AMERIKA / KANADA 2010
Für 6 Wuchä si mir id Staatä gflogä, obwou dr Tinu ds Schin u Wadebei broche het. Über London si mir ds Montreal / Kanada glandet.
Dr Götti vor Marina het üs am Flughafä abghout u mit üs no e obligate Abstächer uf Montreal gmacht.
Mit ihm simer de o über d Gränzä id Staatä zu ihm Heim nach West Chazy NY. Dert heimer du gad es Outo gmietet.
Di nägste paar Tag simer rund um West Chazy ungerwägs gsi. Zum Bispiu simer e ganze Tag uf Montreal i Park u ir Stadt ds wäutbeste Sandwich ga ässä.
Amene angere Tag simer id Adirondacks u ufe White Face Mountain uchä. Dä Bärg isch ir nöchi vo Lake Placid wo 1980 die Olympische Winterspiu stattgfunde hei.
Nach knapp 1 Wuche simer scho witters u vo Burlington nach Manhattan gflogä. Schlimmst Flug ever mit JetBlue-Airways. Erstens Mau isch dr Flüger sehr äng gsi, es het chuum Luft dert inne gha u knapp 1 Stund lang eifach nume ghudlet u eis Luftloch nam angere gha!
Ar Marina isches no dr ganz Wäg vo über 1 Stund im Taxi vom Flughafä id Stadt schlächt gsi da dr Fahrer Stop n'go à gogo gmacht het.
No am gliche Tag heimer üsi Wanderig dür d Stadt gmacht so guet dases miteme brochne Bei haut gange isch.
Üsä Lieblingsplatz, dr Times Square.
D Ussicht uf d Stadt vor Brooklyn Bridge us..
D Brooklyn Bridge isch eine vo de eutiste Hängebrückä in Amerika. Sie geit übere East River u verbindet d Stadtteilä Manhatten mit Brooklyn. D Brügg het sächs Fahrspuhre u e Stock witter obe e breite Fuessgänger u Velowäg. Wo si isch fertig worde 1883 isch d Brügg di längst Hängebrügg vor Wäut gsi. Für d Stadt isch d Brügg schnäu zumene neue Wahrzeichä wordä.
E Bsuech ufem 443 Meter u gsammthaft 102 Stockwärch höchä Empire State Builging darf in Manhattan eifach nid fählä. D Ussicht vo dert Obä uf aui Teilä vor Stadt isch für üs atemberaubend!
Bye bye Manhattan, hello West Coast, hello L.A.
Uf Grund vor Zitverschiebig het d Marina lenger aus gewohnt Geburtstag gha.
In Los Angeles acho simer mitem Mietouto chli ungerwägs gsi. Ds Hostel isch imene normale Huus gsi, bismer das gfunde hei hets duuret..
Mir si dür di ganzi eländ längi Stadt gfahre für uf Santa Monica u dessen Strand.
Am Strand entlang richtig Venice Beach..
Wiumer scho gad ir Nechi si gsi, simer du ono gad ufe Forest Lawn Memorial Park Friedhof. Dert isch d Grabstätte vom Michael Jackson.
D Universal Studios isch e sogenannte Themäpark. Afänglich si d Universal Studios gsi damit me aus Gast cha hinger d Kulissä vom Filmstudio luege. Mit de Jahr hetsech das massiv vergrösseret.
Figure usem Fium, Fiumkulisse, mitem Bähndli dür d Studios fahrä, Achterbahn fahre mitem Simpson's Ride u no viu meh. Me cha sich tagelang i däm Park vertöörlä. Dank däm dr Tinu sis Scheichli broche het gha simer mitem VIP Pass ohni lang z zögere a aune Kilometer länge Schlange verbi. Guet, odr?
Mitem Outo so nöch wi müglech a ds Hollywood Schiud. Ke Ahnig wi mängs Verbotschiud d Marina überfahre het zum das Zieu mit Bravur z erreichä..
Shrine Auditorium in Los Angeles. E super Ort zum e angere Blick uf ds Hollywood- Schiud becho und natürlech o e Blick uf d Stadt z wärfä.
E churze Abstächer i eis vo de bekanntiste Tattoowierstudio. Itz chame spekulierä ob u wär vo üs het es Tattoo la stächä..
