ABU DHABI 2016
Pah, 1. Klass.
Jaja, dr Platz für z Gepäck seu hoch bezahlt si. Quatsch. Sparbilliet u besseri Rändite heisst dr Zouber. Me het auso Bitz meh Platz, aber definitiv o meh Rueh. D Blicke wome so bechunnt mit Reiserucksack isch aber sehr gwahnigsbedürftig.
Erneut si mir vor Gänf us abgfloge. Dismau nach Abu Dhabi.
Churz vorem Ablug (verspätet nach de 22.00) heimer no hurti e Panikmacher verewiget u a üsi Liebe verschickt ;)
Di Vereinigte Arabische Emirat, churz VAE lige ar Küste vom Persischä Gouf, gränzt a Saudi-Arabiä u Oman.
Es besteit us de Emirate:
- Abu Dhabi
- Adschmann
- Dubai
- Fudschaira
- Ra's al-Chaima
- Schardscha
- Umm al-Qaiwain
Abu Dhabi isch nach Dubai di gröschti "Stadt" vo de Emirate.
Lustigerwiis isch Abu Dhabi d Houpstadt vo de VEA. U das für üs lustigerwiis wius üs dünkt het di Stadt isch e reini Bousteu.
Am Morge am 6i simer de z Abu Dhabi glandet u hei üs mau es aständigs Taxi miteme aständige Priis häreghandlet. Föui übermüedet simer im Hotel acho, zersch im lätze u aschliessend no mitem Goufwägeli bim richtigä. 2 Hotel i 1 riisige Komplex cha scho mau aui verwirrä. Es lebe das 24 Stundehotäu wome zu jedere Tages u Nachtzit cha i oder ustscheggä. Somit heimer sofort es Zimmer gha, heinis abeküeut u mau e Rundi Kameurenne gluegt im Fernseh.
So lang heimer de nid Zit gha wiumer no vorem Mittagsliecht zur Moschee hei weue.
D Scheich Zayid Moschee
Die Moschee isch di gröschti i de Vereinigte Arabische Emirat u eini vo de gröschte vor Wäut. Dä sogenannt "Sakralbau" steit ufeme 56 Hektar grosse Grundstück, benennt nachem Zayid bin Sultan Al Nahyan. E Mitbegründer u erscht Presidänt vo de VAE, dessä Grab sich ono gad ufem Gländ befindet. Eröffnet isch di Moschee im Jahr 2007 wordä.
Platz häts für 40.000 Glöibigi. Für Glöibigi, aber o nid Glöibigi wiblechi Bsuecher giut verhüuig. Bättet wird o seperat.
Längi Hosä, länge Puli, nid z ängi Chleider, Haus u Haar verdeckt bi 38-40 Grad. Nach dr stränge Kontroue (Männer u Froue sichtlech trennt) imene sehr provisorisch würckende Zäutli cha me sich ir Tiefgarasch unger dr Mosche e passende sogenannte "Abaya" mit Schleier uslehnä. Ersch denn wirdme definitiv ichegla.
Hübsch, oder?
D Bouchöschtä vo dere ganze Alag gö gschezt gäg di 545 Millionen US-Dollar.
Das ir Wüeschti nid würcklech dr Huufe Boumaterialie het, hetme überau uf dr Wäut ikouft. 15 verschideni Marmorsorte, unger angerem Laaser Marmor us Italie und offesichtlech e huuufe Goud..
A de gsammt 1000 Pfiler ziere Hand-häregäggeleti Bluemä.
Dr Scheich Zayid het ganz klari Vorstellige gha mit däm vile wiise Marmor. D Farb wiiss isch für d Muslime d Farb vom Fridä.
4 Minarett, 107 Meter höch. D Houptkuplä überem Gebätssaau isch 75 Meter höch. Mitem Durchmässer vo 32,2 Meter giutet si aus di gröschti Moscheekuppel vor Wäut.
Ufem 17.000 Quadratmeter grosse Hof hätte witeri 23.000 Lüt platz. Dr Bode isch us Marmor u d Bluememotiv us Haubedustei.
Schuhe aus für i di heilige Hauä..
Da mir bire gfüehrte Tour hei mitgmacht, hei mir i gross, abgsperrt Teu ir grosse Kupple dörfä.
Hübsch
Dr gröscht Teppich vor Wäut.
I ca 18 Monet isch dä Teppich i drü nordoschtiranische Stedt knüpft wordä. I verschidene Teili isch dä mehreri Tonne schwär Teppich in Abu Dhabi igfloge wordä. D Mitti vo däm Teppich isch natürlech o haargenau ir Mitti vor Kupplä usgrichtet.
Steit me a däm Punkt vom Teppich u luegt gredi ufe gseht me dr gröscht Kronleuchter der Welt.
Di Lüchtä isch ca 10 Tonnä schwär, isch öpe 15 Meter höch u ca 10 Millione tüür. A dere Lüchte hange verschide farbigi Swarovski-Steine, äxtra in Europa agfertiget. Da chame eifach nume stuune.
Flüsse von Honig
Für di Glöibige unverzichtbar si di sächseggige Uhrä. Di zeige d Uhrzit füre Sunnufgang, aber o d Uhrzit für di 5 vorgschribene Gebät am Tag a wo sich mitem Sunnestand ständig änderä.
Üs het di füehrig womer übrigens 2 mau gmacht hei sehr guet u informativ dünkt.Me het chönne Frage steue; o kritischi; u so hei mir chli es gspüri übercho für di Iheimische u ihrere Istellig zum Islam,zu dere Moschee u vorauem zum Zayid bin Sultan Al Nahyan.
Dr Zayid bin Sultan Al Nahyan wird dert o "Papa" gnennt. So heimer o ghört, dass är für aui dert d Chöschte übernimmt. Für d Mieti, Läbesmittu, Studiumchöschtä, Gsundheit etc. Am Ändi vom Jahr mues jede ca 20% vo sim Vermöge quasi verstührä, was widerum igsezt wird für d Chöschtä.
D Stadtentwicklig isch bis 2030 fest planet. Di ganzi Stadt seu bis zu 3 Millione Iwohner wachsä. Dämentsprächend het bi üs es riisigs Bousteuäfeeling gherrscht womer si ungerwägs gsi.
O am Flughafe wird i chürzister Zit boue wi blöd. Mitem Bus simer gfüeuti Stunde ufem riise groose Bitz umegfahre u i eis vo de viune Flugzüg igstige.
Bim Abflug heimer de no gad super uf ds Ferarri World abegseh.
Dr sogenannt Themepark mit 20 Atraktionen rund ums schnäue autofahre.
Es het dert e Formula Rossa Achterbahn, e Ralley Parcour usw. Ein Muss für Ferrari-Liebhaber.
Ab nach Mahé..
Eine vo de schlimmste Flüg für d Marina.
Dr Kabinedesinfektionssprays u di mega intensive, arabische Parfümdüft vo de Stuardessä hei ihrem fiine Näsli dr Gong gä und e ganz e wüeschti Übukeit usglöst. Kötzerig auf dem Weg in's Paradies!
