AMERIKA / KANADA 2011
Für vier Wuchä hets üs nomau zrugg zogä i Eggä vo Seattle u Vancouver.
Über d Rocky Mountains agfloge hei mir üses Mietouto am Flughafe gschnappet u si us dr Stadt richtig Mount Rainier gfahrä. Natürlech nid ohni vorhär es feins Subway-Sandwich z ässä u bim Space Needle verbi.
Z Zwöitwichtigste isch ds Ichoufä vo Wasser und Canadian Bier gsi!
Dr Mount Rainier e Schichtvulkan im derzue ghörige Nationaupark usserhaub vo Seattle. Är isch 4392 Meter höch u dr höchscht Gipfu vor Kaskadechötti und vom Bundesstaat Washington.
Während de letschte 65.000 Jahr het dr Mount Rainer ca 3 usdehnti Periode vore Vergletscherig düregmacht. Di letschti isch vor öppe 25.000 bis vor 10.000 Jahr gsi. Während dere Zit isch dr Mount Rainer vouständig mit Iis bedeckt gsi. E paar vo de Gletscher si bis zu 60Km wit vom Bärg gange.
Felsrutsch u Lawine hei derzue gfüehrt, dass dr Bärg ca 1/3 vo sim Volume het verlorä. Derzue si immer widr Eruptione cho wo no e zwöite Krater het hervor bracht.
Mir si mitem Outo düre ganz Park bis z oberst u hei Picknicket. Di nidrige Temperature hei derzue gfüert dasmer das zimlech speditiv erlediget hei.
Ungerwägs es guets Znacht. I dere Region hets viu lääri Züg wo aus Restaurant oder Lädeli brucht wärdä. Kuuli Idee!
Ichoufe in Amerika isch immer wider herrläch. E riise Uswau a Bier und bereits kochti, verpackti Eier..
Mir si immer meh ids Innere vom Land richtig Yellowstone Nationaupark gfahrä.
Yellowstone Nationaupark
Dr Park isch am 1. März 1872 gründet wordä u isch somit dr eutitscht Nationaupark vor Wäut.
Dr Name vom Park chunnt vom Yellowstone River, em wichigste Fluss im Park.
Sehr berüehmt isch dr Park für sini geothermale Quellä, Geysire u Schlammtöpf. Sit 1978 ghört dr park zum UNESCO Wäutnaturerbe.
Scho zimlech am Afang vom Park het eim dr fein Schwäfu-Eier-Gruch um di fiini Nasä gwääit..
62 Prozänt vo de wäutwit existierende heisse Quellä ligä im Yellowstone- Gebiet. Das si ca 10.000. Über 300 si Geysire. Dr berüehmtischt isch dr Old Faithful wo ca au 60-90 Minute Wasser spöit.
Ursach für di vulkanische Aktivität isch d Magmakammerä vom Vulkan, wo vom Bärg achefliesst, i di poröse Lavasteine sickeret u ds Wasser erwärmt.
Ide heisse Quelle, Geysire u blubbernde Schlammlöcher chunnt ds versickerete Wasser wider uchä.
Dür vili, chlini Vulkanusbrüch isch dr Park ufeme Hochplateau uf rund 24000 Meter Höchi. Derzue ischer fasch rundum begränzt dür d Bärgchötti vo de mittlere Rocky Mountains wo di höchschte Spitzä zwüsche 3000-4000 Meter höch si. Ufem Hochplateu befindet sich dr Mount Washburn und dr grösst Bärgsee vo Amerika, dr Yellowstone Lake.
Überau ungerwägs im Park Eierets..
Di vile verschidene Landschaftä chame fasch nid ufhörä z fotografierä!
Dr Yellowstone River isch e rächtä Näbefluss vom Missouri River. Är isch 1114 Kilometer läng u fliesst düre Westä. Dr Name Yellowstone River (gäube Fluss) heter vo de Hidatsta Indianer becho wäg dr gäubfärbig vom Gstei.
Super Schlammbad. Aber leider viu z heiss!
Dr Waud im See schint sich i au däm Fauna übergriffende Wirrwarr wou z fühelä.
Rund 80% vor Parkflächi isch überzogä mit Naduwaud. Dr Räscht ca 15% isch Wisä u 5% isch Wasser. Dr Waud besteit us 3/4 Küsten-Kiefern u dernäbe si viu verschideni Fichtä verträttä.
Die verschidenen heisse Queuä beiflusse d Vegetation im Park sehr stark. Für di meiste Pflanze isch e diräkti Berüehrig mitem silikathaltige, warme Wasser zerstörend, anderi verändere dür das positiv ihre Wachstumsrhytmus.