Dr sogenannt Walk of fame mit de vilä verschidenä Sterne vo de Stars us Film und Musik. Mau interessant das z gseh, aber de glich nüt wäutbewegends hets üs dünkt.
Los Angeles Richtig San Diego. Garnid mau so eifach uf au dene 6 Spuhrige Strasse, no mitem Navigrät.
Sea World San Diego
Vo dr Küste us ab ids Nüt usä. Vo San Diego simer Richtig Palm Springs. Im Winter totau überloffe ischs düre Summer fasch e Geisterstadt mit huufä lääre, aber derführ biuige Motels. U heiss isches dert gsi! Wi usem Föhn blasä!
Joshua Tree Nationaupark
Dr Park isch e Wüestelandschaft wo im Südostä vo Kaliforniä wo dr Übergang vor Mojave-Wüesti zur Colorado-Wüesti biudet.
Dr Park het dr Name vor Josua-Palmlilie, di grösst Art vor Gattig Palmlilie (Yucca).
Düre Joshua Tree Park si mir de no paar Stunde dür d Wüesti richtig Las Vegas gfahrä. D Hitz isch geng meh wordä u womer du hei dänkt da chunnt nümm meh, isch plötzlech di riisigi Stadt im Nüt uftoucht.
Las Vegas
Das isch di grössti Stadt im Bundesstaat Nevada.
Aus erschte Europäer wo z Gebiet vom hütige Las Vegas erreicht het isch im 1829 dr Rafael Rivera gsi wo ufem Old Spanish Trail nach Los Angeles nachere Alternativeroute gsuecht het.
Uf Grund vo de artesischen Quellä u dr damit verbundene Vegetation i dere süs sehr trochenä Wüeschtäregion het är dr Ort Las Vegas (spanisch "Die Auen") touft. Di ersti Sidlig isch 1854 vo de Mormonä gründet wordä, het aber scho drü Jahr speter nümm existiert. Mitti 1860er Jahr het d US-Armee ds Fort Baker errichtet. Dür d Quellä isch Las Vegas zumene wichtige Zwüschestopp für Wagetrecks u dr Isebahn ufem Wäg zwüsche Kalifornie im Westä u New Mexico im Oste wordä.
1903 het d Rancherwitwe Helen Stewart für 55.000 US-Doller e Grossteu vo ihrem Farmgrundstück ad Isebahngseuschaft verchouft. Die Gseuschaft het uf Grund dr grosse Nachfrag am 15. Mai 1905 aues für 265.000 US-Doller a Spekulantä u Investore versteigeret. So isch d Stadt Las Vegas offizieu gründet gsi.
Vo 1931 bis 1935 isch dr Hoover Stoudamm errichtet, parallel isch ds Glücksspiu in Nevada legalisiert wordä.
1940 si di erste Hotels mit ingetriertem Spiucasino erbout wordä u ab 1950 si zaurichi Bsuecher id Stadt cho wo Atombombetests hei weue luege ir Nächi vor Stadt.
I dere Zit isch dr Ifluss vor US-amerikanische Cosa Nostra (Mafia) gstige u viu Hotels si kontrolliert wordä. Viu isch vo de Gängster vorem verstüürä abzapft wordä u zu de Familiebossä nach Chicago, Miami usw. gflossä.
Las Vegas het knapp 600.000 Iwohner. D Zahl stigt pro Jahr um ca 2,0 Prozänt. Ca 150.000 Bett si für Turischtä, tendänz stigend.
D Casinos hei pro Jahr ca e Ihnahm vo 4,5 Milliardä US-Doller.
Dr Grösst Arbeitgäber usserhaub vor Glücksspiuindustrie isch d Stadtbehördä. Si hei ca 200.000 Agsteuti. Witter steut d Universität vo Nevada u d Post e huufe Arbeitsplätz. Es git o ca 30 Spitäler, tendänz stigend.
Ds Pro-Kopf-Ikomä in Las Vegas ligt liecht überem amerikanische Durchschnitt.
Di offizieui Arbeitslosäquotä isch mit 14% eini vo de höchschtä in Amerika. D Zahl vo de Arbeitslosä wird bis zu 100.000 vermuetet, wiu d Wirtschaftskriisä Las Vegas am meistä preicht het.
Trotz au däm isch Las Vegas immerno sehr beliebt. Es git o nüt wos in Las Vegas nid git!
