesack usegrütscht. Gmerkt heimers natürlech ersch denn wo ds Taxi scho wider furt isch gsi. Mit chli Iheimischer Ungerstützig heimer de dr Taxifahrer erreicht, dä het ds Telefon gfunde u bim Flughafe deponiert.
Nach dere Hitzige Äxtrarundi (23.00 bi ca 28 Grad) heimer üses Zimmer womer nume 1 Nacht hei gha gnossä. Nach Feng Shui isches definitiv nid igrichtet gsi. D Ussicht usem Zimmer u ds Hustelefon am nägste Morge hei üs scho mau guet uf d Inslä igstimmt.
Quasi paar Meter richtig Meer troolet u dert. Diräkt mau am Morge früeh amene schöne Strand glandet...
Blau in blau in blau u no blau. Zum aklimatisiere gar nid mau so übu, oder?
Tinu us perfekt i de Blautön usgsattets Model, miteme Huuch Wuuchäfarb obedürä.
Ab is Wasser u ga Schiudchrötä luege wome scho vom Strand us aus schwarzi, wandeldi Steinä?! het chönne gseh!
Qusi ufe erscht Schwum scho di erste 2,3 Schiudchröte entdeckt. Wahnsinn. Bis itze heimer immer hennä müesse sueche, umegha i däm Momänt hets de aube nie, u wenn doch isches de z fiischter gsi für öpis z gseh.
E iheimische Typ het de e Schiudchrott weue fah. Mau zum luege wi di usgseh. So gmüetlech wi die umetuckerlä, so Blitzschnäu cha sone Chrott abhouä.
Wi scho gschribe. So witt wäg vom Strand simer nid gsi um di Chrotte z gseh.
Plumeria. Da chame nume ide Ferie si.
Üsi Ungerkunft für di räschtlechi Wuchä. Es Hüsli, nid witt wäg vom Meer womer üs mit 2-4 angerne teilt hei. Vo amerikanische (müehsame) Girls wo paar Tag uf Konferenz si bis zu reisende us Ängland, Trinidad u Tobago wo ihri Verwandte bsuecht hei heimer aues troffä. Üse Favorit, dr Duschvorhang..
Zwichtigste zersch. Wasser u Rum ichoufe u dr Rum sofort id gfrieri due...
...plus z iheimische Bier uf dr Terasse teschtä.
Es chliis u gsunds Mittagässä: Fisch u Rum Cola.
Früehzitig abtscheckä wases aues z testä git u was das mues heimgno wärdä..
Nume e Strass witter isch dr Gmüeswagä täglech vorgfahrä. Trotzdäm dass uf Barbados niene würcklech öpis cha apflanzt wärdä isches fein u priiswärt.
Zitvertrieb weme wartet ufe Sunneuntergang. Lüt beobachtä.
Hie vorzugswiis di Iheimischä wo ono hurti gö ga badä bevors fischter wird.
Ja u de wirds scho wider kitschig. Ds "langhaar tragende,Sunneungergang-Model Martin" wo scho i etliche Länder het müesse dra gloube isch o hie nid verschohnt blibä.
E Steilvorlag fürne "Bätschelör" Foug..
Müesst nomau nachefrage. Si üs nid ganz sicher ob mir das am Vujo z verdanke hei..?!
Wes gad isch gange, heimer ufem Wäg für ga Zmorge z choufä hurti e Schwumm gno. Schliesslech isch scho am Morge früeh über 20 Grad gsi.
Die Standart- Insel- Hühner
Usflug nach Bridgetown..
Het scho super agfange. Ändlech gwüsst wele Bus wenn i weli Richtig fahrt u wo dasmer dä Cheib verwütschä simer chum dobä ar Strass quasi entfüert wordä. Es misteriöses, luts Bössli het am Strasserand brämset u e junge Typ isch uf üs zuegsecklet. Obmer id Stadt weuge, mir seue pressiere u istige..
3 mau dankend abglehnt wius üs komisch isch vorcho het üs de e Ängländer useme fahrende Outo zuegmööget mir seue sofort istige, es seg kes Problem. Na dann.
"Schätzli, vo wo chunnsch?" "Süessi rütsch, es wei no 1000 angeri (i dä max 16 Plätzer) istigä.." Ja de würcklech na dann. Musig gäbig lut u eigentlech no ganz guet simer mit wiudem "Stop and go" u ewigem ghoorn i di Stadt gfahre. Wougmerkt, für 1 amerikanisch Doller oder 2 Barbados Dollar. So viu choschtet nämlech e Fahrt für 1 Person, egau wi lang u wi witt du fahrsch!