Mir hei üs entschide e Nacht im Park im Outo z verbringä.
Dases ir Nacht de sooo dermasse chaut wird, hättemer nid dänkt.. Es isch trotz em gmüetleche Plätzli ure Grilladä z Mitz ir Nacht sehr ungmüetlech wordä. So hei mir chli usschou nach Bärä ghautä wo lut de Ranger aube gärn ir Nacht desume schlichä. Leider heimer aber kenä gseh. No nid.
Old Faithful Geysir (der alte Getreue). Wi scho erwähnt isch das dr berüehtmischt uf dr Wäut. Är isch düseförmig u isch im obere Geysir - Becki vom Park. Offizieu hei dä Geysir Mitglider vor Washburn-Langford-Doane- Expedition 1870 entdeckt. Nach zwöi Beobachtigstag heisi ihm dr Namä gä, wiuer so hüüfig u regumässig sich usbrochä. Sis "Eruptionsverhaute" isch vo de angere Geysire unabhängig, da är keni diräkti Verbindig zu de angere bsizt.
Ä Eruption duuret zwüsche 1,5 u 5 Minute u es wärde zwüsche 14.0000 u 32.000 Liter Wasser uskuttet.
I de heisse Quelle vom Yellowstone läbe verschideni Bakterie u Algä. Nume wenigi dervo si wüsseschaftlech erforscht. Zu de wichtigste erforschte thermophile Bakterie ghöre "Thermus Aquaticus" u verschideni Cyanobakterie. Gneuerei Erklärig und oder uflischtig miech eim nume wirr!
Die us dr Quelle isolierte Bakterie verberge es riisigs finanziells Potentiau für Pharmakonzärne. Roche us dr Schwitz vertribt es Enzym vo däm "Thermus aquaticus" zu irgend ere Verviufäutigung ir DNA u macht Millionä.
E Thermalquelle isch e hydrothermali Quellä (Wasserasammlig i Gsteinschichtä mit Gase u Mineralien) wo Wasser ustritt, wo wermer isch aus ds umgäbende Grundwasser. Thermalwasser isch so ca ab 20 Grad.
D Abchüehlig vo de hydrothermale Lösige bim Ustritt usem Gstei füehrt zur Abscheidig vo Mineralie uf de Bodeschichtä. Sprich, es cha es Muster, e Form gä.
Dür jehnsti, verschideni Absonderige vo Wasser, Gasä u ablagerige vo ustrocknete "Kristalle" chöi die verschidene Farbe ire Queue entstah.
Mega schlimm zum erklärä, lieber luege u stuunä!
Bim einte oder angere heimer du glich mau müesse dr Finger dri ha oder lenger zueluege wis bluberet u brodlet.
Uf üsem Wäg chrütz u quer düre Park isch üs d einte oder z andere putzige Tierli übere Wäg glüffä..
Es git Tier di söttme nid umbedingt ga strichelä.. Dr Park isch dr perfekt Rückzugsort für säuteni Tierarte wi zum Bispiu Bisons u Gabelböcke. I de tiefer glägene Gebiete im Park gits Maultierhirsche, Pumas, Luchsä. I de höcherä Lagä Dickhornschafe u Schneegeissä. Am Afang vom Park heimer scho gad mau e riise Horde Wapitis (e Art Hirsche) gseh. Di si ganz gärn ir Nechi vo de grossflächiche Hot Springs. Witters findet me mindestens acht verschideni Flädermuusartä, Schwarzbäre und Elchä. Im Hinterland de Grizzlybäre, Wöuf u Kojotä, Grauhörndli, Siuberdachse, Biber, Murmelt usw.
Uf üsem wittere Wäg vom Yellowstone Nationaupark nach Kanada uchä heimer e Stopp in Cody gmacht.
"Cody Wyoming Rodeo Capital of the world".
Zu üsem Glück heimer dert aghautä, no es freis Zimmer gfunde u heis no pünktlech zure Rodeo- Show gschafft.
Bi de amerikaner darfs eifach geng chli meh si..
O chli lenger u monotoner..
Und natürlech, vergässemer z bequemer nid..
Churz vor dr kanadische Gränze simer üs imene Outdoor Ladä no priswärt ga ideckä mit höchwärtige Tramper Ruckseck für üsi planeti Wäutreis.. Ändlech bir kanadische Gränze acho heimer du no müesse usstige u iche a Schauter ga dr Uswiis zeigä. Ke Ahnig was das auso hät seue. Evt. heisi dusse o ganz eifach üses Outo vo Hünd la abschnüfflä.