Am Las Vegas Strip si aui berüehmte Hotels z findä. Dr ganz Strip isch ca 6,8 Kilometer läng.
D Freemont Street isch quasi dr aut Las Vegas Strip wos scho bereits 1905 het gä. Bennent dürne Entdecker u Politiker namens John C. Frémont wo im Jahr 1844 Las Vegas ufere Expedition dürquert het.
Es isch immern sehr eifach in Las Vegas z Hüratä. U zwar rund um d Uhr, auso 24 Stund. Entwedr geitme mit odr ohni Elvis Presley ine Kapäue odr fahrt mitem Outo härä u wird dür z Fänster dür hurti trout.
El Super Läbesmittuladä mit ganz viu mexikanischem Ifluss u super mexikanischer, rassiger Trumpete Musig.. Einä vo üsne Favoritä!
Dr Hoover Dam (Hoover- Talsperre) befindet sich knapp 50 Kilometer südöstlech vo Las Vegas, gad diräkt uf dr Gränze zwüsche de beide Staatä Nevada u Arizona im Black Canyon.
Dr Dam stout dr Colorado zum Lake Mead uf. Miteme Spicherinhaut vo ca 35 Milliarde Kubikmeter isches dr grösst Stousee in Amerika.
Houptzwäck vor Talsperri isch di kontrollierti Wasserabgab in Arizona, Nevada u Kaliforniä wius bis anhin immer grossi Überschwemmigä het gä.
E wittere Zwäck isch natürlech d Gwinnig vo elektrischer Energie / Strom.
Las Vegas bezieht sis ganze Wasser usem Hoover Dam.
Dr Zion Nationalpark befindet sich im Südwestä vo Utah ar Gränzä zu Arizona.
Zwüschem Colorado- Plateu, em Great Basin ur Mojave- Wüestä. Dür di bsunderi Lag existiere im Park verschideni Läbesrüüm mit verschidenä Tier u Pflanzä.
Zion isch es auts hebräisches Wort u bedütet so viu wi Zufluchtsort oder Heiligtum u isch viu vo de mormonische Sidler in Utah benüzt wordä.
Zum Zion Canyon ghört o dr aschliessend Kolob Canyon. Die beide si us 170 Millione Jahr autem brunä bis orange rotem Sandstei.
D Gesteinsschicht im Zion NP besteit us ganz viu verschidene Schichtä.
Afangs vom Park muesme ds Outo parkierä u witter düre Park chunnt me nume miteme chline Bus wo ca au haub Stund zirkuliert.
Uf üsere Tour hei mir no haut gmacht im Bryce Canyon Nationaupark uf 2400- 2700 Meter.
Di farbige Felspyramide wärde Hoodoos gnennt. Dä sogenannt Abbruch verlouft zum Teil nid linear. Zum Teil gseh di haub kreisförmige Felschesslä us wi Amphitheater. Dr Park isch 1850 vo wiissä besidlet wordä u het so dr Name vom Ebenezer Bryce becho wosech 1875 dört het nidergla.
Ds Gstei im Bryce Canyon isch ca. 100 Millione Jahr jünger aus das im Zion. Die widerum hei nomau Feusä wo erneut 100 Millione Jahr jünger si aus im Grand Canyon. Vom Grand Canyon bis zum Bryce Canyon chamä bis zu 200 Millione Jahr Ärdgschicht studierä.
D Steinä si us Basalt u Sandstei u beinhaute viu Fossil. Vor ca 16 Millione Jahr het sich ds Plateau um circa 1000 Meter ghobä. Vor dere Zit isch ds ganze Gebiet fasch uf Meeresspieguhöchi gsi u isch Colorado Plateau gnennt wordä. Mit dr Zit isches vergheit i chlini verschideni Plateaus. Wo dr amerikanisch Kontinänt witter in Richtig Nordä isch driftet, het sich o ds Klima veränderet. Es isch chüehler wordä, het meh grägnet u so hets mit dr Zit dür z frierä di hütegi Struktur biudet.
Ungerwägs für i nägst Park am Lake Powell verbi..
Dr Antelope Canyon
Ganz sicher einä vo üsne Lieblingä!
Dr Antelope Canyon besteit useme oberä Canyon umene ungere Canyon.