Bridgetown, d Houptstadt vo Barbados. D Stadt isch ca 1628 vo de Britä gründet wordä u es läbä ca 7000 Iwohner ir Stadt plus über 800000 i de verschidene Vorortä. Somit isch ds e Drittu vor gsammte Bevöukerig in Barbados wo i däm Eggä vor Inslä wohnt. D Rihanna chunnt übrigens usem ermschtä Vorort vo Bridgetwon u isch imene "Soziauhüsli" vor Stadt ufgwachsä. Sones Hüsli oder o e Wohnig wome vor Stadt aus Soziauhiufbezüger bechunnt chame innert 10 Jahr abzahlä u aschlissend ghörts eim u me darf dran handwärkerä.
D Stadt läbt u funktioniert houptsächlech füre Tourismus. Ir Hochseson, sprich über Wiehnachte chöme pro Tag bis zu 7 Krützfahrtschiff am Hafä a wo diräkt bir Stadt liit. Wougmerkt, uf jedem Schiff hets zwüsche 2-4000 Lüt wo uf d Inslä wei.
O ir Nechi vom Hafä glägä isch di ersti Produktion (1895) vom Malibu Fruchtlikör. Es eländs Teenager-Erinnerige-Gsöff us Rum, Zucker u natürlech natürleche Kokosnussextraktä wome niemeh cha gseh u schmöckä.
Fyrabe bedütet o uf Barbados Stou. U warum nid eifach mau chli usgeprägt ploudere mit de angere Arbeitskollegä vom nid ganz so legale Ungernähmä vor Buslinie 11.
Ungerwägs..
Mit dr Stefanie wo üs mit dr Anneliese d Hütte hie vermacht het simer ufne ganztägigi Insutuur. Ihri Muetter isch dütschi u dr Vater us Barbados. Nachdäm sie z dütschland Schueu u Usbiudig abgschlosse het isch sie vor 10 uf Barbados usgwanderet.
Ungerwägs im Landesinnerä zum Welchman Hall Gully.
Info am Rand: so lang dass es säuber erbouts Hüsli us Beton ke Astrich het, muesme ke Stüürä zahlä wius no nid "fertig" isch.
Welchmann Hall Gully
Das isch e Bitz Rägäwaud mit verschidnigste Vegetatione wo irgendwie uf Koralle wachst. Figeböim, riise Bambus..
..und Green Monkeys (ursprünglech us west Afrika) wo i däm Park, aber o uf dr ganze Inslä frei läbä. Mir si gad pünktlech zur tägleche Füetterig cho.
Wie erwähnt, Böim u Pflanze uf Korallestei
D vili Muskatnussböim mit lustig ussehende Muskatnüss..
Fauna und Flora..
Es härzigs Schnäggli wo mit sine Artgenossä langsam aber sicher a auem grüene schnouset u dr ganz Park / Inslä vernichtet. Die Schliimerplaag darf vor Regierig us ganz offizieu radikau vernichtet wärdä.
Da ischer. Am Pedro Campos si Figeboum mit Bart wone uf di bärtige Barbados bracht het. Das isch eine vo de einzige no vorhandenä uf dr Inslä.
D Ussicht ufem Sugar Hill. Eine vo de höchere Höger uf dr Inslä wo d Bewohner sehr, sehr, sehr stouz si druf.
Lustigerwiis hets dert obe chli usgseh wi z Ängland?!
Ungerwägs vom Landesinnerä zrugg ad Küstä..
Ar Küste im riichä Westä. Louis Vuitton u au dä Schiggimiggi-Plunder.
Huufe Yachtaleger, Goufplätz u Luxusresorts.
I däm Eggä vor Inslä hei mir natürlech nid viu verlohre, darum fahre mir sofort witter u haute lieber amene schöne Ort am Meer..
Dank dr Stefanie si mir imene unschinbare, muntzige Örtli zu öpis hennä feinem glangt. Schinbar dr einzig Ort uf dr Inslä wos seu fein si. Si seu rächt gha ha mit däm.. Bimene no unschinbarere Igang isch sie hurti verschwunde u het üs es no warm Brötli bracht. E Hefeteig gfüut mit Mandlä, Kondänz u Kokosnuss Gmantsch u no chli Haguzucker drüber. Perfekt!