Vo Lethbridge simer witter nach Calgary. Dert simer de diräkt i Olympiapark u dr Tinu het sich e pflegti, rasanti Bobfahrt gönnt.
Znacht im BBQ Restaurant. Ripps, gchochti Bohnä, Schuttchruttsalat, Maisbrot u Härdöpfu. Derzue ghört natürlech eis vo de beste Bier uf dr Wäut. Es Canadian!
Calgary isch e Stadt ir Provinz Alberta u di viert grössti vo Kanada. Dr Calgary Tower isch 190,8 Meter höch u dr Fernsehturm vor Stadt. Im Turm obe befindet sich e "Ussichtsplattform" us Glas. Beschehrt paar gueti Ussichtä..
Nach e paar Tag Ufenthaut ir Stadt hets üs wider id Natur zogä. Ganz genau nach Banff. Das isch es spannenders u üsere Meinig na schöners Interlake. Üses Hotelzimmer het feiechli Ussichtä gha und e Hot Pool. Perfekt.
Ungerwägs im Banff Nationaupark..
Am Morge heimer per Zuefau ungerwägs die 2 Bäre atroffä. Us sicherer Distanz heimerse du zimlech lang chönne beobachtä.
Morraine Lake "Moränensee" isch e gspiste See vom Gletscher. Dr höchscht Wasserstand heter ändi Juni. Dr See bechunnt e miuchigi, smaragdgrüeni Färbig uf Grund de Partiku im Gletscherabrieb wo z Liecht reflektiert.
Vom Banff Nationaupark simer witter richtig Jasper Nationalpark. Stiu gha heimer unger anderem bim Athabasca Gletscher. Das isch eini vo sächs Houptzungä vom Columbia- Iisfäud ide kanadische Rocky Mountains. Wiu dr Gletscher zimlech nöch u guet zuegänglech isch, isches eine vo de meistbsuechte Gletscher in Nordamerika. Im Summer wärde regumässig Toure mit bumsvoue Busse vou mit Japaner abottä.
Ungerwägs im Jasper Nationaupark..
Mount Robson. Dr höchscht Bärg mit 3954 Meter i de Rocky Mountains.
Bärgä, Seeä, Waud.. und gnüegend WC Papier..!
Whistler, vouständig Resort Municipality of Whistler isch bekannt für sis hervorragende Skigebiet, ca 115 Kilometer vo Vancouver. Da heimer natürlech uf dr Durchfahrt e Bsuech gmacht.
Afangs 2005 hei dert d Snowboard- Wäutmeisterschafte stattgfundä usw.
Hallo Vancouver. Fasch es Jahr gnau speter simer widr zrugg ir Stadt gsi.
D Ussicht vom Stanly Park isch immer widr schön.
Witeri Informatione über d Stadt stöh vo üsem letschte Busech im Bricht
Amerika / Kanada 2010
Dises Jahr hei mir üs e Flug mitem Wasserflugzüg gönnt.
Zimlech e ängi u sehr lärmigi Aglägeheit, aber sehr schigg. Lustigerwiis si mir über d Gägend, somit o über z Huus gfloge in Port Moody, womer letscht Jahr e paar Tag drinn gwohnt hei. E haub Stund speter simer scho widr glandet.
Wasserflugzüg si in Kanada sehr beliebt zum reisä. I sehr abglägene Orte / Dörfli isch das dr einzig Kontakt zur "Ussewäut". So hei mir üs e Pouse gönnt u no a paarne Flugzüg zueglugt.
Gmüetlech Znacht ässä u dr Sunneungergang luegä..
Mit dr Fähre si mir vo Vancouver uf Nanaimo, Vancouver Island überä. D Inslä, früecher no Quadra gnennt isch di gröschti nordamerikanischi Pazifikinslä.
Mir hei ke Reservation gmacht, s het wäg däm gheisse di nägschti Frei Fähre fahrt am 14.30. Schlussändlech simer uf dr 13.30 Fähre gsi.
So geit reisä mit MaHo's!
Vo Nanaimo si mir ar ganze Inslä entlang bis Port Hardy u de ume retour uf Port McNeil tuckeret.
Dert simer de gad 2 Nächt blibe. Port McNeil isch herrläch abglägä, s het e Supermarkt, es Kaffee u e hampfelä vou Übernachtigsmüglechkeitä UND e Subway mit de beste Sandwich vor Wäut! Üses "Hotel" het es super Pub inklusive gha. Burger, Pommes, Bier u super Drinks zumene super Pris!