Da dr Unger Canyon nume mit Leiterakrobatik z gseh isch heimer üs mitem obere Canyon zfridä gä. Wobi o dä miteme brochene Bei no sini Tücke het gha.
Zum Bispiu miteme Jeep über di sehr houprigi Prärie raasä..
Beidi Canyon si di meisti Zit trochä u zuegänglech, wes rägnet si d Gfahre vore Sturzfluet Läbesbedrohlech.
Da sich beidi Canyons im grösste Indianerreservat befindä muesme zuesätzlech zur Gebürepflichtige Tour no chli Biträg zahlä.
Dr ober Canyon isch sehr beliebt, wius sehr schöni Fotomotiv git..
We d Sunne schiint gits nomau e ganz angere Effekt we d Strahle bis a Bodä schiinä u d Farbe vom Stei verändere. Leider hei mir bi üsem Bsuech ke Sunne gha. Es het üs aber o so sehr guet gfaue!
Grand Canyon Nationalpark
Dr Park ligt ire steilä, ca 450 Kilometer länge Schlucht im Nordä vo Arizona. Während Jahrmillione hetsech dr Colorado River dür ds Gestei grabe unim di Hüttigi Form u Struktur verpasst.
Vor 3000 Jahr hei di erste Indianer im Gebiet gläbt, verschideni Indianerstämm läbä no Hüt ir Nechi vom Granz Canyon Gebiet.
Dr Grand Canyon isch vom Garcia Lopez de Cadenas us Spanie us erste Europäer entdeckt wordä. Är isch 1540 mitere Gruppe spanischer Soudate unere Begleitperson vom Hopi-Indianerstamm ar Schlucht acho. Drü Soudate si ache id
Schlucht, si aber nach ca emene Drittu wäg Wassermangu wider umkehrt. Dr Canyon isch uf Grund dessi aus wärtlos igstuft wordä u über 200 Jahr hetne ke Europäer me bsuecht.
Im Jahr 1776 si zwöi spanischi Priester bir Erforschig ufe Canyon gstosse wiu si e Wäg vo Santa Fe (New Mexico) nach Kalifornie hei gsuecht.
I dä 1850er Jahr het dr Mormone Brigham Young di erste Sidler i Canyon gschickt, damit die e Müglechkeit zur Flussüberquerig findä. Nachdäm die Sidler gueti Beziehige zu de iheimische Indianer hei gha si zwöi Orte zur Überquerig vom Fluss entdeckt wordä. Lee's Ferr & Pierce Ferry.
Nachem Grand Canyon wo sehr überlüffe mit Turischtä isch gsi, simer es churzes Stück uf dr Route 66 gfahrä.
D Route 66 isch ursprünglech mau e 3.939,67 Kilometer längi Strass vo Chicago (Illinois) nach Santa Monica (Kalifornie) gsi. Si isch abgseh vom Lincoln Higway eini vo de erste durchgehend befestigte Strasseverbindige ad Westküste gsi.
Hüt si numeno Teilstück vo dere Strass übrig blibä.
Mir hei du nach paar Passage abgha i Dead Valley Nationalpark.
Ds Death Valley (Tal des Todes) ligt zmitz ir Mojave Wüesti ussä u isch dr trochnigscht Nationalpark vor USA. D Region isch e richtige Hitzepool u dr tiefscht Punkt Badwater Basin gnennt ligt genau 85, 95 Meter ungerem Meeresspiegu. Dert wird's plus Minus 45 Grad. Es git zwei Houpttäler innerhaub vom Park. Ds Death Valley und ds Panamint Valley. Beidi si wenigi Millione Jahr aut.
Im Death Valley gits näbst däm Badwater Basin o dr Devil's Gold Course. Di spitze Salzstrukture hei früecheri Bsuecher ufe Gedanke bracht, dä Platz müess dr Goufplatz vom Tüüfu gsi si. Oder es git d Mesquite Sand Dunes wo ca 4km² gross si. Meistens wärde si aus Fiumkulisse brucht, wi zb. für Star Wars. Di grössti heist Star Dune u isch rächt stabil. Dr Sand isch dert rund 50 Meter höch.
Dr Yosemite National Park ligt ca 300 Kilometer östlech vo San Francisco.
Dr Park isch sehr viusitig. Feusä, Wasserfäu, Bäch u Mammutböim u är ligt vo 600 bis über 4000 Meter obä.