Uf houprige u immer chliner wärdende Strasse si mir de ganz obe im Norde acho. Dert trifft z karibische Meer ufe Atlantik, dämentsprächend geits feiechli wiud zue u här. Meter höchi Wäue chlatsche a di riisige Feuswänd, würcklech nöch heimer da nid weue ga.
E chli trüebi Ussicht uf di westlechi Site vor Inslä. Nid so wahnsinnig bsuecht vom Turismus, wius uf dere Sitä läbesgfährlech isch zum schwümmä. Immer wider ziehts dert Surfer a. Dr eint oder dr anger pro Jahr überläbts nid i dene Wäuä u sehr starke Strömigä.
E churze Stop bir no letschte Windmühli uf dr Inslä wo sehrwahrschindlech ono würd loufä. Früecher heigs mehreri vo dene gha zum d Zuckerrohr z pressä.
D Westsitä het üs tatsächlech nid so grossartig igladä..
Zwar schön, aber viu z luftig!
Üses Taxi füre ganz Tag. Ar Stefanie ihres Outo.
Näbeinfo: Si hets kouft wos 3 Jährig isch gsi und sie het: 25.000 Doller sprich 1:1 zu Schwizerfranke derführ zaut. Das isch z Barbados nid unüeblech dass d Outo so abartig (huere, exgüse) tüür si. E Chlibus wo üs Mafiamässig ufglade het choschtet nöi um di 150.000 Doller. Au 10 Jahr chame es Outo Stürefrei uf d Inslä mitnä. Me mues auso feiechli Stutz ha uf dere Inslä.
Stimmungsbild der Westküste ;)
Für 1 Doller hättemers o mitem ÖV da übere gschafft. Da hättemer aber eifach öppe rein e haube Tag brucht zur Areis.
Bottom Bay. Eine vo de schönschtä, wenn nid dr schönst Strand zum luege für üs in Barbados.
Da heimer üs sehr gärn e Kokosnuss vou Rum la ufschwätzä fürnes Weggligäud u hei die gnussvou am fasch einsame Strand unger gschlürft.
Einisch meh het üs e Sunneungergang ads Meer zogä. Dä Vujo isch flissig gsi mit Sunneungergäng organisiere!
Zum Znacht geits ids Iheimische u sympatische Daddy's wos lokaus Fuetter u Rum zu super Priise git.
Chli Fisch, chli Salat, chli Fritli. Genau richtig.
Was beinhautet e guete Morgestart? Genau. Nam ufstah diräkt is Meer ga witterlige bis "zack, der kleine Hunger kommt".
Mir heis de mau no weue wüsse u si ine richtige ÖV Bus igstige zum no uf eigeti Fust d Inslä entdeckä. Fasch niemer drinne, wiu aui si ja i de Diskobusli. Feiechli z Gschepper u Ghouper, di beste Zite vo dene Bussä si tatsächlech mehreri Jahrhundert här..
Uf dr Suechi nachem beste Schnorchuspot uf dr Inslä.. Dä hetsesch wider imene riichere Viertu befunde wo mir persönlech überhoupt nid schön gfunde hei. Chuum Paumä, chuum Sandstränd u DÄ Schnorchuplatz vor Inslä isch schlussändlech sehr enttüschend gsi. Zimlech gli mau hei mir d Flossä klopfet u si wider richtig Heim wos huufe Paumä, schöni Stränd u viu Wasserschiudchröt u Fische het.
U das mitem ÖV-Bus zur Stosszit.. Vo haub läär bis Druckete/bumsvouheimer innert dere Stund hurti aues düred düreprobet. Dr Tinu het de sogar no hurti 5-10 Minute chönne schlafä.
U wär einisch "die rote Sonne von Barbados" ghört het, weiss warum dr Sunneungergang zur Tägleche Pendänz wird. Oder so. Vilich heimer eifach o nume e Sunneungergangs-Schattä / e Sunneungergangs-Fetisch.
Ja di Flipper-Brüder..
Di roti Sunnä vo Barbados. Für die wo z Video bis itz strikte nid hei abgspiut: Itz isches aber abracht!
Kitsch-Alarm!
Leckereien. Pommes, Teigwaregratin, Salat, Fisch. Überau. Jedä Tag.
Derzue es Getränk mit Gügs.
Bis zum Finger wird mit Rum ufgfüut u dr letscht Schluck Cola isch für d Farb. Ir Karibik schiint das eifach so z si..