Für üse Usflug heimer zum Telegraph Cove müessä. Das z finde isch garnid so eifach gsi, nidmau z Navi het usegfunde wo dürä! Mir heis du doch no gfunde u gnue Zit gha zum Zmorgä ässä. Derzue heimer de Fischer zuegluegt wisi ihri Fischä hei zerleit bevor dases isch los gangä.
Wasmer aus gseh hei:
- riisig viu Orcas
- Buckuwal
- Wysschopf Adler
- Robbä
Derzue hei üs d Guides zimlech viu Infos über d Tier gä und per Mikro im Meer d Lut vo de Walä la abspilä und erklärt.
Perfekt!
Genau vor üsere Nase het sich e Buckuwau ane Gruppe Fischä härepiirscht (darum di vilä Vögu) u het churz drufabe d Luckä gfüuut u gfrässä. D Guides u Forscher hei das säutene Szenairo o ersch 3-4 Mau erläbt.
D Houptstadt vor kanadische Provinz British Columbia isch Victoria uf Vancouver Island. Dr Namä geit uf di britischi Königin Victoria zrugg.
Ungerem Name "Fort Victoria" isch d Stadt zum Zäntrum vom Peuzhandu im westleche Gebiet vo Kanada wordä. D Stadt isch imene imene Gebiet mitere grosse Gruppe indianische Ethnie entstandä u steit abgseh vom Parlamäntsgeböide (2006 vor Stadt kauft) bis hüt uf Indianergebiet. Di wirschtschaftlechi Basis isch am Afang dr Handu gsi. Aschliessend isch Verwautig, Militär, Polizei u Marine derzue cho. Vorauem d Usbütig vo Houz, Kohlä u fischriche Gwässer, aber o Goudfunde ufem Festland het d Victoria gross gmacht.
Wider mit dr Fähre si mir ab Vancouver Island, dismau aber gad Richtig Amerika. Nach dr erste Fahrt simer de uf dr Haubinslä Port Angeles acho u hei dert übernachtet. Am nächste Tag simer uf di zwöiti Fährä, am Mount Rainer verbi (wi dr Mc Dreamy i Greys Anatomy.. *schmeuz*) u mitere super Ussicht uf d Stadt simer am Hafä z Seattle acho.
Z Seattle heimer du üsi letschte paar Ferietag verbracht mit huufä Ichoufswünsch vo de Zuhausegebliebenen.
Am Flughafe heimer wi letscht Jahr di lätzi Usfahrt gno zum Zmietouto retour bringä. Vor lutter Herie und em riise Häxeschuss vor Marina heimer d Fotokamera im Outo vergässä. Zum Glück heimers no rächtzitig gmerkt.. Das wär ja mau e schöne Skandau gsi!
Churz vorem Abflüge het üs de mau fasch dr Schlag troffä.
Dr Flug vo Seattle nach Toronto het zwar stattgfundä, jedoch simer z spät losgflogä.. Dramatischerwiis simer im "Gospel Jet" z hingerst hinger ikeilet gsi..
Somit hei mir dr buechet Flug Toronto - Züri verpasst u si hei üs nid chönne sägä wis witter geit. Z Toronto simer ohni Boardingpass füre nägst Flug fasch nid düre Transitbereich cho..
Ändlech am richtige Schauter de di nägsti Überraschig. Si hei üs nid chönnä sägä obmer no über London nach Züri chöme oder ob mir üs de a däm Schauter wider gseh wiumer es Hotel müesse ha u umbuechä füre nägst Tag. Dr Flüger Toronto - London isch überbuecht gsi.
Somit heimer über 2 Stund am Gate gwartet. Irgendwenn churz vorem Abflug simer ufgrüeft wordä. Flugticket check, mir si derbi. Sitzplätz 5 u 6. Bim istige heimer du mau realisiert dasmer ir First Class nach London Flüge..
Heilige Bimmbamm!
Was fürne Stress mit dere ässerei u suuferei bide riichä! Vor lutter Menue u Wy wähle ischme ke Minute zur Rueh cho. Mir hei du doch no hurti chönnä z Bett irichtä u wenigstens chli dösä mit üsem Hiller womer üs Rekordverdächtig agsoffä hei.
Leider isch dr Flug nume ca 6 Stund gange, mir hätte ewigs no chönnä witter ässä, trinkä u fulänzä. Immerhin heimer dr Aschlussflug verwütscht u so simer mit e paar Stund Verspätig doch no Heim cho. Mitem "Grüezi" in Züri heimer immerno bi jedere Landig müeh!!