Di berüehmtischti Sehenswürdigkeit im Park isch dr ca 2700 Meter höch Half Dome. Dr Bärg wird unger angerem aus Logo vom Härsteuer vo Bärgsport u Outdoorchleider The North Face brucht.
Uf üsere wiudä Nationaupark-Tour simer im Sequoia Nationaupark acho.
Dr Sequoia Park isch mitem Kings Canyon Nationaupark verbundä u giutet aus e gmeinsami Einheit.
Beidi Parks hei extrem ungerschidlechi Höchinä vo 412 bis über 4000 Meter.
O hie hets tiefi Canyons u riise Bärgä. D Houptatraktion si aber di riisige Mamutböim wo höcher aus 80m und e Durchmässer vo über 11 Meter chöi erreichä.
Dr Riise Mammutboum (Redwood) isch e immergrüene Boum mitere Wuchshöchi vo bis zu 95 Meter umene Durchmässer vo bis zu 17 Meter. Dr Boum biudet e höchi, schmali u keguförmigi Krone u d Stämm chöi im Auter bis uf 50 Meter uchä astfrei si. Jungi Böim wachse nume langsam id Höchi, derfür umso schneuer id Breiti.
Me seit di eutiste Exemplar si zwüsche 2500 u evt sogar bis zu 3900 Jahr aut.
So si mir mitem Outo düre Park gfahre, hei üs di sehr imposannte Böim immer widr us dr Nechi aluegt u si de änenache uf d CA 1 cho.
California State Route 1
D CA 1 Route isch e Verbindig zwüsche Süd u Nordkaliforniä. Quasi zwüsche Los Angeles u San Francisco. Di Strass isch e Teu vom California Freeway u Expressway System. E Teu vo dere Route wird aus National Scenic Byway betittlet. Als National Scenic Byway wärdä i de Staate Strasse betittlet, wo im Verlouf vor Strecki Sehenswürdigkeite "mit einer herausragenden archäologischen, kulturellen oder historischen Bedeutung, durch eine Umgebung mit einem hohen Erholung- und Freizeitwert oder auch durch besonders sehendswerte Natur- und Landschaftsgegebenheiten auszeichnen.
D CA 1 faht ar Interstate 5 in Dana Point a, bevor si nördlech i Richtig Los Angeles geit. Aschliessend dürquert me d Küstestädt Newport Beach, Santa Monica u Malibu. Dr Higway louft näre paralell zum U.S. Higway 101. Gad nach Santa Barbara geit d Strass widr as Meer use. Nördlech vo Morro Bay faht näre dr landschaftlech schönst Abschnitt a. Bis nach Monterey füehrt d Strass a dr Steilküste vo Big Sur entlang. Di vile Kurvä dert gieng ja no. Aber d Amerikaner si sich das überhoupt nid gwahnet, darum heimer dert o nid schneuer aus 30-40kmh chönne fahrä. Vo Monterey geits ar Küste witter bis Santa Cruz u San Francisco u dr ganz Highway ändet nachem überquere vor Golden Gate Bridge in Garberville.
D Golden Gate Bridge isch d Hängebrügg am Igang vor Bucht vo San Francisco. Si isch ds Wahrzeiche vor Stadt u unger dr Bouleitig vo Johann Strauss. Boubeginn isch im Februar 1933 gsi u isch im Apriu 1937 füre Verchehr freigä wordä. Ds Prinzip vor Hängebrügg isch fougendes:
D Fundamänt übertrage z Eigegwicht ufe Bougrund. Ufem Fundamänt ruiä di Pfiler, wo a de Bouwärksändine aus Widerlager, quasi Schubchräft müesse ufnä. Ds Tragwärk übertreit di sogenannte Verkehrslastä u ds Eigegwicht uf d Pfiler und die Widerlager. Di ganzi Hängebrügg isch quasi e durchhängende Gurt a dene Pfiler ufgspannet.
Nach Planig vom Johann Strauss hät d Brügg eigentlech seue imene gwöhnleche grau gstrichä wärdä. Ds Orange wo druff isch, isch eigentlech es Schutzmittu u wird "International Orange" gnennt. Wes nach dr Navy wär gange hätme d Brügg tatsächlech aschliessend nachem uftrage vom Schutzmittu seue grau striche. Das Orange het aber de Iwohner vo San Fran so gfaue, dass dr Strauss igwiuiget het use so het lasi.