Üse Tagesusflug mitem Katamaran het scho mau super agfange. D Stefanie het üs öpis organisiert, üs aber nid gseit was ussert dasmer vorem Hotel vor ar Strass abghout wärdä. Derzue steit no dr fautsch, aber doch bitz richtig tönend Name uf dr Liste u schlussändlech heimer doch de dörfe mitfahre. S git Lüt di sägä däm "Luxusproblem von Vielreiser" welche ke Plan me hei vor lutter easy. Mitere chline Crew u 10 angerne usem Goufclub um ***** Bunker simer i See gstochä.
Diräkt näbem Hafä scho dr erst troumhaft Strand für au die wo vom Krüzfahrtschiff chöme, aber ke Usflug wei machä. Luuschig, das Barbados..
10 Minute u 2 Rum Cola / Malibu Ananas speter simer scho von Bord..
Üse Captain het no e Bächer Rum für ufe Wäg mitgno..
Chum im Wasser heimer scho di erste Schiudchröt gsichtet. Di einti oder angeri het de no chli Fischabfäu z schnousä becho zur Belohnig dass si üs so entzückt het.
Witters heimer no Zit gha zum di 3 versunkene Schiffswrack aluege. Dert hei definitiv z viu Pirate z viu Fläschenä ghöut.
So wird übrigens in Barbados zu de Turischte gluegt und derzue uf sis eigete Glück vom Rum- Cola nid verzichtet. Üsere Kameralinse entgeit zu 98% nüt.
"si hei Wind i de Haar u d Sunne im Gsycht.."
Ach, dä Räber Peschä het scho zu auem es super Lied!
D Westküste zderuf..
Da wär natürlech z einte oder angere Hüsli wome würd nä für lenger..
Bises so witt isch nimmt dr Tinu witterhin z einte oder z angere..
Üse Animator wo übrigens äue am meiste drunke het vo aunä!
Eis vo de türschte Örtli uf Barbados. Hie wird d Rihanna regumässig gsichtet.
Bi söfu viu Stutz chame ruehig mau funkle wine Diamant.
Trotz de fählende Millione blibe mir bim Rum. Oder vilich genau wäg däm?
E chline Farbklecks i däm ewigs längwilige blaue Biud..
Scho vom Schiff us si di vile Schiudchröt guet sichtbar gsi.
Dä isch bim Tinu zimlech elegant vor d Linsä gschwummä, oder?
No im Profiu..
Oistins Fish Fry / Fisch Märit. Faht um Himmuswiuä scho im ÖV-Bus a lustig wärdä. Mau agnoh me wär imene absolut vougstungete Bus u me dänkt me mües am Fahrer nägstens ufe Schoos hockä de isch ds o nägstens Mau zimlech dr Fau!
U weme so ikeilet isch u numeno hofft das me vomene Typ mit sim Becki gnue guet cha stabilisiert wärde we brämset wird cha o d Marina di absolut misslechschti Lag nümm fotografierä.
Da heimer üs nach däre Fahrt mau öpis guets ta..
Standart Fisch mit Chabis, dismau mit Maccaroni statt Riis u Bier.
"No rush", s wird nüt gross pressiert mit verchoufä..
Es beliebts Spiu in Barbados. Domino. Jede bechunnt Steine, zeigtse am angere nid u knautse mit vouer Wucht (das mues umbedingt si) passend ufe Tisch. Z Gwinnä gits meistens Gäud.
Zum Glück heimer üs wi scho erwähnt di ganzi Wuche dür z Rum-Repertuar trunkä damit mir am letschte Abe ohni grosse Zitverlust dr Chorb im Ichoufsladä gfüut hei.
Bevor dasmer am Samsti Abe de Heimzue si heimer am Nami no hurti e Abstächer gmacht zum Coiffeur. Sie wo üs d Haar gschnitte het, het witt u breit aus einzigi e Ahnig gha wisi mit üsne "spezieue"?! Haar mues.
Lings u rächts vo üs hets Stundelang Zöpfli u Kunsthaarkunstwärk gä u mir hei üs flottissimo la d Spitzä u no Bitz me la schnide. Hie gösi mit eim auso bedütend weniger zimperlech um aus gwahnet us dr Schwiz. Dr Sträu wird so lang düregschrisse bises fizt, d Coiffeuse zieht o gad so wisi lust het zum schnidä, agstarrt us jedem Eggä wirdme sowiso.
Guet frisiert, schwitzig ide länge Chleider u dr Rucksack vou Rum hei mir üs ufe Wäg gmacht für Heim.