AMSTERDAM 2010
Erneut hei mir üs ufe Wäg gmacht zumene verlengeretä Wucheänd in Amsterdam / Holland. Wat prachtig!
Holland das Flache Land mit Huufä Windreder, Tuupä u Kiffer..?!
Mir hei z Hotel z mitz ir Stadt gha u si somit duurend ir ganze Stadt z Fuess ungerwägs gsi. Nume hurti simer mitem Tram ungerwägs gsi. Eigentlech heimer es Nichtraucher Hotel gha.. Wär het weue kiffä het das zum Fänster us müesse machä (Awisig vom Hotelmanager). Dämentsprächend hets du o überau gschmöckt.. Nichtroucherschiuder hin oder här.
Ufeme Tagesusflug si mir mitem Car i Keukenhof usegfahrä. E riise grossi u berüehmti Gartealag ir Nechi vo Lisse.
Im 15 Jahrhundert isch ds ganze Gebiet no unberüehrti Natur gsi u Eigetum vom Jakobäa von Bayern. Z Land heisi gnüzt zum Jagä u für Chrüter azbouä wo d Schlosschuchi brucht het. Darum dr Namä Keukenhof = Küchengarten.
Jedes Jahr blüiä dert di schönstä Zwibubluemä. Narzissä, Hyazinthä und d Houptbluemä Tupä. Vo denä wärde jährlech ca 4.500.000 Zibelä i ca 100 verschidenä Variationä vo Hand pflanzet.
D Hafästadt Amsterdam isch d Houptstadt vo Hollad. D Innerstadt isch dür di verschidene Grachtägürtu ufteut. Di Grachtä si im 17 Jahrhundert erbout wordä u us däm Grund wird Amsterdam no Venedig des Nordens gnennt. Di autä Grachtä si aus Verteidigungsgräbä brucht wordä u die nöie hei am innerstädtischä Wareverchehr dient. Derzue hei d Grachtä us Entwässerigskanau dienet.
Ds Rotliechtviertu vo Amsterdam. De Wallen gnennt. Es isch im euteste Teu vo Amsterdam u eis vo de erste Gebiet wo Prostituierti legau u organisiert gschaffet hei. Di Prostiutiertä chöi sich uf eigeni Chöschtä es Schoufänster mietä u dert so lang Betrieb rund um d Uhr ha wisi wei.
D Hüser in Amsterdam..
Sehr spannend i de Konstruktionä.
Heineken ahoi.
Heineken isch e holländischi Brauerei wo im Jahr 1864 vom Gerard Adriaan Heineken gründet wordä. Mir hei üs de di auti, ehemaligi Heinekenbrauerei agluegt u het zum Glück geng chli chönne probierä.
Gracht miteme typische Adam-Velo.
Mitere Hordä betrunkniger Dütschä simer de no ufene Bootsrundfahrt dür d Grachtä.
Das idä Hüser in Amsterdam zimlech äng isch u d Stägä sehr steil heisi ussä ar Fassadä Häägä agmacht zum züglä. Seil drüber, agurtä u los dür z Fänster.
Schuilkerk / versteckte Kirche
Das si wi dr Name s scho seit versteckti Chiuchenä wome vo usse nid aus Chiuchä erkennt het. Settigi Chiuchä si im 17. u 18. Jahrhundert vorauem vo de Katholikä, Lutheraner, Remonstrante u Mennoniten bout wordä. D Niderlande si i dere Zit calvinistisch (theologischi Bewegig) prägt gsi. Anderi Religionsgruppe si zwar toleriert gsi, hei aber nid öffentlech dörfä i Erschiinig trättä. Zum Bispiu sehr stark d Katholikä.
Vo usse chuum erkennbar isch di Chiuchä / Museum Amstelkring sehr pompöös usgstattet gsi.
Ufem Wäg dür d Sitestrassä..
Trotz dä ganz vilä Coffeeshops simer aber nie i einä gangä. Zum Teu si da Düft usecho.. u dr Gstank im Hotel rund um d Uhr het üs glängt!
Coffeeshops si legali Verchoufssteuä für "weichi Drogä".
Nach wi vor isch lut em UNO-Einheitsabkommen vo 1961 der Handu u Bsitz vo verschidene Drogä illegau. D Kommision het ar Regierig 1976 gratä, d Prioritäte vor Polizei neu z definiere use z entlastä.
Jedoch gits verschideni Uflagä u verschideni Bestimmigä:
- ke Wärbig ar Fassadä u idä Mediä.
- weder Verchouf vo hertä Drogä no e Gast wo herti Drogä bsizt.
- ke Ruhestörig u Belästigung vo Nachbarä u Passantä.
- ke verchouf a Judendlichi unger 18i.
- keni grossä Mängä, weder bim Verchouf a Gast (max 5g pro Person pro Tag)
no bim Bestand im Café (max. 500g).
Am 1. Juli 2008 heisi in ganz Holland es Rouchverbot verhängt i Restaurants, Bars u Cafés. Das giutet aber nume für Tabakerzeugnisse u nid für Cannabisgebrauch.
