AMSTERDAM 2014

Vo Basu us si mir wider Mau nach Amsterdam gflogä.. Isch ja schliesslech scho 4 Jahr här wo mir zletschtä Mau si gsi. Siehe Amsterdam 2010.

Dises Mau si mir mit Tinus Familie ufene chlini Pensions-Reis.

E Tag bevor mir si agreist heisi Nationaufiirtag "Koenigsdag" gha. In Holland, u verschidene Teili vor Karibik, in Curacao, Aruba u Saint Maarten (Kolonie). 

Dämentsprächend isch no aues orange u vermüllt gsi. 

Gäge Abä hei mir de e Grachtefahrt gmacht, zum e chline Überblick vor Stadt becho. Dür verschideni Grachte si mir bis ufe uf z offene Meer. Dert hets di grosse Schiff gha, wo vo Basu ufem Rhein si nach Amsterdam tuckeret. Churz hei mir überleit ob äch das o mau e Option für üs wär. Aber dä hei mir verworfä u mit z längwilig für üs schubladisiert. Witters simer ono am schmeuste Huus vo Amsterdam verbi cho wo gad mau 1 Meter breit isch. Das Huus isch aber nume uf dr einte Sitä so schmau. In ganz Amsterdam hets aber ono es paar angeri Hüser wo gad knapp so breit si wi d Igangstüürä..

Dert wo am Tag vorhär hunderti vo Schiff uf de Grachte e riise Stou verursacht hei, hei mir freii Fahrt gha a de vilä Husboot verbi. Es het üs dünkt es sege ide letschte 4 Jahr no viu meh Husboot derzue cho. 

Vorem Znacht heimer üs es Apero ir Sky-Lounge-Bar gönnt mitere schöne Ussicht uf Amsterdam..

Gad näb üsem Hotel isch ds aujährleche Kirmes am Dam gsi, wo aube 1 Wuche ufem Königliche Palastplatz ufgsteut wird. 

Natürlech hei mir erneut e Tagesusflug i "Keukenhof" ir Nechi vo Lisse gmacht. Das isch eigentlech o chli dr Grund vo üsere Pensions-Reis gsi.

Dismau si mir aber mit Zug u Bus gfahrä was so sini Zit brucht het.

Vo Amsterdam Central mitem Zug i Schiphol-Flughafä use; dert i anger Eggä vom Bahnhof; müesse astah für Busbilliet u näre nomau astah für ufe Bus.. Churz nach üsem Iträffe hetsech di ganzi Schlange u d Warterei is ändloosä zogä. Glück im Unglück, mir hei im Bus glich müesse stah. Nach guete 2,5 Stund simer du doch no acho. 

Mir hei üs einisch düre ganz Park fotografiert wo dises Jahr vom 20. März bis am 18. Mai offä het. 

Flowerpower..

Äs Tuupäfäud hingerm Keukenhof..

Imene spezieuä Pavillon hets u viu verschideni Orchideeä gä. Sogar settigi wo dr Pensioniert Gärtner no nieh het gseh.. 

So viu makuloosi Orchideeä uf eim Huufä. Da chame nid angers aus aues dürefotografierä. 

Imene wittere Pavillion hets e huufe grossi u spezieui Amaryllis gha. 

Verschideni Liliä i aunä Farbä..

Es witters Tuupäfäud im Keukenhofpark innä.

Wanderschaft dürä Park..

Ä Inder het vo Tinu im Park es Foto weue machä. Är gsäch us wi Brad Pitt... wohl war! 

Da hei mir üs doch am nägste Morge im Starbucks e super Jux une tolli Dollerei überleit. Liecht uffäuig hei mir nachenand öppis bsteut ufe Namä Brad u Angelina. Di Agsteutä hei sich i Reih u Glid gfröit us schaad gfunde dass mir kes Päärli si.

Es wär de süs gad chli gaar uffäuiig gsi und me hät üs no verwütscht!

Bloemenmarkt in Amsterdam. Dr bekanntischt ir Innerstadt. Dr Markt isch sehr bekannt für di grossi Viufaut a Bluemä u somit hei mir de verschideni Tuupäsortä kouft. Hoffentlech klappet de das o nägst Jahr und es wird öppis drus!

DAS Bier in Amsterdam. Heineken. Da drann füehrt ke Wäg verbi. 

Heineken isch überau.

Ungerwägs i de Grachtä.

In ganz Amsterdam fingt mä fasch durchgehend faszinierendi Hüser. 

Di ursprüngleche Hüser im früechere Mittuauter si us Houz bouä gsi.

Dür d Grossbränd 1421 u 1452 si grossi Teilä vo Amsterdam kaputt gange u me het agfange di Houzkonstruktione dür Backsteiboute ersetzä. In ganz Amsterdam findet mä numeno 2 vouständig us Houz erbouti Hüser. 

Ds einte us Houz erboutä Huus isch o z eutestä in Amsterdam. 

Es isch 1470 erbout wordä. 

Ds eutischte Gebäude in Amsterdam isch di auti Chiuchä Oude Kerk erbout 1306. D Chiuchä isch im mitterauterlechä Amsterdam ou e augemeinä Träffpunkt gsi u het aus Reparaturwärkstätt für Seili u Fischernetz dienet. 

D Hüser si wi scho erwähnt zum Teil extrem schmau. Es git es Huus wo ds chlinste in Europa isch. Es isch 2,02 Meter breit u 6 Meter tief. 

Früecher hetmä Stürä nach dr Breiti vom Huus erhobä. Dämentsprächend isch das Huus sehr beliebt gsi wius so günstig isch gsi.

Wemä viu ungerwägs isch u sich chli jede Eggä aluegt findet mä öppe die eis no Biuddarstelligä. Das isch es Übrigblibsu us dr Zit vom einst sehr verbreitete Analphabetismus. Dazu Mau hetmä d Hüser anhand vo de Steibiuder uf de Fassade identifiziert. 

Meh aus 650 settigi Fassadeverzierige si restauriert u gäbe no immer Uskunft übere Bruef vom ehemalige Bsitzer vore Grachtevilla. Ersch nachem Izug vom Napoleon hetme agfange d Hüser nummerierä. 

Eis vo dä berüehmtischtä Hüser isch äue ds Anne Frank Huus. 

Im Hinterhuus het sich d Anne Frank mit ihrer jüdische Familie im zwöite Wäutchrieg 2 Jahr lang versteckt. 

1960 isches ds Anne Frank Huus wordä u me het no itze Zuegang zum Originauversteck..

Ungerwägs i de Grachtä..

Coffeeshop. Kiffä u Aukohoutrinke derzue erloubt..

Bim nägste Bsuech in Amsterdam schaffemers de sicher mau genau z verzeue was sich i so Kaffelädä aues abspiut..

Verliebt i di Hüser het d Marina chuum chönnä hörä mit fotografiere..

Di berüehmi Hüserreiä womä fasch i jedem Ferie u Reisekatalog gseht..

I dene paar Tag hei mir üs natürlech sehr Königlich verpflegt. Amsterdam bietet eim aber o sehr viu Müglechkeite. So si mir bim Mexikaner, bim Lybanes, Chines und Italiäner gsi. Ganz weneli chöi mir bestätige, dass di holländischi Bedienig nid gad di fründlechschti u ufmerksamsti isch wi ide Reisefüehrer immer gschribe wird. 

Amsterdam / Holland isch immer e Reis wärt..