San Francisco
Das isch di 4t grössti Stadt im Staat Kalifornie. Dr Name vor Stadt isch het spanische Ursprung. San Francisco isch nachem Heilige Franziskus, auso nam Franz von Assisi benannt. Vo de Iwohner lang verpöhnt hetme ar Stadt eifach "Frisco" gseit.
Wi i viune amerikanische Stedt gits es Chinatown. Ds Chinatown vo San Francisco isch zämä mit de Chinese usem Sunset u Richmond District eis vo de grösste Chineseviertu usserhaub vo China. Usserdäm gits e vietnamesischi Gmeind im Stadtteil Tenderloin, eini vo de Philippiner, e Italiänischi, irländischi, russischi Gmeind und es französisches Quartier.
Ds Haight-Ashbury Viertu isch ide 1960er Jahr dür d Asammlig vo de Hippies bekannt wordä u ds Castro Viertu isch ds grösstä Lesbä u Schwuleviertu vor Stadt.
Painted Ladies
So heisst di mehrfahrbig gstricheni Houzhüslireiä us dr viktorianische Zit.
Dr Begriff "Painted Ladies" isch e Slang Begriff usem 19. Jahrhundert u steit für Prostituierti, da sich d Dame vor Gseuschaft i dere Zit normalerwiis nid so uffäuig het gschminkt.
Viu settigi Hüsli si dür ds Ärdbebä 1906 und düre usglöst Brand leider kaputt gange.
E witteri Sehendwürdigkeit isch ds Pier 39. Früecher e groose Bootshafä isches itze e Vergnüegigsort mit Lädä u Rummuplunder. Gad näbedranne hets e riisigi Seelöiä-kolonie wosech im Winter 89/90 ignischtet hei.
Ds Fishermans Wharf Hafeviertu isch öpis ähnlechs wi z Pier 39 u o Bsuech wärt. Vo dert us gshetme uf ds berüehmte Gfängnis vo San Francisco.
Alcatraz
D Inslä Alcatraz isch ca 2,2 km vom Festland entfernt.
Dr spanisch Forscher Juan Manuel de Ayala isch 1775 id Bucht vo San Francisco gsäglet u het de Inslä woner dert gfunde het Nämä gä. Ursprünglech heter dr Inslä Yerba Buena Island wägem damaus herrschende Überflüss vo de Vögu "Isla de Alcatraces" touft. D Aschlussinsu isch ersch 1826 dürne britische Marinekapitän ufe Name "Alcatrazes Island" u 1851 dür di amerikanischi Küstewach "Alcatraz Island" touft wordä.
Lombard Street
Das isch di 3 kurvigsti Strass vor Wäut.
Di ganzi Lombard Street verlouft vom Presidio bis zum Telegraph Hill quer dür San Francisco. Dr berüemtist Teil aber ligt am Russian Hill.
A dere Steu het d Strass e Gfäu vo 27 Prozänt. 1923 hetme die Strass scho zur Einbahnstrass gmacht, da viu Fuessgänger u Outo zimlech Problem hei gha. Nid witt wäg vo dere Strass ligt d Filbert Strass. Die het sogar es Gfäu vo ungloubleche 31,5 Prozänt u liit a zwöiter Steu. Die Strass heisi aber nid entfernt u dienet no hüt aus Sprungschantzä, unger anderem i zauriche Fiumä. Es wird eim ächt angers a dere Strass! D Lombard Street isch ca 145 Meter läng u besteit us 8 Kurvä. Zeutme die am Afang u am Schluss ono sis 10. Mir hei üs natürlech igreiht u si einisch abegfahrä.
Ds beliebtiste Verchehrsmittu si di sogenannte Cable Cars.
Im Jahr 1873 het dr Andrew Smith Hallidie di erste Kabubahnsystem testet u de o gad i Betreib gno. I de Jahr 1877 bis 1892 si witeri zwöi Linie i Betrieb gno wordä. Bis Hüt wärdesi no immer brucht, uf de Berüehmte Strecke muesme zum Teu stundä astah fürne Fahrt!
San Francisco het de no gad e Baseballspieu gäge Los Angeles gha womer üs nid hei weue entga. Mega viu Lüt, e mega Stimmig u nach däm mir de chli usegfunde hei wi das ganze funktioniert sehr spanned. San Fran het schlussändlech knapp gwunnä was schinbar säute passiert. Schwein gha, Glück bracht?
Vo San Francisco us simer nach knappe eire Wuche womer no 2 Kollegä vo Tinu troffe hei ar sogenannte Oregon Coast Richtig Seattle uchä mitem Ziu Vancouver.
Vancouver Kanada
Vancouver isch di grössti Stadt im Weste vo Kanada. Benennt isch d Stadt nachem britische Kapitän George Vancouver wo ir Region Ändi 18. gforschet het. Dr Namä Vancouver säuber stammt vom hollaändische "van Coevorden" abgleitet vor Stadt Coevorden.
D Stadt isch ide 1860er Jahr aus Foug vor Iwanderigswäue während em Fraser-Canyon-Goudruusch entstande u hetsech nach Eröffnig vor transkontinentale Isebahn im Jahr 1887 innerhaub vo wenige Jahrzänte vore chline Sidlig ine Metropolä verwandlet. Afänglech het d Stadt vor Forstwirtschaft, Bärgbou, Fischerei u Landwirtschaft gläbt. Nach dr Eröffnig vom Panamakanu het dr Hafe in Vancouver a Bedütig zuegno. Hüt ischs dr grösst Hafä überhoupt in Kanada u exportiert meh Güeter aus jede anger Hafä in Nordamerika. Vancouver hetsech nach dr Expo 86 zure richtige Touristedestination entwicklet u isch hinger Los Angeles u New York dr drittwichtigst Standort für di nordamerikanischi Fiumindustrie. "Hollywood north".
Dr Stanly Park isch dr grösst Park in Vancouver. Dr grösst Stadtpark überhoupt in Kanada u dr drittgrösst i ganz Nordamerika. Me het ca 200km Wäg zum loufä u e super Ussicht uf d Stadt.
Gastown isch e historische Stadtteil im Zäntrum vo Vancouver. Ds berüehmtischte Wahrzeichä vo däm Stadtteil isch d Dampfuhr.
E Arbeitskollegin von üs het ihri letschte Tag in Kanada in Port Moody bi Verwandte verbracht. Dert häre heisi üs de für zwöi Nächt igladä. Es guet betuechts Quartier, es riise Huus am Ändi vore Strass voreme Waud. Uf dr angere Sitä diräkte Zuegang zum Meer.
Vo Vancouver us simer zrugg id Staatä nach Seattle. Das isch di grössti Stadt im Nordwestä u isch nachem Noah Sealth, Höiptling vo de Duwamish u Suquamisch, churz Höiptling Seattle benennt. D Stadt treit dr Binamä "die Smaragdstadt" uf Grund vom vilä Grüen im Stadtgebiet u "Rägestadt" obwou dr Niderschlag weniger isch aus i viune angere Stedt in Amerika.
Dr Hafä in Seattle isch e bedütende Handuschnotä füre Handu mit Asiä, Alaska u Hawaii. Di wichtigste asässige Industrie si Luft u Raumfahrt (Boeing) Isä u Stahlinduestrie und d Houzverarbeitig.
Für d Wäutusstellig 1962 hetme öxtra der Turm namens "Space Neddle" bout.
Dr Space Needle isch 184 Meter hoch u dient aus Umsichts u Restaurantturm.
Ds Bouwärk isch ds erste gsi miteme dräibare Restaurant i Nordamerika.
Vo dert obä hetme e super Ussicht uf d Stadt, ufe Hafä u i klarä Tage gsehte sogar bis zum Mount Rainier.
Viu gueti Musiker chöme us Seattle. Zum Bispiu Nirvana, Pear Jam, Alice in Chains u Jimi Hendrix. Es het uffauend viu Strassemusiker ir ganze Stadt u im Public Market.
Dr Pike Place Market isch e festinstallierte Märit mit Gmües, Frücht, Fleisch, Fisch, Blume, Handgmachtä Sachä, Chleider, exotischem Spezieuem, Restaurants, Kaffee usw.
Uf üsere Tour dür d Stadt simer o no uf ds Wasser um di vile Husboot z luege. Unger angerem das usem Fium vo "Schlaflos in Seattle" wo tatsächlech existiert.
